1. Nguliphi litsemba Pawula lakhuluma ngalo ngalesikhatsi abhalela emakholwa lakanye nawo?

NGESIKHATSI umphostoli Pawula abhalela emakholwa lakanye nawo, wakhuluma tikhatsi letinyenti ngelitsemba lakhe lekutsi Nkulunkulu naKhristu batawemukela umoya lokhonjiswa ngemabandla. Sibonelo saloku sisitfola kuloko lakubhalela baseGalathiya: “Umusa weNkhosi yetfu Jesu Khristu awube nemoya wenu, bazalwane. Amen.” (Gal. 6:18) Abesho kutsini nakatsi “umoya wenu” leniwukhombisako?

2, 3. (a) Pawula abekhuluma ngani ngaletinye tikhatsi nakasebentisa ligama lelitsi “umoya”? (b) Ngumiphi imibuto lesingatibuta yona mayelana nemoya lesiwukhombisako?

² Pawula wasebentisa leligama lelitsi “umoya” kulendzaba kute achaze emandla latsintsa indlela lesikhuluma nobe lesenta ngayo tintfo. Lomunye umuntfu angaba nesineke, acabangele, abe mnene, abe nemusa nobe atsetselele. LiBhayibheli likhuluma kahle ngekuba ‘nemoya lomnene nalonekuthula’ nangekuba nemoya ‘lopholile.’ (1 Phet. 3:4; Taga 17:27) Ngakulokunye, lomunye umuntfu angatsandza kuphukuta, aphishanekele umcebo, asheshe atfukutsele nome abe nesimo sekwetsembela emandleni akhe. Lokubi kakhulu kutsi kunebantfu labakhombisa umoya lomubi, wekungalaleli nobe wekuhlubuka.

³ Ngako-ke, ngesikhatsi Pawula asebentisa emavi lafanana nalatsi “iNkhosi ayibe nemoya wakho,” abekhutsata bomnakabo kutsi bakhombise umoya lovumelana nentsandvo yaNkulunkulu nebuntfu lobufanana nebaKhristu. (2 Thim. 4:22; fundza Kholose 3:9-12.) Senta kahle lamuhla kutibuta kutsi: ‘Unjani umoya lengiwukhombisako? Ngingawukhombisa njani kancono umoya lojabulisa Nkulunkulu? Ngingasifaka yini sandla ekutfutfukiseni umoya lomuhle ebandleni?’ Ase sifanekise: Ensimini yabobhekilanga, imbali  ngayinye lenembala lomuhle yenta yonkhe lensimi ibe yinhle. Tsine singulenye yini “yaletimbali” leyengeta buhle ebandleni? Nakanjani, kufanele silwe kamatima kute sifanane nayo. Nyalo, ase sihlole kutsi yini lesingayenta kute sikhombise umoya lojabulisa Nkulunkulu.

4. Uyini “umoya welive”?

⁴ Naku imiBhalo lesitjela kona: “Kodvwa tsine asikanikwa wona umoya welive; kepha sinikwe [umoya] lovela kuNkulunkulu.” (1 Khor. 2:12) Uyini “umoya welive”? Ufanana nemoya lokukhulunywa ngawo ku-Efesu 2:2, lotsi: “Lebenikadze nihamba kuto ngekwendlela yalomhlaba, ngekwembusi wemandla emkhatsi, umoya losasebenta kubantfu labangalaleli Nkulunkulu.” ‘Lamandla emkhatsi’ angumoya welive nobe simo sengcondvo, futsi asitungelete njengemoya mbamba lesiwuphefumulako. Agcwele yonkhe indzawo. Bantfu labanyenti lamuhla banesimo sengcondvo sekutsi kute umuntfu lokufanele akutjele kutsi wenteni nobe batsi, lwela emalungelo akho. Labantfu bayincenye ‘yebantfu labangalaleli’ balelive laSathane.

5. Ngumuphi umoya lomubi lowakhonjiswa ngulabanye baka-Israyeli?

⁵ Kucabanga lokunjalo akucali lamuhla. Esikhatsini saMosi, Khora wavukela labo labebahola ebandleni laka-Israyeli. Abehlasela Aroni nemadvodzana akhe labekhetfwe kutsi abe baphristi. Kungenteka kutsi wenta loko ngobe abona emaphutsa abo. Nobe abeke wakhonona ngekutsi Mosi uwasebentisa kabi emandla akhe—unika tihlobo takhe imisebenti letsite. Kunobe ngukuphi, kuyacaca kutsi Khora wacala kubuka tintfo ngembono wakhe futsi wakhuluma kabi ngalabo labakhetfwe nguJehova, watsi kubo ngekwedzelela: “Senihambe kakhulu! . . . Nine-ke nitiphakamiselani etikwalesive?” (Num. 16:3) Ngendlela lefananako, Dathani na-Abiramu bakhonona ngaMosi, bamtjela kutsi ‘ufuna kulibala kutibusa la etikwabo.’ Ngesikhatsi babitwa kutsi baye kuMosi, baphendvula ngekwedzelela batsi: “Singeke site!” (Num. 16:12-14) Kuyacaca kutsi Jehova akazange ajabule ngemoya labawukhombisa. Watibhubhisa tonkhe letihlubuki.—Num. 16:28-35.

