Kuyabonakala Yini Kukhatimula KwaJehova Kuwe?

“Inkhatimulo yeNkhosi ibonakala kitsi njengasesibukweni.”—2 KHOR. 3:18.

UNGAPHENDVULA NJANI?

Ngisho nobe sinesono, singamdvumisa njani Jehova?

Imithandazo yetfu nekuba khona emihlanganweni yebuKhristu kusisita njani kutsi sivete inkhatimulo yaNkulunkulu?

Yini lengasisita kutsi sichubeke sidvumisa Jehova?

1, 2. Kungani kunengcondvo kulindzela kutsi singabulingisa buntfu baJehova?

 SONKHE sifute batali betfu ngetindlela letehlukene. Kungako nje sivame kuva umuntfu atsi kumfana, ‘Ufute uyihlo,’ nome entfombataneni batsi, ‘Ungikhumbuta make wakho.’ Bantfwana bavame kulingisa labakubona kwentiwa batali babo. Tsine-ke? Singamlingisa yini Babe wetfu losezulwini Jehova? Ngisho nobe singakaze sambona, singabati buntfu bakhe ngekudadisha liVi lakhe, kubuka indalo yakhe nangekuzindla ngemiBhalo ikakhulukati emavi netento teNdvodzana yakhe lenguJesu Khristu. (Joh. 1:18; Rom. 1:20) Singakhona kuveta inkhatimulo yaJehova.

² Ngembikwekutsi bo-Adamu na-Eva badalwe, Nkulunkulu bekati kutsi bantfu bangakhona kwenta intsandvo yakhe, bavete buntfu bakhe futsi bamdvumise. (Fundza Genesisi 1:26, 27.) Njengobe sitinikela ekukhonteni Nkulunkulu, kufanele sivete buntfu baLona lowasidala. Nangabe senta njalo, siba nelilungelo lekuveta inkhatimulo yaNkulunkulu ngisho nome sibaluphi luhlanga, sinemfundvo lengakanani nobe sibakuyiphi indzawo. Kungani kunjalo? Kungobe “Nkulunkulu akakhetsi libala lemuntfu, kodvwa lowo lomesabako ente lokulungile uyemukeleka kuye.”—Imis. 10:34, 35.

3. EmaKhristu angativa njani njengobe akhonta Jehova?

³ EmaKhristu lagcotjiwe ayayiveta inkhatimulo yaJehova. Umphostoli Pawula lobekaphefumulelwe wabhala: “Sonkhe lesibuka ngebuso lobembuliwe, inkhatimulo yeNkhosi ibonakala kitsi njengasesibukweni, sibe siguculwa sibe njengaye ngekusuka ezingeni lelitsite lenkhatimulo siye kulelinye lizinga.” (2 Khor. 3:18) Ngesikhatsi umphrofethi Mosi ehla eNtsabeni iSinayi aphetse tibhelekece lebetineMitsetfo  leLishumi, buso bakhe bebukhatimula ngobe Jehova abekhulume naye. (Eks. 34:29, 30) Nanobe emaKhristu angakabi sesimeni lesinjalo nebuso bawo bungakhatimuli, agcwala injabulo nakatjela labanye ngaJehova, ngebuntfu bakhe nangenjongo yakhe lenhle ngebantfu. Njengetibuko lebetipholishwa kahle letatisetjentiswa endvulo, labagcotjiwe nebangani babo basemhlabeni bayayiveta inkhatimulo yaNkulunkulu ekuphileni kwabo nasemsebentini wekushumayela. (2 Khor. 4:1) Uyayiveta yini inkhatimulo yaJehova ngekutiphatsa kwakho nangemsebenti lowentako njengemmemeteli weMbuso?

SIFISA KUYENTA IBONAKALE INKHATIMULO YAJEHOVA

4, 5. (a) NjengaPawula, nguyiphi inkinga lesikuyo? (b) Sono sisitsintse njani?

⁴ Njengetinceku taJehova, sifisa kumdvumisa uMdali wetfu kuko konkhe lesikwentako. Nobe kunjalo, etikhatsini letinyenti loko lesifisa kukwenta asikhoni kukwenta. Pawula naye watikhandza asenkingeni lefanako. (Fundza Roma 7:21-25.) Nakachaza kutsi kungani sikuleyo nkinga, Pawula watsi: “Bonkhe bantfu bonile, bakhashane kakhulu nenkhatimulo yaNkulunkulu.” (Rom. 3:23) Ngesono sa-Adamu, bantfu batfola lifa lekubuswa sono.—Rom. 5:12; 6:12.

