1, 2. Litsemba letfu likhula njani nasicabanga ngenhlangano yaJehova yemhlaba wonkhe?

KUVELE kusimangalise kakhulu kucabanga ngekutsi siyincenye yenhlangano lenkhulu yemhlaba wonkhe. Imibono lesencwadzini yaHezekeli sehluko 1, nalekuDanyela sehluko 7, iyicacisa kahle indlela Jehova latayifeza ngayo injongo yakhe. Jesu ucondzisa incenye lesemhlabeni yenhlangano yaJehova kutsi ichubeke ishumayela tindzaba letimnandzi, inakekele labo labenta lomsebenti kutsi babe nebuhlobo lobuhle naNkulunkulu iphindze itfutfukise kukhonta kweliciniso kwaJehova. Loku kusenta siyetsembe kakhulu inhlangano yaJehova.—Mat. 24:45.

² Siyahambisana yini nalenhlangano lemangalisako? Inshisekelo yetfu ngeliciniso iyachubeka yini ikhula nobe incipha kancane kancane? Kucabanga ngemibuto lenjengalena, kungasenta sibone kutsi sesicala kudzinwa yini nobe inshisekelo yetfu seyicala kuphela. Loko kungenteka. Ngelikhulu lekucala, umphostoli Pawula kwadzingeka kutsi akhutsate emaKhristu labekanye nawo kutsi azindle ngenshisekelo yaJesu. Pawula watsi loku bekutawasita kutsi ‘angadzinwa nome adzangale etinhlitiyweni tawo.’ (Heb. 12:3) Ngendlela lefananako, kuhlolisisa lesihloko lesengcile, lebesikhombisa loko lokwentiwa yinhlangano yaJehova, kusisitile kutsi silondvolote inshisekelo yetfu nekubeketela.

3. Yini ledzingekako kute singadzinwa, futsi sitawucoca ngani kulesihloko?

³ Nobe kunjalo, Pawula waveta kutsi kunyenti lokudzingeka sikwente nangabe singafuni kudzinwa. Watsi kudzingeka sitimisele ‘ekwenteni lokuhle.’ (Gal. 6:9) Ngako kudzingeka sente imisebenti letsite. Ase sihlole imisebenti lesihlanu lengasisita kutsi sime sicine futsi sichubeke sihambisana nenhlangano yaJehova. Ngemuva kwaloko ngamunye wetfu angancuma kutsi nguluphi lushintjo yena nobe umndeni wakhe labangalwenta ekuphileni kwabo.

4. Yini lesenta sitsi kuhlangana bekusolo kuyincenye lebalulekile yekukhonta kweliciniso?

⁴ Kuhlangana bekusolo kuyintfo lebalulekile etincekwini taJehova. Ezulwini, tidalwa temoya tiyamenywa kutsi tite kuJehova ngaletinye tikhatsi. (1 Khos. 22:19; Jobe 1:6; 2:1; Dan. 7:10) Ka-Israyeli, sive besibutsana ndzawonye kute ‘sitewulalela siphindze sifundze.’ (Dut. 31:10-12) EmaJuda angelikhulu lekucala abenemkhuba wekuya esinagogeni kute afundze imiBhalo. (Luk. 4:16; Imis. 15:21) Kubaluleka kwekuhlangana kusachubeka nasebandleni lebuKhristu futsi kuseyincenye lebalulekile yekukhonta kwetfu. EmaKhristu eliciniso ‘ayanakana, asitane ngekukhutsatana elutsandvweni nasemisebentini lemihle.’ Natsi kudzingeka sichubeke ‘sikhutsatana kakhulu, njengobe sibona kutsi lilanga laJehova selisondzele.’—Heb. 10:24, 25.

5. Singakhutsatana njani emihlanganweni yetfu?

⁵ Lenye indlela lebalulekile lesingakhutsatana ngayo kuhlanganyela kuloko lokwentiwa emihlanganweni yetfu. Singaveta kukholwa kwetfu ngekuniketa imphendvulo yembuto losesigabeni, ngekuchaza umbhalo, ngekusho kafishane lokuhlangenwe nako lokukhombisa kuhlakanipha kwekusebentisa timiso teliBhayibheli kanye nalokunye. (Hla. 22:22; 40:9) Nakanjani uyavuma kutsi ngisho nobe sekuphele iminyaka leminyenti siba khona emihlanganweni, solo kuyasikhutsata kulalela timphendvulo letisuka enhlitiyweni tebazalwane betfu nabodzadze—labakhulile nalabasebasha.

