Usakhumbula Yini?

Ubafundze kahle yini bomagazini bakamuva be-Sicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:

• Ngubani Lokufanele Afundzise Bantfwana NgaNkulunkulu?

Nanobe labanye bantfu bangabasita batali kuletinye tintfo, batali ngibo labanemtfwalo loyinhloko wekufundzisa bantfwana babo ngaNkulunkulu kanye nendlela lafuna imindeni iphile ngayo.—10/1, likhasi 7.

• Bekasho kutsini Nkulunkulu nakatjela emaLevi kutsi: “Ngimi lengisabelo sakho”?

Sive ngasinye saka-Israyeli saniketwa live ngenkatho, kodvwa emaLevi aniketwa Jehova ‘njengesabelo sawo.’ (Num. 18:20) Bewangeke atfole live njengelifa lawo, kodvwa aniketwa umsebenti lokhetsekile. Nanobe kunjalo, Jehova wachubeka anakekela tidzingo tawo tenyama. Nalamuhla, labo labanencenye lekhetsekile ekutfutfukiseni tintfo teMbuso, bangaciniseka kutsi tidzingo tabo tekuphila titawunakekelwa.—9/15, emakhasini 7-8, 13.

• Kungani Kufanele Uphatse Loshade Naye Ngenhlonipho?

Inhlonipho iyintfo lebalulekile kute kube nenjabulo kanye nemshado lophumelelako. Inhlonipho iletsa kwenetiseka kanye nekulondzeka emshadweni. Iyimfanelo lokufanele itfutfukiswe.—10/1, likhasi 12.

• Yini lengasita umKhristu ancume kutsi luhlobo lolutsite lwekutijabulisa luyazuzisa yini nobe cha?

Nasihlola kutsi luhlobo lolutsite lwekutijabulisa lutasizuzisa yini luphindze lujabulise Nkulunkulu, kubalulekile kutsi sitibute: Luhlanganisa ini? Ngitatijabulisa nini? Bobani lengitatijabulisa nabo?—10/15, emakhasini 9-12.

• Kufanele Yini Siwubhadale Umtselo?

Ngesikhatsi babuta kutsi ngekwembono waNkulunkulu, kufanele yini babhadale umtselo kuhulumende wemaRoma, Jesu wabaphendvula watsi: “Nikani Khesari kwaKhesari, naNkulunkulu kwaNkulunkulu.” (Mak. 12:13-17) Bohulumende—labamelelwa ‘nguKhesari,’ bakha nobe bashicilele imali futsi bakhulise emandla ayo. Baphindze bentele sive imisebenti letsite. Ngako-ke, ngekwembono waNkulunkulu, banelilungelo lekufuna kutsi sibhadale umtselo.—10/1, emakhasini 14, 15.

• Kulandzisa lokutfolaka encwadzini yeTaga 7:6-23 kungasisita njani kutsi sibalekele kubuka titfombe letingcolile?

Lokulandzisa kusitjela ngelijaha lelahamba esitaladini lebelati kahle kutsi umfati loyingwadla uhlala kuso. Lomfati waliyenga. Nalamuhla, senta kahle kungawabuki emakheli e-Internet lanetitfombe letingcolile, futsi kubalulekile kuthandaza kuNkulunkulu singakangeni ngisho nekungena kuwo.—11/15, emakhasini 9-10.

• Ungayibona Ngani Inkholo Yeliciniso?

EmaKhristu eliciniso ayalihlonipha liBhayibheli njengeliVi laNkulunkulu. Ayalihlonipha nelibito laNkulunkulu lelitsi Jehova, futsi ashumayela ngeMbuso wakhe. Awasiyo incenye yalelive lelibi, futsi anelutsandvo lolukhulu kulomunye nalomunye.—10/1, emakhasini 16, 17.

• Nkulunkulu Utsatsa Sive Sinye Njengalesibaluleke Kakhulu Yini Kunaletinye?

Cha, akusinjalo. Ngobe liBhayibheli lisho ngalokucacile kutsi: “Nkulunkulu akakhetsi libala lemuntfu, kodvwa lowo lomesabako ente lokulungile uyemukeleka kuye, nome angewasiphi sive.”—Imis. 10:34, 35.—10/1, likhasi 26.