6. Labanye bangelikhulu lekucala baveta njani kutsi banesimo sengcondvo lesibi, futsi kungenteka besiyini sizatfu sabo sekwenta njalo?

⁶ Nangelikhulu lekucala kunalabanye labacala kungabata labo labacondzisa libandla, futsi “bawedzelela emandla aNkulunkulu.” (Juda 8) Lamadvodza abengajabuli ngemisebenti layentako, futsi etama kwenta kutsi nalabanye bangawahloniphi emadvodza labekwelwe kwenta imisebenti levela kuNkulunkulu.—Fundza 3 Johane 9, 10.

7. Yini leyenta kube nesidzingo sekunakisisa kakhulu ebandleni lamuhla?

⁷ Kusebaleni kutsi umoya lonjalo awudzingeki ebandleni lebuKhristu. Kungaleso sizatfu kudzingeka sinakisise. Emadvodza lamadzala lasebandleni ayawenta emaphutsa, njengobe abenjalo nangesikhatsi saMosi nesemphostoli Johane. Labadzala belibandla bangenta emaphutsa latsintsa tsine. Nakungenteka loko, angeke kube kuhle nangabe lilunga lelibandla likhombisa umoya welive, lifune kwentiwe “bulungisa” ngenkhani nobe “kwentiwe lokutsite ngalomzalwane.” Jehova angase akhetse kungawanaki emaphutsa latsite lamancane. Angeke yini natsi sente lokufananako? Ngesizatfu sekutsi babona emaphutsa lentiwa ngulabadzala belibandla, labanye labonako ebandleni abafuni kuhlangana nekomidi yalabadzala leyabelwe kutsi ibasite. Loku singakufananisa nesigulane lesilahlekelwa lusito lwekwelashwa ngobe nje kunalokutsite lesingakutsandzi ngalodokotela.

8. Ngumiphi imibhalo lengasisita kutsi sibe nembono lomuhle ngalabo labacondzisa libandla?

 ⁸ Kute siwubalekele umoya lonjalo, singakhumbula kutsi eBhayibhelini Jesu uchazwa ngekutsi ‘esandleni sakhe sangesekudla uphetse tinkhanyeti letisikhombisa.’ ‘Letinkanyeti’ timelela babonisi labagcotjiwe, nabo bonkhe labababonisi emabandleni. Jesu angacondzisa ‘letinkanyeti’ letisesandleni sakhe ngendlela yena layibona ifanele. (Semb. 1:16, 20) Njengobe ayiNhloko yelibandla lebuKhristu, Jesu uyaticondzisa tigungu talabadzala. Nangabe lotsite kulesigungu adzinga seluleko, Loyo ‘lonemehlo lafanana nelilangabi lemlilo’ utawuciniseka ngekutsi loko kwentiwa ngesikhatsi nangendlela yaKhe. (Semb. 1:14) Nakusengakenteki loko, tsine kufanele sibahloniphe labo labagcotjwe ngemoya longcwele, ngobe Pawula wabhala: “Hloniphani baholi benu, nilalele imitsetfo yabo, ngobe balindza imiphefumulo yenu bangaphumuli, njengobe bayawulandzisa ngayo. Nanenta njalo, nibasita, umsebenti wabo batawenta ngekujabula, hhayi ngelusizi; ngobe nani kungeke kunisite loko.”—Heb. 13:17.

9. (a) Ngukuphi kuvivinywa umKhristu langahlangabetana nako nakanikwa seluleko nobe siyalo? (b) Yini lokufanele siyente nasinikwa siyalo?