6. Imihlangano yetfu iphindze isisite ngatiphi tindlela?

⁶ Ngutiphi letinye tizatfu letenta Nkulunkulu wetfu asikhutsate kutsi sihlangane njalo? Imihlangano yetfu yelibandla, lemincane nalemikhulu isisita kutsi sibe nesibindzi sekukhuluma nesekubeketelela kucindzetelwa ngisho nobe bantfu bangasilaleli ensimini yetfu. (Imis. 4:23, 31) Tinkhulumo letisekelwe emiBhalweni tiyasikhutsata tiphindze ticinise kukholwa kwetfu. (Imis. 15:32; Rom. 1:11, 12) Imfundvo netincociswano letikhutsatako lesititfola emihlanganweni yetfu yekukhonta Nkulunkulu, tisisita kutsi sijabule siphindze sibe ‘nekuthula ngesikhatsi sebumatima.’ (Hla. 94:12, 13) Ikomidi Yekufundzisa yeSigungu Lesibusako ihlela onkhe emalungiselelo ekucondzisa bantfu baJehova labasemhlabeni wonkhe. Sibonga kakhulu ngalamalungiselelo lesentelwa wona kute sijabulele imfundvo lesiyitfola emihlanganweni kuwo onkhe emaviki emnyaka.

7, 8. (a) Iyini injongo leyinhloko yemihlangano yetfu yelibandla? (b) Lemihlangano ikusita njani wena?

⁷ Kunalokunye lokubaluleke kakhulu kwendlula tinzuzo lesititfola emihlanganweni yetfu. Injongo leyinhloko yekuhlangana kwetfu kukhonta Jehova. (Fundza Tihlabelelo 95:6.) Kusibusiso lesikhulu kukhonta Nkulunkulu wetfu lomuhle. (Khol. 3:16) Kufanele simkhonte njalo Jehova ngekuba khona emihlanganweni yebuKhristu siphindze sibe nencenye kuyo. (Semb. 4:11) Kungaleso sizatfu sikhutsatwa kutsi “singakuyekeli kuhlangana ndzawonye, njengobe labanye sebanemkhuba wekungahlangani.”—Heb. 10:25.

⁸ Imihlangano yebuKhristu siyitsatsa njengelilungiselelo lelisisita kutsi sibeketele kute kube ngulapho Jehova abhubhisa lelive lelibi yini? Nangabe kunjalo, lemihlangano itawuba semkhatsini ‘wetintfo letibaluleke kakhulu’ letiyincenye yekuphila kwetfu lokumatasatasa. (Fil. 1:10) Kufanele kube yintfo lephutfuma kakhulu lesenta singabi khona ekukhonteni Jehova ngebunye sikanye nebazalwane betfu.

9. Sati njani kutsi umsebenti wekushumayela ubalulekile?

⁹ Kuhlanganyela emsebentini wekushumayela nako kungasisita kutsi sihambisane nenhlangano yaJehova. Jesu wacala lomsebenti ngesikhatsi alapha emhlabeni. (Mat. 28:19, 20) Kusukela lapho umsebenti wekushumayela ngeMbuso newekwenta bantfu babe bafundzi bewusolo ungumsebenti lohamba embili kuyo yonkhe inhlangano yaJehova. Lokuhlangenwe nako lokunyenti kwalamuhla kusiniketa bufakazi bekutsi tingilosi tiyawusekela lomsebenti wetfu tiphindze tisicondzise kulabo ‘labakhetselwe kuphila lokuphakadze.’ (Imis. 13:48; Semb. 14:6, 7) Incenye yenhlangano yaJehova lesemhlabeni isachubeka lamuhla futsi ihlelelwe kutsi isekele lomsebenti lobaluleke kakhulu. Lomsebenti wekushumayela ubalulekile yini ekuphileni kwetfu?

10. (a) Fanekisa kutsi singalulondvolota njani lutsandvo lwetfu lweliciniso. (b) Umsebenti wekushumayela ukusite njani kutsi ungadzinwa?

