Usakhumbula Yini?
Ubafundze kahle yini bomagazini bakamuva be-Sicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:
Kuyini kushaya inkatho, futsi emaKhristu kufanele akutsatse njani?
Kushaya inkatho kumane uvule liBhayibheli nome ngukuphi ukholelwa kutsi livesi lekucala lohlangana nalo litakunika lusito loludzingako. EmaKhristu eliciniso akawenti umlingo. Kunaloko, atadisha liBhayibheli kute atfole lwati lolunembile nesicondziso lesivela kuNkulunkulu.—12/15, likhasi 3.
Nguliphi “live” lelitawendlula?
“Live” lelitawendlula bantfu labaphila imphilo lengahambisani nentsandvo yaNkulunkulu. (1 Joh. 2:17) Umhlaba nebantfu labetsembekile kutawusindza.—1/1, emakhasini 5-7.
Nanobe Abela afa kodvwa kungayiphi indlela asakhuluma natsi? (Heb. 11:4)
Ukhuluma natsi ngekukholwa kwakhe. Singafundza kuye futsi sifune kulingisa kukholwa kwakhe. Sibonelo sakhe solo siyasebenta.—1/1, likhasi 12.
Ngutiphi tici lokufanele sitinake kute singatehlukanisi naNkulunkulu?
Letinye tato nguleti: Ngumsebenti wekutiphilisa, tindlela tekutijabulisa lesitikhetsako, budlelwane lesinabo nesihlobo lesiyekelisiwe kuba nguFakazi, tebucwepheshe, kukhatsateka ngemphilo yetfu, kuba nembono longakafaneli ngemali nekubona shengatsi imibono yetfu nobe imisebenti incono.—1/15, emakhasini 12-21.
Yini lesingayifundza ngekutfobeka kwaMosi?
Esikhundleni sekutsi ligunya labekaniketwe lona limente atetfwale, Mosi wetsembela kuNkulunkulu, hhayi kuye. Asifisi kuvumela sikhundla lesiniketwe sona, ligunya nobe likhono lemvelo lesinalo kutsi lisente sitetfwale, sifuna kwetsembela kuJehova. (Taga 3:5, 6)—3/1, likhasi 5.
Batawuphila kuphi bantfu labavusiwe?
Kunelinani lelincane lalabangu-144 000 lelitawuphila ezulwini. Nobe kunjalo, bantfu labanyenti labatawuvuswa batawuphila emhlabeni, banelitsemba lekuphila phakadze.—3/1, likhasi 6.
Bekusho kutsini kutsi ema-Israyeli ‘awakasoki enhlitiyweni’? (Jer. 9:26)
Abenenkhani, avukela futsi bekudzingeka asuse loko lobekwenta tinhlitiyo tawo tingaphili—imicabango yawo, tifiso nobe tintfo lebetiwenta angayilaleli imiyalo yaNkulunkulu. (Jer. 5:23, 24)—3/15, emakhasini 9-10.
Ihlanganisani incenye lesemhlabeni yenhlangano yaNkulunkulu?
Ifaka ekhatsi Sigungu Lesibusako, emakomidi eligatja, babonisi labajikeletako, tigungu talabadzala, emabandla naboFakazi labehlukehlukene.—4/15, likhasi 29.
Nowa nemkakhe bawakhulisa njani emadvodzana abo kulelive lelibi?
Nowa nemkakhe kwadzingeka kutsi bavikele labafana babo kutsi bangangenwa ngumoya lomubi lobewukulendzawo labebahlala kuyo. Nobe bekungaba matima kuvikela labantfwana kuyo yonkhe imibiko labebayiva ngaleTichwaga, bebangabafundzisa emaciniso ngaNkulunkulu Jehova lobuzondako bubi futsi labafana bakhula baba ngemadvodza sibili.—5/1, likhasi 11.
Ema-Israyeli abebabulala ngekubalengisa elugodvweni yini bantfu labente lokubi?
Cha, ema-Israyeli abengakwenti loko, kodvwa letinye tive tasendvulo betikwenta. Ngesikhatsi sekubhalwa kwemiBhalo yesiHebheru, lokungenani bantfu labente lokubi bebacale babulawe ngekubagcoba ngematje. (Lev. 20:2, 27) Ngemuva kwaloko, lesidvumbu bebangase basilengise elugodvweni kute kube secwayiso nakulabanye.—5/15, likhasi 13.
‘Intsaba yemincumo’ ichekeka ekhatsi ngamuphi umcondvo?
‘Lentsaba yemincumo’ lemelela bukhosi baJehova bendzawo yonkhe, ichekeka ekhatsi ngemcondvo wekutsi Jehova ubeka lomunye umbuso lotawuba wesibili. Lombuso wesibili nguMbuso webuMesiya loholwa nguJesu Khristu. (Zak. 14:4)—2/15, likhasi 19.
Yini leyenta kungabi nekuthula emhlabeni?
Ngisho nome bantfu sebafeze tintfo letinhle kangakanani, abazange badalwe banelikhono lekucondzisa tinyatselo tabo. (Jer. 10:23) Sathane ulawula umhlaba, ngako abantfu ngeke bakhone kuletsa ukuthula. (1 John 5:19)
