Tsembela KuJehova—LonguNkulunkulu ‘Wetikhatsi Netikhatsi Temnyaka’

“Ugucula tikhatsi netikhatsi temnyaka; ubeka emakhosi aphindze awehlise.”—DAN. 2:21.

UNGAPHENDVULA NJANI?

Indalo kanye netiphrofetho letigcwalisekile kukukhombisa njani kutsi Jehova unguMgcini Wesikhatsi Lomkhulu?

Kwati kutsi Jehova nguNkulunkulu ‘wetikhatsi netikhatsi temnyaka,’ kufanele kusente sitsatse siphi sinyatselo?

Kungani luhlelo lwesikhatsi lwaJehova lungacondziswa nguloko lokwentekako emhlabeni naloko lokuhlelwe ngumuntfu?

1, 2. Yini lekhombisa kutsi Jehova usati kahle sikhatsi?

 NKULUNKULU JEHOVA wenta indlela yekubala sikhatsi asengakamdali umuntfu. Ngelilanga lesine lekudala, Nkulunkulu watsi: “Akube khona tibane emkhatsini wesibhakabhaka tehlukanise imini nebusuku; atibe tibonakaliso tetikhatsi, netemalanga, neteminyaka.” (Gen. 1:14, 19, 26) Ngalokuhambisana nentsandvo yaNkulunkulu nguloko kanye vele lokwenteka.

² Nanobe kunjalo, kute kube ngulamuhla, bososayensi solo bayaphikisana ngendzaba yesikhatsi. Lenye i-encyclopedia itsi: “Sikhatsi yintfo ledida bantfu kakhulu emhlabeni wonkhe futsi kute longasho ngalokucondze ngco kutsi siyini.” Kodvwa Jehova usati kahle sikhatsi. Ngetulu kwako konkhe ‘wadala emazulu, . . . wabumba umhlaba, wawusekela.’ Jehova uphindze ‘amemetele siphetfo kusukela ekucaleni, kusukela etikhatsini takadzeni amemetele loko lokutakwenteka.’ (Isa. 45:18; 46:10) Kute sicinise kukholwa kwetfu kuye naseVini lakhe liBhayibheli, asesicabange ngendlela indalo nekugcwaliseka kwetiphrofetho lokukhombisa ngayo kutsi Jehova nguMgcini Wesikhatsi Lomkhulu.

INDALO ICINISA KUKHOLWA KWETFU KUMGCINI WESIKHATSI LOMKHULU

3. Ngutiphi letinye tibonelo tetintfo letigcina sikhatsi?

³ Tintfo letinyenti Jehova latidalile letincane naletinkhulu, tiyasigcina sikhatsi. Nasi sibonelo: Ema-athomu anyakata ngendlela lengashintji. Emawashi lakhetsekile lasebentisa ema-athomu angeke asilahle sikhatsi ngisho nangemzuzu lowodvwa iminyaka letigidzi letingu-80. Emapulanethi netinkhanyeti kuhamba ngesikhatsi lesicondzile. Kuhamba kwako ngalendlela kusite bantfu kutsi bati tikhatsi temnyaka futsi batfole indlela lecondzile nabahamba. Njengobe Jehova enta ema-athomu netinkhanyeti, ‘unemandla lamakhulu’ futsi  kufanele simdvumise.—Fundza Isaya 40:26.

4. Liciniso lekutsi tintfo letiphilako ticondziswa sikhatsi likufakazela njani kutsi Jehova uhlakaniphile?

⁴ Tintfo letiphilako nato ticondziswa sikhatsi. Tintfo letinyenti letihlanyeliwe netilwane ticondziswa yintfo lenjengeliwashi lengekhatsi kuto. Kungako tinyoni letinyenti tisati sikhatsi sekutfutsela kuletinye tindzawo. (Jer. 8:7) Nebantfu nabo bacondziswa sikhatsi. Sibonelo saloku kutsi umtimba wetfu uyasitjela nasekusikhatsi sekuvuka nesekulala. Nangabe sihamba ngendiza siya kulelinye live lelinesikhatsi lesehlukile, umtimba wetfu ungatsatsa emalanga lambalwa kutsi wetayele sikhatsi sakuleyo ndzawo. Ngako-ke, etintfweni Jehova latidalile, kunetibonelo letinyenti letifakazela kutsi unguNkulunkulu ‘wetikhatsi netikhatsi temnyaka’ futsi unemandla nekuhlakanipha lokukhulu. (Fundza Tihlabelelo 104:24.) Ngesizatfu sekutsi Jehova unekuhlakanipha nemandla langapheli, singakholwa kutsi angakwati kufeza tinjongo takhe.

