Bani Nembono Lomuhle Ngemshado Lonetinkinga

“Kepha labashadile ngiyabayala, kungesimi kodvwa kuyiNkhosi.”—1 KHOR. 7:10.

UNGACHAZA?

Nkulunkulu ubahlanganisa ngamuphi umcondvo balingani bemshado ndzawonye?

Labadzala belibandla bangawasita njani emaKhristu lanetinkinga emshadweni?

Kufanele siwutsatse njani umshado?

1. EmaKhristu awutsatsa njani umshado, futsi kungani?

 NGALESIKHATSI emaKhristu ashada, enta sifungo embikwaNkulunkulu—leso sifungo akukamelwe asitsatse kalula. (Shu. 5:4-6) NguJehova ‘lobahlanganisako,’ ngesizatfu sekutsi unguMsunguli wemshado. (Mak. 10:9) Nobe ngabe ngumiphi imitsetfo lesuke ivumele loyo mshado, Nkulunkulu usitsatsa njengalesibalulekile leso sibopho. Tinceku taJehova kufanele titsatse umshado njengelilungiselelo lelitihlanganisa ndzawonye nanobe tashada tingemaKhristu nobe tingesiwo.

2. Ngumiphi imibuto lesitawucoca ngayo kulesihloko?

² Umshado lophumelelako ungajabulisa kakhulu. Kodvwa-ke, yini lengentiwa nangabe bantfu labashadene banetinkinga? Umshado lonjalo ungakwati yini kuphindze ube sesimeni lesihle? Nguluphi lusito lolwentelwe labo labanetinkinga emshadweni wabo?

UTAWULETSA INJABULO YINI NOBE LUSIZI?

3, 4. Yini lengase yenteke nangabe umuntfu enta sincumo lesingakahlakaniphi nakakhetsa umlingani wemshado?

³ Nangabe umshado wemaKhristu uphumelela, loko kuletsa injabulo neludvumo kuJehova. Nangabe ungaphumeleli, uletsa lusizi lolukhulu. UmKhristu longakashadi lofuna kushada, usetfubeni lelihle lekucalisa umshado ngendlela lephumelelako ngekutsi alandzele ticondziso taNkulunkulu. Ngakulolunye luhlangotsi, umuntfu lowenta sincumo lesingakahlakaniphi nakakhetsa indvodza nobe umfati, loko kungamenta angenetiseki futsi eve buhlungu lobukhulu. Sibonelo saloku kutsi labanye labasebasha bacala kutsandzana basengakayilungeli imitfwalo lehambisana nemshado. Labanye batfola balingani bemshado ku-Internet, futsi loko kuphumela emshadweni longajabulisi. Kantsi labanye benta sono lesikhulu ngalesikhatsi basatsandzana futsi bagcine sebashadene, kodvwa bangase bacale  imphilo yabo emshadweni bangahloniphani.

⁴ Lamanye emaKhristu awashadi ‘entsandvweni yeNkhosi’ futsi loko kuphumela ebuhlungwini bekuba semndenini lowehlukene ngekwenkholo. (1 Khor. 7:39) Nangabe loko kwenteka kuwe, thandaza kuNkulunkulu ucele intsetselelo nelusito lwakhe. Akayisusi imiphumela yetono lotentile esikhatsini lesendlulile, kodvwa uyabasita labo labaphendvukile kutsi babeketelele leto tinkinga. (Hla. 130:1-4) Chubeka ulwela kumjabulisa nyalo ngisho nasesikhatsini lesitako, futsi ‘injabulo yakho levela kuSimakadze itawuba ngemandla akho.’—Neh. 8:10.

NANGABE UMSHADO USENGOTINI

5. Ngalokumayelana nemshado longajabuli, ngukuphi kucabanga lokufanele sikugweme?

⁵ Labo labanetinkinga emshadweni wabo, bangase batibute: ‘Sikhona yini sidzingo sekutsi ngiwulondvolote umshado wami lonetinkinga? Kube bengingamane ngicalele phansi bengingatitfolela lomunye umuntfu lengitawushada naye.’ Bangase babe nesifiso sekwehlukana nebantfu labashade nabo—‘Kute ngiphindze ngikhululeke, kungani ngingadivosi? Ngisho nobe singekho sizatfu lesisemBhalweni lesingivumela kutsi ngidivose, kungani singehlukani futsi ngiphindze ngijabulele kuphila ngingedvwa?’ Kunekutsi acabange ngaleyondlela nobe atisole, emaKhristu lakuleso simo kufanele afune sicondziso saNkulunkulu futsi asisebentise.

