Umkhuba Longalimata Tingcondvo Tetfu—Umona

Napoleon Bonaparte bekanemona. Na-Julius Caesar bekanawo. Kantsi na-Alexander Lomkhulu bekanawo. Nangetulu kwemandla kanye neludvumo labebanalo, lamadvodza bekafukamele etinhlitiyweni tawo umkhuba lobewungawalimata engcondvweni. Omatsatfu lamadvodza adlela bantfu labatsite umona.

Bertrand Russell, losati sefilosofi lesingumNgisi, wabhala: “Napoleon bekamdlela umona Caesar, Caesar yena bekadlela Alexander [Lomkhulu] umona, kantsi Alexander, lobekanesibindzi, bekadlela Hercules umona, lobekungumuntfu longakake waphila.” Umona ungahlasela nobe ngabe ngubani, ngisho nobe anjinge kangakanani, anesikhundla lesikhulu futsi aphumelela ekuphileni.

Umona usho kutfukutselela labanye bantfu ngesizatfu setintfo labanato, kuphumelela kwabo, tintfo labakwati kutenta kanye nalokunye. Nayiveta umehluko lokhona emkhatsini wemona kanye nesikhwele, incwadzi lesekelwe eBhayibhelini itsi: “‘Sikhwele’ . . . sisho kuba nesifiso sekufanana nalabanye, kantsi ligama lelitsi ‘umona’ lisho sifiso sekumuka labanye loko labanako.” Umuntfu lonemona, akagcini ngekubafela umona labanye, kodvwa uphindze afune kutsatsa loko labanako.

Senta kahle ngekuhlola indlela umona longakhula ngayo kitsi kanye nemiphumela lesingayitfola ngekuba nawo. Kubalulekile kutsi sati tinyatselo lesingatitsatsa kute sibalekele kutsi umona ulawule timphilo tetfu.

UMOYA LONGABHEBHETELISA UMONA

Nanobe bantfu labanesono “banemkhuba wekuba nemona,” tici letehlukehlukene tingawakha futsi tiwente ucine lomkhuba. (Jak. 4:5, NW.) Achaza lesinye sato, umphostoli Pawula wabhala: “Asingafuni ludvumo lolulite, [sibhebhetelise kuncintisana, NW], futsi singabi nemona lomunye kulomunye.” (Gal. 5:26) Umoya wekuncintisana ungawandzisa kakhulu umkhuba wekuba nemona. EmaKhristu lamabili emabito awo lokungu-Cristina kanye na-José a, akubona kuliciniso loku.

Cristina, lolihlahlandlela lelivamile, utsi: “Ngivame kutitfola ngibadlela umona labanye bantfu. Ngicatsanisa loko labanako naloko mine lengite kona.” Ngalelinye lilanga, Cristina bekadla nemzalwane kanye nadzadze wakakhe labajikeletako. Njengobe bekabona kutsi lomjikeleti kanye nemkakhe bebalingana naye kanye nendvodza yakhe, Eric, futsi bebake baba netabelo letifananako esikhatsini lesendlulile, watsi: “Umyeni wami naye ungulomdzala welibandla. Kungani-ke nine nenta umsebenti wekujikeleta, tsine sibe singawenti?” Lelilangabi lemona, lebelibhebheteliswa ngumoya wekuncintisana, lenta lodzadze wangawucapheli umsebenti lomuhle lobewentiwa nguye kanye nemyeni wakhe, futsi loko kwamenta wanganetiseki ekuphileni.

José, bekanesifiso sekuba yinceku lesebentako ebandleni. Ngesikhatsi angabekwa kutsi abe ngiyo kodvwa labanye babekwa, waba nemona futsi  watfukutselela umchumanisi wesigungu salabadzala. José, uyavuma: “Umona wangenta ngamtondza lomzalwane futsi ngasola tisusa takhe. Nangabe umona sewulawula imphilo yakho, awubi nandzaba nalabanye bantfu, futsi awucabangi kahle.”

