1, 2. (a) Yini lengase ibangele luhlobo lolutsite lwekungaboni? (b) Yini lesingaciniseka ngayo mayelana neMbuso waNkulunkulu?

NJENGOBE kungenteka kutsi uke wanaka, bantfu lababone lokutsite kwenteka bavame kukhumbula lokwentekile ngetindlela letingafani. Ngendlela lefanako, umuntfu angase akutfole kumatima kukhumbula loko dokotela lakushito ngemuva kwekumtjela kutsi utfolakele anesifo lesitsite. Lomunye umuntfu angase angatiboni tikhiya nome tibuko takhe temehlo kodvwa tibe tisedvutane naye. Bacwaningi batsi luhlobo lolufana nalolu lwekungaboni emehlweni lwenteka nasetama kwenta tintfo letinyenti ngesikhatsi sinye. Lena ngulenye indlela ingcondvo yetfu lesebenta ngayo.

² Bantfu labanyenti lamuhla nabo batimphuphutse ngandlela tsite kuloko lokwenteka emhlabeni. Bangase bavume kutsi umhlaba sewushintje kakhulu kusukela nga-1914, kodvwa abakucondzi kubaluleka kwaletintfo letentekako emhlabeni. Njengobe silifundza liBhayibheli, siyati kutsi uMbuso waNkulunkulu wabekwa nga-1914 ngalesikhatsi Jesu acala kuba yiNkhosi ezulwini. Kodvwa siyati kutsi kunalokunyenti lokudzingekako kute kuphendvulwe umthantazo lotsi: “UMbuso wakho awute. Intsandvo yakho ayentiwe emhlabeni njengasezulwini.” (Mat. 6:10) Kuyacaca kutsi loko kufaka ekhatsi kuphela kwalelive lelibi. Kungaleso sikhatsi kuphela lapho intsandvo yaNkulunkulu  iyawukwenteka emhlabeni njengobe yentiwa ezulwini.

3. Kutadisha liVi laNkulunkulu kusisita ngani?

³ Ngenca yekutsi silitadisha njalo liVi laNkulunkulu, siyabona kutsi tiphrofetho tiyagcwaliseka nanyalo kodvwa bantfu abakuboni loko. Bamatasatasa ngekuphila kwabo nangetintfo labatifunako kangangekutsi ababunaki bufakazi lobucacile bekutsi Khristu wacala kubusa kusukela nga-1914 futsi masinyane utawuletsa sehlulelo saNkulunkulu. Kodvwa asewutibute nangu umbuto: ‘Ngisakholelwa yini kutsi kuphela kwalelive sekusedvute, nekutsi lokwentekako emhlabeni kukhombisa loko?’ Ngisho nome ngabe usandza kuba nguFakazi, yini loyinake kakhulu? Nome singaphendvula njani, asesibukete tizatfu letintsatfu letibalulekile tekutsi kungani singaciniseka kutsi iNkhosi legcotjiwe lebekwe nguNkulunkulu ngekushesha itawutsatsa tinyaselo kute intsandvo yaNkulunkulu yentiwe emhlabeni.

4, 5. (a) Yini Jesu labesolo ayenta kusukela nga-1914? (Buka sitfombe lesisekucaleni kwalesihloko.) (b) Bagibeli bemahhashi lamatsatfu bamelelani, futsi lesiphrofetho sigcwaliseke njani?

⁴ Nga-1914 Jesu Khristu lofaniswa nemgibeli welihhashi lelimhlophe, wanikwa bukhosi ezulwini. Ngekushesha waya kuyewucedzela kuncoba live lelibuswa nguSathane. (Fundza Sembulo 6:1, 2.) Siprofetho lesikuSembulo sehluko 6 sisinika tizatfu tekulindzela kutsi ngemuva kwekubekwa kweMbuso waNkulunkulu, timo emhlabeni betitawuba timbi—kuyawuba netimphi, indlala, tifo letingelapheki, nalokunye lokutawubangela kufa. Letimo timelelwa bagibeli bemahhashi lamatsatfu labalandzela Jesu Khristu edvutane.—Semb. 6:3-8.

