1, 2. Yini lekungenteka baphostoli bayicabanga ngesikhatsi seluhambo lwekuya eJerusalema?

‘NJENGOBE emafu angasekho, sibona lucetu lwenyanga. Kungenteka kutsi balindzi baseJerusalema balubonile lolucetu lwenyanga itolo kusihlwa. Ngemuva kwekutsi iSanhedrini ikubone loko, yavele yamemetela kucala kwenyanga lensha, Nisani. Lesimemetelo sasakatwa ngetitfunywa nome ngekutsi kubaswe imililo, lokwenta kutsi sifike nalapha kitsi. Akungabateki kutsi naJesu utawufuna kuhamba aye eJerusalema kute afike khona lingakacali liPhasika.’

² Singake sicabange kutsi yini leyafika etingcondvweni talabanye bantfu lebebanaJesu ePhereya (ngesheya kweJordane) eluhambeni lwakhe lwekugcina lwekuya eJerusalema. (Mat. 19:1; 20:17, 29; Mak. 10:1, 32, 46) Nasekati emaJuda kutsi utawuba nini Nisani 1, bekatawulindza kuze kuphele lamanye emalanga langu-13 bese agubha liPhasika ngemuva kwekushona kwelilanga ngaNisani 14.

3. Kungani emaKhristu alitsatsa njengalelibalulekile lilanga leliPhasika?

³ Lilanga leSidlo SeNkhosi Sakusihlwa, lesicondzana nelilanga leliPhasika, sitawuba nga-April 14, 2014, ngemuva kwekushona kwelilanga. Lelo kutawube kulilanga lelikhetsekile kumaKhristu eliciniso nakulabo labatsandzako kufundza. Ngasiphi sizatfu? Ngenca yaloko lesikufundza ku-1 Khorinte 11:23-25 lotsi: ‘Ngebusuku Jesu labetawutsengiswa ngabo watsatsa sinkhwa, futsi ngemuva kwekubonga, wasihlephula watsi: “Loku kusho umtimba wami lotawunikelwa ngenca yenu. Chubekani nikwenta, ningikhumbula.” Wenta kanjalo nangendzebe.’

4. (a) Ngumiphi imibuto lesingahle sitibute yona ngeSikhumbuto? (b) Sati kanjani kutsi lilanga leSikhumbuto litawuba nini umnyaka nemnyaka? (Fundza libhokisi lelitsi  “Sikhumbuto Sanga-2014.”)

⁴ Asingabati kutsi nawe utawube ukhona kulomkhosi njengobe Jesu atsi balandzeli bakhe kufanele bawugubhe minyaka yonkhe. Njengobe sisengakefiki Sikhumbuto,  tibute kutsi: ‘Kufanele ngisilungiselele kanjani? Ngutiphi tifanekiselo letitawusetjentiswa? Kutawube kwentiwani kulomkhosi? Ubaluleke ngani kimi lomkhosi kanye naletifanekiselo?’

5. Yini Jesu latjela baphostoli bakhe kutsi bayilungiselele kute bagubhe liPhasika lekugcina?

⁵ Ngesikhatsi Jesu atjela baphostoli bakhe kutsi balungise indlu labatawugubhela kuyo liPhasika, akazange abale imihlobiso; kunaloko abefuna indlu lefanele, lehlobile nendzawo leyenele licembu lebantfu lebebatuwaba khona. (Fundza Makho 14:12-16.) Bebatawulungisa tintfo letitsite letidzingekako kulesidlo letifaka ekhatsi sinkhwa lesite imvubelo kanye neliwayini lelibovu. Ngemuva kwesidlo seliPhasika, Jesu wakhuluma ngaletifanekiselo letimbili.

6. (a) Ngemuva kwesidlo seliPhasika, yini Jesu layisho mayelana nesinkhwa? (b) Hlobo luni lwesinkhwa lesisetjentiswa ngeSikhumbuto?

⁶ Umphostoli Matewu lobekakhona nakugujwa lomkhosi, kamuva wabhala kutsi: “Jesu watsatsa sinkhwa, wabonga, wasihlephula wase usinika bafundzi bakhe, watsi: ‘Tsatsani nidle.’” (Mat. 26:26) ‘Lesinkhwa’ besite imvubelo njengobe besisetjentiselwe liPhasika. (Eks. 12:8; Dut. 16:3) Lesinkhwa besentiwa ngafulaha wakolo kanye nemanti ngaphandle kwekufaka imvubelo nobe sinongo lesitsite, njengeluswayi. Ngenca yekutsi besite imvubelo besingeke sikhukhumuke. Besitawuba dvuma, some futsi sibe licebelengwane lokumelula kulicetula. Lamuhla, njengobe kusesele sikhatsi kufike Sikhumbuto, labadzala belibandla bangase bacele lotsite kutsi ente lesinkhwa asebentisa fulaha wakolo kanye nemanti, asibhake ngelipani leligcotjiswe emafutsa kancane. (Nangabe fulaha wakolo ungatfolakali, kungasetjentiswa fulaha welilayisi, webhali, wesangalane nobe imphuphu yetinhlavu letifana naloku.)

