1. Shano umehluko lokhona emkhatsini wendlela levamile bugcili lobuchazwa ngayo, nalobo lobukhutsatwa kuRoma 12:11.

BUGCILI bebuKhristu behluke kakhulu endleleni bantfu labanyenti labayicabanga ngayo indzaba yebugcili. Etingcondvweni tabo, kuba sigcili kuvusa umcabango wekuphatfwa ngesibhuku, kucindzetelwa kanye nekuphatfwa kabi. Kodvwa liVi laNkulunkulu leliphefumulelwe likhuluma ngebugcili lobufaka ekhatsi kutinikela ekusebenteleni iNkhosi lenelutsandvo. Ecinisweni, ngalesikhatsi umphostoli Pawula ancusa emaKhristu ekucala atsi: “Nibe tigcili taJehova,” abewakhutsata kutsi anikele umsebenti longcwele ngenca yekutsandza Nkulunkulu. (Rom. 12:11) Loluhlobo lwebugcili lufaka ekhatsi ini? Singakubalekela njani kuba tigcili taSathane nelive lakhe? Ngumiphi imivuzo yekuba sigcili saJehova neyekumkhonta ngekwetsembeka?

2. (a) Yini lebeyingenta sigcili lesingumIsrayeli kutsi siliyekele litfuba lekutfola inkhululeko? (b) Bekubaluleke ngani kubhotjoswa kwendlebe yesigcili lesitinikele?

² EMtsetfweni Nkulunkulu lawuniketa ema-Israyeli, sifundza ngeluhlobo lolutsite lwebugcili Jehova lalufunako kitsi. Sigcili lesingumHebheru bekufanele sikhululwe ngemnyaka wesikhombisa. (Eks. 21:2) Nobe kunjalo, Jehova wasentela lilungiselelo lelikhetsekile sigcili lebesimtsandza mbamba umtsengi waso futsi sifuna kuchubeka nekumsebentela. Umtsengi waso bekufanele asitsatse asimikise endzaweni yekukhonta eceleni kwemnyango nome eceleni kwensika yemnyango abhobose indlebe yaso ngelusungulo. (Eks. 21:5, 6) Bekubalulekile kutsi lenchubo ihlanganise kubhotjoswa kwendlebe. Elulwimini lwesiHebheru umcondvo losisekelo wekulalela uvetwa ligama lelihlobene nekuva kanye nekulalela. Lesisebenti lesitinikele besinesifiso sekuchubeka silalela lokushiwo ngumtsengi waso. Loku kuyasisita sibone kutsi kuhlanganisani kutinikela kwetfu kuJehova. Kuhlanganisa kulalela ngekutitsandzela ngenca yekutsandza Nkulunkulu.

3. Siyini sisekelo sekutinikela kwetfu kuNkulunkulu?

 ³ Nasibhajatiswa njengemaKhristu, besesincumile kutinikela kuJehova kute sibe tigcili takhe. Satinikela ngenca yekutsi besinesifiso sekulalela Jehova nesekwenta intsandvo yakhe. Kute lowasiphocelela kutsi sitinikele. Ngisho nebantfwana labancane babhajatiswa ngemuva kwekutinikela kuJehova hhayi ngobe bajabulisa batali babo. Sisekelo sekutinikela kwetfu kwebuKhristu, lutsandvo lesinalo ngeNkhosi yetfu yasezulwini, Jehova. Umphostoli Johane wabhala watsi: “Ngobe kutsandza Nkulunkulu kugcina imiyalo yakhe.”—1 Joh. 5:3.

4. Yini ledzingekako kute sibe “tigcili tekulunga”?

⁴ Simbonga kakhulu Jehova ngekusenta kusifanele kuba tigcili takhe. Kukholwa kwetfu enhlawulweni yaKhristu kuyasikhipha ejokeni lesono. Nanobe sisenesono, ngekutitsandzela singaphansi kweligunya laJehova naJesu. Pawula wakuchaza kwacaca loku encwadzini lephefumulelwe layibhala, nakatsi: “Kanjalo nani kufanele nitsatse ngekutsi nifile nehlukana nesono, kodvwa niphilela Nkulunkulu nikuKhristu Jesu.” Wase uwecwayisa ngekutsi atsi: “Anati yini kutsi lowo lenitinikele kuye nitigcili takhe tekumlalela? Nitigcili talowo lenimlalelako, nome tesono kube kufa, nome tekulalela Nkulunkulu kube kwemukeleka kuye kutsi nilungile. Akabongwe Nkulunkulu, ngobe benitigcili tesono kodvwa seniwatfobele ngenhlitiyo yenu yonkhe emaciniso emfundziso leseniyemukele. Nakhululwa esonweni, nase niba tigcili tekulunga.” (Rom. 6:11, 16-18) Naka kutsi lomphostoli ukhuluma ‘ngekuwatfobela ngenhlitiyo yonkhe emaciniso.’ Kutinikela kwetfu kuJehova kusenta “tigcili tekulunga.”

