“Caphelani Imvubelo YebaFarisi”

Jesu wecwayisa bafundzi bakhe watsi: “Caphelani imvubelo yebaFarisi yekutentisa.” (Luk. 12:1) Kulandzisa lokufanana nemavi aJesu kukwenta kucace kutsi abetilahla “timfundziso” tebaFarisi.—Mat. 16:12.

Ngalesinye sikhatsi liBhayibheli lisebentisa ligama lelitsi “imvubelo” nobe imbiliso, kute lifanekise kungetsembeki. Kusebaleni-ke kutsi timfundziso nesimo sengcondvo sebaFarisi bekwenta kutsi tilaleli tabo tingetsembeki. Kungani timfundziso tebaFarisi betiyingoti?

1 BaFarisi bebatigcabha batsi bona balungile futsi bebababukela phasi labanye bantfu.

Kulomunye umfanekiso waJesu siyabonakala lesimo sabo sekutibona balungile. Watsi: “UmFarisi wakhwesha wema yedvwa wathandaza watsi: ‘Ngiyakubonga, Nkulunkulu, kutsi mine angifanani nalabanye bantfu labatigebengu, nalabangakalungi, netiphingi, nanjengalomtselisi. Ngizila kudla emalanga lamabili ngeliviki ngikunika kwelishumi kwako konkhe lengikwemukelako.’ Kodvwa umtselisi eme khashane akazange abhekise ngisho nebuso bakhe ezulwini, kepha ngekutisola wathandaza watsi: ‘Nkulunkulu, ngihawukele mine soni!’”—Luk. 18:11-13.

Jesu wasincoma simo sekutitfoba salomtselisi nakatsi: “Nginitjela kutsi lendvodza lengumtselisi yabuyela ekhaya seyemukelwe nguNkulunkulu kutsi ilungile kunalona lomunye, ngobe phela wonkhe umuntfu lotiphakamisako, uyawutfotjiswa, wonkhe lotitfobako, uyawuphakanyiswa.” (Luk. 18:14) Nanobe batselisi bebatiwa ngekungetsembeki, Jesu abefuna kubasita labanye babo labebamlalela. Bebakhona batselisi lababili lababa balandzeli bakhe, boMatewu naZakewu.

Kutsiwani-ke nangabe siticabanga kutsi sincono kunalabanye ngesizatfu semakhono nemalungelo lesiwanikwa nguNkulunkulu nobe ngekwehluleka kanye nebutsakatsaka balabanye? Kufanele sisheshe siyisuse imicabango lenjalo, ngobe imiBhalo itsi: “Lutsandvo luyabeketela, lutsandvo lumnene, lute umona, lutsandvo alutigabatisi, futsi alutikhukhumeti. Lutsandvo alutiphatsi ngalokungakafaneli, alutifuneli kwalo, alucansuki, alunamagcubu, alukujabuleli lokubi, kodvwa lujabulela liciniso.”—1 Khor. 13:4-6.

Kufanele sibe nesimo sengcondvo lesifanana nesemphostoli Pawula. Ngemuva kwekuba atsite “Khristu Jesu weta emhlabeni kutawusindzisa toni,” wachubeka watsi: ‘Mine ngingulesikhulu kunato tonkhe.’—1 Thim. 1:15.

Imibuto yekuzindla:

Ngiyavuma yini kutsi ngisoni nekutsi ngingasindziswa ngemusa waJehova? Nobe ngitsatsa iminyaka yami leminyenti yekukhonta ngekwetsembeka, emalungelo lenginawo enhlanganweni yaNkulunkulu, nobe emakhono ami njengaloko lokungenta ngibe ncono kunalabanye?

  2 BaFarisi bebafuna kujabulisa bantfu ngekubukisa ngekutsi bona balungile. Bebafuna kudvunyiswa babitwe nangeticu letitsite.

