1. Labanye bantfu babatsatsa njani bachamuki, kodvwa yini leyenta indlela labatsatfwa ngayo ingalungi?

NJENGOBE kuvetiwe esihlokweni lesendlulile, bantfu basebentisa leligama lelitsi ‘umchamuki’ kute babukele phansi labanye, bakhombise kutsi bayabenyanya futsi ababahloniphi. Kutsatsa bantfu balesinye sive njengalabo labaphansi kunebantfu baseveni lakho, kungahloniphi. Ngetulu kwaloko, kuba nembono lonjalo kukhombisa kungawanaki emaciniso. Incwadzi letsi The Races of Mankind itsi: “Bantfu betive letehlukene banguloko lokushiwo liBhayibheli—bobhuti.” Bantfu labatalwa ngumuntfu munye bangehluka ngetindlela letitsite, kodvwa basuke babandzawonye.

2, 3. Jehova unamuphi umbono ngebachamuki?

² Kuliciniso kutsi nome sihlala kuphi, bachamuki baba khona. Bekunjalo nakuma-Israyeli asendvulo, labenebudlelwane lobukhetsekile naNkulunkulu Jehova ngenca yesivumelwane seMtsetfo. Emalungelo alabo lababengasiwo ema-Israyeli abembalwa, nobe kunjalo bekulindzeleke kutsi ema-Israyeli abaphatse kahle nangenhlonipho. Leso sibonelo lesihle lokufanele sisilandzele. EmaKhristu eliciniso awabakhetsi bantfu nobe enyanye labanye. Yini lebangela loko? Umphostoli Phetro watsi: “Nembala sengibonile kutsi Nkulunkulu akakhetsi libala lemuntfu, kodvwa lowo lomesabako ente lokulungile uyemukeleka kuye, nome angewasiphi sive.”—Imis. 10:34, 35.

³ Bachamuki bangesikhatsi sema-Israyeli bazuza ebudlelwaneni lobuhle labebanabo nema-Israyeli. Loku kwakukhombisa indlela Jehova lacabanga ngayo kulendzaba njengobe kwavetwa nguPawula eminyakeni leyalandzela ngalesikhatsi abuta ngaJehova atsi: “Nkulunkulu ngabe unguNkulunkulu wemaJuda kuphela yini? Akasiye yini futsi Nkulunkulu webetive? Vele, unguNkulunkulu newebetive.”—Rom. 3:29; Jow. 2:32.

4. Ngusiphi sizatfu lesenta sitsi kute bachamuki ‘ku-Israyeli waNkulunkulu’?

 ⁴ Ngenca yesivumelwane lesisha, libandla lemaKhristu lagcotjiwe latsatsela Israyeli wemvelo sikhundla, sive Nkulunkulu lobekufanele abe nebudlelwane lobuhle naso. Kungako lelibandla lemaKhristu lagcotjiwe libitwa ngekutsi ‘ngu-Israyeli waNkulunkulu.’ (Gal. 6:16) Pawula wachaza kutsi kulesive lesisha, “kute umehluko emkhatsini wemGriki nemJuda, walosokile nalongakasoki, wetive nemSikithi, sigcili nalokhululekile, kodvwa Khristu ungiko konkhe, futsi ukubo bonkhe.” (Khol. 3:11) Ngaleso sizatfu, bekungakafaneli kube nebachamuki ebandleni lebuKhristu.

5, 6. (a) Ngumuphi umbuto lesingatibuta wona ngalokuphatselene nembhalo wa-Isaya 61:5, 6? (b) Babobani ‘baphristi baSimakadze’ ‘nebachamuki’ Isaya lakhuluma ngabo? (c) Ngukuphi kufana lamacembu lamabili lanako?

⁵ Ngakulolunye luhlangotsi, labanye bangase bakhulume ngencwadzi ya-Isaya sehluko 61, lenesiprofetho lesigcwaliseka ebandleni lebuKhristu. Livesi laka-6 lalesehluko likhuluma ngalabo labatawuba ‘baphristi baSimakadze.’ Bese kutsi vesi 5, akhulume ngalabo labatawuba “bachamuki” futsi labatawusita baphindze basebente ‘nalabaphristi.’ Nguyiphi indlela lokufanele siwacondze ngayo lamavesi?

