1. (a) Bantfu baphatseka njani nabatfola tikhumbuto, futsi loko kubangelwa yini? (b) Kutigcabha kungenta asitsatse njani seluleko?

BANTFU batsintseka ngetindlela letehlukahlukene nabatfola ticondziso. Sikhumbuto lesivela kumuntfu losesikhundleni lesisetulu singase semukelwe ngenjabulo, kantsi seluleko lesivela kumuntfu longasilutfo nobe losesikhundleni lesiphansi singase singemukelwa nhlobo. Indlela lesenta ngayo nasitfola seluleko ayifani. Labanye bangahle beve buhlungu, bative banemahloni ekushintja, nome babe nesifiso sekwenta ncono. Yini lebangela kutsi labantfu bente ngetindlela letingafani? Lokunye lokubangela loku kutigcabha. Kuliciniso kutsi umoya wekutigcabha ungenta umuntfu ehlulele ngendlela lengakafaneli, angasemukeli seluleko alahlekelwe siyalo lesibalulekile.—Taga 16:18.

2. Yini leyenta emaKhristu eliciniso ajabulele seluleko lesivela eVini laNkulunkulu?

² EmaKhristu eliciniso ayasijabulela seluleko lesilusito ikakhulukati nangabe sisekelwe evini laNkulunkulu. Tikhumbuto taJehova tisiniketa lwati lolubalulekile, tisifundzise tiphindze tisisite simelane netingibe letifanana nekutsandza umcebo, kutiphatsa kabi ngekwelicansi nekusebentisa kabi tidzakamiva nobe kunatsa kakhulu tjwala. (Taga 20:1; 2 Khor. 7:1; 1 Thes. 4:3-5; 1 Thim. 6:6-11) Ngetulu kwaloko, siyajabula ngesimo lesihle ‘senhlitiyo’ lesingumphumela wekulalela tikhumbuto taNkulunkulu.—Isa. 65:14.

3. Ngusiphi simo sengcondvo semhlabeli lesihle lesingasilingisa?

³ Kute silondvolote buhlobo betfu lobuligugu naBabe wetfu losezulwini, kufanele sichubeke sisebentisa ticondziso taJehova letihlakaniphile. Kuhle nangabe simo setfu sengcondvo sifanana nesemhlabeli lowabhala watsi: “[Tikhumbuto] takho tilifa lami laphakadze, yebo, tiyinjabulo yenhlitiyo yami.” (Hla. 119:111) Siyijabulela  ngendlela umhlabeli layijabulela ngayo yini imiyalo yaJehova, nobe ngaletinye tikhatsi siyitsatsa njengaleyo lengumtfwalo? Nanobe ngaletinye tikhatsi sikutfola kumatima kwemukela siyalo, asiphelelwa ngemandla. Singakwetsemba ngalokuphelele kuhlakanipha kwaNkulunkulu. Ase sihlole tindlela letintsatfu lesingakwenta ngato loku.

4. Yini lengazange ishintje ekuphileni kwaDavide?

⁴ INkhosi Davide yabhekana nebumatima lobunyenti kakhulu ekuphileni kwayo, kodvwa kunye kuphela lokungazange kushintje—kwetsembeka ngalokuphelele kuMdali wayo. Yatsi “Ngiwuphakamisela kuwe, Simakadze, umphefumulo wami. Nkulunkulu wami, ngetsembele kuwe.” (Hla. 25:1, 2) Yini leyasita Davide kutsi etsembe uYise wakhe losezulwini ngalendlela?

5, 6. Yini leshiwo liVi laNkulunkulu ngebuhlobo Davide labenabo naJehova?

⁵ Bantfu labanyenti bathantaza kuNkulunkulu nabanetinkinga kuphela. Kutsiwani nangabe umngani wakho nobe sihlobo sikhuluma nawe kuphela nasidzinga imali nobe lusito lolutsite? Ngekuhamba kwesikhatsi ungase ucale kutingabata tisusa taso tekufuna lusito lwakho. Nobe kunjalo, Davide akentanga njalo. Buhlobo bakhe naJehova baveta kukholwa kwakhe nelutsandvo labenalo ngemicabango yaNkulunkulu ekuphileni kwakhe konkhe, ngetikhatsi letimnandzi naletibuhlungu.—Hla. 40:8.

