1, 2. Umphostoli Phetro abebhekisele kubobani nakakhuluma ‘ngalabakhetsiwe,’ futsi yini leyamenta wababita ngekutsi ‘batihambi’?

NGEMUVA kweminyaka lengaba ngu-30 Jesu enyukele ezulwini, umphostoli Phetro wabhalela ‘labakhetsiwe lababakhoseli labasakatekele ePhontusi, naseGalathiya, naseKhaphadosiya, nase-Asiya, naseBhithiniya.’ (1 Phet. 1:1) Kuyacaca kutsi ngekusebentisa ligama lelitsi ‘labakhetsiwe,’ Phetro abekhuluma ngalabo labagcotjwe ngemoya longcwele njengaye futsi ‘labatelwe kabusha baba nelitsemba leliphilako’ lekuyobusa naKhristu ezulwini. (Fundza 1 Phetro 1:3, 4.) Ngusiphi sizatfu lesamenta wabita laba labagcotjiwe ngekutsi ‘batihambi nalabendlulako’? (1 Phet. 2:11) Yini lesenta sonkhe sikunake loku, babe balidlanzana boFakazi labagcotjiwe emhlabeni wonkhe?

² Kwakuwalungela emaKhristu lagcotjiwe kubitwa ngekutsi ‘atihambi’ ngelikhulu lekucala leminyaka. Njengobe kuliciniso nangensali yalabagcotjiwe lesaphila nyalo, labagcotjiwe bangelikhulu lekucala baphila sikhashana emhlabeni. Umphostoli Pawula, longulomunye wemalunga alabagcotjiwe ‘labangumhlambi lomncane,’ uyachaza: “Kepha tsine likitsi lisezulwini, lapho silindzele khona kutsi kuvele uMsindzisi wetfu, iNkhosi Jesu Khristu.” (Luk. 12:32; Fil. 3:20) Ngesizatfu sekutsi labagcotjiwe ‘likubo lisezulwini,’ nabafa bayendlula emhlabeni bese batfola kuphila lokute kufa ezulwini. (Fundza Filiphi 1:21-23.) Kungako kutsiwa ‘batihambi’ kulelive lelibuswa nguSathane.

3. Ngumuphi umbuto lesingatibuta wona mayelana ‘naletinye timvu’?

³ Kutsiwani, ‘ngaletinye timvu’? (Joh. 10:16) Banalo yini litsemba lelisekelwe emBhalweni lekuba takhamuti letitawuhlala phakadze emhlabeni? Kuliciniso  kutsi batawuhlala phakadze emhlabeni. Nabo kwanyalo bangatsatfwa njengetihambi. Ngamuphi umcondvo?

4. Baholi bemave yini labehlulekako kuyivimbela?

⁴ Lisengakabhujiswa lelive lelibuswa nguSathane, bonkhe bantfu ngisho nemaKhristu imbala basetawubhekana nemiphumela yekutsi Sathane wavukela Jehova. KumaRoma 8:22, siyafundza: “Siyati kutsi kudzimate kube ngulesikhatsi indalo yonkhe iyabubula.” Baholi bemave, bososayensi kanye nebantfu labasita labahluphekile bayafisa kulungisa lesimo, kodvwa imetamo yabo iphelela ebaleni.

5. Kusukela nga-1914, tigidzigidzi tebantfu tenteni, futsi ngusiphi sizatfu lesibangele loko?

⁵ Kusukela ngemnyaka wanga-1914, tigidzigidzi tebantfu tikhetse kuba tikhonti teNkhosi lebekwe nguNkulunkulu, Jesu Khristu. Tite nalesincane sifiso sekuba yincenye yalelive lelibuswa nguSathane. Tiyakwala kulisekela. Esikhundleni saloko, tisebentisa kuphila kwato netintfo tato kute tisekele uMbuso waNkulunkulu.—Rom. 14:7, 8.

6. Kungamuphi umcondvo boFakazi BaJehova kutsiwa batihambi?

⁶ BoFakazi BaJehova batakhamuti letikahle kakhulu emaveni langetulu kwa-200, kodvwa nobe bakuliphi live baphila njengetihambi. Abatimbandzakanyi etindzabeni tepolitiki telive labahlala kulo. Ngisho kwanyalo, batitsatsa ngekutsi sebatakhamuti telive lelisha leletsenjiswe nguNkulunkulu. Bajabula kakhulu nababona kutsi emalanga abo ekuba tihambi kulelive lelibuswa nguSathane aya ngekuya ayancipha.