⁵ Siyini sono? Singunome yini lephambene nebuntfu baJehova, tindlela takhe, timiso takhe kanye nentsandvo yakhe. Sono siyabulimata buhlobo bemuntfu naNkulunkulu. Sono sisibangela kutsi sigeje luphawu, njengobe nje nemuntfu lodubula ngebutjoki angakugeja loko lakudubulako. Singona ngemabomu nobe ngesiphosiso. (Num. 15:27-31) Sono singene sajula kubantfu futsi siyabehlukanisa neMdali wabo. (Hla. 51:5; Isa. 59:2; Khol. 1:21) Ngako-ke, bantfu behlukanisiwe naJehova futsi balahlekelwe litfuba lelihle lekuveta inkhatimulo yaNkulunkulu. Kuyacaca-ke kutsi sono sikukhubateka lokuhamba embili lokuphetse bonkhe bantfu.

6. Ngisho nobe sinesono, singayiveta njani inkhatimulo yaNkulunkulu?

⁶ Nobe sinesono, Jehova uba ‘nguNkulunkulu, longumtfombo welitsemba.’ (Rom. 15:13) Ulungiselele indlela yekusicedza sono ngemhlatjelo loyinhlawulo waJesu Khristu. Ngekuba nekukholwa kulowo mhlatjelo, ‘asisagcilatwa sono,’ kodvwa sesiyakhona kuveta inkhatimulo yaJehova. (Rom. 5:19; 6:6; Joh. 3:16) Kulondvolota lobuhlobo naNkulunkulu kusiniketa siciniseko sekubusiswa nguJehova nyalo, siphindze sitfole kuphila lokute sono nalokuphakadze. Ngisho nobe sibantfu labenta emaphutsa, kusibusiso kutsi Nkulunkulu usitsatsa njengebantfu labangakhona kuveta inkhatimulo yakhe.

KUVETA INKATIMULO YANKULUNKULU

7. Yini lokudzingeka kutsi siyivume kute sikhone kuveta inkhatimulo yaNkulunkulu?

⁷ Kute sikhone kuveta inkhatimulo yaNkulunkulu, kudzingeka sivume kutsi sinesono. (2 Khr. 6:36) Kudzingeka sikwemukele kutsi kumelula ngatsi kwenta sono. Ngako-ke, kute sitfutfuke ekudvumiseni Nkulunkulu kufanele silwisane nesono. Sibonelo saloku kutsi nangabe sesingenwe ngumkhuba wekubuka tintfombe letikhombisa kungcola, kudzingeka sivume kutsi siyaludzinga lusito lwalabadzala futsi silufune. (Jak. 5:14, 15) Lesi kungaba sinyatselo sekucala lesingasitsatsa kute siphile ngendlela ledvumisa Nkulunkulu. Njengetikhonti taJehova, kufanele sihlale sitihlola kute sibone kutsi sisenta ngekuvumelana netimiso takhe tekulunga yini. (Taga 28:18; 1 Khor. 10:12) Ngisho nome sinasiphi sifiso sesono, kufanele sichubeke silwisana naso kute sivete inkhatimulo yaNkulunkulu.

8. Ngisho nobe sinesono, yini lokufanele siyente?

 ⁸ Jesu abekuphela kwemuntfu lowaphila ajabulisa Nkulunkulu ngalokuphelele futsi aveta inkhatimulo yaKhe waze wafa. Tsine asifanani naJesu ngobe sinesono. Kodvwa singakhona kulandzela sibonelo sakhe futsi kufanele setame kwenta njalo. (1 Phet. 2:21) Jehova ubuka imetamo lesiyentako nentfutfuko yetfu, bese uyayibusisa leyo metamo yekumdvumisa.

9. LiBhayibheli linayiphi indzima ekuphileni kwemaKhristu lafisa kwenta loko lokufunwa nguNkulunkulu?

⁹ LiVi laJehova lingasikhanyisela indlela lokufanele sente ngayo kute sitfutfuke. Kutadisha imiBhalo ngalokujulile nekuzindla nasifundza liBhayibheli, kubalulekile. (Hla. 1:1-3) Kufundza imiBhalo onkhe emalanga kutasisita kutsi sitfutfuke. (Fundza Jakobe 1:22-25.) Kukholwa kwetfu kusekelwe elwatini lweBhayibheli futsi lololwati lusenta sitimisele kubalekela sono futsi sijabulise Jehova.—Hla. 119:11, 47, 48.