⁶ Naka lamavi aDavide ekudvumisa nekubonga Jehova, latsi: “Maye, Simakadze, Nkhosi yetfu! Libito lakho liyababateka emhlabeni wonkhe! Wena ubeke ludvumo Iwebukhosi bakho ngetulu kwemazulu.” (Hla. 8:1) Uyabubona yini buhlobo lobucinile Davide labenabo naBabe wakhe wasezulwini? Kujabulela kwaDavide buhle baNkulunkulu kwambangela kutsi advumise Jehova “onkhe emalanga.”—Hla. 35:28.

7. Sizuza njani ngekusondzela kuNkulunkulu ngemthantazo?

⁷ NjengaDavide, kudzingeka sikhulume naJehova njalo kute simetsembe ngalokucinile. LiBhayibheli litsi “Sondzelani kuNkulunkulu, naye utawusondzela kini.” (Jak. 4:8) Kusondzela kuNkulunkulu ngemthantazo nako kuyindlela lebalulekile yekutfola umoya longcwele.—Fundza 1 Johane 3:22.

8. Kungani kungakafaneli siphindzaphindze intfo yinye nasithantaza?

⁸ Nawuthantaza, uvame kusho intfo yinye yini? Nangabe kunjalo, ngaphambi kwekutsi uthantaze, tinike sikhashana sekucabanga ngaloko lofuna kukusho. Nasisho emavi lafanako njalo nasikhuluma nemngani nobe nesihlobo, singakujabulela yini loko? Singase sicale kungasinaki nasikhuluma naso. Kuliciniso kutsi Jehova angeke ahlale angayilaleli imithantazo lesuka enhlitiyweni yetinceku takhe letetsembekile. Senta kahle ngekungaphindzaphindzi intfo yinye nasikhuluma naye.

9, 10. (a) Yini lesingase siyisho emithantazweni yetfu? (b) Yini lengasisita kutsi sithantaze imithantazo lesuka enhlitiyweni?

⁹ Kuyacaca kutsi imithantazo yetfu angeke ibe yekugcina licala nangabe sifuna kusondzela kuNkulunkulu. Nasichubeka sitfulula tinhlitiyo tetfu kuJehova, sitawusondzela kuye futsi simetsembe kakhulu. Kufanele sitsini emithantazweni yetfu? LiVi laNkulunkulu liyaphendvula litsi: “Kepha kuko konkhe ticelo tenu atatiwe nguNkulunkulu, ngekukhuleka nekuncusa kanye nekubonga.” (Fil. 4:6) Liciniso likutsi nobe yini letsintsa buhlobo betfu naNkulunkulu nobe kuphila kwetfu njengetinceku takhe, kufanele sithantaze ngayo.

¹⁰ Singafundza lokunyenti emithantazweni yemadvodza nebafati labetsembekile lebhalwe eBhayibhelini. (1 Sam. 1:10, 11; Imis. 4:24-31) Incwadzi yeTihlabelelo icuketse imithantazo leminyenti letsintsa inhlitiyo netingoma tekudvumisa Jehova.  Bonkhe buhlungu nekujabula kwemuntfu kuyavetwa kulemithantazo naletingoma. Kucabangisisa ngemavi lafana nalawo lashiwo bantfu labetsembekile, kungasisita kutsi sithantaze imithantazo lecatjangelwe kahle kuJehova.

