“LIVI laNkulunkulu liphilile, linemandla.” (Heb. 4:12) Ngalamavi umphostoli Pawula wagcamisa emandla livi laNkulunkulu lelinawo ekutsintsa inhlitiyo nekugucula kuphila.

Tihlubuki letabakhona ngemuva kwekufa kwebaphostoli tenta emandla emlayeto weliBhayibheli, wabadida labanye. (2 Phet. 2:1-3) Ngekuhamba kwesikhatsi, baholi benkholo bacala kufundzisa kutsi liVi laNkulunkulu linemandla ekwenta imilingo. Phrofesa Harry Y. Gamble wabhala “ngekusetjentiswa kwemilingo emibhalweni yemaKhristu.” Watsi ngelikhulu lesitsatfu leminyaka, i-Church Father Origen yatsi “kuva umsindvo wemavi langcwele kungamsita umuntfu: nangabe emavi anemandla emilingo, kufanele kube emavi eliciniso lavela kuNkulunkulu lasemibhalweni anemandla kakhulu.” John Chrysostom wangelikhulu lesine leminyaka wabhala kutsi “develi angeke acale asondzele endlini leneliBhayibheli.” Waphindze watsi labanye bagaca emavesi eliBhayibheli etintsanyeni bentele kutsi abavikele. Phrofesa Gamble watsi Augustine, losati senkholo yemaKatolika “abekutsatsa njengaloko lokuvumelekile kutsi nawubulawa yinhloko ulale neliVangeli laJohane ngephansi kwemcamelo wakho.” Ngaleyondlela bantfu bebasebentisa liBhayibheli kute bente imilingo. Ucabanga kutsi ungalisebentisa yini liBhayibheli kute likwentele imilingo lengakuvikela etintfweni letimbi?

Lenye indlela levamile yekulisebentisa kabi liBhayibheli, kushaya inkatho. Kuyini kushaya inkatho? Kusho kumane uvule liBhayibheli nobe ngukuphi, bese ufundza livesi emehlo akho lalibone kucala unelitsemba lekutsi lelovesi litakunika sicondziso losidzingako. Nasi sibonelo: Ngekusho kwaPhrofesa Gamble, ngesikhatsi Augustine eva livi lemntfwana endlini yakamakhelwane litsi: “Tsatsa ufundze,” Augustine wakutsatsa loko ngekutsi Nkulunkulu umtjela kutsi avule liBhayibheli afundze umbhalo wekucala latawuhlangana nawo.

Uke weva yini ngebantfu labatsi nabasenkingeni bathantaze kuNkulunkulu bese bavula liBhayibheli nobe kuphi bakholelwa kutsi livesi lekucala labatawuhlangana nalo litabasita kuleyo nkinga? Nanobe tizatfu tekwenta loko tingaba tinhle, leyo akusiyo indlela emaKhristu lokufanele ayisebentise nakafuna sicondziso semiBhalo.

Jesu wacinisekisa bafundzi bakhe kutsi abetawubatfumelela ‘umeluleki, umoya longcwele.’ Wachubeka watsi: “Utanifundzisa konkhe, anikhumbute konkhe lenginitjele kona.” (Joh. 14:26) Ngalokwehlukile, kushaya inkatho akudzingi kutsi ube nelwati lwemiBhalo.

Umkhuba wekushaya inkatho naletinye tindlela temilingo tekusebentisa liBhayibheli tivamile. Nobe kunjalo, liVi laNkulunkulu liyakulahla kusebentisa imilingo. (Lev. 19:26; Dut. 18:9-12; Imis. 19:19) “Livi laNkulunkulu liphilile, linemandla,” kodvwa kufanele sibe nelikhono lekulisebentisa. Lwati lolunembile lweBhayibheli ngilo lolwenta kuphila kwebantfu kube ncono kakhulu hhayi kulisebentisela imilingo. Kutfola lwati lolunjalo kusite labanyenti bakhona kutiphatsa kahle, bayekela imikhuba lemibi, bacinisa imindeni yabo futsi baba nebuhlobo lobuhle neMlobi weliBhayibheli.