FRANÇOIS longulomdzala ebandleni lohlala eveni lelisatfutfuka ulandzisa utsi: “Kwasuka ludlame eveni lakitsi ngemuva kwelukhetfo, lususwa ngulabo labebangakaphumeleli elukhetfweni. Lolodlame lwaphocelela kutsi boFakazi BaJehova babaleke emakhaya abo. Kudla nemitsi bekungatfolakali melula futsi lokwakutfolakala kwakudule kakhulu. Emabhange avalwa kanye nemishini lokukhishwa kuyo imali.”

Ngekushesha, bazalwane basehhovisini leligatja bacala kusekela ngetintfo lebetidzingeka masinyane kubo bonkhe boFakazi lebebashiye emakhaya abo eveni lonkhe bayohlala emaHholweni eMbuso. Emacembu lebekalwa avimbetela imigwaco, kodvwa ngobe bekati kutsi boFakazi abalutsatsi luhlangotsi, timoto tasegatjeni ngalokuvamile betivunyelwa kutsi tendlule.

François utsi: “Nasiya eHholweni leMbuso, labatsite lebebabhacile badubula lemoto lebesihamba ngayo kodvwa lenhlavu yendlula emkhatsini wetfu. Sibona lelinye lisotja lebeliphetse sibhamu ligijima lita ngakitsi, sayidedisa ngekushesha imoto, sajika sabuyela egatjeni. Sambonga Jehova ngekutsi sasindza. Ngakusasa, bazalwane lebebangu-130 baya kulenye indzawo leyayiphephile kulelinye liHholwa LeMbuso. Labanye beta ehhovisini leligatja, sakhona kubanakekela ngetidzingo tekuphila kanye nebuhlobo babo naNkulunkulu lwate lwaphela loludlame.”

François utsi: “Kamuva, ehhovisini leligatja satfola tincwadzi letinyenti lebetivela kubazalwane eveni lonkhe babonga kakhulu. Kubona indlela labanakekelwa ngayo ngulabanye bazalwane, kwakhulisa kumetsemba kwabo Jehova.”

Nakunetinhlekelele temvelo naletentiwe bantfu, asisho kubazalwane nabodzadze labadzingile kutsi “ufutfumale futsi wesutse.” (Jak. 2:15, 16) Esikhundleni saloko, sifuna kubasita ngetidzingo tekuphila. Ngelikhulu lekucala leminyaka kwenteka loku. Ngemuva kwekutfola umlayeto lebewumayelana nendlala lenkhulu lebeyitawuba khona, “bafundzi bavumelana ngekutsi nguloyo naloyo akatfumele loko langakukhona kute kusitwe bazalwane baseJudiya.”—Imis. 11:28-30.

Njengobe sitinceku taJehova sifuna kusita labo labadzingile. Nome kunjalo, bantfu bayakudzinga nekwati ngaNkulunkulu. (Mat. 5:3) Kute abasite babone kutsi banaleso sidzingo futsi batsatse sinyatselo sekusenetisa, Jesu watfuma balandzeli bakhe kutsi bente bafundzi. (Mat. 28:19, 20) Ngamunye wetfu usebentisa sikhatsi lesinyenti, emandla kanye nemcebo wakhe ekwenteni lowo msebenti. Njengenhlangano, sisebentisa leminye iminikelo kute sisite ngetidzingo tekuphila, kodvwa ngalokuyinhloko leminikelo isetjentiselwa tintfo letimayelana neMbuso nekusakatwa kwetindzaba letimnandzi. Ngaleyondlela sikhombisa kutsi siyamtsandza Nkulunkulu nabomakhelwane betfu.—Mat. 22:37-39.

Labo labasekela umsebenti lowentiwa boFakazi BaJehova emhlabeni wonkhe bangaciniseka kutsi iminikelo yabo isetjentiswa kahle. Ungakhona yini kusita bazalwane labadzingile? Unaso yini sifiso sekusekela umsebenti wekwenta bafundzi? Nakunjalo, “yenta lokuhle kulabo labakudzingako, nangabe unawo emandla ekukwenta.”—Taga 3:27.