11. Kungani kufanele sizindle ngetecwayiso letivela kuNkulunkulu?

¹¹ Nali liciniso Davide lalisho: “Tikhumbuto taJehova tetsembekile, tihlakaniphisa labete lwati.” (Hla. 19:7, NW.) Kuliciniso kutsi ngisho nobe site lokuhlangenwe nako, singahlakanipha ngekulalela imiyalo yaNkulunkulu. Leminye imiBhalo lesecwayiso idzinga kutsi sizindle kute sizuze ngalokugcwele kuyo. Nguloko lokungahle kudzingeke sikwente endzabeni yekugcina bucotfo betfu nasicindzetelwa esikolweni nobe emisebentini, kulalela timiso taNkulunkulu mayelana nengati, kutigcina singatsatsi luhlangotsi njengemaKhristu nekusebentisa timiso teliBhayibheli mayelana nendlela yekugcoka nekutilungisa. Kutfola umcondvo waNkulunkulu etindzabeni letifana naleti kutasisita kutsi sikhone kubona tinkinga. Ngemuva kwaloko, sitawubese siyancuma etinhlitiyweni tetfu kutsi kufanele senteni nakungenteka kuvele simo lesinjalo. Kuzindla nekulungiselela sisengakabhekani naleso simo kungasisita kutsi singeva buhlungu.—Taga 15:28.

12. Kucabanga ngani lokungasisita sigcine tikhumbuto taNkulunkulu?

¹² Njengobe silindzele kugcwaliseka kwetetsembiso taNkulunkulu, indlela yetfu yekuphila iyakhombisa yini kutsi siphapheme? Nasi sibonelo: Siyakukholelwa yini kutsi iBhabhulona Lenkhulu itawubhujiswa masinyane? Tibusiso tesikhatsi lesitako, letifaka ekhatsi kuphila lokuphakadze emhlabeni lolipharadisi, sisatetsemba yini ngendlela lebesitetsemba ngayo nasicala kufundza ngato? Sisekhutsele yini emsebentini wekushumayela kunekutsi kuphila kwetfu kube ngiko lokubaluleke kakhulu? Kutsiwani ngelitsemba leluvuko, kungcweliswa kwelibito laJehova nekulwelwa kwebukhosi bakhe? Kusetindzaba letibalulekile yini leto kitsi? Kuzindla ngalemibuto kungase kusisite sente njengobe kwasho umhlabeli kutsi tikhumbuto taNkulunkulu tihlale “tilifa laphakadze.”—Hla. 119:111.

13. Yini leyabangela kutsi emaKhristu angelikhulu lekucala leminyaka akutfole kumatima kucondza letinye tintfo? Niketa sibonelo.

¹³ Letinye tintfo lokukhulunywa ngato eBhayibhelini singase singaticondzi kahle nyalo ngobe sikhatsi saJehova sekuticacisa asikefiki. Jesu bekahlale atjela baphostoli bakhe kutsi kutawudzingeka ahlupheke aphindze abulawe. (Fundza Matewu 12:40; 16:21.) Kodvwa abazange bakucondze loko. Bakucondza ngemuva kwekufa nekuvuswa kwakhe nakaphindze abonakala kubo asemtimbeni wenyama. Wabonakala kubafundzi bakhe labambalwa “wase uvula tingcondvo tabo, kuze bacondzisise imiBhalo.” (Luk. 24:44-46; Imis. 1:3) Ngendlela lefanako, balandzeli baKhristu bebangacondzi kutsi uMbuso waNkulunkulu wawutawubekwa ezulwini kwadzimate kwatfululelwa umoya longcwele kubo ngeliPhentekhoste la-33 C.E.—Imis. 1:6-8.

14. Ngasekucaleni kwelikhulu lema-20 leminyaka, ngusiphi sibonelo lesihle bazalwane labanyenti labasibeka nanobe bekunetintfo labebangaticondzi kahle mayelana nemalanga ekugcina?