6. Chaza loko lokwashiwo nguJesu kuMatewu 19:9.

⁶ Nangabe umKhristu adivosa, imiBhalo kungenteka imvumele nobe ingamvumeli kutsi aphindze ashade. Jesu watsi: “Wonkhe umuntfu lodivosa umkakhe ngaphandle kwanakaphingile, bese ushada lomunye umfati, uyaphinga.” (Mat. 19:9) Lapha ligama lelitsi ‘kuphinga’ lifaka ekhatsi naletinye tono letinkhulu letihlobene nekuya ecasini. Nangabe umlingani wetfu wemshado angakatiphatsi kabi ngekwelicasi, kubalulekile kutsi sithandaze ngalokujulile nasifikelwa ngumcabango wekumdivosa.

7. Labo lababukele bangase bacabangeni nangabe umshado wemKhristu ungaphumeleli?

⁷ Umshado longaphumeleli ungaletsa kungabata ngebuhlobo balabo bantfu naJehova. Umphostoli Pawula wabuta nangu umbuto lobalulekile: “Nangabe indvodza yehluleka kuphatsa umuti wayo, pho, ingaliphatsa kanjani libandla laNkulunkulu?” (1 Thim. 3:5) Nangabe bantfu labashadene batibita ngekutsi bangemaKhristu kodvwa umshado wabo ungaphumeleli, labo lababukele bangase bacabange kutsi labo bantfu abakwenti loko labakushumayelako.—Rom. 2:21-24.

8. Yini lokungenteka ayihambi kahle nangabe emaKhristu lashadene ancuma kwehlukana?

 ⁸ Nangabe bantfu lababhajatisiwe labashadene bacabanga kuhlala ngekwehlukana nobe kudivosa ngaphandle kwetizatfu letisekelwe emibhalweni, kusuke kukhona lokungahambi kahle ebuhlotjeni babo naJehova. Kusenekwenteka munye wabo nobe bobabili abatisebentisi timiso temBhalo. Nangabe ‘bebetsemba Simakadze ngayo yonkhe inhlitiyo yabo,’ kute nalesincane sizatfu lebesingabenta bakholelwe kutsi umshado wabo ngeke uphumelele.—Fundza Taga 3:5, 6.

9. Lamanye emaKhristu abusiswe njani ngemetamo yawo yekubeketela emshadweni?

⁹ Imishado leminyenti lebeyibonakala ingaphumeleli, ngekuhamba kwesikhatsi iyashintja iphumelele kakhulu. EmaKhristu labeketelela umshado lonetinkinga ngalokuvamile ajabulela imivuzo lemihle. Cabanga ngaloko lokungase kwenteke emndenini lowehlukene ngekwenkholo. Umphostoli Phetro wabhala: “Nani bafati, tfobelani emadvodza enu, kuze kutsi nakukhona emadvodza langalikholwa livi, nawo azuzeke ngaphandle kwenkhulumo, azuzwe yintfobeko yebafati bawo, nakabona similo senu lesimsulwa lesinekwesaba Nkulunkulu.” (1 Phet. 3:1, 2) Kuliciniso kutsi ngekutiphatsa lokuhle kwemlingani wakhe, umuntfu longakholwa angakwemukela kukholwa kweliciniso. Imishado lenjalo iletsa ludvumo kuNkulunkulu futsi ingaletsela indvodza, nemfati kanye nebantfwana tibusiso.

10, 11. Ngutiphi tinkinga letingakalindzeleki letingase tivele emshadweni, kodvwa yini umKhristu langaciniseka ngayo?

¹⁰ Ngesizatfu sekutsi afisa kujabulisa Jehova, emaKhristu lamanyenti langakashadi akhetsa balingani bemshado labangemaKhristu. Nanobe kunjalo, ngaletinye tikhatsi kuvela timo letingakalindzeleki. Nasi sibonelo: Umlingani wemshado angase abe nenkinga lenkhulu ngekwemivelo. Ngemuva kwemshado, lomunye wabo angaba ngummemeteli lopholile. Ase sifananise: Linda, a make longumKhristu lokhutsele nalotinikele, inhlitiyo yakhe yadzabuka ngalesikhatsi indvodza yakhe lebhajatisiwe ingaphendvuki etindleleni tayo letiphambene nemiBhalo futsi isuswa ekuhlanganyeleni. Yini umKhristu lokufanele ayente nangabe umshado wakhe ubonakala usengotini yekubhidlika ngesizatfu saloku?

