1, 2. Kukhumbula kutsi iyini intsandvo yaNkulunkulu kungasisita njani, futsi yini lesingayifundza eNkhosini Davide?

TICABANGE uhamba entsabeni lenetindlela letehlukene kabili. Utawukhetsa kuhamba ngayiphi indlela? Mhlawumbe ungagibela etjeni lelisedvutane kute ubone kutsi indlela ngayinye iya kuphi. Kutibona kahle letindlela usendzaweni lephakeme, kungakusita ubone kutsi nguyiphi indlela lekahle lokufanele uhambe ngayo. Kusebentisa simiso lesifananako kungasisita nasenta tincumo letibalulekile. Kubuka tintfo ngembono losezingeni lelisetulu leMdali, kutasisita ‘sihambe endleleni’ lefunwa nguJehova.—Isa. 30:21.

² Esikhatsini lesinyenti sekuphila kwayo, iNkhosi Davide yaka-Israyeli wasendvulo, yabeka sibonelo lesihle sekuhlale ikhumbula kutsi iyini intsandvo yaNkulunkulu. Ase sicoce ngetentakalo letimbalwa tekuphila kwaDavide kute sifundze ekutiphatseni kwalendvodza lebeyinenhlitiyo letinikele ngalokuphelele kuNkulunkulu Jehova.—1 Khos. 11:4.

3, 4. (a) Yini leyenta Davide walwa naGoliyathi? (b) Davide abenamuphi umbono ngelibito laNkulunkulu?

³ Cabanga ngalesikhatsi Davide abukene nesidlakela semaFilisti lesinguGoliyathi. Yini leyenta Davide wafuna kulwa nalesidlakela lesasicishe sibe ngemamitha lamatsatfu budze, futsi lesasihlome siphelele? (1 Sam. 17:4) Bekusibindzi saDavide yini? Bekukukholwa kwakhe kuNkulunkulu yini? Kokubili, sibindzi nekukholwa kwadlala indzima lenkhulu kulesento sakhe sebuchawe. Nobe kunjalo, inhlonipho ngaJehova nangelibito lakhe leliphakeme, kwenta Davide watsatsa sinyatselo sekulwa naleso sidlakela. Atfukutsele futsi amangele, Davide wabuta: “Ungubani yena lomFilisti longakasoki nekusoka kutsi angabita insayeya emabutfo aNkulunkulu lophilako?”—1 Sam. 17:26.

⁴ Ngesikhatsi asondzela kuGoliyathi, Davide watsi:  “Wena uta kimi uphetse inkemba, nelijozi, nesikhali, kodvwa mine ngita kuwe ngelibito laSimakadze wetimphi, Nkulunkulu wemabutfo aka-Israyeli, wona lawo mabutfo bewuwabita insayeya.” (1 Sam. 17:45) Ngekwetsembela kuNkulunkulu weliciniso, Davide wasehlula lesidlakela semaFilisti ngekusishaya ngelitje linye asebentisa silingi. Davide akagcinanga kuleso sentakalo kwetsembela kuJehova nekuhlonipha libito lakhe lelingcwele, kodvwa wachubeka enta njalo kuphila kwakhe konkhe. Kungako Davide akhutsata lamanye ema-Israyeli kutsi ‘atibonge ngelibito laJehova lelingcwele.’—Fundza 1 Tikhronike 16:8-10.

5. Ngusiphi simo longaba kuso lesingafanana nekwesabisa kwaGoliyathi?

⁵ Uyajabula yini ngekutsi Nkulunkulu wakho nguJehova? (Jer. 9:24) Wenta njani nangabe bomakhelwane, bantfu losebenta nabo, lofundza nabo nobe tihlobo takho tikhuluma kabi ngaJehova futsi tihlekisa ngaboFakazi bakhe? Uyalivikela yini libito laJehova nangabe lihlanjalatwa, wetsembe kutsi utakusekela? Kuliciniso kutsi ‘kunesikhatsi sekubindza,’ kodvwa akukafaneli sibe nemahloni ekuba boFakazi BaJehova nekuba balandzeli baJesu. (Shu. 3:1, 7; Mak. 8:38) Ngisho nobe kudzingeka sikhombise kucabangela nenhlonipho nasikhuluma nebantfu labangasitsandzi, asingafanani nema-Israyeli ‘lajabha atfutfumela’ ngesikhatsi eva emavi ekwetfusa aGoliyathi. (1 Sam. 17:11) Esikhundleni sekwenta njalo, asitsatse sinyatselo masinyane kute kudvunyiswe libito laNkulunkulu Jehova. Sifiso setfu kusita bantfu bati kutsi Jehova unguNkulunkulu lonjani. Kute sikwente loko, sisebentisa liVi lakhe lelibhaliwe sisite labanye babone kubaluleka kwekusondzela kuNkulunkulu.—Jak. 4:8.