⁵ Njengobe kwabiketelwa, kuthula ‘kwasuswa emhlabeni’ nanobe emave emhlabeni wonkhe etsembisa kutsi atawuchubeka abambisana futsi akhulumisana. Etimphini letinyenti letibulele bantfu emhlabeni, iMphi Yelive Yekucala kwaba ngiyo leyasusa kuthula. Nanobe kunentfutfuko kutemnotfo nakusayensi kusukela nga-1914, indlala solo iyinkinga lenkhulu emhlabeni. Ngetulu kwaloko, ngubani longete avuma kutsi tonkhe tinhlobo tetifo letitsatselwanako, tinhlekelele temvelo kanye ‘netifo letibulalako’ tiyachubeka nekucedza tigidzigidzi tebantfu umnyaka nemnyaka? Letintfo tiyingoti kakhulu, tivame kwenteka kanyenti futsi tibulala bantfu labanyenti kunakucala emlandvweni webantfu. Uyabona yini kutsi kusho kutsini loko?

6. Bobani labakubonile kugcwaliseka kwetiphrofetho teliBhayibheli, futsi lokubabangele kutsi benteni?

⁶ Bantfu labanyenti abazange banake ngesikhatsi kubhedvuka umkhuhlane waseSpain nangesikhatsi kucala iMphi Yelive Yekucala. Nome kunjalo, emaKhristu lagcotjiwe abesolo achubeka nekubona kutsi 1914 ukuphela kweTikhatsi Tebetive nome ‘kwesikhatsi lesibekiwe setive.’ (Luk. 21:24) Bewangaciniseki kahle kutsi kuyawukwentekani kodvwa bewati kutsi 1914 bewutawuba sikhatsi sekubusa kweMbuso waNkulunkulu. Kwatsi ngekushesha nawabona kugcwaliseka kwetiphrofetho teliBhayibheli, ase atjela labanye bantfu ngesibindzi kutsi uMbuso waNkulunkulu sewucalile kubusa. Imetamo yawo yekumemetela ngeMbuso, yaphumela ekutseni ahlushwe kakhulu. Kwenteka kwaloko emaveni lamanyenti nako bekugcwalisa siphrofetho. Eminyakeni leminyenti leyalandzela, titsa teMbuso ‘tenta bubi kwaba shengatsi ngumtsetfo.’ Taphindze taba nebudlova, tababopha futsi tababulala bazalwane betfu ngekubalengisa, ngekubadubula nobe ngekubancuma tinhloko.—Hla. 94:20; Semb. 12:15.

7. Kungani bantfu labanyenti bangaticondzi tintfo letenteka emhlabeni kutsi tisho kutsini?

⁷ Njengobe sesibubonile bufakazi bekutsi uMbuso waNkulunkulu sewuyabusa  ezulwini, kwentiwa yini kutsi bantfu labanyenti bangakukholelwa loko? Kungani bangaboni kutsi lokwenteka emhlabeni kusho kugcwaliseka kwetiphrofetho teliBhayibheli njengobe bantfu baNkulunkulu bebasolo babatjela iminyaka leminyenti? Kungenteka yini bantfu labanyenti bamane nje banaka loko labakubona ngemehlo? (2 Khor. 5:7) Kuba matasatasa kwabo ngetintfo letiphatselene nabo kubenta bangakuboni yini loko Nkulunkulu lakwentako? (Mat. 24:37-39) Kungenteka yini kutsi labanye baphumphutsekiswa ngemanga lasakatwa nguSathane emhlabeni wonkhe? (2 Khor. 4:4) Kudzingeka sibe nekukholwa kanye nelikhono lekubona kute sibone loko lokwenteka endzaweni yemoya. Kufanele sijabule kutsi siyakubona loko lokwentekako.