¹¹ Ungase utibute: ‘Kufanele yini ngichubeke ngetama kulondvolota umshado wami nobe ngabe kwentekani?’ Kute umuntfu lokufanele akwentele sincumo kulendzaba. Nanobe kunjalo, tikhona tizatfu letivakalako tekulondvolota umshado lobonakala ubhidlika. Indvodza nobe umfati lobeketelela tilingo temshado lonetinkinga ngesizatfu sanembeza, uligugu kuNkulunkulu. (Fundza 1 Phetro 2:19, 20.) NgeliVi nangemoya wakhe, Jehova utamsita umKhristu lowenta imetamo lecotfo yekulondvolota umshado lobhidlikako.

BAKULUNGELE KUSITA

12. Labadzala batasitsatsa njani nangabe sifuna lusito kubo?

¹² Nangabe unetinkinga emshadweni, ungangabati kufuna lusito kumaKhristu lavutsiwe. Labadzala babelusi bemhlambi futsi batakujabulela kusiniketa seluleko lesitfolakala emiBhalweni lephefumulelwe. (Imis. 20:28; Jak. 5:14, 15) Ningaphetsi ngekutsi labadzala angeke basanihlonipha nangabe nifuna lusito futsi nibatjela  tinkinga letinkhulu leninato emshadweni wenu. Lutsandvo lwabo ngani lutawukhula njengobe babona sifiso senu lesicotfo sekujabulisa Nkulunkulu.

13. Ngusiphi seluleko lesitfolakala ku-1 Khorinte 7:10-16?

¹³ Nabacelwa ngemaKhristu lasemindenini leyehlukene ngekwenkholo kutsi bawasite, labadzala basebentisa seluleko lesashiwo nguPawula lesitsi: “Kepha labashadile ngiyabayala, kungesimi kodvwa kuyiNkhosi, kutsi umfati angehlukani nendvodza yakhe. Kepha nangabe ehlukana nayo, akahlale angendzi, nome-ke abuyisane nendvodza yakhe; nendvodza ingamlahli umfati wayo. . . . Wena mfati, wati ngani kutsi utayisindzisa indvodza yakho? Wena ndvodza, wati ngani kutsi utamsindzisa umkakho?” (1 Khor. 7:10-16) Kusibusiso lesikhulu kutsi umlingani longakholwa ete ekukhonteni kweliciniso.

14, 15. Kungaphansi kwatiphi timo lapho umKhristu angakhetsa kuhlala ngekwehlukana naloyo lashade naye, kodvwa kungani kuthandaza kanye nekucabangasisa ngalendzaba kubalulekile?

¹⁴ Kungaphansi kwatiphi timo lapho umfati longumKhristu angase ahlale ‘ngekwehlukana’ nendvodza yakhe? Labanye bakhetse kuhlala ngekwehlukana ngesizatfu sekutsi umlingani wemshado akafuni kondla ngemabomu. Kantsi labanye bakhetse kwenta njalo ngesizatfu sekutsi bayahlukunyetwa nobe buhlobo babo naJehova busengotini.

¹⁵ Kukhetsa kuchubeka uhlala naloyo loshade naye nobe kwehlukana naye, sincumo semuntfu ngamunye. Nanobe kunjalo, umlingani wemshado longumKhristu kufanele athandaze ngalendzaba futsi acabangisise ngayo. Nasi sibonelo: Ngulomlingani longakholwa yini lobangele kutsi buhlobo bakho naJehova bube sengotini, nobe loko kubangelwe kutsi bewungalifundzi njalo liBhayibheli, ungayi njalo emihlanganweni yelibandla kanye nasensimini?

16. Yini lokufanele ivimbele emaKhristu ekwenteni tincumo tekudivosa angakacabangisisi?

¹⁶ Kutsatsa buhlobo betfu naNkulunkulu njengalobuligugu kanye nekujabulela sipho sakhe semshado, kufanele kusente sikugweme kutsatsa tincumo letimayelana nekudivosa singakacabangisisi. Njengetinceku taJehova sinendzaba nekungcweliswa kwelibito lakhe. Ngako-ke, akukafaneli sente emachinga ekwehlukana nemuntfu lesishade naye ngobe sifuna kushada nalomunye.—Jer. 17:9; Mal. 2:13-16.

17. Kungashiwo ngaphansi kwatiphi timo kutsi emaKhristu lashadile Nkulunkulu uwabitele kutsi abe nekuthula?

¹⁷ UmKhristu loshade nemuntfu longakholwa kufanele atimisele kulondvolota umshado wakhe. Nanobe kunjalo, akukafaneli ative anelicala nangabe ngetulu kwemetamo yakhe yekulondvolota umshado wabo loyo lashade naye longakholwa  afuna behlukane. Pawula wabhala: “Nangabe longakholwa afuna kwehlukana naye, akehlukane naye. Umzalwane nome-ke umzalwanekati ukhululekile kulokunjalo. Nkulunkulu unibitele kutsi nibe nekuthula.”—1 Khor. 7:15. b

TSEMBA JEHOVA

18. Ngisho nobe ungeke ukwati kulondvolota umshado wakho, ngumiphi imiphumela lemihle lengatfolakala ngekwenta imetamo yekuwulondvolota?