7. Nguluphi luhlobo leliwayini Jesu lakhuluma ngalo, futsi nguluphi luhlobo lweliwayini lokufanele lusetjentiswe ngeSikhumbuto?

⁷ Matewu wachubeka watsi: “[Jesu] wase utsatsa nendzebe, wabonga, wabanika yona, watsi: ‘Natsani kuyo nonkhe.’” (Mat. 26:27, 28) Jesu bekaphetse liwayini lelibovu esandleni sakhe. (Bekungeke kube yijusi yemagilebisi lamasha ngobe  kuvunwa kwawo besekukadze kwendlula.) Esidlweni sekucala eGibhithe, liwayini alizange lisetjentiswe kodvwa Jesu akazange akwale kusetjentiswa kwalo ngeliPhasika. Waze walisebentisa ngisho eSidlweni SeNkhosi Sakusihlwa. Kungako nemaKhristu asebentisa liwayini ngeSikhumbuto. Njengobe sasingekho sidzingo sekwengeta linani lengati yaJesu, leliwayini lelisetjentiswako alusilo luhlobo lolufakwa i-brandy nobe tinongo. Kufanele kusetjentiswe liwayini lelibovu lelingakafakwa lutfo, kungaba ngulelentiwe ekhaya nobe lelitsengiwe njenge-Beaujolais, Burgundy, nobe i-Chianti.

8. Kungani emaKhristu anesifiso sekwati loko lokumelelwa sinkhwa neliwayini?

⁸ Umphostoli Pawula wakucacisa kutsi nemaKhristu bekufanele agcine Sidlo SeNkhosi Sakusihlwa, hhayi nje baphostoli kuphela. Wabhalela labo lebekakholwa nabo eKhorinte watsi: “Ngakwemukela eNkhosini loko lenganinika kona, kutsi . . . iNkhosi Jesu . . . yatsatsa sinkhwa, ngemuva kwekubonga, yasihlephula yatsi: ‘Loku kusho umtimba wami lotawunikelwa ngenca yenu. Chubekani nikwenta, ningikhumbula.’” (1 Khor. 11:23, 24) Kute kube ngulamuhla, emaKhristu agubha lomkhosi lobalulekile njalo ngemnyaka futsi anesifiso sekwati loko lokumelelwa ngulesinkhwa neliwayini.

9. Ngumuphi umbono longesiwo labanye labanawo mayelana nesinkhwa Jesu lasisebentisa?

⁹ Labanye bantfu labaya esontfweni bakhuluma ngaloko lokwashiwo nguJesu nakatsi: ‘Lona ngumtimba wami,’ ngako-ke bakholelwa kutsi ngalokusimangaliso lesinkhwa sagucuka saba ngumtimba waJesu mbamba. Kodvwa loko akusilo liciniso. * Jesu bekasembikwebaphostoli bakhe labetsembekile futsi nalesinkhwa lesingenamvubelo lebebatasidla sasilapho. Kuyacaca-ke  kutsi Jesu abefanekisa, njengobe bekavame kwenta njalo ngaletinye tikhatsi.—Joh. 2:19-21; 4:13, 14; 10:7; 15:1.

10. Simelelani sinkhwa lesisetjentiswa eSidlweni SeNkhosi Sakusihlwa?

¹⁰ Lesinkhwa lebebasibona futsi batasidla labaphostoli sasimelela umtimba waJesu. Kwakungumuphi lomtimba? Ngalesinye sikhatsi tinceku taNkulunkulu beticabanga kutsi njengobe Jesu wahlephula lesinkhwa kodvwa kute ematsambo akhe lephulwa, lesinkhwa besisho ‘umtimba waKhristu,’ libandla lalabagcotjiwe. (Ef. 4:12; Rom. 12:4, 5; 1 Khor. 10:16, 17; 12:27) Kodvwa ngekuhamba kwesikhatsi kwabonakala kutsi lokucabanga kwabo naloko lokushiwo yimiBhalo kukhombisa kutsi lesinkhwa simelela umtimba waJesu wenyama. Jesu ‘wahlupheka enyameni’ futsi wabetselwa. Kungako kuleSidlo SeNkhosi Sakusihlwa lesinkhwa simelela umtimba wenyama njengobe Jesu “wetfwala tono tetfu” ngawo.—1 Phet. 2:21-24; 4:1; Joh. 19:33-36; Heb. 10:5-7.