⁶ Siyati kutsi ‘baphristi baSimakadze’ ngemaKhristu lagcotjiwe latawuhlanganyela “ekuvukeni kwekucala” futsi “bayawuba baphristi baNkulunkulu naKhristu, bayawubusa naye iminyaka leyinkhulungwane.” (Semb. 20:6) Ngetulu kwaloko, kunemaKhristu lamanyenti letsembekile lanelitsemba lekuphila emhlabeni. LamaKhristu lasebenta aphindze atihlanganise nalabo labayawuphila ezulwini, abachamuki, ngenkhulumo lengumfanekiso. Ngenjabulo, asekela aphindze asebente ‘nebaphristi baSimakadze,’ kuba shengatsi ‘balima emasimini nasetivinini.’ Basita labagcotjiwe kute baletse ludvumo kuNkulunkulu, ngekushumayela nekufundzisa labanye emaciniso. Ngako-ke, emaKhristu lagcotjiwe ‘naletinye timvu’ atfola aphindze abeluse ngelutsandvo bantfu labanetinhlitiyo leticotfo labanesifiso sekukhonta Nkulunkulu phakadze.—Joh. 10:16.

7. Lamuhla emaKhristu afanana njani na-Abrahama kanye nalamanye emadvodza letsembekile angesikhatsi lesendlulile?

⁷ Njengobe kuvetiwe esihlokweni lesendlulile,  emaKhristu eliciniso afanana nebachamuki nobe tihambi kulelive lelibuswa nguSathane. Afanana ncamashi nemadvodza letsembekile angesikhatsi lesendlulile—lafaka ekhatsi Abrahama—lokwatsiwa ‘emhlabeni abafokati netihambi.’ (Heb. 11:13) Nobe ngabe sinaliphi litsemba, sinelilungelo lekujabulela budlelwane lobuhle naJehova njengobe kwenteka nanga-Abrahama. Jakobe watsi: “Abrahama wakholwa Nkulunkulu; ngenca yekukholwa kwakhe Nkulunkulu wamemukela njengemuntfu lolungile,” wase ubitwa ngekutsi: “Ungumngani waNkulunkulu.”—Jak. 2:23.

8. Ngusiphi setsembiso Abrahama laniketwa sona, futsi wativa njani ngekugcwaliseka kwaso?

⁸ Nkulunkulu wetsembisa kutsi nga-Abrahama nesitukulwane sakhe, yonkhe imindeni emhlabeni—hhayi sive sinye—itawubusiswa. (Fundza Genesisi 22:15-18.) Nobe lesetsembiso besitawugcwaliseka esikhatsini lesitako, Abrahama wachubeka anelitsemba lekutsi sitawugcwaliseka. Wacitsa sikhatsi lesinyenti sekuphila kwakhe ahamba tindzawo letinyenti akanye nemndeni wakhe, futsi akazange ayekele kuba ngumngani waJehova.

9, 10. (a) Singasilandzela ngatiphi tindlela sibonelo sa-Abrahama? (b) Ngusiphi simemo lesisendlulisela kulabanye?

⁹ Nobe abengati kutsi utawulindza sikhatsi lesingakanani ngembikwekutsi abone litsemba labenalo ligcwaliseka, lutsandvo Abrahama labenalo nekutinikela kwakhe kuJehova kwakucinile. Abebuke kugcwaliseka kwalesetsembiso. Akazange afune kuba sakhamuti saphakadze eveni lelitsite. (Heb. 11:14, 15) Kukuhlakanipha kakhulu ngatsi kulandzela sibonelo sakhe ngekutsi siphile kuphila lokulula futsi singakhatsateki ngekuba netintfo letinyenti ekuphileni, kuba setikhundleni letisetulu nobe kufundza kakhulu. Yini vele lengasenta silwe kamatima kute siphile imphilo labanyenti labatsi ivamile kulelive lelitawubhujiswa masinyane? Yini lengasenta sinamatsele kakhulu kulelive lelitawubhujiswa? Njengobe kwakunjalo naku-Abrahama, sibheke embili eveni lelincono kakhulu. Sifuna kubeketela futsi silindze lidzimate ligcwaliseke litsemba letfu.—Fundza Roma 8:25.

¹⁰ Nanyalo Jehova umema bantfu bato tonkhe tive kutsi babusiswe ngentalo ya-Abrahama. ‘Baphristi baSimakadze’ labagcotjiwe kanye naletinye timvu ‘letibachamuki,’ bendlulisela lesimemo kubantfu labasemhlabeni wonkhe ngetilwimi letingetulu kwa-600.