5. Nguyiphi imphi sonkhe lesibhekene nayo, futsi kwentiwa yini loko?

⁵ Nome kunjalo, kunetintfo lokufanele sitincobe kute siphile ngekutinikela kwetfu. Kunetimphi letimbili lokufanele sitilwe. Yekucala, ngulemphi Pawula labhekana nayo. Wabhala watsi: “Ngobe ngekwemuntfu longekhatsi ngitfokotela umtsetfo waNkulunkulu. Kodvwa ngibona umtsetfo lomunye losebenta emalungeni ami ulwa nemtsetfo wengcondvo yami. Ungenta ngibe sigcili semtsetfo wesono lesihlala emalungeni ami.” (Rom. 7:22, 23) Natsi sono lesatalwa naso sihlale sisihlupha. Onkhe emalanga silwa netifiso tenyama yetfu. Umphostoli Phetro wasikhutsata watsi: “Nitiphatse njengebantfu labakhululekile, kodvwa ningakusebentisi kukhululeka kwenu kube simbonyo salokubi; kodvwa tiphatseni njengetinceku taNkulunkulu.”—1 Phet. 2:16.

6, 7. Yini leyentiwa nguSathane kute lelive lisikhange?

⁶ Imphi yesibili lesibhekene nayo, kulwa nalelive lelilawulwa ngemadimoni. Sathane longumbusi wemhlaba, ucondzisa tikhali kitsi ngobe etama kucedza kwetsembeka kwetfu kuJehova nakuJesu. Ufuna kusigcilata ngekusilinga kute silandzele kulawula kwakhe. (Fundza Efesu 6:11, 12.) Lenye indlela Sathane lakwenta ngayo loko kwenta lelive lakhe libonakale likhanga kakhulu. Umphostoli Johane wasecwayisa watsi: “Ningalitsandzi live netintfo letiseveni. Nangabe umuntfu atsandza live, lutsandvo lwaBabe alukho kuye. Ngobe konkhe lokuseveni, kuyinkhanuko yenyama, nenkhanuko yemehlo, nekutigabatisa lokulite ngetintfo takulomhlaba. Konkhe loku akuveli kuBabe, kodvwa kwelive.”—1 Joh. 2:15, 16.

⁷ Kuba nemcebo kusifiso lesigcwele emhlabeni. Sathane ukhutsata inkholelo yekutsi imali iletsa injabulo. Kunetitolo letinyenti letitsengisa tintfo letehlukehlukene. Tekukhangisa tikhutsata kutsi uhlale utsenga lokutsite uphindze utijabulise. Betekuvakasha bakhangisa ngetindzawo letinhle kute kutsi bantfu bativakashele kantsi tivame kuba nebantfu labacabanga njengalelive. Bonkhe bantfu lesiphila nabo  bakhutsata kutsi uphile imphilo “lencono” kodvwa ngendlela yalelive.

8, 9. Nguyiphi ingoti lenkhulu lekhona, futsi kwentiwa yini loko?

⁸ Nakakhuluma nalabo lebebasebandleni lebuKhristu lekucala lebesebanembono welive, Phetro wecwayisa watsi: “Kujabula kwabo kumita nekutamasa, ngisho nasemini imbala. Yebo, balihlazo nendlisamahloni nase bahlanganyela nani edzilini ngaso sonkhe sikhatsi, batijabulisa ngetinkhanuko tabo. Bakhuluma emagama lalite, bayenge ngetinkhanuko nangemanyala labo labasandza kuphunyula kulabedukako. Babetsembisa inkhululeko, kantsi bona ngekwabo batigcili tekubhubha; ngobe loko lokumehlulako umuntfu, usigcili sako.”—2 Phet. 2:13, 18, 19.

⁹ Nanobe singenetisa ‘inkhanuko yemehlo’ ngekutsi sibe nako konkhe lesikufunako, ngeke sikhululeke. Kunaloko, sitawuba tigcili tenkhosi yalomhlaba lengabonakali lenguSathane Develi. (1 Joh. 5:19) Kunengoti lenkhulu yekuba sigcili semcebo, bugcili lokumatima kuphunyuka kubo.

10, 11. Bobani lamuhla labasengotini lenkhulu yekuhlaselwa nguSathane, futsi imfundvo yalelive ingababangela njani bumatima?

