1, 2. Uyakutsandza yini kwenta tincumo, futsi utiva kanjani ngaletinye tincumo lotentile?

ONKHE emalanga kudzingeka sente tincumo letinyenti. Uphatseka njani ngetincumo lokufanele utente? Labanye bantfu bayakulangatelela kutincumela yonkhe intfo. Batsi banelilungelo lekutentela tincumo, akubaphatsi kahle kutsi labanye bantfu babentele tincumo. Nobe kunjalo, kunebantfu labesabako kutsatsa tincumo ngetintfo lokufanele batente onkhe emalanga ekuphileni kwabo. Labanye basebentisa tincwadzi tesicondziso nobe bacele lusito kubeluleki futsi mhlawumbe baze bacitse imali lenyenti emetameni yekutfola seluleko labacabanga kutsi bayasidzinga.

² Labanyenti kitsi bayakwenta lokunye kwaloku lesisandza kukubala. Siyabona kutsi letinye tintfo angeke sikhone kutincuma futsi kute lesingakwenta ngaloko. Siyati kutsi etikhatsini letinyenti ekuphileni singahle sente tincumo ngendlela lesitsandza ngayo. (Gal. 6:5) Nome kunjalo, kungenteka siyavuma kutsi akusito tonkhe tincumo lesititsatsako letihlakaniphile nome letisisitako.

3. Ngutiphi ticondziso lesinato endzabeni yekwenta tincumo, kodvwa nguyiphi insayeya lekhona?

³ Njengobe sitinceku taJehova, kuyasijabulisa kutsi usinikete ticondziso leticacile letimayelana netintfo letinyenti letibalulekile ekuphileni kwetfu. Siyati kutsi nasisebentisa ticondziso taJehova, singenta tincumo letitawujabulisa yena tiphindze tisisite. Nome kunjalo, kungase kube netintfo nome timo letisitsintsako liVi laNkulunkulu lelingakhulumi ngato. Kuleto timo, singakuncuma njani loko lokufanele sikwente? Sibonelo saloko, siyati kutsi akukafaneli sebe. (Ef. 4:28) Kodvwa kuhlanganisani kahle kahle kweba? Kuya ngekubaluleka kwentfo leyebiwe yini, sisusa sekweba nome lokunye? Sikuncuma njani lokufanele sikwente etindzabeni labanye labatsi aticaci kahle? Yini lengasicondzisa?

4. Ngusiphi seluleko lokungenteka sisitfolile nakudzingeka sitsatse sincumo?

⁴ Nasitsi sifuna kutsatsa sincumo lesibalulekile  umKhristu lesikanye naye angase aphawule atsi, singasitsatsa kodvwa kudzingeka sibhadle engcondvweni. Loko kuseluleko lesikahle. LiBhayibheli liniketa lesecwayiso mayelana nekujaka kwenta tincumo, litsi: “Nematata aholelana ebumphofini.” (Taga 21:5) Kusho kutsini kuba nengcondvo lebhadlile? Kumane kusho kutsi kufanele sitsatse sikhatsi sicabangisise yini ngaleyo ndzaba, futsi singalindzeli lokukhulu siphindze sehlulele kahle? Konkhe loku kuyasita ekutsatseni sincumo lesikahle kodvwa kunalokunyenti lokudzingekako ekubeni nengcondvo lebhadlile.—Rom. 12:3; 1 Phet. 4:7.

5. Kwentiwa yini kutsi ngekwemvelo singabi nengcodvo lebhadlile?

⁵ Kufanele sivume kutsi kute kitsi lotelwe anengcondvo lebhadlile. Sikusho ngani loko? Sikusho ngobe sonkhe sitelwe sinesono futsi ngaleyondlela ngeke kwenteke kutsi sibe nengcondvo lebhadlile nemtimba lophile kahle. (Hla. 51:5; Rom. 3:23) Ngetulu kwaloko, labanyenti kitsi bake ‘baphumphutsekiswa’ nguSathane. Sonkhe sake sangati lutfo ngaJehova nemitsetfo yakhe. (2 Khor. 4:4; Thit. 3:3) Kungako kwadzingeka kutsi tincumo tetfu sitisekele etintfweni lebesicabanga kutsi tikahle, mhlawumbe besitikhohlisa ngisho nobe ngabe sacabangisisa kangakanani nasenta leto tincumo.—Taga 14:12.