¹⁸ Nawubhekene nanobe ngutiphi tinkinga emshadweni wakho, cela Jehova akuphe sibindzi futsi uhlale wetsembele kuye. (Fundza Tihlabelelo 27:14.) Cabanga ngaLinda lokukhulunywe ngaye ekucaleni. Nanobe acitse iminyaka leminyenti etama kulondvolota umshado wakhe, wagcine adivosile. Uyatisola yini ngekutsi wacitsa sikhatsi sakhe etama kuwulungisa? Utsi: “Angitisoli nakancane. Imetamo yami inikete bufakazi lobuhle kubantfu lababukele. Nginanembeza lohlantekile. Lokuhle kakhulu kutsi leyo minyaka yasita indvodzakati yetfu kutsi icine emacinisweni. Yakhula yaba nguFakazi waJehova lotinikele nalokhutsele.”

19. Yini lengase yenteke nangabe kwentiwe imetamo yekulondvolota umshado?

¹⁹ Lomunye wesifazane longumKhristu libito lakhe lokunguMarilyn, uyajabula ngekutsi wetsembela kuNkulunkulu futsi wenta imetamo yekulondvolota umshado wakhe. Utsi: “Ngike ngalingeka kutsi ngihlukane nemyeni wami ngesizatfu sekutsi bekangangondli futsi nebuhlobo bami naJehova bebusengotini. Umyeni wami abengulomdzala welibandla ngembikwekutsi acale libhizinisi lebelimdlela sikhatsi. Lelo bhizinisi belimenta angasakhoni kuya emihlanganweni njalo futsi singasabi nesikhatsi sekucoca. Kuhlasela kwetiphekula sikhuni kwangitfusa kangangekutsi ngancuma kungasamkhulumisi. Loko kwangenta ngabona kutsi nami ngineliphutsa. Sacala kukhulumisana, savuselela kukhonta kwemndeni futsi saba khona njalo nasemihlanganweni yelibandla. Labadzala bebanemusa futsi balusito lolukhulu kitsi. Umshado wetfu wavuseleleka. Ngekuhamba kwesikhatsi indvodza yami yaphindze yawatfola emalungelo ebandleni. Kwaba sifundvo lesibuhlungu lesaba nemiphumela lejabulisako.”

20, 21. Mayelana nemshado, yini lokufanele sitimisele kuyenta?

²⁰ Nobe ngabe sishadile nobe asikashadi, shengatsi sonkhe singaba nesibindzi futsi setsembele kuJehova. Nasihlangabetana netinkinga emshadweni, kufanele sitimisele kufuna sisombululo, sikhumbule kutsi labo labashadile “abasebabili, kodvwa sebamunye.” (Mat. 19:6) Asikhumbule kutsi nangabe silondvolota umshado wetfu lowehlukene ngekwenkholo ngisho nangetulu kwetinkinga, singamzuza umlingani longakholwa angene ekukhonteni kweliciniso.

²¹ Nobe ngabe sikutiphi timo, shengatsi singenta ngendlela letawuniketa bufakazi lobuhle kubantfu labangasiwo emaKhristu. Nangabe umshado wetfu unetinkinga, kufanele sithandaze ngebucotfo, sihlolisise tisusa tetfu ngekwetsembeka, sicabangele imiBhalo ngekucophelela siphindze sifune lusito kulabadzala. Ngetulu kwako konkhe, shengatsi singatimisela kujabulisa Nkulunkulu Jehova kuto tonkhe tintfo futsi sikhombise kutsi siyasijabulela sipho sakhe lesihle semshado.

[Imibhalo lengentansi]

[Imibuto Yesihloko Lesifundvwako]

[Emavi lacashuniwe lasekhasini 10]

EmaKhristu labeketelela umshado lonetinkinga ngalokuvamile ajabulela umvuzo lomuhle

[Emavi lacashuniwe lasekhasini 12]

Tsembela kuJehova njalo futsi umcele akuphe sibindzi

[Sitfombe ekhasini 9]

Jehova uyababusisa balingani bemshado labenta imetamo yekulondvolota imishado lebhidlikako

[Sitfombe ekhasini 11]

Libandla lebuKhristu lingaba ngumtfombo wendvudvuto nelusito ebuhlotjeni betfu naJehova