¹⁰ Nalamuhla Sathane ufuna kuhlasela bantfu labete lokuhlangenwe nako njengobe enta e-Edeni. Bantfu labasha basengotini lenkhulu yekuhlaselwa nguSathane. Akajabuli nangabe umuntfu lomusha, nome ngabe ngumuphi lomunye umuntfu, atinikela kutsi abe sigcili saJehova. Sitsa saNkulunkulu sifuna kutsi bonkhe labatinikele kuJehova bayekele kuphila ngendlela yekutinikela kwabo nangekwetsembeka.

¹¹ Ase sibuyele kulendzaba yesigcili lesavuma kubhotjoswa indlebe. Lesigcili kungenteka besiva buhlungu kwesikhashana futsi buphele kusale luphawu lwekubhotjoswa. Kukhetsa ngendlela leyehlukile kubontsanga yakho kungaba matima, futsi kube buhlungu kumuntfu lomusha. Sathane ukhutsata umbono wekutsi kuba nemsebenti lotsite kulelive kutamenetisa umuntfu, kodvwa emaKhristu kufanele acabangisise ngekubaluleka kwekwenetisa sidzingo sawo sekuba nebuhlobo lobuhle naNkulunkulu. Jesu wafundzisa kutsi: “Babusisiwe labamphofu emoyeni.” (Mat. 5:3) EmaKhristu latinikele aphilela kwenta intsandvo yaNkulunkulu, hhayi yaSathane. Ajabulela kuphila ngemtsetfo waJehova futsi azindle ngawo imini nebusuku. (Fundza Tihlabelelo 1:1-3.) Nome kunjalo, tinhlobo letinyenti temfundvo lephakeme yalamuhla atitiniketi tinceku taJehova sikhatsi  lesenele sekuzindla nekwenetisa sidzingo letinaso sekuba nebuhlobo lobuhle naNkulunkulu.

12. Bantfu labasha labanyenti babhekene nakuphi kukhetsa lamuhla?

¹² Bantfu labasetikhundleni letisetulu bangenta tintfo tibe matima esigcilini lesingumKhristu. Encwadzini yekucala layibhalela baseKhorinte, Pawula wabuta watsi: ‘Nibitwe nitigcili yini?’ Wase utsi: ‘Ningakhatsateki. Nome ningakhululeka, ningamane nisebentise lelo tfuba leninalo.’ (1 Khor. 7:21) Kwakufanele bakhululeke ebugcilini. Emaveni lamanyenti namuhla, kusemtsetfweni kutsi umuntfu afundze aze abe neminyaka letsite. Ngemuva kwaloko bafundzi baniketwa litfuba lekutikhetsela. Kuchubeka nemfundvo kulelive kute utfole umsebenti lokahle kungase kunciphise inkhululeko yemuntfu yekungenela umsebenti wasikhatsi sonkhe.—Fundza 1 Khorinte 7:23.

13. Nguluphi luhlobo lwemfundvo lolutatizuzisa kakhulu tinceku taJehova?

¹³ Pawula wecwayisa emaKhristu aseKholose watsi: “Caphelani-ke kutsi kubete lonitfumba ngekuhlakanipha, nangekukhohlisa lokulite, aniyenge ngemikhuba yebantfu nangetimfundziso temimoya yemvelo emkhatsini. Konkhe loko kuphambene nendlela yaKhristu.” (Khol. 2:8) ‘Timfundziso temimoya yemvelo emkhatsini’ nemasiko ebantfu, kwandzile endleleni yekucabanga yalamuhla lekhutsatwa tifundziswa. Imfundvo lephakeme njengobe igcizelela kufundza lokungapheli, ivame kukhicita bafundzi labatfola ticu labete emakhono nobe labanalamancane, lokubashiya bangakakulungeli kubhekana nekuphila. Ngalokwehlukile, tinceku taJehova tikhetsa imfundvo letisita kutsi titfutfukise emakhono ladzingekako kute tigcine kuphila kwato kwekukhonta Nkulunkulu kumelula. Titsatsa seluleko Pawula lasiniketa Thimothi lesitsi: “Vele kuyinzuzo lenkhulu kwesaba Nkulunkulu kanye nekweneliseka. Kodvwa nasinekudla nekwekwembatsa, aseneliseke.” (1 Thim. 6:6, 8) Kunekutsi afune ticu temfundvo nekutakhela ligama kulelive, emaKhristu eliciniso agcila ekutfoleni ‘tincwadzi tekuncoma’ ngekutsi ente konkhe lokusemandleni awo emsebentini wekushumayela.—Fundza 2 Khorinte 3:1-3.