¹⁰ Kukhutsala nasenta umsebenti wekushumayela kusisita kutsi silondvolote lutsandvo lwetfu ngeliciniso. Cabanga ngaloko lokwashiwo nguMitchel, losanesikhatsi lesidze angulomdzala welibandla futsi alihlahlandlela lelivamile. Utsi: “Ngiyatsandza kucocela bantfu liciniso. Nangicabanga ngesihloko lesisha lesiku-Sicongosekulindza nobe ku-“Phaphama!” ngivele ngimangaliswe kuhlakanipha, lwati nekulinganisela lokutfolakala kumagazini  ngamunye. Ngiba nenshisekelo yekufuna kuya ensimini kute ngibone indlela bantfu labatawutsintseka ngayo nekutsi ngingabasita njani kute babe nenshisekelo. Umsebenti wami wekushumayela ungenta ngiphile imphilo lemelula. Ngiyetama kutsi letinye tintfo ngitente ngisengakayi ensimini nobe nasengibuya khona.” Ngendlela lefananako, kuba matasa ngemisebenti yaNkulunkulu kungasisita natsi kutsi sime sicine kulamalanga ekugcina.—Fundza 1 Khorinte 15:58.

11. Yini lokufanele isente sitifundze tonkhe tincwadzi lesititfola kuJehova?

¹¹ Jehova usilungiselele tincwadzi letinyenti letisicinisako. Nakanjani, ungacabanga ngesikhatsi lapho watsi nawucedza kufundza incwadzi watsi: ‘Loku ngiko kanye lebengikudzinga. Kushengatsi Jehova wente kutsi bangibhalele yona.’ Akusilo liphutsa kucabanga njalo. Kuletincwadzi, Jehova uyasiyala aphindze asicondzise. Kungako atsi: “Mine ngiyawukufundzisa ngikukhombise indlela lofanele kuhamba ngayo, ngikweluleke.” (Hla. 32:8) Uyatimisela yini kutsi ufundze letincwadzi lesititfolako uphindze uzindle ngaloko lokufundzako? Kwenta njalo kutawusisita kutsi sichubeke sitsela titselo futsi singehlisi lizinga lesikhonta ngalo Nkulunkulu kulamalanga ekugcina.—Fundza Tihlabelelo 1:1-3; 35:28; 119:97.

12. Yini lengasisita kutsi singatitsatseli phansi tincwadzi tetfu tebuKhristu?

¹² Kuhle kutsi sicabange ngemisebenti leyentiwako kute sititfole njalo letincwadzi letizuzisako. Ikomidi Yekufundzisa yeSigungu Lesibusako inakekela imisebenti yekucwaninga, yekubhala, yekufundza loko lokubhaliwe, titfombe nekuhumusha letincwadzi letiphrintwako naleto letifakwa ekhelini letfu le-Internet. Emagatja laphrintako atfumela tincwadzi emabandleni ladvutane nakhashane. Wentelwani lomsebenti? Kute bantfu baJehova bondliwe kahle. (Isa. 65:13) Shengatsi singatimisela ekufundzeni tonkhe tincwadzi lesititfola ngenhlangano yaJehova.—Hla. 119:27.

13, 14. Bobani labasekela emalungiselelo aJehova ezulwini, futsi singakhombisa njani kutsi natsi siyawasekela lapha emhlabeni?

¹³ Embonweni wemphostoli Johane, Jesu ubonakala agibele lihhashi lelimhlophe kute ancobe labo labamelene naJehova. (Semb. 19:11-15) Kucinisa kukholwa kwetfu kwati kutsi Jesu unetingilosi letetsembekile futsi unalabagcotjiwe labancobile lapha emhlabeni lasebatfole umvuzo wabo wekuphila ezulwini. (Semb. 2:26, 27) Lesi sibonelo lesihle sekusekela emalungiselelo aJehova.

¹⁴ Ngendlela lefanako, sicumbi lesikhulu siyawusekela lomsebenti wabomnakaboKhristu labagcotjiwe labasaphila lapha emhlabeni futsi labacondzisa inhlangano yaNkulunkulu lamuhla. (Fundza Zakhariya 8:23.) Ngamunye wetfu angawasekela njani emalungiselelo aJehova? Lenye indlela kutitfoba kulabo labacondzisako. (Heb. 13:7, 17) Loko singacala kukwenta emabandleni etfu. Indlela lesikhuluma ngayo ngalabadzala belibandla, yenta labanye babahloniphe yini bona nemsebenti wabo? Siyabakhutsata yini bantfwana betfu kutsi bawahloniphe lamadvodza letsembekile futsi baye kuwo nabadzinga seluleko semBhalo? Ngetulu kwaloko, siyacoca yini njengemndeni kutsi singayisebentisa njani imali yetfu kute sisekele umsebenti wemhlaba wonkhe ngekwenta iminikelo? (Taga 3:9; 1 Khor. 16:2; 2 Khor. 8:12) Sikutsatsa njengalokubalulekile yini kugcina liHholwa leMbuso lihlobile? Umoya waJehova utawugeleta nangabe kunenhlonipho nebunye. Ngalowo moya sitfola lusito lolungapheli lwekutsi singadzinwa kulamalanga ekugcina.—Isa. 40:29-31.