7. Tinceku taNkulunkulu titawuba njani takhamuti taphakadze, futsi kuphi?

⁷ Ngekushesha Khristu utawusebentisa ligunya lakhe kute abhubhise lelive lelibuswa nguSathane. Umbuso waKhristu utawususa sono nelusizi kulomhlaba lesiphila kuwo. Utawususa bonkhe labavukela bukhosi baJehova. Tikhonti taNkulunkulu  letetsembekile titawubese tiba takhamuti taphakadze emhlabeni loliPharadisi. (Fundza Sembulo 21:1-5.) Ngaleso sikhatsi, indalo itawube ‘seyikhululiwe kulobugcili bekubola, ibe nesabelo kulenkhululeko nebukhosi bebantfwana baNkulunkulu.’—Rom. 8:21.

8, 9. Chaza kutsi Phetro abesho kutsini nakakhuluma ‘ngekukhweshela tinkhanuko tenyama.’

⁸ Phetro wachaza loko lokulindzeleke kumaKhristu, nakatsi: “Ngiyanincenga, njengobe nitihambi nalabendlulako kulomhlaba, kutsi nitikhweshele tinkhanuko tenyama letilwa nemphefumulo.” (1 Phet. 2:11) Ekucaleni leseluleko sasibhekiswe kumaKhristu lagcotjiwe, kodvwa sisebenta ngendlela lefanako nakuletinye timvu taJesu.

⁹ Letinye tifiso natenetiswa ngendlela lefunwa nguMdali, tiyemukeleka. Ecinisweni, tisenta sikujabulele kuphila. Nasi sibonelo: Siba naso sifiso sekudla kudla lokumnandzi nekunatsa lokutsite. Siyakujabulela kudlala sitijabulise nalabanye siphindze sicocisane nabo. Siba nanesifiso sekutijabulisa ngekwelicasi nemuntfu lesishade naye. (1 Khor. 7:3-5) Kodvwa Phetro nakakhuluma ‘ngetinkhanuko tenyama’ abekhuluma ngaleto “letilwa nemphefumulo.” Kuze kucace kutsi loku kusho kutsini, lamanye emahumusho eliBhayibheli akhuluma ‘ngetifiso tenyama’ (King James Version) nobe “tifiso tesono” (New International Version). Kusebaleni kutsi nobe ngabe ngukuphi kutiphatsa lokwentiwa bantfu lokushayisana netinjongo taJehova futsi lokungalimata buhlobo betfu naNkulunkulu, kufanele sikucaphele. Nangabe umKhristu angenti njalo litsemba lakhe lekusindzisa umphefumulo wakhe lingaba sengotini lenkhulu.

10. Ngutiphi letinye tindlela Sathane latisebentisako kute ente emaKhristu abe yincenye yelive lakhe?

¹⁰ Umgomo waSathane kwenta emaKhristu eliciniso aphelelwe ngemandla ekutibona ‘atihambi’ kulelive lelibuswa nguye. Kutsandza umcebo, kutiphatsa lokubi, kutikhandza sibantfu lababalulekile, kuba nemuva wekuba “bekucala etintfweni” nekutigcabha ngebuve betfu—konkhe loku kutingibe taSathane futsi kufanele sitati. Ngekutimisela kutibalekela tilingo taSathane, sitawukhombisa ngalokucacile kutsi asifuni nakancane kuba yincenye yelive lelibuswa nguye. Sisuke sikhombisa kutsi sitihambi kulelive lalibusako. Lesikufunako kuba tikhonti taphakadze eveni lelisha lekulunga laNkulunkulu.

11, 12. Bantfu labachamuka kulamanye emave ngasikhatsi batsatfwa njani, futsi yini leshiwo ngulabanye bantfu ngaboFakazi BaJehova?

¹¹ Evesini 12, Phetro uchubeka achaza loko lokulindzeleke kumaKhristu ‘latihambi,’ utsi: “Philani imphilo yekulunga emkhatsini wemahedeni, khona kutawutsi nome banihleba ngekutsi nenta lokubi, kodvwa batsi bangabona imisebenti yenu lemihle, badvumise Nkulunkulu ngelilanga lekubuya kwakhe.” Bantfu labachamuka kulamanye emave labatakhamuti tesikhashana eveni labatfutsele kulo, ngaletinye tikhatsi baphatfwa kabi. Loko kwentiwa kutsi basuke behlukile kubomakhelwane babo, mhlawumbe bangase batsatfwe ngekutsi benta tintfo letimbi. Indlela labakhuluma ngayo, labenta ngayo tintfo, labembatsa ngayo mhlawumbe nendlela lababukeka ngayo ingase yehluke. Kodvwa kubanyembenya ngekutsi kutsiwe behlukile kubabete sisindvo nangabe batiphatsa kahle.