6. Yini lengasisita sitfutfukise endzabeni yekubhadla engcondvweni?

⁶ Nanobe kungeke kwenteke kutsi sibe yimicemane futsi sibe nengcondvo lebhadlile, Jehova Babe wetfu losezulwini ute sono, akakwenti lokubi. (Dut. 32:4) Usisitile kutsi silungise tingcondvo tetfu kute sitfutfukise endzabeni yekubhadla engcondvweni. (Fundza 2 Thimothi 1:7.) Njengobe singemaKhristu, sifuna kucabanga kahle siphindze sente tintfo ngendlela lefanele. Kufanele siyilawule imicabango yetfu nendlela lesitiva ngayo siphindze silingise Jehova ekucabangeni kwetfu, endleleni lesitiva ngayo nangetento tetfu.

7, 8. Shano lokuhlangenwe nako lokuveta kutsi tincumo letinengcondvo tingentiwa ngisho nobe umuntfu abhekene nekucindzetelwa nobe bumatima.

⁷ Cabanga nganasi sibonelo: Kungumkhuba lovamile kutsi labanye bantfu labasebenta kulamanye emave bashiye bantfwana labasandza kutalwa etihlotjeni kuze tibakhulise njengobe batali babo bachubeka basebenta. * Lomunye wesifazane lobekahlala kulelinye live watala umntfwana longumfana. Ngaleso sikhatsi lomake wacala kutadisha liBhayibheli futsi bekatfutfuka kahle. Tihlobo nebangani tacala kumcindzetela yena nendvodza yakhe kutsi bashiye lomntfwana kagogo wakhe. Nobe kunjalo, ngekusitwa nguloko lebekakufundza, lomake wabona kutsi njengobe angumtali kungumtfwalo wakhe lawunikwe nguNkulunkulu kukhulisa umntfwana wakhe. (Hla. 127:3; Ef. 6:4) Bekufanele ahambisane nalomkhuba lovamile yini lobonakala unengcondvo kubantfu labanyenti? Nobe bekufanele asebentise loko lebekakufundza eBhayibhelini bese ubhekana nemiphumela yekungabi nemali nekutsi bantfu bahlekise ngaye? Bewungenta njani wena kube bewubhekene nalesimo?

⁸ Acindzetelekile futsi akhatsatekile, lomake watfulula sifuba sakhe kuJehova wacela sicondziso. Wakhuluma nalobekamfundzela liBhayibheli nalabanye ebandleni ngesimo labebhekene naso, wase utfola umbono waJehova ngalendzaba. Waphindze wacabanga ngengoti lengaba khona kubantfwana labehlukaniswa nebatali babo basebancane. Ngemuva kwekucabangisisa ngalendzaba asebentisa nemiBhalo, wancuma kutsi akusikahle kushiya umntfwanakhe kubogogo. Indvodza yakhe yabona indlela emalunga elibandla latimisela ngayo kumsita nendlela lomntfwana labejabule ngayo nekutsi abekhula kahle.  Yase yemukela sifundvo seliBhayibheli yaphindze yacalisa nekuya emihlanganweni nemkayo.

9, 10. Kusho kutsini kuba nengcondvo lebhadlile, futsi singakwenta kanjani?

⁹ Lesi sibonelo lesiveta kutsi kuba nengcondvo lebhadlile akusho kumane sente loko tsine nobe labanye labakucabangako, loko lesinemuva wekutsi kunengcondvo nobe lokutasisita. Ingcondvo nenhlitiyo yetfu lenesono ingafana neliwashi leligijimako nobe lelihamba kancane kakhulu. Kucondziswa ngilo kungasifaka enkingeni lenkhulu. (Jer. 17:9) Sidzinga kulungisa indlela lesicabanga ngayo kanye netinhlitiyo tetfu ngekusebentisa timiso taNkulunkulu letinekwetsenjelwa.—Fundza Isaya 55:8, 9.

¹⁰ Ngesizatfu lesihle, liBhayibheli liyasincusa litsi: “Tsemba Simakadze ngayo yonkhe inhlitiyo yakho, ungeyami ekwatini kwakho. Matise kuko konkhe lokwentako, yena uyakucondzisa tindlela takho.” (Taga 3:5, 6) Naka lamavi latsi “ungeyami ekwatini kwakho.” Alandzelwa ngulatsi “matise [Jehova] kuko konkhe lokwentako.” Nguye lonengcondvo lephelele. Ngako-ke, nobe nini nakudzingeka sitsatse tincumo, sidzinga kuya eBhayibhelini kute sitfole umbono wakhe. Ngemuva kwaloko kufanele tincumo tetfu sitisekele kulelikushoko. Kwenta njalo kusenta sibe nengcondvo lebhadlile ngekutsi silingise Jehova ngekucabanga.