10. Umthandazo ungasisita njani kutsi sikhonte Jehova kakhudlwana?

¹⁰ Kute sivete inkhatimulo yaNkulunkulu, kudzingeka ‘sicinisele njalo emthandazweni.’ (Rom. 12:12) Kufanele sithandazele kutsi Jehova asisite sikhone kumkhonta ngendlela layemukelako. Singamcela kutsi asiphe umoya longcwele, akhulise kukholwa kwetfu, asiphe emandla ekulwisana netilingo kanye newelikhono ‘lekuphakela kahle livi leliciniso.’ (2 Thim. 2:15; Mat. 6:13; Luk. 11:13; 17:5) Natsi sidzinga kwetsembela kuBabe wetfu wasezulwini, Jehova, njengobe nje nemntfwana etsembela kubabe wakhe. Nangabe simcela kutsi asisite kute simkhonte kakhudlwana, singaciniseka kutsi utasisita. Shengatsi singete sacabanga kutsi siyamhlupha. Esikhundleni saloko, emithandazweni yetfu kufanele simdvumise, simbonge, sicele sicondziso sakhe ikakhulukati nasishushiswa, simcele nekutsi asisite simkhonte ngendlela letawudvumisa libito lakhe lelingcwele.—Hla. 86:12; Jak. 1:5-7.

11. Imihlangano yelibandla isisita njani kutsi sikhone kuveta inkhatimulo yaNkulunkulu?

¹¹ Nkulunkulu unikete ‘sisebenti lesetsembekile nalesihlakaniphile’ umsebenti wekunakekela timvu takhe letiligugu. (Mat. 24:45-47; Hla. 100:3) Lesisebenti sinendzaba nendlela lamanye emakholwa laveta ngayo inkhatimulo yaJehova. Indlela lesibukeka ngayo njengemaKhristu iyalungiswa emihlanganweni yetfu, njengobe nje nemtfungi angasilungisela timphahla tetfu kute sibukeke kahle. (Heb. 10:24, 25) Ngako-ke, kufanele sifike ngesikhatsi ngobe nasetayela kufika sekwephutile kulemihlangano, asikutfoli lokunye kulungiswa lesikudzingako kute sitfutfukise indlela lesibukeka ngayo njengetinceku taJehova.

ASILINGISE NKULUNKULU

12. Singamlingisa njani Nkulunkulu?

¹² Nangabe sifuna kuveta inkhatimulo yaJehova, kufanele setame ‘kuba njengaye.’ (Ef. 5:1) Lenye indlela lesingamlingisa ngayo Jehova, kutsi sibe nembono wakhe ngetintfo letitsite. Kuphila ngendlela leyehlukile kuloku kuyamhlazisa futsi natsi kungasilimata. Njengobe live lesiphila kulo lisemandleni alomubi longuSathane Develi, kufanele sisebente matima kute senyanye loko Jehova lakwenyanyako bese sitsandza lakutsandzako. (Hla. 97:10; 1 Joh. 5:19) Sidzinga kuciniseka lokusuka enhlitiyweni kutsi indlela leyemukelekako yekukhonta Nkulunkulu ikwenta tonkhe tintfo letidvumisa yena.—Fundza 1 Khorinte 10:31.

13. Kungani kufanele sisenyanye sono, futsi loku kutasisita kutsi senteni?

¹³ Jehova uyasenyanya sono, ngako natsi kufanele sisenyanye. Kungako kufanele  sikubalekele kwenta lokubi singetami nekubona kutsi singasondzela kangakanani kuko. Sibonelo saloku kutsi kufanele sitigadze singavumelani nekuhlubuka ngobe loko kungaba sono lesisenta singakufanelekeli kudvumisa Nkulunkulu. (Dut. 13:6-9) Ngaleso sizatfu, asingatihlanganisi netihlubuki nanobe ngubani lotibita ngekutsi ungumzalwane kodvwa abe ahlazisa Nkulunkulu. Kufanele sente njalo ngisho nobe loyo muntfu alilunga lemndeni. (1 Khor. 5:11) Akusisiti ngalutfo kwetama kuphikisana netihlubuki nobe nalabanye labasola inhlangano yaJehova. Ecinisweni kuyingoti futsi akufaneleki kutsi sifundze nobe ngukuphi kwatiswa lokuvela kubo, kungaba sencwadzini nobe ku-Internet.—Fundza Isaya 5:20; Matewu 7:6.

14. Nasetama kuveta inkhatimulo yaNkulunkulu, yini lokufanele ibonakale kitsi futsi ngani?

¹⁴ Kukhombisa lutsandvo kuyindlela lehamba embili yekulingisa Babe wetfu wasezulwini. Kufanele sibe nelutsandvo njengaye. (1 Joh. 4:16-19) Lutsandvo lesinalo emkhatsini wetfu lusenta sibonakale kutsi sibafundzi baJesu nekutsi sitinceku taJehova. (Joh. 13:34, 35) Ngisho nobe kuba nesono kungahle kusiphatamise, kufanele setame kukukhweshisela eceleni, sibe nelutsandvo ngaso sonkhe sikhatsi. Kuba nelutsandvo nebuntfu lobufanana nebaNkulunkulu, kutasisita kutsi singatenti tintfo letimbi.—2 Phet. 1:5-7.