8-10. (a) 2 Thimothi 3:1-5 ugcwaliseke njani? (b) Kungani singatsi bubi budlanga kakhulu?

⁸ Kunesizatfu sesibili lesisenta sati kutsi ngeke kwendlule sikhatsi lesidze uMbuso waNkulunkulu ungakulawuli lokwenteka emhlabeni: Bubi kubantfu budlanga ngelizinga leliphakeme kakhulu. Cishe sekutawuphela iminyaka lelikhulu loko lokwashiwo ku-2 Thimothi 3:1-5 kwenteka. Indlela bantfu labenta ngayo lechazwe kulemibhalo igcwele wonkhe umhlaba. Uyabona yini kutsi lesiphrofetho sesigcwaliseka ngelizinga lelikhulu? Ase sicoce ngaletinye tibonelo letisikhombisa loko.—Fundza 2 Thimothi 3:1, 13.

⁹ Ase ucabange ngemehluko lokhona emkhatsini waloko lobekutswatfwa njengelihlazo eminyakeni yabo-1940 nabo-1950 naloko lokwentekako esikhatsini salamuhla emsebentini, kutekutijabulisa, kutemidlalo nakutefashini. Budlova lobukhulu kanye nekutiphatsa kabi sekuyintfo levamile. Bantfu bancintisana ngekuba nelulaka, ngekutiphatsa kabi nangekuba neludlame. Tinhlelo te-TV bantfu labanyenti lebebacabanga kutsi timbi ngabo-1950, nyalo setitsatfwa njengendlela lekahle yekutijabulisa kwemindeni. Bantfu labanyenti bayabona kutsi titabane tinemtselela kutekutijabulisa nasemfashinini, titfutfukisa indlela yato yekuphila kute wonkhe umuntfu abone. Sijabula kakhulu ngekutsi siyakwati loko Nkulunkulu lakufunako.—Fundza Juda 14, 15.

 ¹⁰ UmKhristu angase abone shengatsi loko lobekutsatfwa ngekutsi kuba lihlongandlebe kubantfwana eminyakeni yabo-1950, akusafani naloko lokwenteka nyalo. Batali bebavame kukhatsateka kube kufanele ngekutsi bantfwana babo babhema ligwayi, banatsa tjwala nangekutsi bajayiva ngendlela levusa inkhanuko. Lamuhla imibiko leminyenti leshacisako yatiwa etindzaweni letinyenti. Nasi sibonelo: Umntfwana wesikolwa loneminyaka lengu-15 wadubula lafundza nabo eklasini, wabulala lababili, kwalimala labangu-13. Licembu lebantfwana labaseminyakeni yekutfomba lebebadzakiwe labulala ngesibhuku intfombatana leneminyaka leyimfica budzala laphindze lashaya babe wayo kanye nemzala wayo. Labasha kulelinye live lase-Asia kutsiwa bente incenye yemacala kuleminyaka lelishumi leyendlulile. Kukhona yini longaphika kutsi tintfo setishintje kakhulu tiya ngekuya tiba timbi?

11. Kungani bantfu labanyenti bangaboni kutsi bubi buyadlanga?

¹¹ Umphostoli Phetro watsi: “Emalangeni ekugcina kutawufika baphukuti nekuphukuta kwabo, bente ngekuvumelana netifiso tabo, batsi: ‘Kuphi lokuba khona kwakhe lokwetsenjiswa? Ngobe kusukela ngesikhatsi bokhokho betfu labafa ngaso, tonkhe tintfo tisachubeka njengobe betinjalo ekucaleni kwendalo.’” (2 Phet. 3:3, 4) Yini lebangela bantfu kutsi bente ngalendlela? Kubonakala shengatsi nangabe sebakwetayele lokutsite, bantfu babese abasanaki. Kwehla kancane kancane kwelizinga lekutiphatsa kwebantfu kungase kubonakale kungasesilo lihlazo kunendlela lokubekungenteka ngayo ngekutumeka lokukhulu kumuntfu lesimetayele. Nobe kunjalo, lokwehla kwelizinga lekutiphatsa kuyingoti.

