Lokuvela Emtatjeni Wetfu

‘Beyenta Kutsi Banginake’

Ngesikhatsi Charlotte White, losikhonti sasikhatsi sonkhe efika e-Louisville, Kentucky, eMelika, afuca liputumende lelinemasondvo, bantfu labanyenti bamangala.

Bekungumnyaka wa-1908,ngesikhatsi Dzadze White amangalisa bantfu bakulelodolobha ngeliputumende lakhe lelisha lelinemasondvo, lelibitwa ngekutsi yi-Dawn-Mobile. Uyachaza: “Leliputumende belenta kutsi bantfu banginake baphindze batibute imibuto leminyenti.”

Bafundzi beliBhayibheli, nyalo lababitwa ngekutsi boFakazi BaJehova, babona kunesidzingo lesikhulu sekucocela labanye emaciniso labawatfole ngekufundza imiBhalo ngekutimisela. Labanye kubo batfole emaciniso eliBhayibheli ngelusito lweluchungechunge lwetincwadzi letinesihloko lesitsi “Millennial Dawn” (ngekuhamba kwesikhatsi leyaphindze yabitwa ngekutsi yi-“Studies in the Scripture”). LamaKhristu bewatimisele futsi bewaya etindzaweni letikhashane naletibanti—emadolobheni, emitini kanye nasemaphandleni, aniketa bantfu tincwadzi “Letisita Bafundzi BeliBhayibheli.”

Nga-1908, Dzadze White kanye nalabanye bamemeteli beMbuso labanenshisekelo bahambisa imiculu lesitfupha lehlangene, ngema-dollar aseMelika langu-$1.65 [R12.00]. Kunekutsi banikete umuntfu letincwadzi te-“Dawn” ngaso leso sikhatsi, bebabhala phansi ema-oda bese baphindze babuya—imvamisa bebaletsa tincwadzi nasekuphele inyanga kute batewutfola iminikelo yato, lebeyisita etindlekweni tekushicilela. Lomunye umphikisi wakhonona ngemnikelo lomncane bantfu labebawukhipha nabaniketwa letincwadzi.

Malinda Keefer, ukhumbula lilanga latfola ngalo ema-oda etincwadzi letingemakhulu lamatsatfu ngeliviki. Inshisekelo lebeyivetwa ngalencwadzi letsi “Dawn,” beyiletsa bumatima. Phela imiculu lesitfupha  lehlangene beyinemakhasi langu-740. Sicongosekulindza sangaleso sikhatsi satsi: “Tincwadzi letingemashumi lasihlanu betinesisindvo lesingemakhilogremu langu-18, ngako bekuba matima kakhulu kutihambisa, ikakhulukati kubodzadze.”

Kute acatulule lenkinga, uMzalwane James Cole, wakha incola yensimbi legocwako futsi lenemasondvo lamabili, kuyo bekungafakwa liputumende. Njengobe bekungasadzingeki kutsi batfwale emabhokisi lasindzako lagcwele tincwadzi, umakhi wayo watsi: “Angisawephuli emahlombe ami.” Wetfula lelithulusi lelisha emhlanganweni weBafundzi beliBhayibheli wa-1908, lowaba e-Cincinnati, e-Ohio. Ekinobhweni ngalinye lelisekugcineni kwensimbi, bekubhalwe ligama lelitsi “Dawn-Mobile,” ngobe ekhatsi eputumendeni bekunemiculu ye-“Millennial Dawn.” Ngemuva kwekuceceshelwa indlela yekusebentisa lencola, besekumelula kuhambisa liputumende leligcwele tincwadzi, futsi loko bekungentiwa ngumuntfu loyedvwa. Budze balencola bebunganciphiseka, futsi emasondvo ayo bekangahamba njengemasondvo eloli lahamba endzaweni lelubhucu. Ngemuva kwekushumayela, lamasondvo lentiwe ngerabha, bewungawagocota kute ukwati kubamba sibambo seliputumende nase lite lutfo.

Bodzadze labatikhonti tasikhatsi sonkhe bebaniketwa i-Dawn-Mobile mahhala. Nanobe kunjalo, beyitsengwa ngema-dollar aseMelika langu-$2.50 [lokungu-R18.00]. Dzadze Keefer, lovetwe kulesitfombe, bekayisebentisa kahle kakhulu i-Dawn-Mobile ngobe bekayifuca ngesandla sinye incola letfwele liputumende leligcwele tincwadzi, bese kutsi kulesi lesinye sandla aphatse sikhwama lesinetincwadzi. Kute ahambise tincwadzi kubantfu labanenshisekelo labahlala edolobheni lelinemayini, lelise-Pennsylvania, eMelika, bekufanele atilandze katsatfu nobe kane tincwadzi awela libhuloho.

Ngasekupheleni kwabo-1980, lomunye umshayeli wetindiza wakha sikhwama sekufaka timphahla lesisetjetiswako etikhumulweni tetindiza nobe emigwacweni yase dolobheni. Nobe kunjalo, eminyakeni lengaba likhulu leyendlulile, Bafundzi beliBhayibheli labanenshisekelo bebakujabulela kubukwa bantfu labamangele ngesikhatsi bafuca ema-Dawn-Mobiles abo nabaya nobe babuya kuyewusakata imbewu leligugu yeliciniso leBhayibheli.

[Emavi lahambisana nesitfombe ekhasini 32]

Dzadze Keefer bekavame kuhamba tikhatsi letintsatfu nobe letine awela libhuloho ngelilanga lekuhambisa tincwadzi

[Emavi lahambisana nesitfombe ekhasini 32]

Lencola yasita ekucatululeni inkinga yekuhambisa lencwadzi lokutsiwa yi-Dawn