11, 12. (a) Watsini Jesu mayelana neliwayini? (b) Limelela ini liwayini lelasetjentiswa eSidlweni SeNkhosi Sakusihlwa?

¹¹ Loko lokumelelwa sinkhwa kusisita kutsi sicondze loko Jesu lakusho ngeliwayini. Siyafundza: “Yenta kanjalo nangendzebe, ngemuva kwekuba nesidlo sakusihlwa, yatsi: ‘Lendzebe isho sivumelwane lesisha lengisenta ngengati yami.’” (1 Khor. 11:25) EmaBhayibheli lamanyenti anemavi latsi awafane newelihumusho laRobert Young lelitsi: “Lendzebe isivumelwano lesisha sengati yami.” (Kubhala ngendlela yekutjekisa emagama sitentele.) Beyisivumelwano lesisha yini lendzebe Jesu lebekayiphetse? Chake. Ligama lelitsi ‘indzebe’ belisho loko lebekusekhatsi kuyo—liwayini. Jesu watsi lisho ini nobe limelela ini leliwayini? Watsi limelela ingati yakhe leyacitseka.

¹² EVangelini laMakho, sitfola emavi aJesu latsi: “Loku kusho ‘ingati yami yesivumelwane,’ letawucitfwa ngenca yalabanyenti.” (Mak. 14:24) Ingati yaJesu ‘beyitawucitfwa ngenca yalabanyenti kute kutsetselelwe tono.’ (Mat. 26:28) Kungako liwayini lelibovu liyimelela kufanele ingati yaJesu mbamba. Ngaleyo ngati singatfola kukhululwa ngenhlawulo, kute ‘kutsetselelwe tiphambeko tetfu.’—Fundza Efesu 1:7.

13. Chaza kutsi sigujwa njani Sikhumbuto sekufa kwaKhristu.

¹³ Nangabe utabe ukhona kwekucala eSikhumbutweni kanye naboFakazi BaJehova, yini lotayibona? Lomkhosi ungahle ube sendzaweni lenhle, lehlobile lapho wonkhe umuntfu angahlala akhululeke, ajabulele lokutakwenteka. Kungahle kube netimbali, kodvwa angeke kuhlotjiswe ngalokwendlulele nobe kube shengatsi kusephathini. Lomdzala lofanele utakwetfula inkhulumo lecacile futsi lehloniphekile lesekelwe kuloko lokushiwo liBhayibheli ngalomkhosi. Utawusita bonkhe labakhona bakwatise loko Khristu lasentela kona. Wafa waba yinhlawulo kute siphile. (Fundza Roma 5:8-10.) Lesikhulumi sitawuchaza ematsemba lamabili emaKhristu lanawo lashiwo liBhayibheli.

14. Enkhulumeni yeSikhumbuto, ngumaphi ematsemba lokukhulunywa ngawo?

¹⁴ Lelinye lalamatsemba kubusa naKhristu ezulwini, lokulitsemba lelijatjulelwa licembu lelincane lebalandzeli baKhristu, lokufaka ekhatsi baphostoli labetsembekile. (Luk. 12:32; 22:19, 20; Semb. 14:1) Kantsi lelinye, litsemba lemaKhristu lamanyenti lakhonta Nkulunkulu ngebucotfo esikhatsini setfu. Anelitsemba lekuphila phakadze emhlabeni lolipharadisi. Ngaleso sikhatsi intsandvo yaNkulunkulu itakwentiwa emhlabeni njengobe yentiwa ezulwini, lokuyintfo emaKhristu lasayithantazele sikhatsi lesidze. (Mat. 6:10) ImiBhalo isitjela ngetintfo letinyenti letinhle  lesitatijabulela phakadze naphakadze.—Isa. 11:6-9; 35:5, 6; 65:21-23.

15, 16. Kwentiwani ngesinkhwa eSidlweni SeNkhosi Sakusihlwa?