Jesu wecwayisa watsi: “Konkhe labakwentako kwekutiveta kubantfu. Ngobe la etinhloko tabo sebandzise emabhande lanetikhehle temabhokisana letinemavesi emiBhalo, bese belula timvakaza temijiva yabo. Batsandza tindzawo letingenhla emadzilini, netitulo letisembili emasinagogeni, batsandza nekubingelelwa ngenhlonipho etimakethe, bantfu bababite ngekutsi ‘Mfundisi!’” (Mat. 23:5-7) Ase ubone kutsi simo sabo sengcondvo sasehluke njani kunesaJesu. Ngisho nobe abeyiNdvodzana yaNkulunkulu lete sono, abetfobekile. Ngesikhatsi lenye indvodza itsi ‘ulungile,’ Jesu yena watsi: “Ungibitelani ngekutsi ngilungile? Kute lolungile, nguNkulunkulu kuphela.” (Mak. 10:18) Ngalesinye sikhatsi, Jesu wageza tinyawo tebafundzi bakhe, ngaloko ababekela sibonelo sekutitfoba.—Joh. 13:1-15.

UmKhristu weliciniso kufanele akhonte labanye lakholwa nabo. (Gal. 5:13) Loko kumcoka kakhulu kulabo labafisa kufaneleka kuba babonisi ebandleni. Kuhle kutsi ‘ufise umsebenti wekuba ngumbonisi,’ kodvwa loko kufanele ukwente kute usite labanye. ‘Lomsebenti’ awusiso sikhundla nobe ligunya. Labo labababonisi kufanele ‘batfobeke ngenhlitiyo,’ njengobe naJesu abenjalo.—1 Thim. 3:1, 6; Mat. 11:29.

Imibuto yekuzindla:

Ngivame kubabona bancono yini labo labaniketwe imisebenti letsite ebandleni, mhlawumbe nginelitsemba lekutsi batanginaka nobe banginikete emalungelo langetiwe? Ngivame kunaka kakhulu imisebenti yekukhonta Nkulunkulu letangenta ngibonwe nobe ngidvunyiswe yini? Ngetama kutenta loncono yini kulabanye?

  3 Imitsetfo nemasiko ebaFarisi beyenta kutsi kugcina uMtsetfo kube matima kubantfu.

UMtsetfo waMosi bewuchaza indlela ema-Israyeli lobekufanele amkhonte ngayo Jehova. Nobe kunjalo, bewungatibali tintfo letincane kakhulu. Sibonelo saloku kutsi uMtsetfo bewungakuvumeli kusebenta ngeliSabatha, kodvwa-ke bewungachazi yonkhe imisebenti lebekufanele yentiwe nobe ingentiwa. (Eks. 20:10) BaFarisi bona bebetama kuchaza leto tintfo ngemitsetfo nangemasiko abo. Nanobe Jesu abengayinaki lemitsetfo yebaFarisi, abewugcina uMtsetfo waMosi. (Mat. 5:17, 18; 23:23) Jesu abebona ngale kweMtsetfo. Abewucondza kahle umgomo wemtsetfo futsi wasibona nesidzingo sekuba nemusa nebubele. Bekabacabangela balandzeli bakhe ngisho nangesikhatsi behluleka kwenta lakushoko. Sibonelo saloku kutsi ngisho nobe akhutsata baphostoli bakhe labatsatfu kutsi bahlale baphapheme futsi balindzile ngebusuku laboshwa ngabo, kodvwa bekabatfola balele. Ngisho nobe kunjalo, wakhombisa kubavela nakatsi: “Umoya uyavuma, kodvwa inyama ibutsakatsaka.”—Mak. 14:34-42.

Imibuto yekuzindla:

Ngiyetama yini kungayinaki imibono yami, nobe ngiyenta ibe ngumtsetfo? Nginako yini kubonelela kuloko lengikulindzele kulabanye?

Ase ucabange ngemehluko lokhona emkhatsini wetimfundziso taJesu netebaFarisi. Uyatibona yini tindlela longatfutfukisa ngato? Nangabe kunjalo, kungani ungatimiseli kutfutfukisa?

[Sitfombe ekhasini 28]

BaFarisi bebafaka tikhehle temabhokisana letinemavesi emiBhalo.—Mat. 23:2, 5

[Titfombe ekhasini 29]

Labadzala labangemaKhristu bayabakhonta labanye futsi abafanani nebaFarisi labatiphakamisako

[Sitfombe ekhasini 30]

NjengaJesu, unako yini kubonelela kuloko lokulindzele kulabanye?