LOKO TIBONELO LETISEBHAYIBHELINI LETISIFUNDZISA KONA

LiBhayibheli linetibonelo letinyenti letisecwayiso. (1 Khor. 10:11) Letinye tato atigcini nje ngekuveta indlela umona longakheka ngayo, kodvwa tiphindze tivete nendlela longabalimata ngayo labo labawuvumelako kutsi ubancobe.

Nasi sibonelo: Khayini, indvodzana ya-Adamu na-Eva lelitubulo, waphatseka kabi ngesikhatsi Jehova emukela umnikelo wa-Abela kodvwa wangawemukeli wakhe. Khayini bekangasilungisa lesimo, kodvwa wancotjwa ngumona wadzimate wabulala umnakabo. (Gen. 4:4-8) Kungako liBhayibheli litsi Khayini bekavela ‘kulomubi,’ longuSathane.—1 Joh. 3:12.

BomnakaboJosefa labalishumi baba nemona ngesizatfu sebuhlobo lobuhle Josefa labekanabo nababe wabo. Umona wabo wakhula kakhulu ngesikhatsi Josefa abacocela ngemaphupho akhe lasiphrofetho. Bebafuna ngisho nekumbulala. Ekugcineni, bamtsengisa njengesigcili futsi ngebucili benta babe wabo wakholwa kutsi Josefa bekafile. (Gen. 37:4-11, 23-28, 31-33) Ngekuhamba kwesikhatsi, basivuma sono sabo, futsi batsi kulomunye nalomunye: “Ase nibheke-ke manje sesiyavuna ngalobubi lesabenta kumnaketfu Josefa. Satsi sesikubona kukhatsateka kwemphefumulo wakhe, nasincenga, satsalalisa sangete samlalela.”—Gen. 42:21; 50:15-19.

Endzabeni yaKhora, Dathani kanye na-Abiramu, umona wakhula ngesikhatsi bacala kucatsanisa imisebenti yabo kanye naleyo beyentiwa nguMosi na-Aroni. Basola Mosi ngekutsi ‘bekalibala kubabusa,’ kanye nekutsi bekatenta lomkhulu kunalabanye. (Num. 16:13) Lokumangalelwa bekungemanga laluhlata. (Num. 11:14, 15) Jehova nguye lobekabeke Mosi kuleso sikhundla. Nanobe kunjalo, labantfu labebatihlubuki bebanemona ngesikhundla saMosi. Ekugcineni, umona wabaholela ekubhujisweni nguJehova.—Hla. 106:16, 17.

INkhosi Solomoni yatibonela ngewayo umphumela wekuba nemona. Umfati lobekaneluswane lobelusandza kufa, wetama kuyenga lomunye umfati kute amente acabange kutsi bekuluswane lwakhe lolu lolufile. Ngesikhatsi kutsetfwa lelicala, lomfati lobekacala emanga watsi akubulawe lomntfwana lophilako. Nanobe kunjalo, Solomoni wakwati kuncuma kutsi lomntfwana aniketwe make wakhe sibili.—1 Khos. 3:16-27.

Umona ungaba nemiphumela lebuhlungu. Tibonelo letisemiBhalweni lesisandza kucoca ngato tiveta kutsi ungaholela enzondweni, ekungalungini kanye nesekubulaleni. Ngetulu kwaloko, kuko konkhe lokulandzisa, bantfu labebadlelwa umona bebasuke bangakenti lutfo. Kukhona yini lesingakwenta kute siciniseke kutsi umona awukulawuli kuphila kwetfu? Ngutiphi tinyatselo lesingatitsatsa kute sincobe umona?

TINDLELA TEKUWUNCOBA!

Bani nelutsandvo lwebuzalwane. Umphostoli Phetro wayala emaKhristu: “Njengobe senihlambulule  imiphefumulo yenu ngekulalela liciniso [ngemoya] kuze nitsandze bazalwane benu ngelutsandvo lolute kutentisa, tsandzanani ngenhlitiyo lephelele.” (1 Phet. 1:22) Luyini lutsandvo? Umphostoli Pawula wabhala: “Lutsandvo luyabeketela, lutsandvo lumnene, lute umona, lutsandvo alutigabatisi, futsi alutikhukhumeti. Lutsandvo alutiphatsi ngalokungakafaneli, alutifuneli kwalo.” (1 Khor. 13:4, 5) Kwakha lutsandvo lolunjalo ngalabanye bantfu angeke yini kusente singabi nawo umona? (1 Phet. 2:1) Kunekutsi adlele Davide umona, Jonathani “wamtsandza njengobe atitsandza yena.”—1 Sam. 18:1.

