Timo leticindzetelako tingase tisibangele imiphumela lebuhlungu. Singatitfola sicabanga ngato kuphela, tisicedze emandla futsi titsintse nembono wetfu ngekuphila. Endvulo, iNkhosi Davide yaka-Israyeli yabhekana nebumatima lobunyenti. Yakhona njani kuhlangabetana nabo? Engomeni layihlabela letsintsa inhlitiyo, Davide watsi: “Ngikhala kuSimakadze ngelivi lami. Ngincenga Simakadze ngelivi lami. Ngititfululela kuye tonkhe tikhalo tami, ngimtjele tonkhe tinhlupheko tami. Umoya wami nase uphelelwa ngemandla, wena ucaphela tinyatselo tami.” Kuyacaca kutsi Davide wathantaza ngekutfobeka kuNkulunkulu acela lusito.—Hla. 142:1-3.

Kulenye ingoma, Davide wahlabela watsi: “Kunye kuphela lengakucela kuSimakadze, ngiko kodvwa lengikufunako: kutsi ngihlale endlini yaSimakadze onkhe emalanga ekuphila kwami, ngibukisise buhle baSimakadze, ngizindle ngaye ngisethempelini lakhe.” (Hla. 27:4) Davide abengasuye umLevi, kodvwa asewumcabange eme ngephandle kwelibala lelingcwele edvute nendzawo lebeyibaluleke kakhulu ekukhonteni kweliciniso. Inhlitiyo yaDavide yagcwala kubonga lokukhulu kangangekutsi abesafuna kucitsa konkhe kuphila kwakhe kuleyo ndzawo futsi ‘abukisise buhle baSimakadze.’

Ligama lelitsi “buhle” lihlobene “nentfo leyemukelekako nobe lejabulisako engcondvweni nasemiveni.” Davide abehlale azindla ngelilungiselelo lekukhonta Nkulunkulu. Ngako kungaba kuhle kutsi sitibute: ‘Ngitiva ngendlela Davide labetiva ngayo yini?’

Esikhatsini setfu, lilungiselelo Jehova lalentele kutsi sisondzele kuye alitfolakali esakhiweni lesitsite. Esikhundleni saloko, lifaka ekhatsi lithempeli laNkulunkulu lelikhulu—lokulilungiselelo lelingcwele lekukhonta kweliciniso. * Nangabe ‘sizindla’ ngalelilungiselelo, natsi ‘singabubukisisa buhle baSimakadze.’

Cabanga ngelilati lekushisa iminikelo lebelisembikwemnyango loya ethendeni lekukhontela, lebelentiwe ngelitfusi. (Eks. 38:1, 2; 40:6) Lelilati belimelela indlela Nkulunkulu labetimisele ngayo kwemukela kuphila kwaJesu kwasemhlabeni njengemhlatjelo. (Heb. 10:5-10) Ase ucabange nje kutsi loko kusho kutsini kitsi. Umphostoli Pawula wabhala, watsi: “Ngesikhatsi sititsa, sabuyisana naNkulunkulu ngekufa kweNdvodzana yakhe.” (Rom. 5:10) Nasibonisa kukholwa engatini yaJesu leyacitseka, singemukeleka futsi setsenjwe ngenca yekuba bangani baNkulunkulu. Umphumela waloko kutawuba kutsi ‘sisondzelane naJehova.’—Hla. 25:14, NW.

Ngesizatfu sekutsi ‘tono tetfu tiyesulwa,’ sitfola ‘sikhatsi sekuvuseleleka lesivela kuJehova.’ (Imis. 3:19) Simo setfu sifanana nesesiboshwa lesitisolako ngetento taso bese senta lushintjo lolukhulu ngesikhatsi siselindzele kubulawa kwaso. Lijaji lelinemusa litsi nalibona loku litsatse sinyatselo sekwesula licala lalesiboshwa, ngaleyo ndlela lisuse sigwebo saso sekufa. Lesiboshwa sitiva sikhululekile futsi sijabule kakhulu. Njengalelijaji, Jehova uyabemukela labo labaphendvukako bese ususa sigwebo sabo sekufa.

Letinye tincenye tekukhonta kweliciniso Davide labetibona endlini yaJehova bekukuhlangana kweticumbi letinkhulu tema-Israyeli, kufundvwa nekuchazwa  kweMtsetfo, kushiswa kwemphepho, kanye nemsebenti longcwele lobewentiwa baphristi nemaLevi. (Eks. 30:34-38; Num. 3:5-8; Dut. 31:9-12) Nasesikhatsini setfu tisekhona tintfo letifana naletincenye tekukhonta kweliciniso lebetentiwa ka-Israyeli endvulo.

Njengasendvulo, lamuhla “kuhle kumnandzi kuhlalisana kwebazalwane ngekuvana.” (Hla. 133:1) Linani labo “bonkhe bazalwane” emhlabeni wonkhe landze kakhulu. (1 Phet. 2:17) LiVi laNkulunkulu liyafundvwa futsi lichazwe emihlanganweni yetfu. Asebentisa inhlangano yakhe, Jehova usinike ticondziso letinyenti. Kuphindze kube netincwadzi letinyenti letishicilelwako kute umuntfu atisebentise esifundvweni latichubela sona nobe esifundvweni semndeni. Lelinye lilunga leSigungu Lesibusako latsi: “Kuzindla ngeliVi laJehova, kucabangisisa ngenchazelo yalo kanye nekwetama kulicondza nekuliva kahle, kwente ingcondvo yami yanaka tintfo letihlobene naNkulunkulu futsi ngativa ngenetisekile.” Ngako-ke, ‘lwati lungaba yinjabulo emphefumulweni wetfu.’—Taga 2:10.

Lamuhla, imithantazo leyemukelekako yetinceku taNkulunkulu yenyukela kuJehova malanga onkhe. Kuye imithantazo lenjalo ifana nemphepho lenuka kamnandzi. (Hla. 141:2) Kuyasijabulisa kwati kutsi Jehova Nkulunkulu ujabula kakhulu nasithantaza kuye ngekutitfoba.

Mosi wathantaza watsi: “Shangatsi lutsandvo lweNkhosi lenguNkulunkulu wetfu, lungabasetikwetfu. Shangatsi ungawubusisa umsebenti wetandla tetfu.” (Hla. 90:17) Njengobe sishumayela ngekutimisela, Jehova uyawubusisa umsebenti wetfu. (Taga 10:22) Kungenteka kutsi bakhona bantfu lesibasitile kutsi bafundze liciniso. Mhlawumbe sibeketele iminyaka leminyenti emsebentini wekushumayela ngisho nobe singanakwa, sigula, sicindzetelekile futsi siphatfwa kabi. (1 Thes. 2:2) Nangetulu kwaloko, asikabuboni yini “buhle baSimakadze” futsi sabona kutsi Babe wetfu wasezulwini ujabula kakhulu ngemetamo yetfu?

Davide wahlabela watsi: “Simakadze, wena usabelo lesilifa lami, ungipha konkhe lengikudzingako. Likusasa lami lisetandleni takho. Lifa lelingumhlaba, lengisikelwe wona, liyindzawo lenhle kakhulu.” (Hla. 16:5, 6) Davide abebonga kakhulu ‘ngesabelo’ sakhe, lokusho kuba nebuhlobo lobuhle naJehova kanye nelilungelo lekumkhonta. NjengaDavide, singase sibhekane nebumatima, kodvwa tinyenti kakhulu tibusiso lesititfolako. Ngako-ke, asichubeke sijabula ngekukhonta kweliciniso futsi sihlale ‘sizindla’ ngelithempeli laJehova.