BEKUNGUMNYAKA wa-49 C.E., ngesikhatsi Phetro, Jakobe naJohane—“labebatiwa ngekutsi batinsika”—baniketa umphostoli Pawula nesisebenti lebesikanye naye, Bhanabasi, umsebenti lotsite. Bekufanele bakhumbule emaKhristu lamphofu nabashumayela kubantfu betive. (Gal. 2:9, 10) Bawenta njani lomsebenti?

Tincwadzi letabhalwa nguPawula tikhombisa kutsi abewunaka lomsebenti. Nasi sibonelo: Wabhalela emaKhristu aseKhorinte watsi: “Macondzana neminikelo lebutselwa kusita labangcwele, njengobe ngayala emabandla aseGalathiya, yentani njalo nani. Njalo nje ngelilanga lekucala evikini, akube ngulowo nalowo alondvolote loko lokumlingene, kuze kutsi iminikelo ingentiwa sengikhona. Nase ngifikile, labo lenibakhetsile ngitawubatfumela kanye netincwadzi tekubetfula, bamikise letipho tenu telutsandvo eJerusalema.”—1 Khor. 16:1-3.

Encwadzini yakhe yesibili lephefumulelwe leya kubaseKhorinte, Pawula waphindze wayichaza injongo yaleyo minikelo. Watsi kubo: “Nine ninenala letawuhlangabetana netidzingo tabo.”—2 Khor. 8:12-15.

Ngesikhatsi Pawula abhalela emaKhristu laseRoma nga-56 C.E., kubutfwa kweminikelo besekucishe kuphelile. Watsi: “Ngisaya eJerusalema kuyawukhonta labangcwele. Ngobe kwaba kuhle kubaseMasedoniya nebase-Akhaya kutsi banikelele labangcwele labamphofu baseJerusalema.” (Rom. 15:25, 26) Masinyane ngemuva kwaloko, Pawula wawucedza umsebenti wakhe ngobe ngesikhatsi abuyela eJerusalema futsi aboshwa, naku lakutjela iNdvuna yaseRoma Feliksi: “Bengibuyele kuletsa tipho esiveni sakitsi kanye nekunikela imihlatjelo.”—Imis. 24:17.

Simo lesavetwa ngemaKhristu angelikhulu lekucala siyabonakala kuloko Pawula lakusho ngebaseMasedoniya. Watsi laba baseMasedoniya ‘bebabancengisisa ngekweminikelo yabo yesihle.’ Lomphostoli wakhutsata baseKhorinte kutsi balandzele leso sibonelo. Watsi: “Lowo nalowo akatincumele yena enhlitiyweni yakhe kutsi utawunikela kangakanani, bese unikela ngekukhululeka, hhayi ngekusola nangekucindzetelwa. Nkulunkulu utsandza umuntfu lonikela ngenhlitiyo lemhlophe.” Yini lebeyenta lamabandla akhombise kwephana lokunjalo? Sifiso sabo bekungasiko ‘kusita labangcwele kuphela, kodvwa nekutsi labanyenti babonge Nkulunkulu.’ (2 Khor. 8:3, 4; 9:7, 12) Kupha kwetfu kungaba netinjongo letifananako. Nkulunkulu Jehova utawubusisa umoya lonjalo, lomuhle nalote bugovu—sibusiso sakhe senta umuntfu acebe.—Taga 10:22.

Njengasemalangeni emphostoli Pawula, bantfu labanyenti lamuhla ‘balondvolota’ nobe babekele eceleni imali letsite labatayifaka emabhokisini emnikelo labhalwe kutsi “Umsebenti Wemhlaba Wonkhe.” (1 Khor. 16:2) Inyanga ngayinye, emabandla atfumela leminikelo ehhovisi laboFakazi BaJehova lelinakekela live lawo. Ungakhona nekutfumela iminikelo enhlanganweni lesemtsetfweni lesetjentiswa boFakazi BaJehova eveni lakini. Kute wati ligama lenhlangano lesemtsetfweni lesetjentiswa boFakazi BaJehova eveni lakini, sicela uchumane nelihhovisi leligatja lelinakekela live lakini. Likheli lalelihhovisi leligatja liyatfolakala ku-www.pr418.com. Tinhlobo letehlukene teminikelo longayitfumela tihlanganisa leti:

IMINIKELO LECONDZILE

• Iminikelo lefaka ekhatsi imali, tintfo tekutihlobisa letinjengebucwebe nobe letinye tintfo takho letiligugu.

• Kufanele ubhale incwadzi letawuchaza kutsi lemali naleletinye tintfo titipho leticondzile.

KUPHA LOKUHLELIWE

Ngetulu kwekunikela ngemali naletinye tintfo takho letiligugu, kunaletinye tindlela tekupha letingazuzisa umsebenti weMbuso lowentiwa emhlabeni wonkhe. Letindlela tibalwe lapha ngentasi. Ngisho nobe ungatsandza kusebentisa yiphi indlela nobe tindlela, sicela ucale utsintsane nelihhovisi leligatja lelinakekela live lakini kute ubone kutsi nguyiphi kuletindlela lesetjentiswako kulelo live. Njengobe tintfo letifunwa ngumtsetfo tehlukahluka kanjalo nemitsetfo yemitselo, kubalulekile kucale ukhulumisane netati temtselo, netemtsetfo ngembikwekutsi ukhetse indlela lencono yekunikela.

Umshuwalensi: Ngumnikelo lowentiwa ngekutsi kubhaliswe inhlangano lesetjentiswa boFakazi BaJehova njengendlalifa yemshuwalensi wekuphila nobe wemhlalaphansi.

Ema-Account Asebhage: Ema-account asebhange, timphepha letifakazela kufakwa kwemali nobe ema-account emuntfu emhlalaphansi, angase aniketwe inhlangano lesetjentiswa boFakazi BaJehova nakwenteka lowo muntfu ashona, ngekuvumelana netimfuneko telibhange talelo live.

Emasheya Nema-Bond: Kunganikelwa ngemasheya nema-bond abe sipho (outright gift) kulenhlangano lesetjentiswa boFakazi BaJehova nobe ibhaliswe njengendlalifa nakwenteka umnikati wemshuwalensi afa (i-Transfer on Death agreement).

Imphahla Lengatfwaleki: Kunganikelwa ngemphahla lengatfwaleki enhlanganweni lesetjentiswa boFakazi BaJehova ngekutsi kwentiwe sipho lesicondzile (outright gift), nobe nangabe leyo mphahla kuyindzawo yekuhlala, igcinelwe umnikati wayo kutsi ahlale kuyo nangabe asaphila.

Tincwadzi Temafa Kanye Nema-Trust: Imphahla nobe imali inganikelwa enhlanganweni lesetjentiswa boFakazi BaJehova ngekusebentisa incwadzi yelifa lesemtsetfweni nobe kubhalisa leyo nhlangano kutsi ibe yindlalifa lenganakekela lelo lifa. Nangabe indlalifa kuyinhlangano yenkholo, ingase itfole kubonelelwa ekubhadaleni umtselo.

Kute utfole kwatiswa lokubanti, ungachumana ne-Accounting Office ngelucingo nobe ngekuyibhalela, usebentisa likheli lelingentansi nobe ungachumana nelihhovisi leligatja lelinakekela live lakini.