Nathani—Ummeleli Locotfo Wekukhonta Lokuhlantekile

Kuyintfo lelukhuni kutjela umuntfu lonesikhundla lesikhulu kutsi wenta tintfo letimbi lokudzingeka atilungise. Bewungaya yini kumuntfu lonjalo kube bewati kutsi ubulele umuntfu kute atisindzise yena?

INkhosi Davide yaka-Israyeli wasendvulo yaphinga naBhatisheba, futsi ngemuva kwaloko Bhatisheba wakhulelwa. Kute afihle lesono sabo, Davide wabulala indvodza yaBhatisheba wase ushada naye. Kwendlula tinyanga letitsite Davide aphila kuphila lokumphacambili, futsi akungabateki kutsi bekachubeka enta imisebenti yakhe yasebukhosini. Nanobe kunjalo, Jehova akazange asitsalalisele sono salenkhosi. Watfumela umphrofethi wakhe Nathani kutsi aye kuDavide.

Lesi bekusabelo lesimatima. Asewuticabange unguNathani. Akungabateki kutsi kuba cotfo kuJehova kanye nekulalela timiso takhe ngiko lokwenta Nathani wakhumbuta Davide ngesono sakhe. Lomphrofethi bekatawukwenta njani loku futsi bekatayitjela njani iNkhosi Davide kutsi bekudzingeka iphendvuke?

UMFUNDZISI LONELIKHONO

Kungani ungasebentisi imizuzu lembalwa ufundze 2 Samuweli 12:1-25? Ticabange unguNathani njengobe acocela Davide lendzaba: “Edolobheni lelitsite kwakunemadvodza lamabili, lenye yayinjingile, kantsi lena lenye yona yayiphuyile. Lena leyayinjingile yayinemihlambi lemikhulu yetimvu netinkhomo, kodvwa lena lephuyile yayingenalutfo ngaphandle kwelizinyane linye lelisikati leyayilitsengile. Yalikhulisa, lakhula kanye nebantfwabayo. Yayilondla ngisho nangekudla kwayo, ilinatsise nemanti endzebeni yayo, yayize iligone lilale emikhonweni yayo. Lalifanana  nendvodzakati yayo kuyo. Ngalelinye lilanga kwefika sihambi kulena lenjingile, kodvwa lenjinga yala kutsatsa lenye yetimvu tayo nome etinkhomeni tayo itewulungisa kudla kwalesihambi lesasiyifikele. Esikhundleni saloko yatsatsa lelizinyane lemvu lelisikati lelalilalendvodza lephuyile, yalungisela lesivakashi lesasifike lapha kayo.”—2 Sam. 12:1-4.

Njengobe Davide bekake waba ngumelusi, kufanele kutsi bekacabanga kutsi lendzaba beyenteke mbamba. Lomunye umhlatiyi utsi: “Kungenteka kutsi Nathani beketayele kuya kuDavide amtjele ngebantfu labebaphatfwa kabi kodvwa bangavetelwa kulunga, futsi kungenteka kutsi Davide bekacabanga kutsi nguloko labekakutele nangaleso sikhatsi.” Ngisho nobe kungenteka kutsi bekunjalo, kwadzingeka kutsi Nathani abe cotfo kuNkulunkulu futsi abe nesibindzi kute akwati kukhuluma nenkhosi ngalendlela. Lendzaba leyacocwa nguNathani yamtfukutselisa Davide. Watsi: “Ngifunga kuphila kwaSimakadze, ngitsi, lomuntfu lowente intfo lenjena kufanele afe nekufa!” Ngemuva kwaloko, Nathani washo nankha emavi lacinile: “Lowo muntfu nguwe, nkhosi!”—2 Sam. 12:5-7.

Cabanga ngekutsi kungani Nathani acatulula lendzaba ngaleyondlela. Phela akusimelula kutsi umuntfu losondzelene nalotsite ngekwemivelo akwati kucatulula indzaba ngendlela lefanele. Sonkhe sivame kubeka taba nangabe sente intfo letsite. Nanobe kunjalo, umfanekiso waNathani wenta Davide wasola tento takhe ngaphandle kwekucaphela. Lenkhosi yakubona ngalokucacile kutsi kutiphatsa lobekuchazwa nguNathani bekukubi kakhulu. Nanobe kunjalo, Nathani wembula kutsi lomfanekiso bewusebenta kulenkhosi ngemuva kwekutsi Davide atilahle yena ngekwakhe. Kwenta njalo, bekutawusita ekutseni Davide atibonele yena bukhulu besono sakhe. Loko kwamenta waba nesimo sengcondvo lesikahle kute emukele siyalo. Wavuma kutsi ‘bekamedzelele’ Jehova ngaloko lakwenta naBhatisheba, futsi wavuma nekutsi bekufanele ajeziswe ngaloko.—2 Sam. 12:9-14; Hla. 51, umbhalo longenhla.