11. Nguyiphi indlela yekuphumelela ekutsatseni tincumo letihlakaniphile?

¹¹ Kufundza indlela yekutsatsa tincumo letihlakaniphile nekukwenta, akusimelula. Loku kungaba yinsayeya ikakhulukati kubantfu labasandza kuhlanganyela nome kulabo labasacala kutfutfuka. Bantfu labanjalo nabo bangayenta intfutfuko kulendzaba njengobe liBhayibheli likhuluma ngabo. Ase ucabange ngendlela umntfwana lafundza ngayo kuhamba kodvwa angawi. Indlela yekutsi aphumelele kuvame kuba kutsi acatfute. Loku kuyafana nasendzabeni yemuntfu losandza kucala kuhlanganyela nome losacala kutfutfuka nakutiwa ekutsatseni tincumo letihlakaniphile. Khumbula kutsi nakachaza bantfu labavutsiwe, umphostoli Pawula watsi “labo lokutse ngekusebentisa emandla abo ekucondza bawenta aceceshelwa kwehlukanisa  kokubili lokulungile nalokungakalungi.” Ligama lelitsi “ngekusebentisa” nalelitsi “aceceshelwa,” omabili anemcondvo wekwenta umetamo ungayekeli futsi nguloko lokufanele bakwente labasandza kucala kuhlanganyela nalabasacala kutfutfuka.—Fundza Hebheru 5:13, 14, NW.

12. Singalitfutfukisa kanjani likhono letfu lekwenta tincumo letihlakaniphile?

¹² Njengobe kuke kwavetwa, onkhe emalanga kudzingeka sitsatse tincumo letinyenti, letinkhulu naletincane. Ngekusho kwalolunye luhlolo, emaphesenti langetulu kwa-40 alesikwentako asikwenti ngobe sicabangisisile ngako kodvwa sikwenta ngobe sekwaba sengatini. Sibonelo saloku kutsi njalo ekuseni mhlawumbe kudzingeka uncume kutsi utawugcokani. Loko ungakutsatsa kancane futsi ukhetse ungakanaki, ikakhulukati nawujakile. Kodvwa kubalulekile kucabanga ngekutsi lotakugcoka kuyakufanela yini njengobe uyinceku yaJehova. (2 Khor. 6:3, 4) Nawutsenga timphahla, ungase ucabange ngeluhlobo lwemphahla lolufunako kodvwa kutsiwani ngekuzitsa netindleko tato? Kutsatsa sincumo lesikahle kuletindzaba kungaba nemtselela ekucecesheni emandla etfu ekucondza lokugasisita kutsi sente tincumo letikahle nasetindzabeni letimatima.—Luk. 16:10; 1 Khor. 10:31.

13. Yini ledzingekako kute siciniseke kutsi silandzela tincumo lesititsetse?

¹³ Sonkhe siyati kutsi kutsatsa sincumo lesikahle akufani nekunamatsela kuso nekusilandzela. Nasi sibonelo: Labanye bantfu labafuna kuyekela kubhema bayehluleka ngenca yekutsi abasitfoli sikhutsato lesenele sekukuyekela. Lokudzingekako kutimisela kulandzela sincumo lositsetse. Labanye bakholelwa kutsi sifiso setfu sifanana nelimasela. Nasilijimisa liyacina kakhulu. Nasingalijimisi, liba butsakatsaka nobe liphelelwe ngemandla. Yini-ke lengasisita kutsi sitfutfukise nobe sicinise sifiso setfu sekunamtsela esincumeni lesisitsetse? Kucela lusito lwaJehova.—Fundza Filiphu 2:13.

14. Kungani Pawula aba nemandla ekwenta loko lebekati kutsi kufanele akwente?

¹⁴ Pawula abekwati loku njengobe nakuye kwenteka. Ngalesinye sikhatsi watikhalela watsi: “Nome sifiso sikhona kimi sekwenta lokulungile, kodvwa ngite emandla ekukwenta.” Bekakwati labefuna kukwenta nalobekufanele akwente kodvwa ngaletinye tikhatsi kukhona lobekumvimba. Wavuma watsi: “Ngobe ngekwemuntfu longekhatsi ngitfokotela umtsetfo waNkulunkulu. Kodvwa ngibona umtsetfo lomunye losebenta emalungeni ami ulwa nemtsetfo wengcondvo yami. Ungenta ngibe sigcili semtsetfo wesono lesihlala emalungeni ami.” Besingetsembisi yini simo lebekakuso? Cha akusinjalo. Watsi: “Akabongwe Nkulunkulu ngeNkhosi yetfu Jesu Khristu!” (Rom. 7:18, 22-25) Kulomunye umbhalo wabhala kutsi bekakhona kubhekana naleso simo ngekusitwa ‘ngemandla lamakhulu langasiwo etfu kepha aNkulunkulu.’—2 Khor. 4:7.

