YATSI nje nayitalwa indvodzana yami Gary nga-1958, ngavele ngabona kutsi kukhona lokungahambi kahle. Nobe kunjalo, kwatsatsa tinyanga letilishumi kutsi bodokotela bakubone kugula kwakhe, kwase kutsatsa iminyaka lengetulu kwalesihlanu kutsi bocwephese baseLondon baciniseke ngako. Ngeva buhlungu kakhulu ngesikhatsi indvodzakati yami Louise, italwa eminyakeni leyimfica ngemuva kwekutalwa kwaGary, futsi kubonakala kutsi yona inetimphawu tekugula lokukhulu kakhulu kunekwaGary.

Bodokotela batsi kimi: “Bobabili bantfwana bakho banesifo lesibitwa ngekutsi yi-LMBB, * futsi lesifo aselapheki.” Ngaleso sikhatsi, kuncane kakhulu lobekwatiwa ngalesifo selufuto lesingakavami. Kugula lokuhambisana naso kufaka ekhatsi kungaboni kahle lokugcine kubangele kutsi ube yimphumphutse, kukhuluphala kakhulu, kuba neminwe nobe tintwane letinyenti, kungakhuli kahle, kuba nesifo sashukela, sematsambo nesetinso. Ngako-ke, bekutawuba matima kakhulu kunakekela bantfwana bami. Lucwaningo lolusandza kwentiwa lukhombisa kutsi umuntfu munye kulabangu-125 000 eBritain unalesifo, ngisho nobe kulabanye singabi sibi kakhulu.

Ngesikhatsi ngisandza kushada, ngakhuluma nalomunye Fakazi waJehova, futsi ngavele ngalibona liciniso. Kodvwa indvodza yami beyingalitsandzi sanhlobo. Umsebenti wayo wawubangela kutsi sihlale sihamba, ngako bengingakhoni kuya emihlanganweni. Nobe kunjalo, ngachubeka ngilifundza liBhayibheli futsi ngithantaza kuJehova. Kwangidvudvuta kakhulu kufundza kutsi “Simakadze usiphephelo sebantfu labacindzetelwe. Uyinqaba ngetikhatsi tekweswela” nekutsi ‘akabafulatseli labamfunako.’—Hla. 9:9, 10.

Gary abengaboni kahle emehlweni, ngako watsi nakaneminyaka lesitfupha budzala, watfunyelwa kutsi ayewuhlala kulesinye sikolwa lesiseningizimu yeNgilandi, kute atfole imfundvo lekhetsekile. Abehlale angishayela lucingo angitjele ngetinkinga labenato, futsi bengikhona kumsita acondze timiso teliBhayibheli. Eminyakeni lembalwa ngemuva kwekutalwa kwaLouise, nami ngagula ngaba nesifo lesihlasela imisipha (multiple sclerosis) nalesinye sekoma kwemitsambo nemamasela (fibromyalgia). Gary wabuya ekhaya nasaneminyaka lengu-16 budzala. Nobe kunjalo, emehlo akhe abengasaboni, futsi nga-1975 kwavele kwashiwo kutsi sewuyimphumphutse. Nga-1977 indvodza yami yasishiya.

Masinyane ngemuva kwekubuya kwaGary, senta imisebenti leminyenti kulelinye libandla lelisitsandzako, futsi nga-1974 ngabhajatiswa. Ngajabula kakhulu ngesikhatsi lomdzala welibandla asita Gary kutsi akhone kubhekana nelushintjo lolwalwenteka kuye eminyakeni yakhe yekutfomba. Lamanye emaKhristu abengisita ngemisebenti yasekhaya, futsi ekugcineni baphatsi betenhlalakahle bacasha lasihlanu awo kutsi asisite ekhaya. Loko kwaba sibusiso lesikhulu.

Gary wachubeka atfutfuka kahle ecinisweni futsi nga-1982 wabhajatiswa. Abefisa kuba lihlahlandlela lelisitako. Ngako-ke, ngancuma kutsi ngihambe naye ensimini futsi ngachubeka ngikwenta loko iminyaka leminyenti. Ngekuhamba kwesikhatsi, indvodzana yami yajabula kakhulu ngesikhatsi umbonisi wesifundza ayibuta atsi: “Gary, kungaba njani ube lihlahlandlela lelivamile?” Gary abekudzinga kukhutsatwa  lokunjalo, futsi nga-1990 wabekwa kutsi abe lihlahlandlela lelivamile.