TIPHROFETHO LETIGCWALISEKA NGESIKHATSI TICINISA KUKHOLWA

5. (a) Nguyiphi indlela lengasenta sati likusasa lebantfu? (b) Kungani Jehova angabiketela ngalokutsite kanye nesikhatsi letenteka ngaso?

⁵ Incwadzi lekhuluma ngendalo isifundzisa lokunyenti ngaJehova ‘nangebuNkulunkulu bakhe lobufihlekile’ kodvwa ayiyiphendvuli imibuto lebalulekile lefanana nalotsi: Likusasa libaphatseleni bantfu? (Rom. 1:20) Kute sitfole imphendvulo, kufanele sifundze loko Nkulunkulu lasembulele kona eVini lakhe liBhayibheli. Nasilifundza, sitfola tiphrofetho lebetigcwaliseka ngesikhatsi lesifanele njalo. Jehova angakwati kwembula loko lokutakwenteka ngobe uyakwati kubona likusasa. Ngetulu kwaloko, loko lokubiketelwe emiBhalweni kwenteka ngesikhatsi ngobe Nkulunkulu Jehova angenta tintfo tenteke ngalokuvumelana nentsandvo neluhlelo lwakhe.

6. Yini lekhombisa kutsi Jehova ufuna kutsi sicondze kugcwaliseka kwetiphrofetho teliBhayibheli?

⁶ Jehova ufuna tikhonti takhe ticondze tiphrofetho letisemBhalweni futsi tizuze kuto. Nanobe Nkulunkulu angasebentisi indlela tsine lesibala ngayo sikhatsi, singakwati kubala sikhatsi ngaloko lakushito nakabiketela ngalokutakwenteka ngesikhatsi lesitsite. (Fundza Tihlabelelo 90:4.) Nasi sibonelo: Incwadzi yeSembulo ikhuluma ‘ngetingilosi letine’ ‘letilungiselelwe li-awa, nelilanga, nenyanga, nemnyaka’—lokusikhatsi lesingakhona kusicondza. (Semb. 9:14, 15) Kubona indlela tiphrofetho letagcwaliseka ngayo ngesikhatsi lesifanele kufanele kucinise kukholwa kuNkulunkulu ‘wetikhatsi netikhatsi temnyaka’ naseVini lakhe. Asesicoce ngetibonelo letimbalwa.

7. Kugcwaliseka kwesiphrofetho saJeremiya ngeliJerusalema nakaJuda, kukukhombisa njani kutsi Jehova nguMgcini Wesikhatsi Lomkhulu?

⁷ Kwekucala, asesibuyele emuva ekhulwini lesikhombisa B.C.E. ‘Ngemnyaka wesine wekubusa kwaJehoyakimu, umsa waJosaya,’ livi leMgcini Wesikhatsi Lomkhulu “lefika kuJeremiya macondzana nabo bonkhe bantfu bakaJuda.” (Jer. 25:1) Jehova wabiketela ngekubhujiswa kweJerusalema nangekuhamba kwemaJuda esuka kaJuda aya eBhabhulona. ‘Abeyawukhonta inkhosi yaseBhabhulona iminyaka lengu-70.’ Emabutfo aseBhabhulona alibhubhisa liJerusalema nga-607 B.C.E., futsi emaJuda atfunjelwa eBhabhulona. Kodwa bekutakwentekani ngemuva kweminyaka lengu-70? Jeremiya waphrofetha: “Naku lokushiwo nguSimakadze, utsi: ‘Naseyiphelile iminyaka lengu-70 yeBhabhulona, ngitawufika kini ngitewugcwalisa setsembiso sami semusa kutsi nginibuyise kulendzawo.’” (Jer. 25:11, 12; 29:10) Lesiphrofetho sagcwaliseka ngesikhatsi lesifanele nga-537 B.C.E. ngemuva kwekutsi  emaMediya nemaPheresiya akhulule emaJuda eBhabhulona.

