Imibuto Levela Kubafundzi

‘Kuligugu njani emehlweni aSimakadze’ kufa kwalabacotfo bakhe?

▪ Umhlabeli lophefumulelwe wahlabela watsi: ‘Kuligugu emehlweni aSimakadze kufa kwalabacotfo bakhe.’ (Hla. 116:15) Kuphila kwemuntfu lokhonta Jehova ngeliciniso kubalulekile kuYe. Nanobe kunjalo, emavi lacashunwe kuTihlabelelo 116 awakhulumeli kufa kwemuntfu ngamunye.

Nakubekwa inkhulumo yemngcwabo wemKhristu, akukafaneli kusetjentiswe Tihlabelelo 116:15 nakukhulunywa ngalona lofile, ngisho nobe afe ayinceku yaJehova lecotfo. Kungani? Kungobe lamavi alomhlabeli anenchazelo leyenabile. Asho kutsi kufa kwebantfu baNkulunkulu njengelicembu kubita kakhulu kuye kutsi angakuvumela kwenteke.—Fundza Tihlabelelo 72:14; 116:8.

Tihlabelelo 116:15 tisicinisekisa ngekutsi Jehova angeke avumele kutsi tinceku takhe leticotfo tibulawe tonkhe. Ecinisweni, umlandvo wetfu walamuhla ukhombisa kukhutsatela kwetfu nasilingwa futsi sishushiswa. Ngaleyondlela, buyabonakala bufakazi bekutsi Nkulunkulu angeke avumele kutsi siphele.

Ngesizatfu sekutsi Jehova unemandla langapheli futsi unenjongo letawugcwaliseka, angeke avumele kutsi sonkhe sife siphele. Nangabe Nkulunkulu bekangakuvumela loko, bekungabonakala shengatsi titsa takhe tinemandla kunaye—intfo lengeke yenteke. Angeke futsi kwenteke kutsi injongo yaJehova yekutsi bantfu bahlale emhlabeni ingasagcwaliseki. (Isa. 45:18; 55:10, 11) Nangabe sekute bantfu emhlabeni, kute lotawube asakhonta Jehova enta umsebenti longcwele. Kute nebantfu labangabese bakha ‘umhlaba lomusha,’ lokusho bantfu labaphila emhlabeni lababuswa ‘ngemazulu lamasha.’ (Semb. 21:1) Ngisho nekubusa kwaKhristu kweMinyaka Leyinkhulungwane angeke kube khona nangabe kute bantfu emhlabeni.—Semb. 20:4, 5.

Sikhundla saNkulunkulu besingeke sisasetsemba nabekangavumela titsa takhe tibabulale bonkhe bantfu bakhe emhlabeni. Loko bekungasilimata sikhundla saJehova sekuba nguMbusi Wendzawo Yonkhe. Ngetulu kwaloko, ngesizatfu sekutsi Jehova uyatihlonipha yena kanye nelibito lakhe lelingcwele, angeke avumele kutsi bantfu bakhe labacotfo bafe bonkhe. Cabanga futsi nangaloku: Njengobe Nkulunkulu ‘angakwenti lokubi,’ angeke ehluleke kuvikela bantfu bakhe labebasolo bamkhonta ngekwetsembeka. (Dut. 32:4; Gen. 18:25) Ngetulu kwaloko, kuvumela kutsi tinceku takhe tiphele bekungaphambana neliVi lakhe, lelitsi: “Ngenca yelibito lakhe lelikhulu Simakadze angeke asilahle sive sakhe.” (1 Sam. 12:22) Kuliciniso kutsi “Simakadze angeke asilahle sive sakhe, angeke alishiye lifa lakhe.”—Hla. 94:14.

Kuyadvudvuta kwati kutsi bantfu baJehova angeke baphele emhlabeni. Ngako-ke, asente konkhe lokusemandleni etfu kutsi sihlale sicotfo kuNkulunkulu simetsembe nakatsi: “Kute sikhali lesilolelwa kulwa nawe lesiyawuphumelela, uyakuyicitsa yonkhe inkhulumo lekubeka licala. Leli lifa letinceku taSimakadze, loku ngukona kutivikela kwami.”—Isa. 54:17.

[Emavi lacashuniwe lasekhasini 22]

Nkulunkulu angeke avumele bantfu bakhe babulawe baphele