Balimemetela Ngesibindzi LiVi LaNkulunkulu!

Kuba nesibindzi nakuvela kuphikiswa. Lena yimfanelo levetwa ngemaKhristu eliciniso, njengobe kuchazwa encwadzini letsi “‘Ukunikeza Ubufakazi Obuphelele’ NgoMbuso KaNkulunkulu,” kanye naletsi “OFakazi BakaJehova—Abamemezeli BoMbuso KaNkulunkulu.” Njengemakholwa angelikhulu lekucala, natsi sithandaza kuJehova kute sitfole umoya wakhe kanye nelusito lwekukhuluma ngelivi lakhe ngesibindzi.—Imis. 4:23-31.

Mayelana nemsebenti wetfu wekushumayela ngesikhatsi semphi yelive yekucala, lomunye umzalwane wabhala watsi: “Tinceku taNkulunkulu betiwusakata ngenkhutsalo umculu wencwadzi letsi “Studies in the Scriptures,” lebeyinesihloko lesitsi “The Finished Mystery.” Kusakatwa kwalencwadzi kwafinyelela linani lelimangalisako. I-“Kingdom News” No. 1 yakhululwa nga-1918. Ngemuva kwaloko, kwakhululwa i-“Kingdom News” No. 2, lebeyichaza sizatfu lesenta bohulumende bavimbela kuhanjiswa kwencwadzi letsi “The Finished Mystery.” Lena yalandzelwa yi-“Kingdom News” No. 3. Letincwadzi betisakatwa sigaba salabagcotjiwe labetsembekile. Kute lesigaba sikwati kusakata lemiculu ye-“Kingdom News,” bekufanele sibe nesibindzi kanye nekukholwa.”

Lamuhla, bamemeteli beMbuso labasandza kucala, bavame kuceceshelwa umsebenti wekushumayela, kodvwa bekungasinjalo esikhatsini lesendlulile. Acabanga ngaloko lokwenteka ngelilanga lekucala asensimini nga-1922, lomunye umzalwane lodzabuka e-Poland kodvwa lohlala eMelika wabhala: “Nanobe benginelwati loluncane endleleni yekuhambisa tincwadzi futsi ngingakwati kukhuluma kahle siNgisi, ngaya ehhovisini ladokotela lotsite ngafike nganconcotsa. Linesi ngilo lelavula umnyango. Angeke ngikukhohlwe loko lokwenteka, phela bengijabulile kodvwa ngesikhatsi lesifananako ngetfukile. Ngesikhatsi ngivula sikhwama sami, tonkhe tincwadzi tawela etinyaweni talonesi. Angisakukhumbuli lengakusho kuye, kodvwa ngamshiyela incwadzi yekufundza. Ngesikhatsi sengihamba, ngaba nesibindzi futsi ngeva nesibusiso saJehova. Ngalelo langa, ngahambisa tincwajana letinyenti esitaladini sasedolobheni.”

Lomunye dzadze watsi: “Cishe nga-1933, bazalwane labanyenti bebasebentisa timoto letinemibhobho kute basakate umlayeto weMbuso.” Ngalelinye lilanga, lodzadze kanye naboFakazi lababili labashadene bebashumayela endzaweni lenetintsaba yase-California, eMelika. Lodzadze utsi: “Lomzalwane lebesihamba naye watsatsa imoto waya etulu entsabeni, futsi tsine sasala edolobheni. Ngesikhatsi lomzalwane acala kudlalisa lomlayeto lotsetjuliwe, bekuvakala shengatsi uchamuka ezulwini. Bantfu labebasedolobheni betama kumtfungatsa lomzalwane, kodvwa behluleka kumtfola. Nasewuphelile lomlayeto lobewudlala, sacoca nebantfu labatsite futsi safakaza kubo. Bengishumayela ngetimoto letimbili letinemibhobho, futsi ngingakucinisekisa kutsi bantfu labanyenti bebangafuni kulalela. Nanobe kunjalo, bebangakhoni kukubalekela ngalokuphelele kulalela leto tinkhulumo, njengobe lomlayeto lobewuvela kuleyo mibhobho bewufika ngisho nasemakhaya abo. Besihlale sibona kutsi Jehova bekabangela kutsi kusetjentiswe indlela lefanele yekushumayela, ngesikhatsi lesifanele. Lendlela, beyifuna kutsi sibe naso sonkhe sibindzi, kodvwa  beyiyifeza njalo injongo yayo, futsi libito laJehova ladvunyiswa.”

