1. Ngukuphi kutidzela bantfu labanyenti labakwentako, futsi ngani?

BANTFU ngekutitsandzela bayatidzela kute batfole tintfo letibalulekile kubo. Batali badzela sikhatsi sabo, imali yabo kanye nemandla abo kute kuzuze bantfwana babo. Ngesikhatsi bontsanga yabo badlala futsi bajabula, bantfwana labatsandza temidlalo futsi labanesifiso sekumelela live lakubo kuma-Olympics bacitsa ema-awa lamanyenti lilanga ngalinye batilolonga ngekutimisela. Jesu naye wadzela tintfo letitsite ngenca yetintfo lebetibalulekile kuye. Akazange afune imphilo lentofontofo futsi bekete bantfwana. Kunaloko, wafuna kusebentisa emandla akhe onkhe kute asekele uMbuso. (Mat. 4:17; Luk. 9:58) Balandzeli bakhe nabo batidzela kute basekele uMbuso waNkulunkulu. UMbuso waNkulunkulu wawubalulekile ekuphileni kwabo, kungako nje batidzela ngenca yawo. (Mat. 4:18-22; 19:27) Ngako-ke, singatibuta lombuto lotsi: ‘Yini lebalulekile ekuphileni kwami?’

2. (a) Ngukuphi kutidzela lokubalulekile lokufanele kwentiwe ngiwo onkhe emaKhristu? (b) Ngukuphi lokunye kutidzela lokwentiwa ngulabanye?

² Kutidzela lokutsite kubalulekile kuwo onkhe emaKhristu eliciniso futsi kumcoka kute alondvolote buhlobo bawo lobuhle naJehova. Lokutidzela kufaka ekhatsi kunikela ngesikhatsi kanye nemandla etfu nasithantaza, sifundza liBhayibheli, ekukhonteni kwemndeni, kuya emihlanganweni kanye nekwenta umsebenti wekushumayela. * (Josh. 1:8; Mat. 28:19, 20; Heb. 10:24, 25) Ngenca yalemetamo yetfu kanye nesibusiso saJehova, umsebenti wekushumayela uyandza futsi bantfu labanyenti bakhuphukela ‘entsabeni yelithempeli laSimakadze.’ (Isa. 2:2) Kute basekele imisebenti yeMbuso, labanyenti batidzelile ngekutsi baye kuyosebenta eBethel, basite ekwakhiweni kwemaHholwa EMbuso, nemaHholwa Emhlangano, ekuhleleni  imihlangano yesigodzi nome kuniketa lusito nakuvela inhlekelele yemvelo. Lemisebenti ayisiyo ledzingekako kute sitfole kuphila lokuphakadze kodvwa imcoka ekusekeleni uMbuso.

3. (a) Sizuza njani nangabe sitidzela ngenca yeMbuso? (b) Ngumiphi imibuto lokufanele siyicabangele?

³ Kubalulekile lamuhla kutsi sente lokunyenti kakhulu kunakucala kute sisekele uMbuso. Kuyajabulisa kubona kutsi labanyenti banikela ngekutitsandzela kuJehova. (Fundza Tihlabelelo 54:6.) Umoya lonjalo wekutidzela usiletsela injabulo lenkhulu njengobe silindzele kufika kweMbuso waNkulunkulu. (Dut. 16:15; Imis. 20:35) Nanobe kunjalo, ngamunye wetfu kufanele atihlolisise. Kukhona yini lokunye lesingakwenta kute sikhombise kutidzela ngenca yeMbuso? Sisisebentisa njani sikhatsi setfu, imali yetfu, emandla etfu kanye nemakhono etfu? Ngutiphi tecwayiso lokufanele sitinake? Ase sihlole sibonelo lesingasilingisa nasenta iminikelo yekutitsandzela kute sikhulise injabulo yetfu.

4. Ema-Israyeli azuza njani ngekwenta iminikelo?

⁴ Kwenta iminikelo ka-Israyeli wasendvulo kwakusisekelo sekutsetselelwa kwetono. Iminikelo yayibalulekile kubantfu kute bajabulele budlelwane naJehova. Leminye yayo wawubophekile kutsi uyente; kantsi leminye wawuyenta ngekutitsandzela. (Lev. 23:37, 38) Yonkhe iminikelo yekushiswa yayingentiwa ngekutitsandzela, nobe uyente ibe sipho kuJehova. Lesinye sibonelo lesihamba embili sekunikela, sabonakala ngesikhatsi kunikelwa lithempeli esikhatsini saSolomoni.—2 Khr. 7:4-6.