¹² Ngendlela lefananako, emaKhristu eliciniso ehlukile kubomakhelwane babo ngetindlela letinyenti, letifaka ekhatsi  indlela lakhuluma ngayo nasekukhetseni tekutijabulisa. Indlela lembatsa aphindze atilungise ngayo, iwenta ehluke kubantfu labanyenti emmangweni. Ngaleso sizatfu, labanye bayawahlukumeta, batsi enta tintfo letimbi. Nobe kunjalo, labanye bantfu bangase bakhulume kahle ngawo ngendlela laphila ngayo.

13, 14. Kuhlakanipha kwaNkulunkulu ‘kubonakala kuliciniso ngemiphumela yako’ ngayiphi indlela? Fanekisa.

¹³ Kutiphatsa lokuhle kungenta kubonakale kutsi asikho sidzingo sekutsi siphatfwe kabi. Ngisho naJesu, indvodza lokukuphela kwayo leyaphila ingumuntfu lote sono futsi yetsembekile kuNkulunkulu, wamangalelwa ngemanga. Labanye bebambita ngekutsi ‘yindvodza lesimiti nemnatsi weliwayini, kantsi futsi ungumngani webatselisi netoni.’ Liciniso likutsi, ngendlela latiphatsa ngayo ekukhonteni Nkulunkulu wakhombisa kutsi akasilo lolo hlobo lwemuntfu. Kungako atsi: “Kuhlakanipha kwaNkulunkulu kubonakala kuliciniso ngemiphumela yako.” (Mat. 11:19) Kunjalo nalamuhla. Nasi sibonelo: Labanye bomakhelwane beBethel leseSelters, eJalimane, bebayitsatsa njengalengakavami indlela bazalwane nabodzadze baseBethel labaphila ngayo. Kodvwa umphatsi welidolobha wabakhulumela boFakazi, watsi: “LaboFakazi labangemalunga alomndeni waseBethel, baphila imphilo yabo leyehlukile, futsi ayiyiphatamisi indlela labanye bantfu labaphila ngayo lapha emmangweni.”

¹⁴ Muva nje kwenteke lokufanako endzabeni lebeyitsintsa boFakazi BaJehova labahlala eMoscow, eRussia. Betfweswa emacala lamanyenti langemanga kwatsiwa benta tintfo letimbi. Kutsite ngaJune 2010, iNkantolo Yemalungelo Ebantfu YaseYurophu, lekanekise eStrasbourg eFulansi, yatsi itfole kutsi kuphatamisa inkhululeko yaboFakazi lobekwentiwa lidolobha laseMoscow kwakungekho emtsetfweni. Tinkantolo letincane taseMoscow atizange tisho tizatfu ‘letivakalako’ letisekela kutsi boFakazi bebanelicala etindzabeni letifaka ekhatsi kubhidlika kwemindeni, kubulala nobe kwala tindlela letitsite tekwelashwa. Ngako-ke, “sijubo lesakhishwa nguletinkantolo letincane besisikhulu kakhulu nasicatsaniswa nemtsetfo losebenta kuletinkantolo futsi besingakhombisi kucabangela.”

15. Ngusiphi simiso seliBhayibheli emaKhristu eliciniso lasemhlabeni wonkhe labasilandzelako?

¹⁵ BoFakazi BaJehova eMoscow nasemhlabeni wonkhe, benta lokutsite lokwashiwo nguPhetro kutsi onkhe emaKhristu kufanele akwente. Wabhala: ‘Tfobelani bonkhe bantfu labasetikhundleni; loko nikwente ngenca yeNkhosi: kumbusi ngobe mukhulu, nome tindvuna.’ (1 Phet. 2:13, 14) Nanobe angasiyo incenye yalelive lelibuswa nguSathane,  emaKhristu eliciniso ayatitfoba etiphatsimandleni tembuso ‘letibekiwe,’ njengobe Pawula aweluleka.—Fundza Roma 13:1, 5-7.