15. Yini lesenta sichubeke silwa kute siphile ngekuvumelana nenjongo yaJehova?

¹⁵ Kwekugcina, kute sibeketele siphindze sichubeke sihambisana nenhlangano yaJehova, kufanele sichubeke siphila ngekuvumelana nemlayeto lesiwushumayelako ngekutsi ‘setame kufundza lokutfokotisa iNkhosi.’ (Ef. 5:10, 11) Siyachubeka silwa netilingo letimbi ekuphileni kwetfu ngobe sinesono futsi Sathane nalelive lelibi betama kusiyekelisa kwenta lokuhle. Labanye kini bazalwane nabodzadze balwa kamatima malanga onkhe kute balondvolote buhlobo babo naJehova. Loko kumenta anitsandze kakhulu. Ningadzinwa! Kuphila ngekuvumelana nenjongo yaNkulunkulu kutasenetisa futsi kusicinisekise ngekutsi kukhonta kwetfu akusilo lite.—1 Khor. 9:24-27.

16, 17. (a) Yini lokufanele siyente nasona? (b) Singazuza njani esibonelweni sa-Anne?

¹⁶ Nobe kunjalo, yini lokufanele siyente nangabe sonile? Tfola lusito ngekushesha lokukhulu. Kufihla loko lokwentile kungenta simo sibe sibi kakhulu. Khumbula, Davide watsi ngesikhatsi afihla tono takhe, ‘abetikhalela lilanga lonkhe, kuze kushaye ekhatsi emnkantjeni.’ (Hla. 32:3) Kuliciniso kutsi kufihla tono tetfu kutasicedza emandla emtimbeni yetfu futsi kucedze buhlobo betfu naNkulunkulu, kodvwa “lotivumako atishiye uyawutfola umusa.”—Taga 28:13.

¹⁷ Cabanga ngesibonelo sa-Anne. * Ngesikhatsi Anne asemusha, abelihlahlandlela lelivamile. Nobe kunjalo, wacala kuphila imphilo lemphacambili. Loku kwamhlupha kakhulu. Utsi: “Bengisala nginanembeza lonelicala. Bengingakajabuli futsi ngihlale ngicindzetelekile ngaso sonkhe sikhatsi.” Wenta njani lodzadze? Utsi ngalelinye lilanga asesifundvweni, kwacocwa ngembhalo waJakobe 5:14, 15. Anne wabona kutsi abedzinga lusito futsi waya kulabadzala kute bamsite. Nakabuka emuva, utsi: “Lemibhalo yaba njengemitsi levela kuJehova kute angelaphe. Akusimelula kuyinatsa lemitsi, kodvwa iyangelapha. Ngasisebentisa seluleko salemibhalo, futsi sangisita kakhulu.” Ngemuva kweminyaka, Anne wacinisa buhlobo bakhe naNkulunkulu futsi sewuphindze wamkhonta ngenshisekelo nanganembeza lote licala.

18. Yini lokufanele sitimisele kuyenta?

¹⁸ Kuyinjabulo kuphila kulamalanga ekugcina nekuba yincenye yenhlangano yaJehova lemangalisako. Asitimisele kutsi singakubukeli phansi loko lesiphiwe kona. Esikhundleni saloko, asisebente ndzawonye njengemndeni ngekutsi sibe khona emihlanganweni yekukhonta Nkulunkulu nelibandla letfu, sifune labo labanetinhlitiyo leticotfo ensimini yetfu siphindze sijabulele tincwadzi tetfu tebuKhristu. Asiphindze sisekele labo labahola libandla futsi siphile ngekuvumelana nemlayeto lesiwushumayelako. Nasenta njalo, angeke sigcine ngekuhambisana nenhlangano yaJehova kodvwa angeke sidzinwe ngekwenta lokuhle.