11. Solomoni wamema bantfu betive kutsi benteni?

¹¹ Nakunikelwa lithempeli nga-1026 B.C.E., futsi ngalokuvumelana nesetsembiso Jehova lasenta ku-Abrahama, Solomoni wabona kutsi bantfu bato tonkhe tive batawuhlanganyela ekudvumiseni Jehova. Emthantazweni wakhe losuka ekujuleni kwenhlitiyo, Solomoni watsi: “Macondzana newetive longasiye lomunye wesive sakho ema-Israyeli, kodvwa lochamuka eveni lelikhashane ngenca yeLibito lakho, ngobe bantfu batawuva ngeLibito lakho, lelikhulu kangaka, nangesandla sakho lesinemandla, nangengalo yakho leyelulekile, naketa-ke lona wetive atewuthandaza abheke kulelithempeli, ubobe sewuyeva usezulwini, indzawo yakho yekuhlala, wente konkhe loko wetive lakucelako kuwe. Loko kuyakwenta kutsi tonkhe tive temhlaba tilati Libito lakho tikwesabe, njengobe kwenta sive sakho ema-Israyeli.”—1 Khos. 8:41-43.

12. Yini lengase yente labanye batsatse boFakazi BaJehova njengebantfu labangakavami nobe “bachamuki”?

¹² Umuntfu longumchamuki kusuke kungumuntfu lohlala eveni langatalelwanga  kulo nobe kungumuntfu lofikako emmangweni lotsite nobe losandza kujoyina licembu lelitsite. Loku kufanana kahle naboFakazi BaJehova. Basekela ngalokuyinhloko hulumende wasezulwini, uMbuso waNkulunkulu loholwa nguKhristu. Abalutsatsi luhlangotsi etindzabeni telive ngisho nobe labanye banemuva wekutsi kufanele balutsatse.

13. (a) Nguyiphi indlela lengasenta singatsatsi labanye bantfu ‘njengebachamuki’? (b) Injongo yaJehova yasekucaleni beyikutsi sitsatse labanye njengebachamuki yini? Chaza.

¹³ Bachamuki ngalokuvamile babonakala lula ngetici letitsite letikubo. Kungase kube yindlela labakhuluma ngayo, emasiko abo, indlela lababukeka ngayo nalabembatsa ngayo. Nobe kunjalo, tintfo labafanana ngato nalabanye bantfu bakuletinye tive, tibaluleke kakhulu kwendlula tonkhe tintfo labehluke ngato. Liciniso likutsi bantfu labatsite batsatfwa njengebachamuki ngesizatfu sekutsi behlukile ngetindlela letitsite. Nasifundza kungatinaki tindlela bantfu labehluke ngato kitsi, leligama lelitsi ‘umchamuki’ liphelelwa sisindvo. Kube sonkhe emhlabeni bekungatsiwa siphetfwe nguhulumende munye, kute lobekatawuba ngumchamuki. Ecinisweni, injongo yaJehova kusukela ekucaleni bekukutsi bonkhe bantfu babe ngumndeni munye futsi babuswe ngumbuso munye—umbuso wakhe. Kungenteka yini nyalo kutsi bonkhe bantfu bato tonkhe tive bayekele kutsatsa labanye njengebachamuki?

14, 15. Yini licembu laboFakazi BaJehova leliyijabulelako?

¹⁴ Kulelive leligcwele bantfu labanemona nalabacabanga kutsi sive sabo sincono, kuyajabulisa kwati kutsi bakhona labatsandza bantfu bato tonkhe tive. Kuliciniso kutsi kulwisana nelubandlululo kungaba matima. Umsunguli wesiteshi seTV i-CNN, Ted Turner wakhuluma ngemsebenti wakhe lawenta nebantfu labanemakhono labachamuka etiveni letinyenti. Watsi: “Kwangijabulisa kakhulu kuhlangana nalabantfu lababuya etindzaweni letinyenti. Angisabatsatsi ‘njengebachamuki’ bantfu lababuya kulamanye emave, kodvwa ngibatsatsa njengalabanye bantfu lesihlala nabo emhlabeni. Ngacala kutsatsa leligama lelitsi ‘umchamuki’ njengalelo lelenta bantfu babukelwe phansi futsi sashaya umtsetfo wekutsi ku-CNN lingasetjentiswa leligama nasisakata nobe sicoca nalabanye ehhovisi. Esikhundleni salelo sesisebentisa lelitsi ‘bantfu bemhlaba wonkhe.’”

