Uyasijabulela Yini Sipho SaNkulunkulu Semshado?

“Shangatsi Simakadze anganibusisa aniphe emadvodza, nakhe imiti!”—RUTHE 1:9.

FUNA TIMPHENDVULO TALEMIBUTO:

Kungani singatsi tinceku taNkulunkulu tasekucaleni tasijabulela sipho saNkulunkulu semshado?

Sati njani kutsi Jehova unendzaba nekutsi sikhetsa kushada nabani?

Ngusiphi seluleko seliBhayibheli lesimayelana nemshado lotimisele kusisebentisa ekuphileni kwakho?

1. Chaza indlela Adamu lativa ngayo ngalesikhatsi atfola umfati.

 “LONA-KE sewulitsambo lematsambo ami, nenyama yenyama yami. Uyawubitwa ngekutsi: ‘yindvodzakati,’ ngobe utsetfwe endvodzeni.” (Gen. 2:23) Indvodza yekucala Adamu yajabula kakhulu ngekutfola umfati. Kungaleso sizatfu yasho lenkhondlo. Ngemuva kwekutsi Jehova ehlisele Adamu butfongo lobukhulu, wadala lomfati lomuhle ngalolunye lwetimbambo ta-Adamu. Adamu wametsa libito watsi ngu-Eva. Nkulunkulu wabahlanganisa bakha umshado lojabulisako. Njengobe Jehova asebentisa lubhambo lwa-Adamu njengesisekelo sekudala Eva, bebasondzelene kakhulu kwendlula nobe nguyiphi indvodza nemfati lamuhla.

2. Kungani emadvodza nebafati basondzelana?

² Ngekuhlakanipha kwakhe lokukhulu, Jehova wadala bantfu kutsi babe nelutsandvo ngebantfu bebulili lobehlukile—lokuyimfanelo leyenta bafati nemadvodza basondzelane. I-The World Book Encyclopedia itsi: “Indvodza nemfati labashadako banelitsemba lekutsi batawuhlanganyela buhlobo bebulili futsi bakhangane.” Nguloko lokwentekako emkhatsini webantfu baJehova.

BASIJABULELA SIPHO SEMSHADO

3. Isaka wamtfola njani umfati?

³ Abrahama lowetsembekile bekanenhlonipho lenkhulu ngemshado. Ngako-ke, watfuma inceku yakhe lendzala kutsi iyewufunela Isaka umfati eMesophothamiya. Umthandazo walenceku waba nemiphumela lemihle. Rebheka lowesaba Nkulunkulu waba ngumfati wa-Isaka lotsandzekako futsi waba nencenye elungiselelweni laJehova lekulondvolota intalo ya-Abrahama. (Gen. 22:18; 24:12-14, 67) Loku akusho kutsi kufanele siphetse ngekutsi umuntfu losifisela lokuhle angaba ngumhlanganisi webantfu angakacelwa.  Esikhatsini salamuhla, bantfu labanyenti bayatikhetsela kutsi batawushada nabani. Kuliciniso kutsi imishado ayentiwa ezulwini, kodvwa Nkulunkulu utawacondzisa emaKhristu kuyo nakuletinye tici tekuphila nangabe athandazela sicondziso futsi aholwa ngumoya wakhe.—Gal. 5:18, 25.

4, 5. Yini lekucinisekisako kutsi umShulami kanye nemelusi bebanemiva yelutsandvo kulomunye nalomunye?

⁴ Intfombatana lenhle lengumShulami yaka-Israyeli beyingafuni bangani bayo bayicindzetele kutsi ibe ngulomunye webafati beNkhosi Solomoni. Yatsi: “Ngiyaniyala, madvodzakati aseJerusalema, ngitsi: Ningaluvusi lutsandvo, futsi ningalunyakatisi, luze lutivukele lona.” (Ngo. 8:4) Lentfombatana kanye nemelusi, bebanayo imiva yelutsandvo kulomunye nalomunye. Ngekutitfoba, yatsi: “Ngiyimbali yaseSharoni, umnduze wetigodzi.” Umelusi waphendvula watsi: “Njengemnduze emkhatsini wemanyeva, unjalo lotsandzekako wami emkhatsini wetintfombi.” (Ngo. 2:1, 2) Bebatsandzana sibili.