6. Yini Davide labefuna kuyifeza ngekulwa naGoliyathi, futsi yini lokufanele ibaluleke kakhulu kitsi?

⁶ Kulwa kwaDavide naGoliyathi kusifundzisa lesinye sifundvo lesibalulekile. Ngesikhatsi Davide eta agijima kulelibutfo lemphi, wabuta: “Utakwentelwani umuntfu lotawubulala lomFilisti [longuGoliyathi] esuse lihlazo ka-Israyeli?” Bantfu bamphendvula ngekuphindza loko labebake bakusho: ‘Inkhosi itsite itamnika umcebo lomnyenti umuntfu longahle ambulale. Itawuphindze imendzisele nendvodzakati yayo.’ (1 Sam. 17:25-27) Kutfola umvuzo lotsite bekungasiyo intfo lebaluleke kakhulu kuDavide. Abenenjongo lebalulekile. Davide abefuna kudvumisa Nkulunkulu weliciniso. (Fundza 1 Samuweli 17:46, 47.) Kutsiwani ngatsi? Kubaluleke kakhulu yini kitsi kutakhela ligama ngekucongelela umcebo nekuba bantfu labadvumile kulelive? Sifuna kufanana naDavide lowahlabela watsi: “Dvumisani Simakadze kanye nami, siphakamise libito lakhe kanyekanye.” (Hla. 34:3) Shengatsi singetsembela kuNkulunkulu, sibeke libito lakhe kucala kunewetfu.—Mat. 6:9.

7. Singakwakha njani kukholwa lokucinile lokudzingekako nasihlangana nebantfu labangalitsandzi liciniso?

⁷ Kulwa ngesibindzi naGoliyathi bekudzinga kutsi Davide etsembele ngalokuphelele kuJehova. Davide losemusha abenekukholwa lokucinile. Lenye indlela labekwakhe ngayo kukholwa kwakhe, bekukwetsembela kuNkulunkulu nakenta umsebenti wekwelusa. (1 Sam. 17:34-37) Natsi sidzinga kukholwa lokucinile kute sichubeke sishumayela, ikakhulukati nangabe sitfola bantfu labangalitsandzi liciniso. Singakwakha kukholwa lokunjalo ngekutsi setsembele kuNkulunkulu emisebentini yetfu yamalanga onkhe. Nasi sibonelo: Singacoca ngemaciniso eliBhayibheli nebantfu labahleti eceleni kwetfu nasihamba ngetintfo tekwetfwala sive. Singaphinze sicoce nebantfu lesihlangana nabo endleleni nasenta umsebenti wekushumayela emtini ngemuti.—Imis. 20:20, 21.

8, 9. Davide wakhombisa njani kutsi abehlala ayikhumbula intsandvo yaJehova endleleni laphatsa ngayo iNkhosi Sawula?

⁸ Lesinye sibonelo sesifiso saDavide sekwetsembela  kuJehova, simayelana naSawula—inkhosi yekucala yaka-Israyeli. Sawula wetama tikhatsi letintsatfu kugwaza Davide ngesikhali ambhance nelubondza, kodvwa Davide abevika, angafuni kuphindzisela. Ekugcineni, wambalekela Sawula. (1 Sam. 18:7-11; 19:10) Sawula wakhetsa emadvodza langu-3 000 aka-Israyeli futsi wahamba wayewufuna Davide ehlane. (1 Sam. 24:2) Ekugcineni, Sawula angati wangena emhumeni lapho Davide nemadvodza labekanye nawo bebakhona. Davide abengasebentisa lelitfuba kute abulale lenkhosi lebeyifuna kuphila kwakhe. Ecinisweni, bekuyintsandvo yaNkulunkulu kutsi Davide atsatse sikhundla saSawula njengenkhosi yaka-Israyeli. (1 Sam. 16:1, 13) Kube Davide abelalele seluleko semadvodza labekanye naye, lenkhosi ngabe yabulawa. Kodvwa Davide watsi: “Simakadze akakutsandzi kutsi ngente intfo lenje enkhosini yami, lengulogcotjiwe waSimakadze.” (Fundza 1 Samuweli 24:4-7.) Sawula abesolo ayinkhosi legcotjwe nguNkulunkulu. Davide abengafuni kwemuka Sawula bukhosi, ngobe Jehova abesengakamsusi kuleso sikhundla. Ngekujuba umphetfo wengubo yaSawula nje kuphela, Davide wakhombisa kutsi abengakahlosi kumlimata Sawula.—1 Sam. 24:11.