Yini lesingayifundza kuloku? Umgomo wemfundzisi weliBhayibheli kusita tilaleli takhe kutsi tifinyelele esiphetfweni lesifanele. Ngesizatfu sekutsi Nathani bekamhlonipha Davide, wakhuluma naye kahle. Nathani bekati kutsi Davide bekakutsandza kulunga. Ngalomfanekiso wakhe, lomphrofethi wativusa letimfanelo taDavide letinhle. Natsi singabasita bantfu labacotfo kutsi bawucondze umbono waJehova ngetintfo. Singakwenta njani loko? Ngekutsintsa imiva yabo lemayelana naloko lokulungile, futsi loko kufanele sikwente ngaphandle kwekubenta bacabange kutsi tsine sincono kunabo nobe sivutsiwe. LiBhayibheli ngilo lokufanele lisitjele kutsi yini lelungile kanye nalengakalungi, akusiyo imibono yetfu.

Ngetulu kwako konkhe, kuba cotfo kuNkulunkulu kwasita Nathani kutsi akwati kweluleka inkhosi lenemandla. (2 Sam. 12:1) Kwetsembeka lokufananako kutasiniketa sibindzi kute sitimelele ngalokucinile timiso taJehova tekulunga.

WATFUTFUKISA KUKHONTA LOKUHLANTEKILE

Kubonakala shengatsi boNathani kanye naDavide bebabe bangani sikhatsi lesidze, ngobe Davide wadzimate wetsa lomunye webantfwana bakhe ngekutsi ;nguNathani. (1 Khr. 3:1, 5) Sikhatsi sekucala lapho kukhulunywa khona ngaNathani eBhayibhelini, usuke anaDavide. Bobabili bebamtsandza Jehova. Kusebaleni nekutsi lenkhosi beyiyetsemba imibono yaNathani, ngobe yatjela lomphrofethi sifiso sayo sekwakhela Jehova lithempeli. Naku leyakusho: “‘Buka la, mine ngihleti kahle esigodlweni lesakhiwe ngemisedari, kodvwa libhokisi lesivumelwane saNkulunkulu lihleti ethendeni.’ Nathani wayiphendvula inkhosi, watsi: ‘Loko lonako engcondvweni yakho, chubeka ukwente, ngobe Simakadze unawe.’”—2 Sam. 7:2, 3.

Njengobe Nathani bekasikhonti saJehova lesetsembekile, walisekela ngekutimisela lisu laDavide lekwakha lithempeli lekucala lekukhonta kweliciniso emhlabeni. Nanobe kunjalo, ngaleso sikhatsi Nathani bekaveta imibono yakhe ngalendzaba, hhayi yaJehova. Ngalobo busuku, Nkulunkulu wayala lomphrofethi wakhe kutsi amikise umlayeto lowehlukile enkhosini, wekutsi: Davide bekangeke alakhe lithempeli laJehova. Umuntfu lobekatalakha bekutawuba ngulenye yemadvodzana aDavide. Nanobe kunjalo, Nathani wamemetela kutsi Nkulunkulu bekenta sivumelwane naDavide sekutsi sihlalo sakhe sebukhosi ‘besitawuhlala sisimile phakadze naphakadze.’—2 Sam. 7:4-16.

Endzabeni yekwakhiwa kwelithempeli, intsandvo yaNkulunkulu beyishayisana nembono waNathani. Kodvwa kunekutsi lomphrofethi lotfobekile akhonone, wasekela injongo yaJehova futsi wenta ngekuvumelana nayo. Lesi sibonelo lesihle kakhulu lokufanele sisilingise nangabe Nkulunkulu asiyala endzabeni  letsite. Kuchubeka kwaNathani akhonta njengemphrofethi kuveta kutsi akazange alahlekelwe ngumusa waNkulunkulu. Kunaloko, Jehova waphefumulela Nathani kanye naGadi umboniswa kutsi bacondzise Davide nakahlela bantfu labangu-4 000 labebatawuhlabela ethempelini.—1 Khr. 23:1-5; 2 Khr. 29:25.

