Jehova ‘Ungetfwalela Umtfwalo Wami Onkhe Emalanga’
Nanobe ngangigula ngendlela lebeyibonakala ingabeketeleleki, kuphila kwami konkhe ngiye ngabona indlela yelutsandvo Babe wami wasezulwini langisekele ngayo. Kuleminyaka lengetulu kwalengu-20, ngitfole injabulo lekhetsekile ekukhonteni Jehova ngilihlahlandlela.
Ngatalwa nga-1956 nginesifo lesibitwa ngekutsi-spina bifida. Ngesizatfu sekutsi liphayiphi lelisemgogodleni wami belingavaleki ngci, kulimala kwalo msipha kwenta kwaba lukhuni ngami kuhamba futsi kungibangele ngaba naletinye tinkinga temphilo.
Ngisengakatalwa, boFakazi BaJehova labatitfunywa telivangeli bacala kufundza liBhayibheli nebatali bami. Ngesikhatsi ngisemncane, bekunebamemeteli labambalwa labebahlala edolobheni lakitsi lokutsiwa yi-Usako, eNamibia. Ngaleso sizatfu, sasihlangana sonkhe kube shengatsi singumndeni sitadishe imihlangano. Nangineminyaka lesikhombisa budzala ngahlindvwa kwavulwa sikhala emtimbeni kute ngikhone kuchama ngisebentisa sona. Nangineminyaka lengu-14 budzala, ngacalwa sifo sekuwa. Ngesizatfu sekutsi sikolwa semabanga laphakeme besikhashane kantsi nebatali bami bekudzingeka banginakekele ngalokukhetsekile, angizange ngisicedze sikolwa.
Nobe kunjalo ngancuma kucinisa buhlobo bami naNkulunkulu. Ngaleso sikhatsi betimbalwa tincwadzi tebuKhristu letitfolakala ngelulwimi lengalumunya lwesiBhunu. Kwadzingeka kutsi ngifundze siNgisi kute ngitewukwati kufundza letinyenti tato. Ngaba ngummemeteli weMbuso longakabhajatiswa ngase ngiyabhajatiswa nangineminyaka lengu-19 budzala. Eminyakeni lemine leyalandzela, ngaba netinkinga letinyenti temphilo nangekwemivelo. Ngetulu kwaloko, emmangweni wakitsi lobewunebantfu labasondzelene kakhulu, kwesaba bantfu kwangivimbela kutsi ngikhutsale emsebentini wekushumayela.
Nangisandza kuba neminyaka lengaba ngu-20 budzala, satfutsa eNamibia saya eNingizimu Afrika futsi kwaba kwekucala ngca kutsi ngibe sebandleni. Kwangijabulisa kakhulu loko! Nobe kunjalo, kwadzingeka kutsi ngiphindze ngihlindvwe—nyalo ngasengihlindvwa ematfunjini letfwala kungcola emtimbeni ngenhla nje kancane kwengungu.
Ngekuhamba kwesikhatsi, ngeva umbonisi wesifundza akhuluma ngekuba lihlahlandlela. Kwangitsintsa kakhulu enhlitiyweni loko lakukhuluma. Ngangisati kamhlophe simo sami semphilo kutsi akusiso lesikahle, kodvwa ngangibonile kutsi Jehova abengetfwala ebumatimemi lobunyenti. Ngako-ke, ngasifaka sicelo sekuba lihlahlandlela lelivamile. Kodvwa ngenca yesimo sami semphilo, labadzala belibandla bakutfola kumatima kusivumela sicelo sami.
Nobe kunjalo ngancuma kufaka umfutfo emsebentini wami wekushumayela ngeMbuso. Ngelusito lengalutfola kumake nalabanye, ngakhona kusebenta ema-awa lasetjentwa lihlahlandlela kwadzimate kwendlula tinyanga letisitfupha. Loko kwakhombisa kutsi ngitimisele kuba lihlahlandlela futsi kwakhanya kutsi simo sami semphilo ngiyakhona kusinakekela. Ngaphindze ngasifaka sicelo sekuba lihlahlandlela, labadzala basemukela futsi basivuma. Nga-September 1, 1988, ngacala kuba lihlahlandlela lelivamile.
Ngesikhatsi ngilihlahlandlela ngatibonela ngewami kusekelwa nguJehova. Kufundzisa labanye liciniso esikhundleni sekutsi nginake kakhulu kugula kwami kungivikele, kungente ngakhula kwaphindze kwangisita ngakhulisa buhlobo bami naNkulunkulu. Ngitfole injabulo lenkhulu ngenca yekutsi ngisite bantfu labanyenti kutsi batinikele futsi babhajatiswe.
Kugula kimi solo akukatibeki phansi. Kodvwa Jehova ‘ungetfwalela umtfwalo wami onkhe emalanga.’ (Hla. 68:19) Akangenti nje kutsi ngibeketelele simo lengibhekene naso kuphela; ungenta ngijabule ngesizatfu sekutsi solo ngiyaphila!