¹⁴ Ngendlela lefanako ekucaleni kwelikhulu leminyaka lema-20, bekunetintfo letinyenti emaKhristu eliciniso labegadze kutsi titawugcwaliseka ngaleso sikhatsi ngalokuphatselene ‘nemalanga ekugcina.’ (2 Thim. 3:1) Sibonelo saloku kutsi nga-1914 labanye bebacabanga kutsi kuyiswa kwabo ezulwini kutawenteka masinyane. Ngesikhatsi ematsemba abo angagcwaliseki, kuhlolisiswa kwemiBhalo kwabembulela kutsi kwakunemsebenti lomkhulu wekushumayela lobekufanele bawente. (Mak. 13:10) Ngako-ke, nga-1922, J. F. Rutherford, lobekahola emsebentini wekushumayela watjela bonkhe labebahlangene  emhlanganweni wetive lowawuseCedar Point, e-Ohio, e-U.S.A. kutsi: “Lamuhla ngilo lilanga, iNkhosi iyabusa! Nine nititfunywa tayo. Ngako-ke memetelani, memetelani, memetelani, iNkhosi nembuso wayo.” Kusukela ngaleso sikhatsi kuchubeke, kumemetela ‘livangeli lembuso’ solo kuluphawu lwetinceku taJehova esikhatsini setfu.—Mat. 4:23; 24:14.

15. Sizuza njani ngekuzindla ngendlela Nkulunkulu lasebentelana ngayo nebantfu bakhe?

¹⁵ Nangabe sizindla ngendlela lemangalisako Jehova lasebentelana ngayo nebantfu bakhe esikhatsini lesendlulile nasesikhatsini setfu, siba nelitsemba lelikhulu emandleni akhe ekugcwalisa injongo yakhe esikhatsini lesitako. Ngesikhatsi lesifanako, tikhumbuto taNkulunkulu tiyasisita kutsi sigcine tingcondvo netinhlitiyo tetfu tilindzele kugcwaliseka kwetiphrofetho. Singaciniseka kutsi kwenta njalo kutasisita kutsi sikholelwe etitsembisweni takhe.

16. Ngutiphi tibusiso lesititfola ngekuba matasa emsebentini wetfu?

¹⁶ Nkulunkulu wetfu, Jehova, unguNkulunkulu lonemandla futsi lotsatsa sinyatselo. Umhlabeli wabuta watsi: “Ngubani nje lofanana nawe, wena lonemandla, Simakadze?” Waphindze watsi: “Nesandla sakho sinemandla, nesandla sakho sekudla siphakeme.” (Hla. 89:8, 13) Kufanele siciniseke kutsi Jehova uyajabula futsi uyayibusisa imetamo yetfu yekubeka kucala tintfo letimayelana neMbuso. Uyabona kutsi tinceku takhe letingemadvodza nobe bafati, letindzala nobe letincane, atihlali nje ‘tivilaphe.’ (Taga 31:27) Njengobe silingisa uMdali wetfu, sihlale simatasa ngemisebenti yebuKhristu. Kukhonta Nkulunkulu ngenhlitiyo yonkhe kuyasizuzisa futsi kumjabulisa kakhulu Jehova adzimate abusise umsebenti wetfu.—Fundza Tihlabelelo 62:12.

17, 18. Singasho ngani kutsi tento tekukholwa tisisita kutsi setsembele etelulekweni taJehova? Niketa sibonelo.

 ¹⁷ Tento tetfu tekukholwa tisisita ngayiphi indlela kutsi sakhe kwetsembela kwetfu kuJehova? Cabanga ngekulandzisa kwemBhalo lokumayelana nekungena kwesive saka-Israyeli eVeni Lesetsembiso. Jehova watjela baphristi labebatfwala libhokisi lesivumelwane kutsi bahambe nalo eMfuleni iJordane. Nobe kunjalo, njengobe bantfu bebasondzela, babona kutsi timvula tasentfwasahlobo betibangele kutsi lomfula ugcwale ugole tintsetse. Abetawenta njani ema-Israyeli? Kwakutawudzingeka kutsi alindze emavikana yini kute lomfula ubohle? Cha, abeka litsemba lawo kuJehova ngalokuphelele futsi alandzela ticondziso labewanikete tona. Waba yini umphumela? Lokulandzisa kutsi: “Ngesikhatsi tinyawo tebaphristi tinyatsela emanti, umfula wema wangageleti, . . . baphristi bema emkhatsini emhlabatsini lowomile edvutane naseJerikho ngesikhatsi bonkhe bawela.” (Josh. 3:12-17 Contemporary English Version) Cabanga nje kutsi batsintseka njani etinhlitiyweni tabo ngesikhatsi babona emanti ema angageleti. Kuyacaca kutsi kukholwa kwema-Israyeli kuJehova kwaciniswa ngenca yekutsembela eticondzisweni takhe.