UMMELELI WEBUKHOSI

Nathani bekati kutsi nguSolomoni lobekatawubusa emva kwenkhosi leseyikhulile, Davide. Ngako-ke, Nathani watsatsa sinyatselo ngekushesha ngesikhatsi Adoniya afuna kusitsatsa ngenkhani sihlalo sebukhosi saDavide lobekasagugile. Nakuloku, Nathani waphindze waveta likhono kanye nekuba cotfo. Kwekucala, wancenga Bhatisheba kutsi akhumbute Davide ngesifungo labekasentile sekwenta indvodzana yabo Solomoni inkhosi. Ngemuva kwaloko, Nathani waya enkhosini wafike wayibuta kutsi ngiyo yini lebeyivumele Adoniya kutsi abuse emva kwayo. Icaphela kubaluleka kwalendzaba, lenkhosi lebeseyikhulile yayala Nathani kanye naletinye tinceku tayo letetsembekile kutsi bagcobe Solomoni futsi bamente inkhosi. Licebo la-Adoniya lekutenta inkhosi alizange liphumelele.—1 Khos. 1:5-53.

SATI SEMLANDVO LESITFOBEKILE

Bantfu labanyenti bayavuma kutsi nguNathani kanye naGadi lababhala incwadzi ya-1 Samuweli tehluko 25 kuya ku-31 kanye nayo yonkhe incwadzi ya-2 Samuweli. Mayelana nemlandvo lophefumulelwe lobhalwe kuleto tincwadzi, kutsiwa: “Imininingwane ngekubusa kwaDavide, kusukela ekucaleni kuze kube ngusekugcineni, kubhaliwe emlandvweni waSamuweli, umboniswa, nasemlandvweni waNathani, umphrofethi, kanye nasemlandvweni waGadi, umboniswa.” (1 Khr. 29:29) LiBhayibheli liphindze litsi Nathani wabhala kulandzisa lokumayelana ‘nemininingwane yekubusa kwaSolomoni.’ (2 Khr. 9:29) Kufanele kutsi loku kusho kutsi Nathani wachubeka anesandla etindzabeni tasebukhosini ngisho nangemuva kwekufa kwaDavide.

Lokunyenti lesikwatiko ngaNathani kungenteka kutsi kwabhalwa nguye ngekwakhe. Nanobe kunjalo, kungatisho kwakhe letinye tindzaba kusitjela lokunyenti ngaye. Kusebaleni kutsi Nathani bekasati semlandvo lesitfobekile. Besite umgomo wekutakhela ludvumo. Lesinye sichazamagama seliBhayibheli sitsi nakukhulunywa ngaye eBhayibhelini, “aketfulwa futsi akushiwo lutfo ngemndeni wakhe.” Kute lesikwatiko ngemvelaphi yaNathani nobe indlela labephila ngayo.

WAKHUTSATWA KUBACOTFO KUJEHOVA

Kuloko lokuncane lesikufundzako ngaNathani emiBhalweni, kuyacaca kutsi bekatfobekile kodvwa awamelela ngekutimisela emalungiselelo aJehova. Nkulunkulu Jehova wamniketa imitfwalo lemikhulu. Ngako-ke, zindla ngetimfanelo taNathani letifanana nekuba cotfo kwakhe kuNkulunkulu kanye nekutitsatsa njengaletibalulekile timiso taJehova. Yetama kulingisa timfanelo letinjalo.

Kungase kungadzingeki kutsi uyale inkhosi lephingile nobe uvimbe licebo lemuntfu lotsite lofuna kuba yinkhosi. Nanobe kunjalo, ngelusito lwaNkulunkulu ungaba cotfo kuye futsi usekele timiso takhe tekulunga. Ungaphindze ube ngumfundzisi lonesibindzi kanye nalonelikhono, futsi ungatfutfukisa kukhonta lokuhlantekile.

[Sitfombe ekhasini 25]

Njengemmeleli webukhosi, Nathani wakhuluma naBhatisheba ngelikhono