5. Nguliphi lilungiselelo Jehova lalentela labaphuyile?

⁵ Jehova abecondza kutsi ngeke banikele ngendlela lefanako, futsi abefuna kutsi loyo naloyo anikele ngalokusemandleni akhe. Umtsetfo waJehova wawutsi ingati yesilwane kufanele itfululwe, lobekutawuba ‘sitfunti setintfo letinhle letatiseta’ ngeNdvodzana yakhe, Jesu. (Heb. 10:1-4) Nome kunjalo, Jehova nakashaya lomtsetfo wacabangela nalabanye. Nasi sibonelo: Nkulunkulu abengawemukela umnikelo wematuba nangabe loyo muntfu abengeke akhone kunikela ngemvu nobe imbuti. Ngako-ke, ngisho nalabaphuyile bebanganikela kuJehova bajabulile. (Lev. 1:3, 10, 14; 5:7) Nanobe tilwane lokwakunikelwa ngato tatehlukahlukana, kwakunetintfo  letimbili lobekufanele tentiwe ngumuntfu lowenta umnikelo wekutitsandzela.

6. Yini leyayidzingeka kumuntfu ngamunye nakenta iminikelo, futsi kwakubaluleke kangakanani kwenta loko lokwakudzingeka?

⁶ Kwekucala, umuntfu kwakufanele anikele ngalokuncono kakhulu kulabekanako. Jehova watjela lesive kutsi nobe ngabe yini lesinikela ngayo kufanele ibe ngulencono kakhulu kute ‘yemukeleke.’ (Lev. 22:18-20) Nangabe lesilwane sasilimele nome sikhubatekile, sasingeke sibe ngumnikelo lowemukelekako kuJehova. Kwesibili, umuntfu lowenta lomnikelo kwakufanele ahlanteke. Nangabe umuntfu angakahlanteki, abengenta umnikelo wetono nobe umnikelo welicala kute abe nebudlelwane lobuhle naJehova ngaphambi kwekutsi ente umnikelo wekutitsandzela. (Lev. 5:5, 6, 15) Lena kwakuyindzaba lebaluleke kakhulu. Jehova watsi nangabe umuntfu longakahlanteki adla umnikelo wekuthula, lobewufaka ekhatsi iminikelo yekutitsandzela, abetawuncunywa kubantfu baNkulunkulu. (Lev. 7:20, 21) Ngakulolunye luhlangotsi, nangabe umuntfu lowenta umnikelo anebudlelwane lobuhle naJehova nemnikelo wakhe uncono kakhulu, abetawujabula futsi enetiseke.—Fundza 1 Tikhronike 29:9.

7, 8. (a) Nguyiphi injabulo labanyenti labayitfolako ngekutidzela kute basekele uMbuso? (b) Yini lesinayo lesinganikela ngayo kuJehova?

⁷ Lamuhla, labanyenti banesifiso sekwenta lokunyenti emsebentini waJehova, futsi Jehova uyajabula ngaloko. Kusebenta ngekutimisela kute sisite bazalwane betfu kuyasijabulisa. Lomunye umzalwane losita ekwakhiweni kwemaHholwa EMbuso lophindze asite labo labehlelwe tinhlekelele temvelo, utsi kumatima kuchaza kwenetiseka lakutfolako ngekwenta lemisebenti. Utsi: “Kubona injabulo nekuva bazalwane nabodzadzewetfu babonga naseliphelile liHholwa labo leMbuso nobe nabatfola lusito ngemuva kwekwehlelwa tinhlekelele temvelo, kwenta wonkhe lomsebenti nemandla lesiwafakile kujabulise kakhulu.”

⁸ Inhlangano yaJehova lamuhla ihlale ifuna tindlela tekusekela umsebenti wakhe. Nga-1904, uMzalwane C. T. Russell wabhala watsi: “Ngamunye wetfu kufanele atitsatse njengaloyo lobekwe yiNkhosi abe ngumphatsi wesikhatsi sakhe, anake tintfo letimtungeletile, imali, nalokunye, futsi ngamunye kufanele asebentise lamakhono ngalokusemandleni akhe kute aletse ludvumo eNkhosini yakhe.” Nanobe sitfola tibusiso letinyenti, kutidzela  ngenca yaJehova kusenta silahlekelwe ngulokutsite. (2 Sam. 24:21-24) Singakusebentisa yini ngekuhlakanipha loko lesinako?

9. Nakutiwa endzabeni yekusebentisa sikhatsi setfu, ngusiphi simiso lesingasisebentsisa lesitfolakala emyalweni waJesu lokuLukha 10:2-4?