¹⁵ Nasekutawuphela inkhulumo yeSikhumbuto, sikhulumi sitawuveta kutsi sesikhatsi sekwenta loko Jesu latjela baphostoli bakhe kutsi bakwente. Njengobe kuke kwashiwo, kutawusetjentiswa letifanekiselo letimbili, sinkhwa lesite imvubelo neliwayini lelibovu. Letifanekiselo tingahle tibe setafuleni eceleni kwesikhulumi. Utawukhuluma ngendzaba leseBhayibhelini lechaza loko Jesu lakusho nalakwenta nakacalisa lomkhosi. Nasi sibonelo: Ekulandziseni kwaMatewu sifundza kutsi: “Jesu watsatsa sinkhwa, wabonga, wasihlephula wase usinika bafundzi bakhe, watsi: ‘Tsatsani nidle. Loku kusho umtimba wami.’” (Mat. 26:26) Jesu wahlephula sinkhwa lesite imvubelo wasinika baphostoli bakhe. Utawubona kutsi mhlaka 14 April lesinye sinkhwa lesite imvubelo sitawube sesihleshuliwe futsi sibekwe emapuleteni.

¹⁶ Kutawusetjentiswa emapulete lenele endluliswe kubo bonkhe labakhona kute kongeke sikhatsi. Loku ngeke kube nemidanti letsite. Kutawuba nemthantazo lomfishane ngemuva kwawo kwendluliswe sinkhwa ngendlela lehlelekile, kuye ngetimo tendzawo. Labambalwa (nome mhlawumbe kube bete) batawudla lesinkhwa njengobe kwentekile kulomkhosi emnyakeni wa-2013 emabandleni lamanyenti.

17. ESikhumbutweni, silandzelwa njani sicondziso saJesu mayelana neliwayini?

¹⁷ Ngemuva kwaloko, kutakwenteka naku lokwashiwo nguMatewu: “[Jesu] wase utsatsa nendzebe, wabonga, wabanika yona, watsi: “Natsani kuyo nonkhe, ngobe isho ‘ingati yami yesivumelwane,’ letawucitfwa ngenca yalabanyenti kute kutsetselelwe tono.’” (Mat. 26:27, 28) Kulandzelwa leyonchubo, kutakwentiwa lomunye umthantazo bese ‘indzebe’ yeliwayini lelibovu yendluliswa kubo bonkhe labatawube bakhona.

18. Nangabe bambalwa nobe kute labatawudla tifanekiselo, kungani kubalulekile kutsi sibe khona eSikhumbutweni?

¹⁸ Labanyenti labasuke bakhona abatidli letifanekiselo natendluliswa ngobe Jesu washo kutsi ngulabo labayawubusa naye ezulwini kuphela lokufanele batidle. (Fundza Lukha 22:28-30; 2 Thim. 4:18) Bonkhe labanye labatawube bakhona batawubukela ngenhlonipho. Kuba khona eSidlweni SeNkhosi Sakusihlwa kubalulekile kubo ngobe kukhombisa kutsi bayitsatsa njengalebaluleke kangakanani inhlawulo yaJesu. Nakuchubeka Sikhumbuto, bangacabanga ngetibusiso labangatitfola ngenca yemhlatjelo loyinhlawulo waJesu. Banelitsemba lekuba khona ‘esicumbini lesikhulu’ lesitawusindza “ekuhluphekeni lokukhulu” lokutako. Labo bantfu labakhonta Nkulunkulu batawube ‘bahlante tingubo tabo batenta taba mhlophe engatini yeliWundlu.’—Semb. 7:9, 14-17.

19. Yini longayenta kute ulungele Sidlo SeNkhosi Sakusihlwa futsi uzuze kuso?

¹⁹ BoFakazi BaJehova emhlabeni wonkhe jikelele bayawulungiselela lomkhosi lokhetsekile. Kusesele emaviki kutsi ufike, sitawuhlanganyela ekumemeni bantfu labanyenti kutsi babe khona kulomkhosi. Ngetulu kwaloko, emalangeni lendvulela Sikhumbuto labanyenti betfu batawufundza kulandzisa lokuseBhayibhelini mayelana naloko Jesu lakwenta nalokwenteka ngalelilanga ngemnyaka wa-33 C.E. Sitawuhlela timo tetfu kute sibe khona. Kukahle kufika kusenesikhatsi ngaphambi kwekutsi kucale ingoma nemthantazo kute sitekwemukela labavakashile futsi silalelisise lonkhe luhlelo. Sonkhe lesitabe sikhona, emalunga elibandla kanye netivakashi, sitawuzuza ngekuhambisana nesikhulumi nasifundza imiBhalo futsi siyichaza. Lokubaluleke kakhulu kutsi kuba khona kwetfu kuleSikhumbuto kutawukhombisa indlela lesiwatisa ngayo umhlatjelo waJesu futsi kuyobe kusho kutsi siyawulalela umyalo wakhe lotsi: “Chubekani nikwenta, ningikhumbula.”—1 Khor. 11:24.