8, 9. Siphrofetho saDanyela lesimayelana nekuta kwaMesiya nekubekwa kweMbuso wasezulwini, sikhombisa njani kutsi Jehova nguNkulunkulu ‘wetikhatsi netikhatsi temnyaka’?

⁸ Ase ucabange ngalesinye siphrofetho lesitsintsa bantfu baNkulunkulu bangesikhatsi lesendlulile. Cishe ngemuva kweminyaka lemibili ngembikwekutsi emaJuda ahambe eBhabhulona, Nkulunkulu ngemphrofethi Danyela wabiketela kutsi Mesiya abetawuvela eminyakeni lengu-483 ngemuva kwekutsi kukhishwe umyalo wekwakhiwa kabusha kweliJerusalema. Inkhosi yemaMediya nemaPheresiya yakhipha lomyalo nga-455 B.C.E. Ngemuva kwaleminyaka lengu-483, nga-29 C.E.—Jesu waseNazaretha wagcotjwa ngemoya longcwele ngalesikhatsi abhajatiswa futsi waba nguMesiya. a—Neh. 2:1, 5-8; Dan. 9:24, 25; Luk. 3:1, 2, 21, 22.

⁹ Nyalo asewunake loko imiBhalo leyakubiketela mayelana neMbuso. Siphrofetho seliBhayibheli saveta kutsi uMbuso waNkulunkulu loholwa nguMesiya bewutawubekwa emazulwini nga-1914. LiBhayibheli laniketa ‘sibonakaliso’ sekuba khona kwaJesu, lasho nesikhatsi Sathane latawucoshwa ngaso ezulwini, lobekutawubangela maye lomkhulu emhlabeni. (Mat. 24:3-14; Semb. 12:9, 12) Ngetulu kwaloko, siphrofetho seliBhayibheli sakhomba sikhatsi lesicondzile—1914—‘lobekutawugcwaliseka ngaso sikhatsi’ sebetive futsi uMbuso ucale kubusa ezulwini.—Luk. 21:24; Dan. 4:10-17. b

10. Ngutiphi tintfo lesicinisekako kutsi titakwenteka ngesikhatsi lesifanele esikhatsini lesitako?

¹⁰ Kuseta “kuhlupheka lokukhulu” lokwabiketelwa nguJesu, lokutawulandzelwa kubusa kwakhe kweMinyaka Leyinkhulungwane. Asingabati kutsi letintfo titakwenteka ngesikhatsi lesifanele. Ngalesikhatsi Jesu alapha emhlabeni, Jehova besekalati ‘lilanga nemzuzu’ letintfo letitakwenteka ngawo.—Mat. 24:21, 36; Semb. 20:6.

‘BAMBISISA EMATFUBA’

11. Kwati kutsi siphila esikhatsini sekuphela kufanele kusitsintse njani?

¹¹ Kufanele kusitsintse njani kucaphela kutsi uMbuso sewucalile kubusa nekutsi siphila ‘esikhatsini sekugcina’? (Dan. 12:4) Bantfu labanyenti bayabona kutsi timo tiba timbi kakhulu kodvwa bayehluleka kuvuma kutsi letintfo letentekako tigcwalisa tiphrofetho teliBhayibheli letimayelana nemalanga ekugcina. Bangase balindzele kutsi lelive liphele ngalelinye lilanga nobe bakholelwe kutsi imetamo yebantfu ingaphumelela ekuletseni ‘kuthula nenhlalakahle.’ (1 Thes. 5:3) Kodvwa kutsiwani ngatsi? Nasicaphela kutsi siphila emalangeni ekugcina alelive laSathane, kufanele sitimisele kusebentisa lesikhatsi lesisele  ekukhonteni Nkulunkulu ‘wetikhatsi netikhatsi temnyaka’ futsi sisite labanye kutsi bamati. (2 Thim. 3:1) Kufanele sente tincumo letihlakaniphile ngendlela lesitawusisebentisa ngayo sikhatsi setfu.—Fundza Efesu 5:15-17.