⁹ Sikhatsi setfu. Kutsatsa sikhatsi nemandla lamanyenti kuhumusha nekushicilela tincwadzi tetfu, kwakha tindzawo tekukhontela, kulungiselela imihlangano, kusita lapho kuvele khona tinhlekelele temvelo nekwenta leminye imisebenti leminyenti. Sinema-awa langu-24 nje kuphela ngelilanga. Jesu wasiniketa simiso lesingasisita. Nakatfumela bafundzi bakhe ensimini, Jesu wabatjela kutsi bangalitjatiswa “kubingelela bantfu lenihlangana nabo emgwacweni.” (Luk. 10:2-4) Kungani Jesu abaniketa lomyalo? Lesinye sati seliBhayibheli sitsi: “Bantfu baseMphumalanga bebangabingelelani ngekukhotsamisa tinhloko nobe kuchawulana lesikwetayele kodvwa bebagacana baze bagicike phansi. Konkhe loku kwakudzinga sikhatsi lesinyenti.” Jesu abengakhutsati balandzeli bakhe kutsi babe luhlata. Esikhundleni saloko, abebasita kute babone kutsi bebanesikhatsi lesincane nekutsi bekufanele basisebentise kahle kute bente tintfo letibaluleke kakhulu. (Ef. 5:16) Singasisebentisa yini lesimiso kute sibe nesikhatsi lesinyenti sekusekela emsebentini weMbuso?

10, 11. (a) Iminikelo yetfu lesiyinikelela umsebenti wemhlaba wonkhe isetjentiswa ngatiphi tindlela? (b) Ngusiphi simiso lesiku-1 Khorinte 16:1, 2 lesingasisita?

¹⁰ Imali yetfu. Kudzingeka imali lenyenti kute kusekelwe imisebenti yeMbuso. Umnyaka ngamunye kusetjentiswa emashumi etigidzi temarandi kute kunakekelwe tindleko tebabonisi labajikeletako, emahlahlandlela lakhetsekile kanye netitfuynwa telivangeli. Kusukela nga-1999, kwakhiwe emaHholwa EMbuso langetulu kwa-24 500 emaveni lete imali leyenele. Nobe kunjalo, kusenesidzingo sekutsi kwakhiwe emaHholwa EMbuso lacishe abe ngu-6 400. Inyanga ngayinye kushicilelwa tigidzi letilikhulu tamagazini we-Sicongosekulindza ne-“Phaphama!” Konkhe loku kusekelwa ngeminikelo yenu yekutitsandzela.

¹¹ Umphostoli Pawula washo simiso lokufanele silandzelwe nakwentiwa iminikelo. (Fundza 1 Khorinte 16:1, 2.) Aphefumulelwe nguNkulunkulu, wakhutsata bazalwane baseKhorinte kutsi bangalindzi kudzimate kube yimphelasontfo kute babone loko lokwakusele, kodvwa ngamunye wabo kwakufanele abekele eceleni lokutsite nakucala liviki, kuye ngekwaloko lanako. Njengobe kwakunjalo ngelikhulu lekucala leminyaka, bazalwane nabodzadze esikhatsini setfu bahlela kusenesikhatsi kute bente iminikelo kuye ngekwaloko labanako. (Luk. 21:1-4; Imis. 4:32-35) Jehova uyawujabulela lomoya wekupha.

12, 13. Yini lengase yente labanye bacabange kutsi ngeke sebakhone kuniketa Jehova emandla nemakhono abo, futsi Jehova utabasita njani?

¹² Emandla nemakhono etfu. Jehova uyasisekela nasetama kusebentisa emandla nemakhono etfu emsebentini weMbuso. Nasiphelelwa ngemandla, wetsembisa kusisita. (Isa. 40:29-31) Kuyenteka yini kutsi sitive shengatsi site emakhono ekusita kulomsebenti? Sike sicabange yini kutsi bakhona labanye labancono lobafanele lomsebenti? Kufanele sikhumbule kutsi Jehova angawatfutfukisa emakhono emvelo anobe ngubani, njengobe enta kuBesaleli na-Oholiyabi.—Eks. 31:1-6; buka sitfombe lesisekucaleni kwalesihloko.