Tihlanganise nebantfu labahlonipha Nkulunkulu. Umbhali weTihlabelelo 73 wabadlela umona bantfu lababi labebajabulela kuphila lokute tinkinga futsi lokuntofontofo. Nanobe kunjalo, wawuncoba umona wakhe ngekutsi aye “endlini lengcwele yaNkulunkulu.” (Hla. 73:3-5, 17) Kutihlanganisa nalamanye emakholwa kwasita lomhlabeli kutsi acaphele tibusiso labekatitfola ‘ngekusondzela kuNkulunkulu.’ (Hla. 73:28) Kuhlangana njalo nemakholwa lesikanye nawo emihlanganweni yebuKhristu kungenta lokufananako nakitsi.

Funa ematfuba ekwenta lokuhle. Ngemuva kwekucaphela kutsi umona kanye nenzondo bese kucala kwakheka enhlitiyweni yaKhayini, Nkulunkulu watsi kuye: “Phendvukela ekwenteni [lokuhle].” (Gen. 4:7) Kusho kutsini ngemaKhristu ‘kwenta lokuhle’? Jesu watsi ‘siboyitsandza iNkhosi, Nkulunkulu wetfu, ngayo yonkhe inhlitiyo yetfu, nangawo wonkhe umphefumulo wetfu, nangayo yonkhe ingcondvo yetfu, futsi kufanele sitsandze bomakhelwane betfu, njengobe sititsandza tsine.’ (Mat. 22:37-39) Kwenetiseka lesikutfola ngekukhonta Jehova kanye nekusita labanye, kuyindlela yekuncoba umona. Kuhlanganyela ngalokugcwele emsebentini wekushumayela ngeMbuso kanye newekwenta bafundzi, kuyindlela lencono kakhulu yekukhonta Nkulunkulu nabomakhelwane betfu, futsi isiletsela ‘sibusiso saJehova.’—Taga 10:22.

‘Jabula nalabajabulako.’ (Rom. 12:15) Jesu wajabula ngekuphumelela kwebafundzi bakhe, futsi washo nekutsi bebatawufeza umsebenti wekushumayela lomkhulu kwendlula lowo lobewufezwe nguye. (Luk. 10:17, 21; Joh. 14:12) Ngesizatfu sekutsi sinebunye njengetinceku taJehova, kuphumelela kwalomunye wetfu kusuke kusibusiso kitsi sonkhe. (1 Khor. 12:25, 26) Ngako-ke, akukafaneli yini sijabule lapho labanye batfola imitfwalo lemikhulu kunekutsi sibe nemona?

LENA AKUSIYO IMPHI LEMELULA!

Imphi yekulwa nemona ingatsatsa sikhatsi lesidze. Cristina uyavuma: “Ngisenawo umkhumba wekuba nemona. Nanobe ngikutondza kuba nawo, kodvwa usekhona futsi kufanele ngihlale ngilwisana nawo.” José naye bekalwisana nentfo lefananako. Utsi: “Jehova ungisitile kutsi ngicaphele timfanelo letinhle temchumanisi wesigungu salabadzala. Buhlobo lobuhle naNkulunkulu ngibo lobubaluleke kakhulu.”

Umona uyincenye ‘yemisebenti yenyama,’ futsi onkhe emaKhristu kufanele alwisane nawo. (Gal. 5:19-21) Ngekungavumeli umona kutsi usilawule, singenta kuphila kwetfu kujabulise kakhulu futsi singajabulisa naBabe wetfu wasezulwini, Jehova.

[Umbhalo longentansi]

[Emavi lahambisana nesitfombe ekhasini 17]

‘Jabula nalabajabulako’