⁵ Ngesizatfu sekutsi bobabili bebamtsandza Nkulunkulu, sibopho sabo semshado besitawucina kakhulu. UmShulami watsi kumelusi wakhe lotsandzekako: ‘Ngibeke njengeluphawu etikwenhlitiyo yakho, yebo, njengeluphawu emkhonweni wakho; ngobe lutsandvo lunemandla njengekufa, sikhwele salo asitfobiseki, sinjengelithuna. Lushisa njengemlilo lovutsako, yebo, njengelilangabi lelinemandla laJehova [ngobe luvela kuye]. Emanti lamanyenti ngeke alucime lutsandvo, nemifula ingeke ilukhukhule. Nome ngabe umuntfu abenganikela ngawo wonkhe umcebo wasekhaya lakhe kuze atewutsenga lutsandvo, loko bekuyawuba yinhlekisa yodvwa nje.’ (Ngo. 8:6, 7) Nangabe inceku yaJehova icabangela kushada, kungani kungakafaneli iwutsatse kalula?

KUKHETSA LOKUMTSINTSAKO NKULUNKULU

6, 7. Sati njani kutsi Nkulunkulu unendzaba nekutsi sishada nabani?

⁶ Jehova unendzaba nekutsi ukhetsa kushada nabani. Macondzana nebantfu baseKhenani, ema-Israyeli ayalwa: “Ningendziselani nato. Emadvodzakati enu ningavumi kutsi ashade nemadvodzana ato, nemadvodzana enu ningavumi kutsi ashade nemadvodzakati ato, ngobe ayawuhlubukisa lamadvodzana enu angabe asangilandzela, awente akhonte labanye bonkulunkulu, intfukutselo yaSimakadze bese iyanivutsela, inibhubhise ngekushesha.” (Dut. 7:3, 4) Ngemuva kwemakhulu eminyaka, Ezra umphristi watsi: “Aniketsembeki; niteke bafati betive, nengeta bubi etikwebubi baka-Israyeli.” (Ezra 10:10) Nemphostoli Pawula watjela emaKhristu labekanye nawo watsi: “Umfati uboshelwe endvodzeni nayisaphila; kepha nangabe indvodza seyifile, sewukhululekile, angendza nome ngukubani, kuye ngekubona kwakhe, kuphela nje kutsi kube ngusentsandvweni yeNkhosi.”—1 Khor. 7:39.

⁷ Nangabe inceku yaJehova letinikele ishada nemuntfu longakholwa, loko kutawube kusento sekungamlaleli Nkulunkulu. Ema-Israyeli angesikhatsi sa-Ezra enta ngekungetsembeki ‘ngekuteka bafati betive.’ Kungaba kubi kungatinaki timiso temiBhalo leticacile letinjalo. (Ezra 10:10; 2 Khor. 6:14, 15) UmKhristu loshada nemuntfu longakholwa, akasiso sibonelo lesihle futsi akakhombisi kubonga ngesipho saNkulunkulu semshado. Kushada nemuntfu lonjalo ngemuva kwekubhajatiswa, kungase kusilahlekisele emalungelo latsite emkhatsini webantfu baNkulunkulu. Akunangcondvo kulindzela tibusiso, sibe sivuma emthandazweni wetfu sitsi: ‘Jehova, angizange ngikulalele ngemabomu, kodvwa ngicela ungibusise.’

 BABE WETFU WASEZULWINI WATI KANCONO

8. Chaza kutsi kungani kufanele silandzele sicondziso saNkulunkulu emshadweni.

⁸ Umakhi wemshini uwati kahle kutsi usebenta njani. Nangabe tincenye tawo tidzinga kuhlanganiswa, nguye longaniketa imininingwane ledzingekako kute uhlanganiswe. Kutsiwani nangabe singatinaki leticondziso futsi siwuhlanganisa ngendlela yetfu lomshini? Nangabe lomshini usebenta, ungase ubange tingoti. Ngako-ke, nasifuna kuba nemshado lojabulisako, kufanele silandzele ticondziso lesitinikwe nguJehova, uMsunguli wemshado.

9. Kungani singatsi Jehova uyayati imiva yekuba nesitunge kanye nenjabulo letfolakala emshadweni?

⁹ Jehova wati konkhe ngebantfu nangemshado. Wenta bantfu baba nesidzingo sebulili kute ‘bandze, bagcwalise umhlaba.’ (Gen. 1:28) Nkulunkulu uyayati imiva yemuntfu lonesitunge, kungako ngembikwekuba adale umfati wekucala atsi: “Akukuhle kutsi umuntfu ahlale yedvwana. Ngitamentela umsiti lolungele yena.” (Gen. 2:18) Jehova uyayati nenjabulo letfolakala emshadweni.—Fundza Taga 5:15-18.

