Kute sizatfu sekukhatsateka ngekutsi umuntfu loyekelisiwe kuba nguFakazi uhlala kuphi eHholweni leMbuso. Lomagazini wente imetamo yekukhutsata batali labangemaKhristu kutsi basite bantfwana babo labayekelisiwe kuba boFakazi labasahlala nabo ekhaya kutsi balungise buhlobo babo naNkulunkulu nangabe loko kungenteka. Njengobe kuvetiwe ku-Sicongosekulindza saNovember 15, 1988, emakhasini 19 kuya ku-20 [ngesiZulu], batali bangase bafundze liBhayibheli nebantfwana babo labancane labayekelisiwe kuba boFakazi labasahlala nabo. Sinelitsemba lekutsi lomntfwana utawutfola sikhutsato lasidzingako kute ashintje indlela laphila ngayo.

Nakutiwa endzabeni yekuhlala eHholweni leMbuso, kungabonakala kukucabangela kutsi umntfwana loyekelisiwe kuba nguFakazi ahlale nebatali bakhe ngaphandle kwekuphatamisa labanye. Nanobe kungakadzingeki kutsi umuntfu loyekelisiwe kuba nguFakazi ahlale emuva ehholweni, akukafaneli kube yinkinga nangabe umntfwana loyekelisiwe kuba nguFakazi ahlala eceleni kwebatali bakhe nobe ngukuphi lapho bahleti khona. Njengobe batali banakekela buhlobo bemntfwana wabo naNkulunkulu, nakanjani batawufuna kutsi azuze emihlanganweni. Nabavumela kutsi lomntfwana ahlale nabo kunekutsi ahlale nobe ngukuphi, kungase kubasite kakhulu kuloku.

Kutsiwani nangabe umntfwana loyekelisiwe kuba nguFakazi angasahlali nebatali bakhe ekhaya? Lesimo singawenta yini umehluko? Esikhatsini lesendlulile, tincwadzi tetfu takusho ngalokucacile loko umKhristu lokufanele akwente endzabeni yekutihlanganisa nesihlobo lesiyekelisiwe kuba nguFakazi langahlali naso ekhaya. * Nobe kunjalo, kuhlala kwemuntfu loyekelisiwe kuba nguFakazi eceleni kwemalunga emndeni wakhe ngaphandle kwekuphatamisa labanye ngesikhatsi kusachubeka imihlangano, kwehlukile kunekumane afune ematfuba ekutihlanganisa netihlobo takhe ngalokungakadzingeki. Nangabe emalunga emndeni letsembekile anesimo sengcondvo lesifanele mayelana nesihlobo lesiyekelisiwe kuba nguFakazi futsi atimisele kulalela seluleko semiBhalo mayelana nekutihlanganisa naye, angeke sibe khona sizatfu sekukhatsateka.—1 Khor. 5:11, 13; 2 Joh. 11.

Ngisho nobe umuntfu loyekelisiwe kuba nguFakazi angase ahlale eceleni kwemalunga emndeni wakhe nobe lomunye ebandleni, akukafaneli kube sizatfu sekukhatsateka nangabe ahlala alalelisise. Kukhetsela umuntfu kutsi kufanele ahlale kuphi kungase kube netinkinga letehlukehlukene kuye ngetimo. Nangabe umndeni kanye netihlobo letetsembekile letitimisele kulalela timiso teliBhayibheli letimayelana nekuyekeliswa kuba nguFakazi, futsi kungabakhubi labanye bazalwane, kute sidzingo sekukhonona mayelana nekutsi labo labete emihlanganweni yebuKhristu kufanele bahlale kuphi. *