⁹ Umoya wemKhristu ungavivinywa nangabe anikwa seluleko nobe ayekeliswa imisebenti letsite ebandleni. Lomunye umzalwane losemusha waniketwa siyalo ngekuhlakanipha ngulabadzala ngobe abedlala imidlalo yema-video lenebudlova. Lokubuhlungu kutsi akazange asemukele  lesiyalo futsi kwadzingeka kutsi ayekeliswe kuba yinceku lesebentako ngobe abengasaphili ngetimiso temiBhalo lebetimenta afaneleke. (Hla. 11:5; 1 Thim. 3:8-10) Ngemuva kwaloko, lomzalwane watjela bantfu kutsi akavumelani nalesincumo lesitsetfwe, wase ubhalela lihhovisi leligatja tikhatsi letinyenti akhuluma kabi ngalabadzala belibandla waphindze wenta nalabanye ebandleni kutsi bente lokufananako. Ngako-ke, kuyintfo lembi kucedza kuthula kwelibandla ngesizatfu sekufuna kutsetselela bubi lesibentile. Sitawube senta kahle nangabe sibuka siyalo njengelitfuba lekubona butsakatsaka betfu lebesingabunaki bese sisemukela ngekushesha.—Fundza Sililo 3:28, 29.

10. (a) Chaza loko lesingakufundza kuJakobe 3:16-18 mayelana nemoya lomuhle nalomubi. (b) Uba yini umphumela nasikhombisa “kuhlakanipha lokuchamuka ngetulu”?

¹⁰ Umbhalo waJakobe 3:16-18 usitjela ngaloko lokubangela umoya lomubi nalomuhle ebandleni. Utsi: “Lapho kunemona nembango khona, kunesiphitsiphitsi nayo yonkhe imisebenti lemibi. Kodvwa kuhlakanipha lokuchamuka ngetulu kwekucala kumsulwa, bese kuba nekuthula, nekutfobeka, nekulalela, kugcwele bubele netitselo letihle; akunalo lubandlululo nekutentisa. Bantfu labaletsa kuthula, basuke bahlanyela kuthula, bese bavuna kulunga.” Njengobe sitiphatsa ngekuvumelana ‘nekuhlakanipha lokuchamuka ngetulu,’ buntfu betfu lobufanana nebaNkulunkulu butasenta sifake sandla ekutfutfukiseni umoya lomuhle nasinebazalwane.

11. (a) Kulondvolota umoya lomuhle kutasisita kutsi sibalekele ini? (b) Yini lesiyifundzako esibonelweni saDavide?

¹¹ Kufanele sikhumbule kutsi Jehova unike labadzala umsebenti wekutsi ‘beluse libandla laNkulunkulu.’ (Imis. 20:28; 1 Phet. 5:2) Ngako-ke, siyacaphela kutsi indlela lencono kuhlonipha tinhlelo taNkulunkulu ngisho nobe singulabadzala belibandla nobe singesibo. Kulondvolota umoya lomuhle kungasisita kutsi singanaki kakhulu kunikwa imisebenti ebandleni. Ngesikhatsi iNkhosi Sawula yaka-Israyeli ibona kutsi Davide utawutsatsa bukhosi bayo, Sawula “waba neliso lelibi kuDavide.” (1 Sam. 18:9) Lenkhosi yaba nemoya lomubi yaze yafuna nekubulala Davide. Kunekutsi sikhatsateke kakhulu ngekuba neligunya njengaSawula, kungaba kuhle kulingisa Davide. Ngetulu kwako konkhe kungalungi lahlangabetana nako, Davide wachubeka abahlonipha labo lababekwe nguNkulunkulu.—Fundza 1 Samuweli 26:23.

12. Yini letawusita ekugcineni bunye ebandleni?

¹² Kuba nemibono leyehlukehlukene kungakucedza kuthula ebandleni—ngisho nakubabonisi belibandla. Leseluleko seliBhayibheli singasisita kuloku: “Nijakiselane ngekuhloniphana” futsi, “Ningacabangi kutsi nihlakaniphile” emehlweni enu. (Rom. 12:10, 16) Kunekutsi sigcizelele kutsi imibono yetfu ilungile, kufanele sikhumbule kutsi kunemibono leminyenti lengasetjentiswa. Nasetama kuyicondza imibono yalabanye, singasita ekugcineni bunye ebandleni.—Fil. 4:5.