15. Lutsandvo lusenta sibe nebuhlobo lobunjani nalabanye bantfu?

¹⁵ Lutsandvo lusenta sifune kwenta lokuhle kulabanye bantfu. (Rom. 13:8-10) Nati tibonelo: Kuba nelutsandvo naloshade naye, kwenta umbhedze wemshado uhlale uhlobile. Lutsandvo nenhlonipho ngalabadzala belibandla nemsebenti wabo, lungasisita sibalalele siphindze sititfobe ekucondziseni kwabo. Bantfwana lababatsandzako batali babo bayabalalela futsi babahloniphe, abakhulumi kabi ngabo. Nangabe sibatsandza labanye bantfu, angeke sitibone sincono kunabo nobe sikhulume nabo kabi. (Jak. 3:9) Labadzala belibandla labatitsandzako timvu taNkulunkulu, batatiphatsa ngesineke.—Imis. 20:28, 29.

16. Kukhombisa lutsandvo kungasisita njani emsebentini wetfu wekushumayela?

¹⁶ Lutsandvo kufanele lubonakale nasemsebentini wetfu wekushumayela. Ngesizatfu sekutsi siyamtsandza Jehova, angeke sivumele kunganaki nobe kungasemukeli kwebanikati bemakhaya kutsi kusiyekelise kushumayela. Esikhundleni saloko, sitawuchubeka sishumayela tindzaba letimnandzi. Lutsandvo lutawusenta silungiselele kahle siphindze setame kuphumelela kancono ekushumayeleni. Nangabe simtsandza mbamba Nkulunkulu nabomakhelwane betfu, kushumayela ngeMbuso angeke kube ngumtfwalo kitsi. Esikhundleni saloko kutawuba lilungelo lelihle futsi sitakwenta ngekujabula.—Mat. 10:7.

CHUBEKANI NIKHATIMULISA JEHOVA

17. Kusisita ngani kwati kutsi sikhashane nenkhatimulo yaNkulunkulu?

¹⁷ Live lesiphila kulo alati kutsi kubi kangakanani kuba nesono kodvwa tsine siyati. Loku kusenta sisibone sidzingo sekulwisana nesono. Kwati kutsi sinesono kusisita kutsi siceceshe bonembeza betfu kute sikhone kwenta ngendlela lekahle nasicala kuba nesifiso sekwenta sono engcondvweni nasenhlitiyweni yetfu. (Rom. 7:22, 23) Kuliciniso kutsi singaba butsakatsaka, kodvwa Nkulunkulu angasicinisa kute sikhone kwenta lokulungile kunobe ngusiphi simo.—2 Khor. 12:10.

18, 19. (a) Yini lesisita kutsi siphumelele ekulweni nemabutfo abomoya lababi? (b) Yini lokufanele sitimisele kuyenta?

¹⁸ Nangabe sifuna kudvumisa Jehova, kufanele siphindze silwisane nemabutfo  abomoya lababi. Tikhali tetfu takamoya lesitiniketwe nguNkulunkulu tiyasisita kute sikhone kuphumelela kulemphi. (Ef. 6:11-13) Sathane uchubeka etama kweba ludvumo lolufanele Jehova kuphela. Develi uphindze achubeke etama kulimata buhlobo betfu naJehova. Sathane uyajabha nakabona tigidzi temadvodza, bafati nebantfwana labanesono bachubeka betsembekile futsi badvumisa Nkulunkulu. Ngako-ke, asichubeke sidvumisa Jehova njengetidalwa tasezulwini letitsi: “Ufanele wena, Nkulunkulu, loyiNkhosi yetfu, kutsi wemukele bukhosi, neludvumo, nemandla, ngobe konkhe kwadalwa nguwe. Konkhe kwenteka ngentsandvo yakho, kwadalwa ngayo.”—Semb. 4:11.

¹⁹ Asitimisele kuchubeka sidvumisa Jehova nobe kungenteka ini. Uyajabula ngekutsi bantfu labanyenti labetsembekile benta lokusemandleni abo kute bamlingise futsi bavete inkhatimulo yakhe. (Taga 27:11) Shengatsi natsi singasho njengaDavide lowahlabela: “Ngiyawukubonga, Simakadze, Nkulunkulu wami, ngikudvumise ngenhlitiyo yami yonkhe, ngidvumise libito lakho kuze kube phakadze.” (Hla. 86:12) Siyalilangatelela lilanga lapho sitawukhona khona kuyiveta kahle inkhatimulo yaJehova siphindze simdvumise kute kube phakadze. Bantfu labalalelako batawusijabulela lesimo. Uyayiveta yini inkhatimulo yaNkulunkulu Jehova nyalo ube ulangatelela kwenta njalo kuze kube phakadze?

[Imibuto Yesihloko Lesifundvwako]

[Titfombe ekhasini 27]

Uyayiveta yini inkhatimulo yaJehova ngaletindlela?