12. Yini lesingayifundza emavini aJesu macondzana nemalanga aNowa?

¹² ‘Kubambisisa ematfuba’ akusimelula kulelive leligcwele tiphatamiso. Jesu wecwayisa: “Njengasemalangeni aNowa kuyawuba njalo nekufika kweNdvodzana yeMuntfu.” Bekunjani ngemalanga aNowa? Bekubiketelwe kutsi bantfu bangaleso sikhatsi bebatawubhujiswa. Ngaleso sikhatsi bantfu lababi bebatawumita kuZamcolo lomkhulu. ‘Njengemshumayeli wekulunga,’ Nowa wawumemetela ngekwetsembeka umlayeto waNkulunkulu kubantfu bangesikhatsi sakhe. (Mat. 24:37; 2 Phet. 2:5) Kodvwa bantfu bangaleso sikhatsi “babedla banatsa, labadvuna nalabasikati batsatsana, . . . abazange bati, kwaze kwefika zamcolo wabacedza.” Ngako-ke, Jesu wecwayisa balandzeli bakhe: “Hlalani nilindzele ngobe iNdvodzana yeMuntfu iyawufika ngesikhatsi leningakasibheki.” (Mat. 24:38, 39, 44) Kufanele silingise Nowa, hhayi bantfu bangesikhatsi sakhe. Yini lengasisita sihlale silindzile?

13, 14. Yini lokufanele siyikhumbule ngaJehova letasisita kutsi simkhonte ngekwetsembeka njengobe silindzele kufika kweNdvodzana yemuntfu?

¹³ Nanobe iNdvodzana yemuntfu ita ngesikhatsi lesingasati, kufanele sikhumbule kutsi Jehova unguMgcini Wesikhatsi Lomkhulu. Luhlelo lwakhe alucondziswa nguloko lokwenteka emhlabeni nobe lokuhlelwe ngumuntfu. Jehova ucondzisa sikhatsi kanye nemiphumela yetintfo kute afeze injongo yakhe. (Fundza Danyela 2:21.) Incwadzi yeTaga 21:1 itsi: “Inhlitiyo yenkhosi isesandleni saSimakadze, uyicondzisa kalula njengemanti emfula.”

¹⁴ Jehova angabangela kutsi tintfo letitsite tenteke kute aphumelelise tinjongo takhe ngesikhatsi lesifanele. Tingucuko letinyenti letibalulekile letenteke emhlabeni betigcwalisa tiphrofetho, ikakhulukati ngalokuphatselene nekushunyayelwa kwetindzaba letimnandzi teMbuso waNkulunkulu emhlabeni wonkhe. Cabanga ngekuwa kweSoviet Union, kanye nemiphumela yako. Bambalwa labebangacabanga kutsi tingucuko letinkhulu kangaka betingenteka ngekushesha. Umphumela waletingucuko, ube kutsi lamuhla kushunyayelwe tindzaba letimnandzi emaveni lamanyenti lapho umsebenti wetfu bewuvinjelwe khona. Shengatsi singenta konkhe lokusemandleni kute sibambisise ematfuba ekumkhonteni ngekwetsembeka Nkulunkulu ‘wetikhatsi netikhatsi temnyaka.’

BANI NEKUKHOLWA ESIKHATSINI SAJEHOVA

15. Singakukhombisa njani kukholwa etingucukweni letentekako enhlanganweni?

¹⁵ Kuchubeka emsebentini wekushumayela ngeMbuso kulamalanga ekugcina kudzinga kutsi sibe nekukholwa esikhatsini saJehova. Kugucugucuka kwetimo kulelive lesiphila kulo kungase kusente siyishintje indlela lesiwenta ngayo umsebenti wetfu wekwenta bafundzi. Ngasikhatsi inhlangano ingahle yente tingucuko kute inakekele tidzingo tetfu njengebashumayeli beMbuso. Sikhombisa kutsi sinekukholwa kuNkulunkulu ‘wetikhatsi netikhatsi temnyaka’ ngekutsi sihambisane netingucuko letentekako enhlanganweni njengobe simkhonta ngekwetsembeka ngaphansi kweNdvodzana yakhe ‘leyinhloko yelibandla.’—Ef. 5:23.