13. Kufanele siyitsatse njani imibono yetfu, futsi ngusiphi sibonelo lesiseBhayibhelini lesifanekisa loku?

¹³ Loku kusho kutsi kubi yini kuveta imibono yetfu nasibona lokutsite ebandleni lesicabanga kutsi kufanele kulungiswe? Cha, akusinjalo. Ekhulwini lekucala leminyaka, kunesimo lesavela lesabangela kucabana lokukhulu. Bazalwane ‘bancuma kutsi Pawula naBhanabasi nalabanye kufanele bahambe baye eJerusalema bayewubonana nebaphostoli nebabonisi ngaleyo ndzaba.’ (Imis. 15:2) Akungabateki kutsi ngamunye kulabazalwane abenawo umbono wekutsi ingacatululwa  njani lendzaba. Nobe kunjalo, ngemuva kwekutsi bonkhe sebavete imibono yabo, batsatsa sincumo ngelusito lwemoya longcwele. Ngako labazalwane abazange bachubeke baveta imibono yabo. Ngesikhatsi bazalwane emabandleni batfola incwadzi lecuketse sincumo lesitsetfwe, “bajatjuliswa ngemavi ekubakhutsata” futsi ‘bacinisela ekukholweni.’ (Imis. 15:31; 16:4, 5) Nalamuhla, nasesiyetfulile kulabadzala lababekiwe indzaba letsite lesikhatsatako, kufanele siyishiyele etandleni tabo sinelitsemba lekutsi batayilungisa ngelusito lwemthantazo.

14. Singawukhombisa njani umoya lomuhle ebuhlotjeni betfu nalabanye?

¹⁴ Ebuhlotjeni betfu nalabanye, manyenti ematfuba ekukhombisa umoya lomuhle. Sonkhe singenta lokunyenti lokuhle nangabe sikhombisa umoya wekutsetselela nasiphatfwa kabi. LiVi laNkulunkulu liyasitjela: “Nibeketelelane, nitsetselelane, nangabe umuntfu akhube lomunye; ngobe phela neNkhosi yanitsetselela, nani-ke yentani njalo.” (Khol. 3:13) Lamavi latsi “nangabe umuntfu akhube lomunye” aveta kutsi tikhona tizatfu letivakalako letingasenta sikhutjwe ngulabanye. Nobe kunjalo, kunekutsi sinake kakhulu tintfo letingakabaluleki letentiwa ngulabanye, siphindze siphatamise umoya wekuthula ebandleni, setama kulingisa Jehova sitsetselele ngalokukhululekile sichubeke simkhonta sindzawonye.

15. (a) Yini lesingayifundza kuJobe mayelana nekutsetselela? (b) Umthantazo ungasisita njani kutsi sikhombise umoya lojabulisako?

¹⁵ Singafundza esibonelweni saJobe mayelana nekutsetselela. Bantfu labatsatfu labatsi babadvudvuti bakhe basho emavi lamanyenti labuhlungu lamkhuba. Nobe kunjalo, Jobe wabatsetselela. Njani? ‘Abebathantazela labangani bakhe.’ (Jobe 16:2; 42:10) Kuthantazela labanye kungayishintja indlela lesibatsatsa ngayo. Kuthantazela onkhe emaKhristu, kusisita sibe nemoya lofanana newaKhristu. (Joh. 13:34, 35) Njengobe sithantazela bazalwane betfu, kufanele sithantazele nemoya longwele. (Luk. 11:13) Umoya waNkulunkulu utasisita sivete buntfu bebuKhristu endleleni lesiphatsa ngayo labanye.—Fundza Galathiya 5:22, 23, NW.

16, 17. Mayelana ‘nemoya’ lesiwukhombisako, yini lotimisele kuyenta?

¹⁶ Kutawuba nemiphumela lejabulisako nangabe lilunga ngalinye lelibandla likwenta umgomo walo kusita ekutfutfukiseni umoya lomuhle ebandleni. Njengobe sesifundze ngako konkhe loku, singaphetsa ngekutsi singawutfutfukisa umoya lomuhle lesiwukhombisako. Nangabe kunjalo, asivumele liVi laNkulunkulu lisihlole. (Heb. 4:12) Pawula labekhatsateke kakhulu ngetento takhe ebandleni, watsi: “Angitikhobosi ngalutfo ngekwami, noko-ke akusho kutsi loko kungenta ngemukeleke kuNkulunkulu kutsi ngilungile. Kodvwa yiNkhosi lengehlulelako.”—1 Khor. 4:4.

¹⁷ Njengobe silwa kamatima kute sitiphatse ngekuvumelana nekuhlakanipha kwaNkulunkulu, singatsatsi imibono yetfu njengalebaluleke kakhulu nobe sifune imisebenti leminyenti ebandleni, sitawusita ekutfutfukiseni umoya lomuhle ebandleni. Nasinemoya wekutsetsela futsi sinembono lomuhle ngalabanye, sitawujabulela buhlobo lobunekuthula nemakholwa lesikanye nawo. (Fil. 4:8) Njengobe senta konkhe loku, singaciniseka ngekutsi Jehova naJesu batawujabula ‘ngemoya wetfu’ lesiwukhombisako.—Flm. 25.