16, 17. (a) Ngubuphi bufakazi lobukhombisa kutsi asibavukeli bohulumende? (b) Yini labanye baholi bepolitiki labayivumile?

¹⁶ BoFakazi BaJehova nabatiphatsa ‘njengetihambi’ kulelive lelibuswa nguSathane, abakwenti loko ngobe bafuna kuvukela hulumende. Baphindze bangaphikisani nobe baphatamise labanye bantfu labasetinhlanganweni tepolitiki labaphikisana nahulumende. BoFakazi BaJehova bayakugwema kutihlanganisa netepolitiki, abafanani naletinye tinkholo. Abetami kwenta baholi betepolitiki kutsi bashintje indlela yekubusa. Akusilo liciniso kutsi bangase betame kuvukela hulumende nobe bagcugcutele labanye kutsi bamvukele.

¹⁷ Ngekulalela labasemagunyeni njengobe kushiwo seluleko saPhetro, ‘sekuhlonipha umbusi,’ emaKhristu alalela tiphatsimandla tembuso kute akhombise inhlonipho neludvumo kuto. (1 Phet. 2:17) Ngaletinye tikhatsi, tiphatsimandla tiyavuma kutsi tite tizatfu letiphatsekako tekutsi boFakazi BaJehova bayingoti. Nasi sibonelo: Steffen Reiche, longulomunye walabapolitikako eveni laseJalimane, lowake waba yindvuna yembuso eBrandenburg kamuva lowaba lilunga lephalamende watsi: “Indlela labebatiphetse ngayo boFakazi BaJehova etinkambu nasemajele beyihlanganisa tento letinhle kakhulu.” Waveta nekutsi boFakazi abazange bakushintje loko labebakukholelwa ngisho nobe bebashushiswa, futsi bebatiphatsa kahle letinye tiboshwa. Lobuntfu lobebukhonjiswa boFakazi bebubaluleke kakhulu eveni lelifanana nelaseJalimane, ngesizatfu sekutsi bantfu bakhona ababaphatsi kahle lababuya kulamanye emave nobe bantfu labanetinkholelo letehlukile.

18. (a) Yini lebangela kube yimvelo ngatsi kubatsandza bonkhe bazalwane? (b) Yini labanye labangesibo boFakazi labayicaphele?

¹⁸ Umphostoli Phetro wabhala: “Nitsandze [bonkhe] bazalwane, nesabe Nkulunkulu.” (1 Phet. 2:17) BoFakazi BaJehova bayesaba kudvumata Nkulunkulu futsi loko kubakhutsata kutsi bente intsandvo yakhe. Bayakujabulela kukhonta Jehova nekuba yincenye yenhlangano yakhe lesemhlabeni wonkhe leyakhiwa bazalwane nabodzadze labanesifiso lesifananako. Ngako-ke, kuyimvelo ngabo ‘kutsandza bonkhe bazalwane.’ Lutsandvo lolunjalo luyimvelakancane emhlabeni lesiphila kuwo futsi luyabamangalisa bantfu labangasibo boFakazi. Nasi sibonelo: Lomunye wesifazane lovakashisa bantfu futsi losebentela lenye inkapane yaseMelika, wabamba wangephansi nakabona lutsandvo lolwaboniswa kuboFakazi lababuya kulamanye emave labebete emhlanganweni wetive wanga-2009 eJalimane. Watsi solo acala kwenta lomsebenti wekuvakashisa bantfu, kwekucala ngca kubona bantfu baboniswa lutsandvo ngalendlela. Kamuva lomunye waboFakazi watsi: “Konkhe lobekushiwo ngulona wesifazane ngatsi abekusho ngelivi lelikhombisa kumangala nangemfutfo.” Emhlanganweni loke waya kuwo, uke wabeva yini bantfu bakhuluma ngalendlela babhekisele kuboFakazi?

19. Yini lokufanele sitimisele kuyenta, futsi ngani?

¹⁹ Kuto tonkhe letindlela lesesicoce ngato naletinye, boFakazi BaJehova bakwente kwacaca kutsi ‘batihambi’ kulelive lelibuswa nguSathane, futsi batimisele ngenjabulo kuhlale banjalo. Banelitsemba lelicinile lekutsi madvutane batawuba takhamuti taphakadze telive lelisha laNkulunkulu lekulunga. Unaso yini sifiso lesijulile sekuyophila kulelo live?