Usakhumbula Yini?
Ubafundze kahle yini bomagazini bakamuva be-Sicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:
Singawucima njani umlilo wenkhulumo lengalawuleki?
Kufanele sihlole inhlitiyo yetfu. Kunekutsi simsole umzalwane wetfu, kuncono kuhlolisisa kutsi yini lesibangela sicabange kanjalo. Kungenteka yini kutsi setama kwenta labanye bacabange kutsi tsine sincono kunaye? Ngetulu kwaloko, kuhlale sisola labanye kungenta simo lesimatima sibe sibi kakhulu.—8/15, likhasi 21.
Nkulunkulu utitsetselela aphindze atikhohlwe ngayiphi indlela tono tebantfu labaphendvukile?
Setsembiso saJehova kubantfu labemukelwa nguye sitsi: “Tono tabo ngingasaphindzi ngitikhumbule.” (Jer. 31:34) Angasitsetselela tono ngemhlatjelo wenhlawulo. Nkulunkulu nakasitsetselela uyakhohlwa ngemcondvo wekutsi angeke aphindze atikhumbule letono kute asijezise ngato.—10/1, likhasi 32.
Yini letawenteka ngembikwekutsi kufike kuphela?
Kutawumenyetelwa ‘Kuthula nenhlalakahle!’ Tive titawuhlasela futsi tibhubhise iBhabhulona Lenkhulu. Bantfu baNkulunkulu batawuhlaselwa. Kutawube sekucala imphi ye-Amagedoni, letawulandzelwa kujikijelwa kwaSathane nemadimoni akhe emgodzini longenamkhawulo.—9/15, likhasi 4.
Sizuza njani ngekungati kutsi siphelo sitawufika nini?
Kungati kutsi kuphela kutawufika nini kusenta sivete loko lokusetinhlitiyweni tetfu. Kusinika litfuba lekwenta inhlitiyo yaNkulunkulu ijabule. Kusikhutsata kutsi singatigodli kodvwa sisebentise kuphila kwetfu simkhonta futsi sisita nalabanye, siphindze setsembele kakhulu kuNkulunkulu naseVini lakhe. Ngetulu kwaloko, tinkinga lesihlangabetana nato nyalo, ticinisa kukholwa kwetfu.—9/15, emakhasini 24-25.
Nkulunkulu utawulungisa njani umonakalo lobangelwe kuhlupheka kwebantfu?
Ngekushesha Nkulunkulu utawuletsa live lelisha lelinekulunga latawuvumela kutsi lihlalwe bantfu labanelutsandvo kulomunye nalomunye. (2 Phet. 3:13) NjengeNkhosi yaNkulunkulu yasezulwini, Jesu utawubese uyawucedza lomonakalo. (Isa. 33:24; Semb. 21:4)—10/1, likhasi 7.
Bobani labamelela “tinkhanyenti letisikhombisa” letisesandleni saJesu sangesekudla lokukhulunywa ngato kuSembulo 1:16, 20?
Bamelela babonisi labagcotjiwe, nabo bonkhe labababonisi emabandleni.—10/15, likhasi 14.
Ngutiphi letinye timiso teliBhayibheli letisenta sibe nemcondvo waNkulunkulu endzabeni yekusebentisa ligwayi?
Nkulunkulu ufuna sikuhloniphe kuphila. (Dut. 5:17) Ulindzele kutsi simtsandze, sitsandze nabomakhelwane betfu. (Mak. 12:28-31) Ufuna sibalekele imikhuba lengcolile. (2 Khor. 7:1)—10/1, likhasi 15.
Jesu wasikhombisa njani simo sekutitfoba lokukhulunywa ngaso ku-Isaya 50:4, 5?
Lamavesi atsi loyo ‘lonelulwimi Iolufundzisiwe’ abengeke ‘agucuke.’ Jesu wakhombisa simo sekutitfoba, wakunakisisa loko Babe wakhe abemfundzisa kona. Jesu abetimisele futsi afisa kufundza kuJehova, abesinakisisa sibonelo saNkulunkulu sekutitfoba endleleni lakhombisa ngayo umusa kubantfu labanesono.—11/15, likhasi 11.
Sizuza njani ngekuba nemusa kulabanye?
Ngekuba nemusa kulabanye, siyakwati kumati kancono Nkulunkulu, futsi loko kusenta sijabule. (1 Joh. 4:7; Mat. 5:7, 8) Ngetulu kwaloko, Jehova uyajabula nasibonisa labanye umusa. (Taga. 19:17)—10/1, likhasi 20.