16. Kungani singaba nekukholwa ngekutsi Jehova utasisita ngesikhatsi lesifanele?

¹⁶ Jehova ufuna sithandaze kuye sikhululekile futsi sinelitsemba lekutsi ‘utasisita ngesikhatsi lesifanele.’ (Heb. 4:16) Loko akukhombisi yini kutsi unelutsandvo lolujulile ngemuntfu ngamunye? (Mat. 6:8; 10:29-31) Sikhombisa kutsi sinekukholwa  kuNkulunkulu Jehova ngekutsi sithandaze njalo kuye, sicele lusito siphindze sisebentele kuloko lesikuthandazele silandzele neticondziso takhe. Ngetulu kwaloko, siyabathandazela nalabanye lesikholwa nabo.

17, 18. (a) Ngusiphi sinyatselo Jehova latasitsatsa ngalokumelene netitsa takhe? (b) Kufanele sibalekele luphi lugibe?

¹⁷ Nyalo akusiso sikhatsi sekutsi ‘singabate ekukholweni,’ kodvwa sikhatsi sekutsi sicine kuko. (Rom. 4:20) Titsa taNkulunkulu—Sathane nalabo labamlandzelako—betama ngako konkhe lokusemandleni kuvimba umsebenti Jesu lawunika balandzeli baKhe, lokufaka ekhatsi natsi. (Mat. 28:19, 20) Nobe Develi asihlasela, Jehova simati ‘njengaNkulunkulu lophilako, longuMsindzisi wabo bonkhe bantfu, ikakhulukati walabo labakholwako.’ ‘Uyakwati kubakhulula ekulingweni labo labamesabako.’—1 Thim. 4:10; 2 Phet. 2:9.

¹⁸ Ngekushesha, Jehova utalicedza lelive lelibuswa nguSathane. Njengobe singakaniketwa yonkhe imininingwane kanye nesikhatsi lesicondzile latalicedza ngaso, siyati kutsi ngesikhatsi lesifanele Khristu utatibhubhisa titsa taNkulunkulu, nebukhosi baJehova butawungcweliswa. Ngako-ke, kutawuba liphutsa lelikhulu ngatsi kwehluleka kubona “tikhatsi netikhatsi temnyaka” lesiphila kuto. Shengatsi singeke sawela elugibeni lwekucabanga kutsi “tonkhe tintfo tihamba njengobe tatinjalo kusukela ekucaleni kwendalo.”—1 Thes. 5:1; 2 Phet. 3:3, 4.

BANI NESIMO SENGCONDVO ‘SEKULINDZA’

19, 20. Kungani kufanele sibe nesimo sekulindza Jehova?

¹⁹ Injongo yekucala yaNkulunkulu Jehova ngebantfu yayifaka ekhatsi kutsi bacitse sikhatsi lesingapheli bafundza ngaye nangendalo yakhe lenhle. Umshumayeli 3:11 utsi: “Konkhe [Jehova] ukwente kwalungela sikhatsi sako. Uphindze wabeka liphakadze etinhlitiyweni tebantfu; noko abakhoni kuyicondza imisebenti yaNkulunkulu kusukela ekucaleni kwayo kuze kube ngusekugcineni.”

²⁰ Siyajabula ngekwati kutsi Jehova akakayishintji injongo yakhe ngebantfu. (Mal. 3:6) Nkulunkulu ‘akagucugucuki.’ (Jakobe 1:17) Luhlelo lwakhe lwesikhatsi alwenganyelwa yindlela umuntfu lakala ngayo sikhatsi, njengekugucuka kwemhlaba. Jehova ‘uyiNkhosi yetikhatsi.’ (1 Thimothi 1:17) Ngako-ke, ‘asilindzele Nkulunkulu ngesibindzi, ngobe nguye lotasiphephisa.’ (Mikha 7:7) “Cinani, tinhlitiyo tenu tibe nesibindzi, nonkhe nine lenilindzele Simakadze.”—Tihlabelelo 31:24.

[Imibhalo lengentansi]

[Imibuto Yesihloko Lesifundvwako]

[Sitfombe ekhasini 19]

Danyela waba nekukholwa etiphrofethweni taNkulunkulu

[Sitfombe ekhasini 21]

Usisebentisa kahle yini sikhatsi ngekutsi wente intsandvo yaJehova?