14. Ngekusho kwaFiliphu 3:8, Pawula abekutsatsa njani kuba sigcili saNkulunkulu naKhristu?

¹⁴ Ase ucabange ngendzaba yemphostoli  Pawula. Wafundziswa ngumfundzisi weMtsetfo longumJuda, Gamaliyeli. Imfundvo Pawula layitfola ingacatsaniswa nemfundvo yasenyuvesi lamuhla. Pawula watsini ngalemfundvo nakayicatsanisa nekuba sigcili saNkulunkulu naKhristu? Wabhala watsi: “Konkhe ngikushaya lite ngebukhulu bekumati Khristu Jesu iNkhosi yami.” Wachubeka watsi: ‘Ngilahlekelwe ngiko konkhe ngenca yakhe. Ngikushaya tibi, kuze ngizuze Khristu.’ (Fil. 3:8) Lendzaba isita emaKhristu lasemasha nebatali bawo labesaba Nkulunkulu kutsi bente sincumo lesihlakaniphile nakutiwa endzabeni yemfundvo. (Buka sitfombe.)

15, 16. Nguyiphi imfundvo Jehova lasipha yona, futsi iyini injongo yayo?

¹⁵ Sinjani simo etikolweni letinyenti temfundvo lephakeme emhlabeni? Akwenteki yini ngaletinye tikhatsi tibe tigodlo tepolitiki nendzawo yemibango? (Ef. 2:2) Ngalokwehlukile, inhlangano yaJehova iniketa imfundvo lencono kakhulu endzaweni lenekuthula lokulibandla lebuKhristu. Ngamunye kitsi unelitfuba lekuzuza eSikolweni Semsebenti WemaKhristu lesichutjwa maviki onkhe. Kunalolunye luhlobo lwemfundvo lekhetsekile yebazalwane labangakashadi labangemahlahlandlela (Sikolwa Lesisekelwe EBhayibhelini Sebazalwane Labangakashadi) kanye nesemahlahlandlela lashadile (Sikolwa Lesisekelwe EBhayibhelini SemaKhristu Lashadene). Lemfundvo levela kuNkulunkulu iyasisita kutsi simlalele Jehova, loyiNkhosi yetfu yasezulwini.

¹⁶ Emagugu akamoya singawemba ku-“Watch Tower Publications Index” nobe ku-“Watchtower Library” leku-CD-ROM. Injongo leyinhloko yemfundvo yeliBhayibheli kutsi sikhonte Jehova. Isifundzisa kutsi singabasita njani labanye babuyisane naNkulunkulu. (2 Khor. 5:20) Loku kutabasita nabo kute bafundzise labanye.—2 Thim. 2:2.

17. Kukhetsa imfundvo lencono kakhulu kunamiphi imivuzo?

¹⁷ Emfanekisweni waJesu wemathalenta, tisebenti letimbili letetsembekile tanconywa taphindze tajabula kanye nenkhosi yato ngekutsi taniketwa umsebenti lomnyenti. (Fundza Matewu 25:21, 23.) Kukhetsa imfundvo lencono kakhulu lamuhla kuletsa injabulo nemivuzo. Cabanga ngaMichael lowaphasa ngemalengiso esikolweni kangangekutsi bothishela bakhe bammemela emhlanganweni kute bakhulume ngematfuba labenawo ekuya enyuvesi. Labothishela bamangala nabatfola kutsi Michael ukhetse kufundzela umsebenti wetandla lotsatsa sikhatsi lesifishane. Ngekuhamba kwesikhatsi lowo msebenti wamsita kutsi akhone kutisekela njengobe alihlahlandlela lelivamile. Uyatisola yini ngalesincumo lasitsatsa? Utsi: “Imfundvo levela kuNkulunkulu lengiyitfolile ngeke ngiyicatsanise nalutfo njengobe ngilihlahlandlela futsi nyalo sengingulomdzala ebandleni. Tibusiso nemalungelo lengiwajabulelako awalingani nemali lebengingayihola. Ngijabula kakhulu ngekutsi angizange ngikhetse imfundvo lephakeme.”

18. Yini lekukhutsata kutsi ukhetse imfundvo lencono kakhulu?

¹⁸ Imfundvo lencono kakhulu isifundzisa intsandvo yaNkulunkulu iphindze isisite sibe tigcili taJehova. Isiniketa litsemba “lekutsi nendalo ngalelinye lilanga iyawukhululwa kulobugcili bekubola, ibe nesabelo kulenkhululeko nebukhosi bebantfwana baNkulunkulu.” (Rom. 8:21) Ngetulu kwaloko, sifundza indlela lesingakhombisa ngayo kutsi siyitsandza mbamba iNkhosi yetfu yasezulwini, Jehova.—Eks. 21:5.