12, 13. (a) Kungani kungakafaneli sidvumale ngenca yalokwenteka emhlabeni? (b) Kubona ini lokutasisita kutsi silwisane netimo “lokumatima kubhekana nato”?

¹² Umphostoli Pawula wasecwayisa watsi “emalangeni ekugcina,” timo ‘kutawuba matima kubhekana nato.’ (2 Thim. 3:1) Kodvwa akusho kutsi ngeke sikhone kubhekana nato. Ngako-ke, akukafaneli siwabalekele emaciniso. Ngekusitwa nguJehova, umoya wakhe kanye nelibandla lebuKhristu, singaphumelela ekulwisaneni nekudvumateka nome kwesaba lokungase kusifikele. Singahlala setsembekile. “Emandla lamakhulu kakhulu” aNkulunkulu, awasiwo etfu.—2 Khor. 4:7-10.

¹³ Kubalulekile kunaka kutsi Pawula nakakhuluma ngetiphrofetho temalanga ekugcina wacala ngemavi latsi “yati kutsi.” Lamavi asicinisekisa ngekutsi loko lokwashiwo kutawenteka mbamba. Asingabati kutsi bantfu labangamhloniphi Nkulunkulu batawuchubeka ngekudlanga ngebubi aze Jehova atsatse sinyatselo sekubacedza. Emlandvweni sifundzile kutsi nangabe lehla lizinga labakutsatsa ngayo lokuhle nalokubi, bantfu nobe tive nakubo kuba njalo. Solo kwatsi nhlo, akukaze kube nekutiphatsa lokubi lokugcwele emhlabeni wonkhe ngendlela lokwenteka ngayo nyalo. Bantfu labanyenti bangase bangakunaki loku, kodvwa lokuchubeke kwenteka kusukela nga-1914 kufanele kube bufakazi lobucacile bekutsi singawetsemba uMbuso waNkulunkulu lotawutsatsa sinyatselo ngekushesha.

14-16. Ngusiphi sizatfu sesitsatfu lesinaso sekukholelwa kutsi uMbuso waNkulunkulu ‘uyeta’ masinyane?

¹⁴ Kunesizatfu sesitsatfu lesingasenta siciniseke. Loko lokwentekile kubantfu baNkulunkulu kukhombisa kutsi kuphela sekusondzele. Sibonelo saloko kutsi nawusengakacali kubusa uMbuso waNkulunkulu ezulwini, licembu lalabetsembekile labagcotjiwe belimkhonta ngekutimisela Nkulunkulu. Yini lelayenta ngesikhatsi lokunye lebelilindzele kutsi kwenteke nga-1914 kungenteki? Labanyenti kulo babeketela nababhekene netilingo kanye nekuhlushwa  futsi bachubeka nekukhonta Jehova. Kuyo yonkhe leminyaka, linyenti lalabo labagcotjiwe bahlala betsembekile kwadzimate kwaba sekufeni kwabo.

¹⁵ Esiphrofethweni sakhe lebesinemininingwane lenabile lesimayelana nekuphela kwalelive, Jesu watsi: “Lesitukulwane ngeke siphele tingakenteki tonkhe letintfo.” (Fundza Matewu 24:33-35.) Siyacondza kutsi nakakhuluma ‘ngalesitukulwane,’ Jesu bekasho emacembu lamabili emaKhristu lagcotjiwe. Licembu lekucala beliphila nga-1914, futsi belisicondza sibonakaliso sekuba khona kwaKhristu ngaloyo mnyaka. EmaKhristu labekangemalunga alelicembu bekangaphili nje kuphela nga-1914, kodvwa bewagcotjwe ngemoya longcwele aba ngemandvodzana aNkulunkulu ngaloyo mnyaka nome ngaphambi kwawo.—Rom. 8:14-17.