¹⁵ Emaveni lasemhlabeni, licembu laboFakazi BaJehova kuphela lelilingisa indlela yaNkulunkulu yekucabanga. Ngekufundza kwenta tintfo ngendlela yaJehova, bakhonile kutsandza bantfu bato tonkhe tive. Esikhundleni sekutsi bangabetsembi  bantfu baletinye tive, babasole nobe babenyanye, bafundze kujabulela kubona bantfu labehlukahlukene nalabanemakhono langafani. Uke wacabanga yini ngaloku nangekutsi kukusita njani wena ebuhlotjeni bakho nalabanye?

16, 17. Kugcwaliseka kwencwadzi yeSembulo 16:16 naDanyela 2:44 kungasho kutsini kuwe?

¹⁶ Ngekushesha tonkhe tive temhlaba titawulwa naJesu Khristu nemabutfo akhe asezulwini emphini yekugcina yebukhosi baNkulunkulu. Leyomphi ‘kutsiwa yi-Amagedoni ngesiHebheru.’ (Semb. 16:14, 16; 19:11-16) Sekwendlule iminyaka lengetulu kwa-2 500, umphrofethi Danyela aphefumulelwa kutsi abhale loko lokutawenteka kubohulumende bebantfu. Wabhala: “Ngesikhatsi salawo makhosi, Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.”—Dan. 2:44.

¹⁷ Asewucabange nje kutsi kugcwaliseka kwalesiphrofetho kutawusho kutsini kuwe? Kungevani lokusemkhatsini wetive, lokwenta bantfu lamuhla batsatsane njengebachamuki, angeke kusaba khona. Nanobe bantfu batawube bangafani ngendlela lababukeka ngayo, loko kutawube kukhombisa buhle bendalo yaNkulunkulu. Ngesizatfu sekutsi sinelikusasa lelihle kangaka, loku kufanele kusikhutsate sichubeke sidvumisa uMdali wetfu Nkulunkulu Jehova.

18. Yini leyentekile muva nje lekhombisa kutsi boFakazi BaJehova abacabangi kutsi labanye bantfu ‘babachamuki’?

¹⁸ Kumelula yini kukholelwa kutsi lushintjo lolungaka lungenteka emhlabeni? Cha akusimelula. Ngalokwehlukile, tsine siyakholelwa kutsi lolushintjo lutawenteka. BoFakazi BaJehova ababatsatsi labanye bantfu njengebachamuki, futsi abanaki kakhulu kutsi bantfu labanabo basive sini. Muva nje, lamanyenti emahhovisi abo eligatja ahlanganiswe nalamanye kute umsebenti wekuwengamela ube melula futsi kutfutfukiswe nemsebenti wekushumayela tindzaba letimnandzi teMbuso. (Mat. 24:14) Imitsetfo yalamave beyingaphikisani nekuhlanganiswa kwalamagatja. Lobu ngulobunye bufakazi lobucacile bekutsi Jesu Khristu longuMbusi lobekwe nguJehova usita boFakazi BaJehova kutsi bangehlukaniswa buve babo, futsi ngekushesha utakucedzela ‘kuncoba’ kwakhe.—Semb. 6:2.

19. Lulwimi loluhlambulukile lweliciniso lusente sakwati kwenta ini?

¹⁹ Njengobe bachamuka etiveni letehlukene futsi bakhuluma tilwimi letingefani, boFakazi BaJehova balwela kusebentisa lulwimi lokuhlambulukile lweliciniso. Loku kubenta babe nebunye lobungeke buphele melula. (Fundza Zefaniya 3:9.) Lona ngumndeni wemhlaba wonkhe lophila kulelive lelibuswa nguSathane kodvwa lowehlukile kulo. Lomndeni lonebunye nyalo umane uveta loko lokutawenteka eveni lelisha—live lelitawube selite bachamuki. Ngaleso sikhatsi bonkhe bantfu labaphilako ngenjabulo batawuvumelana nemaciniso latfolakala encwadzini letsi The Races of Mankind lesikhulume ngayo ekucaleni, latsi: “Bantfu betive letehlukene banguloko lokushiwo liBhayibheli—bobhuti.”