Ubafundze kahle yini bomagazini bakamuva be-Sicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:

Jesu wayishumayela nini ‘imimoya leboshiwe’? (1 Phet. 3:19)

Kubonakala shengatsi ngemuva kwekuvuswa kwakhe, Jesu wamemetela kuletingilosi letimbi mayelana nesijeziso lesitifanele letitawusitfola.—6/15, likhasi 23.

Ngutiphi tinsayeya letintsatfu letiba khona emshadweni longasiwo wekucala?

Nguleti letilandzelako: Kucabanga kakhulu ngetintfo letinhle lebetenteka emshadweni wakho wekucala kunalona lokuwo manje. Ukutfola kumatima kukhulumisana nebangani bakadzeni lebangakatayelani nawe nome naloyo loshade naye manje. Ukutfola kumatima kwetsemba loshade naye nyalo ngobe lobewushade naye ekucaleni aketsembekanga.—7/1, emakhasi 11-12.

Jesu utabehlulela nini bantfu njengetimvu nobe timbuti? (Mat. 25:32)

Jesu utawehlulela bantfu bato tonkhe tive njengetimvu nobe timbuti nakabuya ngesikhatsi sekuhlupheka lokukhulu, nangemuva kwekubhujiswa kwenkholo yemanga.—7/15, likhasi 6.

Kunini lapho bantfu lababi lekukhulunywa ngabo emfanekisweni wemabele nelukhula batawukhala bagedletelise ematinyo? (Mat. 13:36, 41, 42)

Loko kutakwenteka ngekuhlupheka lokukhulu nasebabona kutsi angeke bakubalekele kubhujiswa.—7/15, likhasi 13.

Emavi aJesu lamayelana nesisebenti lesetsembekile nalesihlakaniphile agcwaliseka nini? (Mat. 24:45-47)

Awazange agcwaliseke ngeliPhentekhoste la-33 C.E., kodvwa ngemuva kwa-1914. Nga-1919, sisebenti sabekwa etikwebendlu yakhe, labebahlanganisa onkhe emaKhristu londliwako ngakamoya.—7/15, emakhasi 21-23.

Jesu usibeka nini sisebenti lesetsembekile ngetulu kwako konkhe lanako?

Loko kutakwenteka esikhatsini lesitako, ngesikhatsi sekuhlupheka lokukhulu lapho labakha sisebenti lesetsembekile batfola umvuzo wabo wasezulwini.—7/15, likhasi 25.

Ngetulu kwemandla lavela kuNkulunkulu yini leyasita boFakazi labangu-230 kutsi basindze kuloluhambo lwekufa lolwalusuka enkambu eSachsenhausen?

Nanobe bebabutsakatsaka ngenca yendlala netifo, bachubeka bakhutsatana kute bachubekele phambili.—8/15, likhasi 18.

Kungani kulandzisa lokumayelana nema-Israyeli ngesikhatsi awela uMfula iJordane awelela eVeni Lesetsembiso kusikhutsato kitsi?

Nanobe lomfula wawugcwele ugola tintsetse, Jehova wawumisa kutsi ugelete kute bantfu bakhe bawele. Kungenteka kutsi loko kwacinisa kukholwa kwabo kuye nekumetsemba, ngako-ke natsi lokulandzisa kungasikhutsata.—9/15, likhasi 16.

Siphrofetho lesikuMikha 5:5 lesimayelana nebaholi betfu labanemandla kakhulu sigcwaliseka kanjani lamuhla?

Siyacondza kutsi labaholi betfu labanemandla kakhulu lokukhulunywa ngabo kuMikha 5:5, bazalwane labadzala lababekiwe emabandleni, labacinisa bantfu baNkulunkulu ngekuhlaselwa kwabo lokutako.—11/15, likhasi 20.