¹⁶ Licembu lesibili leliyincenye ‘yalesitukulwane,’ ngulabagcotjiwe lebebaphila lisekhona lelicembu lekucala. Nabo akusho kutsi bebamane baphila nje ngesikhatsi sinye nalabo belicembu lekucala kodvwa bagcotjwa ngemoya longcwele ngalesikhatsi basaphila emhlabeni labo belicembu lekucala. Ngako-ke, akusibo bonkhe labagcotjiwe lamuhla labayincenye ‘yalesitukulwane’ Jesu lakhuluma ngaso. Lamuhla, labo labakulelicembu lesibili nabo bayaguga, kodvwa emavi aJesu lakuMatewu 24:34 asiniketa sicinisekiso sekutsi labanye ‘kulesitukulwane ngeke’ bafe bangakakuboni kucala kwekuhlupheka lokukhulu. Loku kufanele kube ngulesinye sicinisekiso sekutsi sesincane kakhulu sikhatsi lesisele sekutsi iNkhosi yeMbuso waNkulunkulu ibhubhise lababi bese iletsa live lelisha lelinekulunga.—2 Phet. 3:13.

17. Ngusiphi siphetfo lesifinyelela kuso ngekusitwa bufakazi lobutsatfu lesifundze ngabo?

¹⁷ Ngusiphi siphetfo lesingafinyelela kuso mayelana nalobufakazi lobutsatfu lesesifundze ngabo? Jesu wasitjela kutsi ngeke silati futsi asilati lilanga nome li-awa lelicondzile. (Mat. 24:36; 25:13) Kodvwa singasati, futsi siyasati “sikhatsi” Pawula lakhuluma ngaso. (Fundza Roma 13:11.) Siphila kuleso sikhatsi, emalangeni ekugcina. Nangabe sitinakisisa tiphrofetho teliBhayibheli naloko Nkulunkulu Jehova kanye naJesu Khristu labakwentako, ngeke sihlale singabuboni bufakazi lobusicinisekisa kutsi siphila esikhatsini lapho sekusedvute khona kutsi liphele lelive lelibi.

18. Yini lemele labo labangafuni kwemukela uMbuso waNkulunkulu?

¹⁸ Bantfu labangafuni kubona kutsi Jesu Khristu uniketwe ligunya lelimangalisako futsi unguMgibeli welihhashi lelimhlophe loncobako, masinyane batawuphoceleka kutsi balivume liphutsa labalentako. Ngeke bakubalekele loko. Ngaleso sikhatsi, bantfu labanyenti bayawukhala kabuhlungu batsi: “Ngubani longakhona kuma?” (Semb. 6:15-17) Sehluko lesilandzelako kuSembulo sisiniketa imphendvulo. Labagcotjiwe kanye nalabo labanelitsemba lekuphila emhlabeni, ‘batawuma’ ngalelo langa bemukeleke kuNkulunkulu. Ngemuva kwaloko “sicumbi lesikhulu” saletinye timvu sitawusindza ekuhluphekeni lokukhulu.—Semb. 7:9, 13-15.

19. Yini loyilangatelelako njengobe ubona, wemukela futsi ubuvuma bufakazi lobucacile bekutsi emalanga ekugcina atawuphela masinyane?

¹⁹ Ngekuchubeka sinake kugcwaliseka kwetiphrofetho teliBhayibheli letigcwalisekako esikhatsini setfu, ngeke size siphatanyiswe live laSathane futsi ngeke sihlale singaboni kutsi kusho kutsini loko lokwenteka emhlabeni. Ngekushesha, Khristu utawucedzela kuncoba kwakhe bantfu labangamhloniphi Nkulunkulu ngekutsi alwe imphi yakhe yekugcina ngekulunga. (Semb. 19:11, 19-21) Ase ucabange nje ngaloko liBhayibheli lelisicinisekisa kutsi kungaba ngumvuzo lesitawutfola lojabulisako.—Semb. 20:1-3, 6; 21:3, 4.