¹³ Jehova usikhutsata kutsi sente konkhe lokusemandleni etfu futsi singatigodli. (Taga 3:27) Ngesikhatsi kwakhiwa kabusha lithempeli, Jehova watjela emaJuda eJerusalema kutsi acabangasise ngaloko abekwenta mayelana nemsebenti wekwakha. (Hag. 1:2-5) Abephatamisekile futsi abengenti umsebenti waJehova kutsi ute kucala ekuphileni kwawo. Sitawube senta  kahle nasicabanga ngekutsi tintfo letita kucala kitsi nguleto letibalulekile yini kuJehova. ‘Singacabangisisa yini ngetindlela tetfu’ kute sitewuba nesikhatsi lesinyenti emsebentini weMbuso kulamalanga ekugcina?

14, 15. (a) Basikhutsata njani bazalwane labeswele? (b) Kufanele sibe yini sifiso setfu?

¹⁴ Labanyeti bahlala etindzaweni lapho kumatima khona kuphila nobe etindzaweni letiphuyile. Inhlangano yetfu ‘ihlangabetana’ netidzingo tebazalwane betfu labahlala kulawo mave. (2 Khor. 8:14) Nome kunjalo, ngisho nebazalwane labaphuyile bayalijabulela lelilungelo lekupha. Kuyamjabulisa Jehova nangabe abona labo labaphuyile banikela ngenjabulo.—2 Khor. 9:7.

¹⁵ Kulelinye live leliphuye kakhulu e-Afrika, labanye bazalwane basebentisa lenye incenye yengadze yabo base basebentisa imali labayitfola ngekutsengisa loko labakulimile kute basekele umsebenti weMbuso. Kulelo live, kwaba nesidzingo lesasiphutfuma sekwakha liHholwa leMbuso. Bazalwane nabodzadze labahlala dvutane nalapho bekwakhiwa khona bebafuna kusita kodvwa lomsebenti bewutawentiwa ngesikhatsi sekulima. Ngenca yekutsi bebatimisele kuhlanganyela kulomsebenti wekwakha, bebasebenta ekwakheni leliHholwa leMbuso emini bese kutsi entsambama basebente etingadzeni kute bayewuhlanyela. Loyo ngumoya wekutidzela sibili! Loku kusikhumbuta bazalwane bangelikhulu lekucala eMasedoniya. Ngisho nobe ‘bebahluphekile,’ bancenga kutsi nabo babe nesandla emsebentini lowawentiwa. (2 Khor. 8:1-4) Shengatsi ngamunye wetfu ‘angaletsa sipho lesifanele sibusiso lasemukele kuSimakadze.’—Fundza Dutheronomi 16:17.

16. Singaciniseka njani kutsi iminikelo yetfu iyemukeleka kuJehova?

¹⁶ Nome kunjalo, kuyadzingeka kutsi sinake. Njengobe kwakunjalo nakuma-Israyeli asendvulo, natsi kufanele siciniseke kutsi iminikelo yetfu yekutitsandzela iyemukeleka kuNkulunkulu. Kufanele sikhumbule kutsi imindeni yetfu nekukhonta kwetfu Jehova kungumtfwalo lobaluleke kakhulu kitsi. Kunikela ngesikhatsi setfu nangetintfo lesinato kute sisite labanye, akukafaneli kusibangele kutsi singatinaki tindzaba letihlobene nekukhonta Nkulunkulu emindenini yetfu nobe inhlakahle yawo. Ecinisweni sitawube sinikela ngalesite kona. (Fundza 2 Khorinte 8:12.) Ngetulu kwaloko, kufanele sihlale sinebuhlobo lobuhle naJehova. (1 Khor. 9:26, 27) Kufanele siciniseke kutsi nasiphila ngetimiso teliBhayibheli, iminikelo yetfu iletsa injabulo nekwenetiseka kitsi futsi ‘yemukeleka kakhulu’ kuJehova.

17, 18. Sitiva njani ngalabo labatidzelako kute basekele uMbuso, futsi yini sonkhe lesingayicabangisisa?

¹⁷ Bazalwane nabodzadze labanyenti ‘batitfulula njengemnikelo walokunatfwako’ ngemisebenti labayentako kute basekele imisebenti ledzingekako yeMbuso. (Fil. 2:17) Sibabonga kakhulu labo labakhombise lomoya wekupha. Siyabancoma bafati nebantfwana bebazalwane labaholako kulemisebenti yeMbuso ngalomoya wabo wekupha nekutidzela.

¹⁸ Kunemsebenti lomkhulu lodzinga kwentiwa kute kusekelwe imisebenti yeMbuso. Shengatsi sonkhe ngemthantazo singacabangisisa kutsi singasifaka njani sandla kulomsebenti lomkhulu kangaka. Ungaciniseka kutsi tinyenti tibusiso lotatitfola nyalo ‘nasesikhatsini lesitako.’—Mak. 10:28-30.