10. Ngutiphi tici lokufanele ticondzise emaKhristu lashadene lanebudlelwane lobuhle?

¹⁰ Ngesizatfu sekutsi sono sa-Adamu sendlulela kuyo yonkhe intalo yakhe, bonkhe bantfu labashadile banesono. Nanobe kunjalo, nangabe tinceku taJehova tilandzela liVi laKhe, umshado wato ungaletsa injabulo. Ase ucabange ngeseluleko saPawula lesicacile ngebudlelwane lobusedvute emshadweni. (Fundza 1 Khorinte 7:1-5.) ImiBhalo ayisho kutsi bantfu labashadile kufanele bahlanganyele buhlobo bebulili nabetama kutfola bantfwana kuphela. Buhlobo lobunjalo bungenelisa netidzingo letingekwemivelo kanye netenyama. Kodvwa imikhuba lengcolile yebulili ayimjabulisi Nkulunkulu. Emadvodza nebafati labangemaKhristu batawuphatsa lesici sekuphila lesibalulekile ngendlela lekahle, futsi sitabenta babonisane lutsandvo lolucotfo. Kuliciniso kutsi kufanele babalekele tento letingamjabulisi Jehova.

11. Ruthe wabusiswa njani ngekwenta tintfo ngendlela yaJehova?

¹¹ Umshado kufanele ugcwale injabulo hhayi buhlungu nobe tinkinga. Likhaya lemKhristu kufanele libe yindzawo lekahle yekuphumula nalenekuthula. Cabanga ngalokwenteka eminyakeni lengaba ngu-3 000 leyendlulile ngalesikhatsi umfelokati longuNawomi losakhulile kanye nabomalukatane bakhe nabo lababafelokati bo-Opha naRuthe basendleleni besuka kaMowabi balibangise kaJuda.  Nawomi wancenga labafati labasebasha kutsi babuyele kubantfu bakubo. Ruthe umMowabi wahamba naNawomi wetsembeka kuNkulunkulu weliciniso futsi abeciniseka kutsi ‘Nkulunkulu utamnika umvuzo lophelele, njengobe naku sewukhosele ngaphansi kwakhe.’ (Rut. 1:9; 2:12) Ngekubonga lokukhulu ngesipho saNkulunkulu semshado, Ruthe waba ngumfati waBhowazi losikhonti saJehova seliciniso. Nasekavuselwe eveni lelisha laNkulunkulu emhlabeni, utawujabula kufundza ngekutsi waba ngukhokho waJesu Khristu. (Mat. 1:1, 5, 6; Luk. 3:23, 32) Watfola tibusiso ngekwenta tintfo ngendlela yaJehova.

SELULEKO LESIBALULEKILE SEMSHADO LOPHUMELELAKO

12. Singasitfola kuphi seluleko lesibalulekile semshado?

¹² UMsunguli wemshado usitjela loko lesidzinga kukwati ngemshado kute uphumelele, futsi kute umuntfu lowati njengaye. LiBhayibheli lihlale lisitjela lokuliciniso. Kute sitfole seluleko lesikahle mayelana nemshado, kufanele sinamatsele etimisweni letisemiBhalweni. Nasi sibonelo: Aphefumulelwe, umphostoli Pawula wabhala watsi: “Akube ngulowo nalowo atsandze umkakhe, njengobe atitsandza yena, nemfati ahloniphe indvodza yakhe.” (Ef. 5:33) Akukho lokungenta umKhristu lovutsiwe kutsi angasilaleli leseluleko seliBhayibheli. Umbuto ukutsi: Batalisebentisa yini liVi laJehova? Batalilalela nangabe basijabulela sipho semshado. a

13. Kungase kube namiphi imiphumela kungasilaleli seluleko lesitfolakala ku-1 Phetro 3:7?

¹³ Indvodza lengumKhristu kufanele imphatse ngelutsandvo umfati wayo. Umphostoli Pawula wabhala: “Nani, madvodza, hlalisanani kahle nebafati benu, nati kutsi umuntfu lomsikati unjengesitja lesibutsakatsaka; nibahloniphe, ngobe batindlalifa temusa wekuphila kanye nani; loku nikwente, khona ingetiwuvimbeleka imithandazo yenu.” (1 Phet. 3:7) Imithandazo yendvodza ingavimbeka nangabe ingasisebentisi seluleko saJehova. Buhlobo babo naJehova bungalimala futsi loko kungaholela ekucindzetelekeni, ekucabaneni kanye nasetentweni tekuhlukumetana.