Gary sewuhlindvwe inyonga kabili, kwekucala nga-1999 kwesibili kwaba nga-2008, kodvwa tinkinga temphilo yaLouise tibe tinkhulu kakhulu. Yena watalwa ayimphumphutse, futsi ngatsi nangibona kutsi kulolunye lunyawo lwakhe kunelutwane lolwengetekile, ngavele ngabona kutsi naye unalesifo se-LMBB. Luhlolo lwabodokotela lwaphindze lwakhombisa lokunye kugula lokukhulu lobekuhlasela titfo letingekhatsi emtimbeni wakhe. Kuleminyaka leyendlulile, kwentiwe kuhlindvwa lokuyinkimbinkimbi kuye, lokufaka ekhatsi lokusihlanu kwetinso takhe. Naye unesifo sashukela njengaGary.

Njengobe atati tinkinga letingavela nakudzingeka ahlindvwe, Louise ukhuluma nabodokotela nalabo labasebentisana nabo kute abachazele kusenesikhatsi ngesincumo sakhe lesimayelana nekwelashwa ngaphandle kwengati. Umphumela waloku ube kutsi abe nebuhlobo lobuhle nabo bonkhe labatinakekela kahle tinkinga temphilo yakhe.

Likhaya letfu liyindzawo yemsebenti lobalulekile wekukhonta Jehova. Ngesikhatsi kusete imishini lelusito yebucwepheshe bengivame kucitsa ema-awa lamanyenti ngifundzela Gary naLouise. Nyalo ema-CD, ema-DVD nalokunye lokutsetjuliwe lokutfolakala ku-www.pr418.com, kusenta sonkhe sikhone kulalela luhlelo lweliviki lwesifundvo seliBhayibheli, futsi siyakhona kuphendvula emihlanganweni yebuKhristu.

Ngaletinye tikhatsi Gary uyakhona kutibamba ngengcondvo timphendvulo takhe, futsi nakanenkhulumo eSikolweni Semsebenti WemaKhristu uyakhona kuyibeka ngemavi akhe. Nga-1995 wabekwa kutsi abe yinceku lesebentako futsi uhlale amatasa eHholweni leMbuso, emukela emalunga elibandla futsi asite emishinini yekukhulisa livi.

BoFakazi lesikanye nabo bahamba naGary ensimini, futsi bamfuca ngesihlalo salabakhubatekile ngobe unesifo sematsambo. Lomunye Fakazi umsitile kutsi achube sifundvo seliBhayibheli nalomunye umuntfu lonenshisekelo. Gary ukhonile nekukhutsata lomunye umKhristu lobesaneminyaka lengu-25 apholile. Bobabili labantfu nyalo baba khona emihlanganweni yebuKhristu.

Ngesikhatsi aneminyaka leyimfica, Louise wafundza kunitha kugogo wakhe. Mine nalomunye walabebamnakekela samfundzisa kuhlobisa timphahla. Njengobe akutsandza kwenta lemisebenti, uvame kunitha tingubo tebantfwana tekulala letinemibala lemihle, netalabanye lasebakhulile ebandleni. Uphindze ente nemakhadi asebentisa titfombe letinamatseliswako. Bantfu labatfola lamakhadi akhe bawatsandza kakhulu. Ngesikhatsi asakhula, Louise wafundza kuthayipha. Nyalo uyakhona kuchumana nebangani ababhalele ema-e-mail ngelusito lwangcondvomshini lokwati kukhuluma. Louise wabhajatiswa aneminyaka lengu-17 budzala. Ngetikhatsi temikhankaso yekushumayela, sonkhe sijabulela kuba ngemahlahlandlela lasitako. NjengaGary, Louise uyakhona kuyibamba ngengcondvo imibhalo kute avete kukholwa kwakhe etetsembisweni taNkulunkulu temhlaba lapho “emehlo etimphumphutse ayawuvuleka” futsi “kute lohlala [khona] loyakutsi: ‘Ngiyagula.’”—Isa. 33:24; 35:5.

Sijabula kakhulu ngalamaciniso laligugu laseVini laJehova leliphefumulelwe. Tinhlitiyo tetfu tigcwele kubonga ngekusekelwa ngelutsandvo libandla lakitsi, ngobe ngaphandle kwaloko besingeke sikhone kwenta tintfo letinyenti lesitentako nyalo. Ngelusito lwaJehova, kuphila kwetfu kunenjongo.