Emahlahlandlela lamabili emukelwa kulelinye likhaya eKenya. Ngesikhatsi angena amangala nawabona indvodza lebeyibukeka iyincane ilele embhedzeni. Beyinemtimba lomncane futsi imikhono yayo imifishane. Njengobe bewacoca nayo ngesetsembiso saNkulunkulu lesitsi “labachutako bayawusuka emagonso njengenyamatane,” lendvodza yavele yamoyitela.—Isa. 35:6.

Lamahlahlandlela atfola kutsi Onesmus loseminyakeni yabo-30 budzala, watalwa anesifo lesichwalisa ematsambo lokutsiwa yi-osteogenesis imperfecta. Ematsambo akhe abutsakatsaka kakhulu kangangekutsi kutsintseka nje kancane kubangela kutsi ephuke. Njengobe lesifo singelapheki, Onesmus abecabanga kutsi utawuhlale asetinhlungwini futsi ahlale asencoleni yalabakhubatekile.

Onesmus wavuma kutsi bafundze naye liBhayibheli. Nome kunjalo, make wakhe wala kutsi aye emihlanganweni yebuKhristu acabanga kutsi angahle alimale nobe atengetele buhlungu. Ngako-ke bazalwane bebamtsebulela imihlangano futsi Onesmus bekayilalela ekhaya. Ngemuva kwekufundza tinyanga letisihlanu, wancuma kuya emihlanganweni nanobe loko bekungaba yingoti.

Kuya kwa-Onesmus emihlanganweni yebuKhristu kwamengetela yini buhlungu? Cha, kodvwa kwenteka lokwehlukile. Onesmus nakakhumbula utsi: “Bengiva shengatsi buhlungu bami lobungapheli buyancipha nakuchubeka imihlangano.” Bekacabanga kutsi litsemba lakhe lelisha ngilo lelimenta ative ancono. Unina wa-Onesmus walubona lushintjo endleleni indvodzana yakhe letiva ngayo futsi naye Onesmus wajabula kakhulu kutsi unina wavuma kufundzelwa liBhayibheli. Bekavame kutsi: “Kukhonta Nkulunkulu kungumutsi wendvodzana yami.”

Kungakahambi nje nesikhatsi lesidze, Onesmus waba ngummemeteli longakabhajatiswa. Ngekuhamba kwesikhatsi, wabhajatiswa futsi nyalo uyinceku lesebentako ebandleni. Nanobe angakhoni kuhamba futsi lomunye umkhono wakhe ungasebenti, Onesmus bekanesifiso sekwenta konkhe langakwenta emsebentini waJehova. Bekafuna kuba lihlahlandlela lelisitako kodvwa angabata kufaka sicelo. Bekangatjatiswa yini? Bekangatjatiswa kutsi kufanele etsembele kulomunye umuntfu kute amfucele incola yakhe. Nakakhuluma nalamanye emaKhristu ngalendzaba, etsembisa kumsita. Ngiko kanye loko lakwenta, kusita Onesmus kutsi abe lihlahlandlela lelisitako.

Wativa ngendlela lefanako Onesmus ngisho sekafuna kuba lihlahlandlela lelivamile. Kodvwa ngalelilenye lilanga, umbhalo welusuku wamniketa sikhutsato lebekasidzinga. Lombhalo kwakuTihlabelelo 34:8, utsi: “Ase ninambitse nibone kutsi Simakadze muhle unemusa.” Ngemuva kwekuzindla ngalombhalo, Onesmus wancuma kuba lihlahlandlela lelivamile. Nyalo sewushumayela emalanga lamane ngeliviki futsi unetifundvo letinyenti letitfutfukako. Nga-2010, waya eSikolweni Semsebenti Semahlahlandlela. Wajabula kakhulu Onesmus nakatfola kutsi lomunye webachubi kulesikolwa ngulomunye walabazalwane labamvakashela.

Batali ba-Onesmus sebashona, kodvwa bazalwane nabodzadze ebandleni lakulo bamnakekela onkhe emalanga. Ubonga kakhulu ngato tonkhe tibusiso latijabulelako futsi ulangatelela sikhatsi lapho ‘kute loyawuhlala [khona] loyawutsi: “Ngiyagula.”’—Isa. 33:24.