Ngabo-1930 kanye nasekucaleni kwabo-1940, bekushunyayelwa ngemagilamafoni kanye nangetinkhulumo letitsetjuliwe letisekelwe eBhayibhelini. Lomunye dzadze uyakhumbula: “Dzadze lotsite losemusha bekashumayela emtini ngemuti asebentisa igilamafoni. Ngemuva kwekutsi acale kuyidlalisa kulomunye umuti, indvodza lengumnikati walelo khaya yatfukutsela kakhulu, futsi yakhahlela legilamafoni yayisusa esitubhini. Nanobe kunjalo, kute nalinye lirekhodi lelaphuka. Njengobe kwenteka loko, bekunemadvodza lamatsatfu labekadlela elolini lebeyipake ngaphandle kwalowo muti futsi akubona loko lokwenteka. Ngako-ke, abita lodzadze futsi amcela kutsi awadlalele lirekhodi, ngemuva kwaloko emukela netincwadzi tekufundza. Loko kwalungisa lokuphatfwa kabi lodzadze lahlangabetana nako.” Kudzingeka sibindzi kute umuntfu akwati kubeketelela lushushiso lolunjalo.

Lodzadze uchubeka atsi: “Ngikhumbula ngesikhatsi kucala kuhanjiswa bomagazini esitaladini nga-1940. Ngembikwekutsi kwenteke loko, bekusetjentiswa indlela yekushumayela ngemabhodi. Kute bente loko, bazalwane kanye nabodzadze bebahamba ngelilayini eceleni kwemgwaco balandzelana, futsi baphatse emabhodi lanesihloko lesitsi ‘Inkholo Ilugibe Kanye Nelibhizinisi Lelingekho Emtsetfweni’ kanye nalesitsi ‘Khonta Nkulunkulu Kanye NaKhristu INkhosi.’ Ngesikhatsi lesifananako, bebaphindze banikete bantfu emapheshana amahhala. Bekudzingeka umuntfu abenesibindzi kute akwati kuhlanganyela kulomsebenti; nanobe kunjalo, bewuyifeza injongo yekulondvolota libito laJehova kanye nelebantfu bakhe.”

Lomunye dzadze utsi: “Kwenta umsebenti wamagazini emadolobheni lamancane bekulukhuni. Loko bekwenteka ngesikhatsi kunekuphikisa lokunyenti lobekumelene naboFakazi. . . . Ngako-ke, bekudzingeka sibindzi kute ukwati kuma ekoneni, ubambe bomagazini futsi usho inshumayelo lebeyisetjentiswa kute bahanjiswe. Nanobe kunjalo, besibakhona cishe yonkhe iMigcibelo. Ngaletinye tikhatsi bantfu bebaba nemusa. Kantsi ngaletinye bekuba nesicumbi sebantfu labatfukutsele lebesifike sime embikwetfu, futsi ngaletinye tikhatsi besivele sisuke kute sibalekele kuphikisana naso.”

Nangetulu kwelushushiso lolwaba khona ngesikhatsi seMphi Yelive II, boFakazi BaJehova bachubeka bashumayela ngesibindzi. Emkhankasweni wemalanga langu-43, lowacala nga-December 1, 1940, waphela nga-January 12, 1941, bamemeteli baseMelika labangaba ngu-50 000 basakata tincwajana leticishe tibe tigidzi letisiphohlongo, futsi lawo malanga bekabitwa ngekutsi Sikhatsi Sekufakaza “Ngesibindzi.”

Bantfu labanyenti lasebakhulile labasenhlanganweni yaNkulunkulu babukhumbula kahle bumatima lobabenta baba nesibindzi. Labanye babo bayakhumbula kutsi cishe iminyaka leminyenti, sibindzi sabo besibonakala ngekutsi basho sicubulo lesitsi: Jikisa imphi esangweni! Kwanyalo, asati kutsi nguyiphi indlela yekushumayela lesitayisebentisa ngembikwekutsi kuphele lelive lelibi. Nanobe kunjalo, ngelusito loluvela kuNkulunkulu, sitawuchubeka simemetela livi laKhe ngekukholwa kanye nangesibindzi.

[Emavi lacashuniwe lasekhasini 9]

Kuba nesibindzi bekusolo kudzingeka kute kufezwe umsebenti wekushumayela ngeMbuso