15. Kutsatsa sincumo lesicinile nekungasitsatsi kungaba namuphi umphumela kulabo labatsintsekako?

¹⁵ Kuyacaca kutsi kute sijabulise Nkulunkulu, kudzingeka sitsatse sincumo lesicinile. Khumbula emavi Elija lawasho kulabebakhonta Bhali nakumahlubuka aka-Israyeli nabaseNtsabeni iKhameli, watsi: ‘Kuyawuze kube ngunini solomane nidziyatela emkhatsini wemicondvo lemibili? Nangabe Simakadze anguNkulunkulu, landzelani yena; kodvwa nangabe Bhali anguNkulunkulu, landzelani yena.’ (1 Khos. 18:21) Ema-Israyeli bekakwati lobekufanele akwente kodvwa ‘bewadziyatela’ ngekutsi angatsatsi sincumo lesifanele. Kunemehluko lomkhulu emkhatsini waloko lokwenteka kuma-Israyeli nalokwenteka eminyakeni lengaphambili. Joshuwa wabeka sibonelo lesihle nakatjela  ema-Israyeli kutsi: “Nangabe kukhonta Simakadze kubonakala kungatsandzeki kini, ngako khetsani lamuhla kutsi nitawukhonta bani . . . Kodvwa mine nendlu yami sitawukhonta Simakadze.” (Josh. 24:15) Saba namuphi umphumela lesento sakhe? Joshuwa nalabo labamlandzela babusiswa bangena eveni lesetsembiso, “live leligcwele lubisi neluju lwetinyosi.”—Josh. 5:6.

16, 17. Shano sibonelo lesiveta kutsi kutsatsa tincumo letivumelana nentsandvo yaNkulunkulu kuyazusisa.

¹⁶ Nasi sibonelo sesikhatsi setfu: Umzalwane loshadile losandza kubhajatiswa, yena nemkakhe banebantfwana labancane labatsatfu. Ngalelinye lilanga, lasebenta naye wamtjela kutsi bahambe bayofuna emadlelo laluhlata kulenye inkapane leholela kahle. Lomzalwane wacabanga ngalendzaba waphindze wathantaza ngayo. Bekavele akhetse lomsebenti lobewungaholeli kahle kuze angasebenti ngetimphelasontfo atewukhona kuya emihlanganweni nasensimini nemndeni wakhe. Wabona kutsi bekangeke akhone ngisho kwesikhashana kukwenta loko nangabe angatsatsa lomsebenti lomusha. Wena bewungenta njani?

¹⁷ Nakacatsanisa buhlobo bakhe naNkulunkulu nemsebenti loholela kahle, lomzalwane akawutsatsanga lomsebenti. Ucabanga kutsi watisola yini ngalesincumo sakhe? Akazange ngisho nakancane. Wabona kutsi tibusiso lebekatatitfola betitamzuzisa kakhulu yena kanye nemndeni wakhe kunemsebenti loholela kahle. Yena nemkakhe bajabula lapho indvodzakati yabo leneminyaka lelishumi budzala ibatjela kutsi iyabatsandza bona nebazalwane nabodzadze futsi imtsandza kakhulu Jehova. Yatsi ifuna kutinikela kuJehova iphindze ibhajatiswe. Asingabati kutsi bekasijabulela sibonelo lesihle seyise sekubeka kukhonta Jehova kucala ekuphileni kwakhe.

18. Kubaluleke ngani kutsi onkhe emalanga sitsatse tincumo letihlakaniphile?

¹⁸ Mosi Lomkhulu, Jesu Khristu, abeloku ahola tikhonti taJehova teliciniso kulelihlane lelilive laSathane emashumi eminyaka. Njengobe anguJoshuwa Lomkhulu, Jesu sewukulungele kutsatsa sinyatselo sekucedza lelive lelonakele bese uholela balandzeli bakhe eveni lelisha lelinekulunga labetsenjiswe lona. (2 Phet. 3:13) Ngako-ke, nyalo akusiso sikhatsi sekubuyela endleleni yekucabanga yakucala, emikhubeni yetfu yakadzeni, endleleni yekutiphatsa nasemigomeni lebesinayo. Sikhatsi sekunakisisa kutsi Nkulunkulu ufuna senteni. (Rom. 12:2; 2 Khor. 13:5) Shengatsi tincumo lotenta onkhe emalanga kanye netintfo lotikhetsako tingaveta kutsi ungumuntfu lofanelwe kutfola sibusiso saNkulunkulu saphakadze.—Fundza Hebheru 10:38, 39.