14. Umfati lotsandzekako angasifaka njani sandla ekuphileni kwemndeni wakhe?

¹⁴ Umfati locondziswa liVi nangumoya waJehova angenta lokunyenti kute ente likhaya lakhe libe nekuthula nenjabulo. Kuyatentakalela kutsi indvodza leyesaba Nkulunkulu itsandze umfati wayo futsi imvikele ngato tonkhe tindlela. Uyalilangatelela lutsandvo lwendvodza yakhe futsi loko kudzinga kutsi atente atsandzeke. Taga 14:1, titsi: “Umfati lohlakaniphile uyawakha umuti wakhe; kepha losilima uwubhidlita ngetakhe tandla.” Umfati lohlakaniphile nalonelutsandvo, unesandla emphumelelweni nasenjabulweni yemndeni wakhe. Ukhombisa nekutsi uyabonga ngesipho saNkulunkulu semshado.

15. Ngusiphi seluleko lesitfolakala ku-Efesu 5:22-25?

¹⁵ Emadvodza nebafati labasekela budlelwane  babo esibonelweni saJesu sendlela lasebentelana ngayo nelibandla lakhe, bakhombisa kutsi bayasijabulela sipho saNkulunkulu semshado. (Fundza Efesu 5:22-25.) Bantfu labashadile batawujabulela tibusiso nangabe batsandzana mbamba futsi bangavumeli kutigabatisa, kungakhulumisani nobe letinye tindlela letingakalungi kumakhristu tiphatamise umshado wabo.

AKUNGABI NALOBEHLUKANISAKO

16. Kungani lamanye emaKhristu ahlala angakashadi?

¹⁶ Nanobe bantfu labanyenti bahlela kushada ekuphileni kwabo, letinye tinceku taJehova tihlala tingakashadi ngesizatfu sekutsi atimtfoli umlingani wemshado lotilungele nalofanelekako emehlweni aJehova. Letinye tinesipho sekungashadi lesitivumela kutsi titinikele emsebentini waJehova, tingaphatanyiswa ngumshado. Kuliciniso kutsi kungashadi kufanele kujatjulelwe ngalokuvumelana nemincele lebekwe nguJehova.—Mat. 19:10-12; 1 Khor. 7:1, 6, 7, 17.

17. (a) Ngumaphi emavi aJesu lamayelana nemshado lokufanele sihlale siwakhumbula? (b) Nangabe lomunye umKhristu acala kuhawukela umlingani wemshado walomunye umuntfu, yini lokufanele ayente ngekushesha?

¹⁷ Nobe sishadile nobe singakashadi, sonkhe kufanele sihlale sikhumbula emavi aJesu latsi: “Anizange niwufundze yini lomBhalo lotsi: ‘Ekucaleni uMdali wenta umuntfu lomdvuna nalomsikati’? Watsi: ‘Ngenca yaloko-ke indvodza iyawushiya uyise nenina inamatsele kumkayo, labo-ke bobabili sebayawuba nyamanye.’ Ngako-ke abasebabili, kodvwa sebamunye. Ngako-ke loko lakuhlanganisile Nkulunkulu, akungabe kusehlukaniswa ngumuntfu.” (Mat. 19:4-6) Kuhawukela umlingani wemshado walomunye umuntfu kusono. (Dut. 5:21) Nangabe umKhristu acala kuba nesifiso lesinjalo sebugovu, kufanele alwisane naso ngekushesha kute asincobe, ngisho nobe angalimala ngekwemivelo ngesizatfu sekutsi uvumele leso sifiso sebugovu sakheka kuye. (Mat. 5:27-30) Ngako-ke, kubalulekile kulungisa imicabango lenjalo futsi silwisane nesifiso sesono senhlitiyo yetfu lekhohlisako.—Jer. 17:9.

18. Utiva njani ngekutsi kufanele sitsatse umshado njengesipho lesivela kuNkulunkulu?

¹⁸ Ngisho nalabanye bantfu labanyenti labangati ngaNkulunkulu Jehova nangesipho sakhe lesihle semshado, bakhombisa kubonga ngalesipho. Tsine njengetinceku letitinikele kuJehova ‘longuNkulunkulu lojabulako,’ kufanele siwajabulele onkhe emalungiselelo akhe futsi sinikete bufakazi bekutsi sijabula kakhulu ngesipho saKhe semshado.—1 Thim. 1:11.

[Umbhalo longentansi]

[Imibuto Yesihloko Lesifundvwako]

[Emavi lacashuniwe lasekhasini 6]

Umshado lophumelelako udvumisa Jehova futsi ungaletsa injabulo kubo bonkhe emndenini

[Sitfombe ekhasini 5]

Ruthe wakhombisa kubonga ngesipho saNkulunkulu semshado

[Sitfombe ekhasini 7]

Ukukhombisa mbamba yini kubonga ngesipho saJehova semshado?