⁹ Davide waphindze wakhombisa kumhlonipha logcotjiwe waNkulunkulu ngesikhatsi ayibona kwekugcina lenkhosi. Ngaleso sikhatsi, Davide na-Abishayi befika endzaweni lapho Sawula abekanekise khona futsi bamtfola alele. Ngisho nobe Abishayi aphetsa ngekutsi Nkulunkulu abesanikele sitsa saDavide esandleni sakhe futsi asafuna kugwaza Sawula ngesikhali size siphumele emhlabatsini, Davide akazange akuvumele loko. (1 Sam. 26:8-11) Ngesizatfu sekutsi Davide wachubeka afuna sicondziso saNkulunkulu, akazange ashintje kutimisela kwakhe kwenta ngendlela levumelana nentsandvo yaJehova, ngisho nobe Abishayi abemncengisisa.

10. Ngusiphi simo lesivivinyako lesingabhekana naso, futsi yini lengasisita kutsi sime sicinile?

¹⁰ Natsi singabhekana nesimo lesivivinyako nangabe bantfu lesibetayele betama kusiphocelela kutsi silandzele kucabanga kwebantfu kunekutsi basisekele nasenta intsandvo yaJehova. Njenga-Abishayi, labanye bangaze basikhutsate kutsi sitsatse tinyatselo singakacabangi ngentsandvo yaNkulunkulu endzabeni letsite. Kute sime sicinile, kudzingeka kusicacele kahle kutsi uyini umbono waJehova endzabeni letsite futsi sitimisele kunamatsela etindleleni takhe.

11. Yini loyifundzile kuDavide mayelana nekugcina intsandvo yaNkulunkulu ibalulekile engcondvweni yakho?

¹¹ Davide wathantaza kuNkulunkulu Jehova watsi: “Ngifundzise kwenta intsandvo  yakho.” (Fundza Tihlabelelo 143:5, 8, 10.) Kunekutsi etsembele ekucabangeni kwakhe nobe alalele kuncengwa ngulomunye umuntfu, Davide abetimisele kufundziswa nguNkulunkulu. ‘Wazindla ngayo yonkhe imisebenti yaJehova, wacabanga ngato tonkhe tento taNkulunkulu.’ Natsi singayati intsandvo yaNkulunkulu ngekuhlolisisa imiBhalo nangekuzindla ngekulandzisa lokunyenti lokuseBhayibhelini kwendlela Jehova labaphatsa ngayo bantfu.

12, 13. Yini leyenta Davide wawatfululela emhlabatsini emanti labekawaphatselwe ngulamadvodza lamatsatfu?

¹² Lokunye lokufanele sikulingise, yindlela Davide latijabulela ngayo timiso lebetihambisana neMtsetfo nesifiso sakhe sekuphila ngekuvumelana nato. Cabanga ngalokwenteka ngesikhatsi Davide atsi womele “emanti asemtfonjeni longasesangweni laseBhetlehema!” Emadvodza lamatsatfu labekakanye naDavide, afohla angena kulelidolobha lebelihlala emaFilisti futsi amphatsela lamanti. Nobe kunjalo, “Davide wala kuwanatsa lamanti, esikhundleni saloko wawatfululela embikwaSimakadze.” Wakwentelani loko? Davide uyachaza: ‘Nkulunkulu akangivumeli kutsi ngikwente loku! Kufanele yini kutsi nginatse ingati yalamadvodza latilahle ematsambo ngemphilo yawo? Njengobe abetilahle ematsambo ngemphilo yawo ngekungikhelela lamanti.’—1 Khr. 11:15-19.

¹³ Davide abati kutsi uMtsetfo utsi ingati kufanele itfululelwe kuJehova ingadliwa. Abesicondza nesizatfu sekutsi kwentiwe kanjalo. Davide abati kutsi “kuphila kwemtimba kusengatini.” Nobe kunjalo, lawa bekungemanti, kungesiyo ingati. Yini leyenta Davide wala kuwanatsa? Abesicaphela simiso lebesihambisana nalomtsetfo. KuDavide, lamanti abeligugu njengengati yalamadvodza lamatsatfu. Ngako-ke, abengeke akhone kuwanatsa lamanti. Esikhundleni sekutsi awanatse, wabona kuncono kuwatfululela emhlabatsini.—Lev. 17:11; Dut. 12:23, 24.