¹⁸ Kuliciniso kutsi Jehova akenti timangaliso letifana naleti lamuhla ngenca yebantfu bakhe, kodvwa uyatibusisa tento tabo tekukholwa. Emandla aNkulunkulu lamakhulu ayabasita bantfu bakhe kutsi bente umsebenti labanike wona wekushumayela umlayeto weMbuso emhlabeni wonkhe. Jesu Khristu, Fakazi lomkhulu waJehova lowavuswa ekufeni, wacinisekisa bafundzi bakhe kutsi utabasekela kulomsebenti lobalulekile. Watsi: “Hambani, nente tive tonkhe tibe bafundzi . . . nginani onkhe emalanga, kuze kube ngusekupheleni kwetikhatsi.” (Mat. 28:19, 20) BoFakazi labanyenti lokungenteka kutsi bebanemahloni nobe besaba, bangasho kutsi umoya longcwele waNkulunkulu ubanikete sibindzi sekukhuluma nebantfu labangabati emsebentini wekushumayela.—Fundza Tihlabelelo 119:46; 2 Khorinte 4:7.

19. Nanobe singakhoni kwenta tintfo ngendlela lesifisa ngayo, ngusiphi sicinisekiso lesinaso?

¹⁹ Labanye bazalwane nabodzadze abakhoni kwenta letinye tintfo ngenca yekutsi sebakhulile ngeminyaka nobe bayagula. Nobe kunjalo, bangaciniseka ngekutsi ‘uYise wemusa Nkulunkulu longumtfombo wayo yonkhe indvudvuto’ uyasicondza simo semKhristu weliciniso ngamunye. (2 Khor. 1:3) Uyajabula ngako konkhe lesikwentako kute sitfutfukise tintfo letiphatselene neMbuso. Sonkhe sidzinga kukhumbula kutsi kukholwa kwetfu enhlawulweni yaKhristu ngiko lokutasigcina siphila njengobe senta konkhe lokusemandleni etfu.—Heb. 10:39.

20, 21. Ngutiphi letinye tindlela lesikhombisa ngato kutsi setsembele kuJehova?

²⁰ Kukhonta kwetfu kuhlanganisa kusebentisa sikhatsi, emandla nemcebo wetfu ngalokugcwele ngendlela lesingakhona ngayo. Ngaso sonkhe sikhatsi sifuna ‘kwenta umsebenti webuvangeli’ ngenhlitiyo yetfu yonkhe. (2 Thim. 4:5) Liciniso likutsi siyakujabulela kuwenta njengobe usita labanye kutsi “bafinyelele ekulatini liciniso.” (1 Thim. 2:4) Kuyacaca-ke kutsi kudvumisa nekubonga Jehova kusenta sicebe ebudlelwaneni betfu naye. (Taga 10:22) Kuphindze kusisite kutsi kucine kwetsembela kwetfu kuMdali.—Rom. 8:35-39.

²¹ Njengobe sesibonile, kwetsembela eticondzisweni taJehova letihlakaniphile akutentakaleli; kufanele sente lokutsite kute simetsembe. Kufanele sente konkhe lokusemandleni kute setsembele kuJehova ngemthantazo. Zindla ngendlela Jehova layifeza ngayo intsandvo yakhe esikhatsini lesendlulile nendlela latayifeza ngayo esikhatsini lesitako. Chubeka ucinisa kwetsembela kwakho kuJehova ngetento tekumkhonta. Ngalokucinisekile, tikhumbuto taJehova titawuhlala njalo. Nawe ungaba nelitsemba lekuphila phakadze.