14. Yini leyasita Davide kutsi abe nembono waJehova?

¹⁴ Davide wetama kuwunakisisa umtsetfo waNkulunkulu. Wahlabela watsi:  “Yebo, Nkulunkulu wami, kujabula kwami kusekwenteni intsandvo yakho, imiyalo yakho isenhlitiyweni yami.” (Hla. 40:8) Davide wawudadisha umtsetfo waNkulunkulu futsi wazindla nangawo. Wetsembela ekuhlakanipheni kwemiyalo yaJehova. Ngako-ke, Davide akazange agcine nje ngekuwulalela uMtsetfo waMosi kodvwa abetimisele kulalela nenjongo yawo. Nasidadisha liBhayibheli, sitawube senta kahle ngekuzindla ngaloko lelikushoko futsi sikugcine etinhlitiyweni tetfu kute sikwati loko lokujabulisa Jehova endzabeni letsite.

15. Solomoni wehluleka njani kukhombisa inhlonipho ngeMtsetfo waNkulunkulu?

¹⁵ Nkulunkulu Jehova abeyitsandza kakhulu indvodzana yaDavide lenguSolomoni. Nobe kunjalo, ngekuhamba kwesikhatsi, Solomoni wehluleka kukhombisa inhlonipho ngeMtsetfo waNkulunkulu. Akazange awulalele umyalo waJehova wekutsi inkhosi lengumIsrayeli “akukafaneli iteke bafati labanyenti.” (Dut. 17:17) Solomoni watsatsa bafati labanyenti bakuletinye tive. Ngesikhatsi akhula, “emakhosikati akhe abeya ngekuya kuphambukisela inhlitiyo yakhe etithicweni.” Kunobe yini labeyicabanga, “Solomoni wenta lokubi emehlweni aSimakadze. Akazange alandzele Simakadze ngalokuphelele, njengobe kwakwente uyise Davide.” (1 Khos. 11:1-6) Kubaluleke kakhulu kutsi silalele imiyalo netimiso letiseVini laNkulunkulu. Loko kubaluleke kakhulu nawucabangela kushada.

16. Kucondza injongo yemyalo wekutsi sishade ‘kuphela entsandvweni yeNkhosi,’ kutawubatsintsa njani labo labafisa kushada?

¹⁶ Nangabe umuntfu longakholwa acala kukhombisa tento telutsandvo kitsi, indlela lesenta ngayo ikhombisa kutsi sinembono lofanana newaDavide nobe waSolomoni yini? Tikhonti teliciniso titjelwa kutsi tishade ‘kuphela entsandvweni yeNkhosi.’ (1 Khor. 7:39) Nangabe umKhristu akhetsa kushada, kufanele ashade nemuntfu lakholwa naye. Nangabe siyibona injongo yaloku lokushiwo ngimiBhalo, angeke sigcine ngekubalekela kushada nemuntfu longakholwa kodvwa sitawenta konkhe lokusemandleni kutsi singamvumeli umuntfu lonjalo asikhombise tento telutsandvo.

17. Yini lengasisita kutsi sibalekele kubanjwa silingo sekubuka titfombe letikhombisa kungcola?

¹⁷ Cabanga nangekutsi sibonelo saDavide sekutimisela kufuna sicondziso saNkulunkulu singasisita njani kutsi silwisane nesilingo sekubuka titfombe letikhombisa kungcola. Fundza lemibhalo lelandzelako, ucabange ngetimiso letitfolakala kuyo futsi utimisele kubona intsandvo yaJehova kulendzaba. (Fundza Tihlabelelo 119:37; Matewu 5:28, 29; Kholose 3:5.) Kuzindla ngetimiso takhe letisezingeni lelisetulu, kusilungiselela kutsi sisibalekele sitsiyo sekubuka titfombe letikhombisa kungcola.

18, 19. (a) Ngisho nobe abenesono, yini leyasita Davide kutsi achubeke emukelwa nguNkulunkulu? (b) Yini lotimisele kuyenta?

¹⁸ Ngisho nobe Davide aba sibonelo ngetindlela letinyenti, wenta tono letinkhulu. (2 Sam. 11:2-4, 14, 15, 22-27; 1 Khr. 21:1, 7) Nobe kunjalo, Davide abekhombisa kuphendvuka nakente sono. Wahamba naNkulunkulu “ngebucotfo benhlitiyo.” (1 Khos. 9:4) Yini lesenta sisho njalo? Kungobe Davide wetama kwenta ngekuvumelana nentsandvo yaJehova.

¹⁹ Ngisho nobe sinesono, singachubeka semukeleka kuJehova. Sinalowo mgomo engcondvweni, asidadishe liVi laNkulunkulu ngekutimisela, sizindle ngalokujulile ngaloko lesikufundza kulo futsi sente tincumo letihambisana naloko lesikugcine etinhlitiyweni tetfu. Ecinisweni, sitawube sithantaza kuJehova njengemhlabeli lowenta lesicelo ngekutitfoba: “Ngifundzise kwenta intsandvo yakho.”