1, 2. (a) Ngumshado wabani lotawubangela injabulo ezulwini? (b) Ngumiphi imibuto lephakamako?

KUHLALE kutsatsa sikhatsi kulungiselela umshado. Kodvwa sitawukhuluma ngemshado lokhetsekile—umshado wasebukhosini. Asewucabange nje! Bewusolo ulungiselelwa cishe iminyaka lengu-2 000. Sesitawufika masinyane sikhatsi sekutsi umkhwenyane namakoti basale bahlanganiswa. Madvutane kutawugcwala kuhlabela ngenjabulo esigodlweni seNkhosi futsi sicumbi setidalwa tasezulwini sitawuhlabela sitsi: “Dvumisani Jah, ngobe Jehova Nkulunkulu wetfu, longuSomandla, sewucalile kubusa njengenkhosi. Asitfokote, sigcwale injabulo, futsi simkhatimulise, ngobe umshado weliWundlu sewufikile, namakoti walo sewutilungiselele.”—Semb. 19:6, 7.

² ‘LeliWundlu’ nguJesu Khristu futsi umshado walo utawubangela kujabula ezulwini. (Joh. 1:29) Wembetse njani kulomshado? Ngubani lomakoti? Lomakoti ulungiselelwe njani umshado? Utawuba nini lomshado? Lomshado utawubangela injabulo ezulwini, kodvwa labo labanelitsemba lekuphila phakadze emhlabeni nabo batawuhlanganyela yini kulenjabulo? Ngekulangatelela lokukhulu, sitawucoca ngalemibuto njengobe sichubeka nekuhlola incwadzi yeTihlabelelo 45.

3, 4. (a) Yini leshiwoko ngetembatfo temshado teMkhwenyane, futsi yini leyengeta enjabulweni yakhe? (b) Abobani “emadvodzakati emakhosi” ‘nendlovukazi’ labahlanganyela enjabulweni yeMkhwenyane?

³ Fundza Tihlabelelo 45:8, 9. UMkhwenyane, longuJesu Khristu, ugcoke tembatfo takhe letimengetelako tasebukhosini. Letembatfo tinukelela kamnandzi njengobe ‘tinetinongo leticolisakele,’ njengemure nekhasiya, lebetisekhatsi kwetinongo letakha emafutsa langcwele emgcobo lebekasetjentiswa ka-Israyeli.—Eks. 30:23-25.

⁴ Lokuhlabela lokusemazulwini lokugcwalisa sigodlo kwengeta enjabulweni uMkhwenyane lasavele anayo njengobe umshado wakhe usondzela. ‘Indlovukazi,’ lokuyincenye yasezulwini yenhlangano yaJehova lefaka ekhatsi “emadvodzakati emakhosi,” lokutingilosi letingcwele, nayo iyahlanganyela kulenjabulo. Kuyajabulisa kuva emavi lasezulwini latsi: “Asitfokote, sigcwale injabulo, . . . ngobe umshado weliWundlu sewufikile”!

5. Ngubani “umfati weliWundlu”?

⁵ Fundza Tihlabelelo 45:10, 11. Sesiyamati uMkhwenyane, kodvwa ngubani-ke lomakoti? Akasiye umuntfu mbamba, kunaloko umelela onkhe emaKhristu lagcotjiwe langu-144 000. Jesu uyinhloko yelibandla lalabagcotjiwe. (Fundza Efesu 5:23, 24.) Batawuba yincenye yeMbuso waNkulunkulu lobuswa nguMesiya. (Luk. 12:32) LamaKhristu lagcotjwe ngemoya langu-144 000 ‘achubeka alandzela liWundlu nobe ngukuphi lapho liya khona.’ (Semb. 14:1-4) Aba ‘ngumfati weliWundlu,’ futsi ahlala nalo ekhaya lalo lelisezulwini.—Semb. 21:9; Joh. 14:2, 3.

6. Labagcotjiwe babitelwani ngekutsi ‘yinkhosatana,’ futsi kungani bayalwa kutsi ‘bakhohlwe sive sakubo’?

⁶ Lomakoti akabitwa nje kuphela ngekutsi “ndvodzakati” kepha uphindze abitwe ngekutsi ‘yinkhosatana.’ (Hla. 45:13) Ngubani ‘lenkhosi’? Jehova watsatsa emaKhristu lagcotjiwe wawafaka esiswini aba ‘bantfwana’ bakhe. (Rom. 8:15-17) Njengobe batawuba ngumakoti wasezulwini, lalabagcotjiwe banikwa umyalo lotsi: “Sikhohlwe sive sakini nebakenu [enyameni].” Kufanele bahlale ‘banake tintfo letisezulwini, hhayi letisemhlabeni.’—Khol. 3:1-4.

7. (a) Khristu bekasolo amlungiselela njani makoti wakhe loseta? (b) Lomakoti umtsatsa njani umyeni wakhe loseta?

⁷ Kuwo onkhe lamakhulu eminyaka, Khristu bekasolo alungiselela makoti wakhe umshado wasezulwini. Umphostoli Pawula wachaza kutsi Khristu ‘walitsandza libandla futsi watinikela ngenca yalo, kuze alingcwelise, alihlambulule ngekuligeza ngemanti asebentisa livi, khona atewuliletsa kuye likhatimula, lingenabala, lingenasici, nanobe yini lenjengalena, kodvwa libe ngcwele futsi lingasoleki.’ (Ef. 5:25-27) EKhorinte yasendvulo, Pawula watjela emaKhristu lagcotjiwe kutsi: “Nginesikhwele ngani, sikhwele lesifana nesaNkulunkulu, njengobe ngetsembisa kunendzisa endvodzeni yinye, kuze nginetfule njengentfombi ntfo kuKhristu.” (2 Khor. 11:2) Jesu Khristu iNkhosi lenguMkhwenyane, imbona amuhle makoti wayo, ngobe uhlantekile futsi uyemukeleka kuNkulunkulu. Lomakoti umtsatsa njengenkhosi yakhe futsi ‘uyamtfobela’ njengemyeni wakhe.

8. Kungani kufaneleka kutsi lomakoti achazwe ngekutsi ‘uyacwebetela’?

⁸ Fundza Tihlabelelo 45:13, 14a. Lomakoti ‘uyacwebetela’ kulomshado wasebukhosini. KuSembulo 21:2 lomakoti ufananiswa nelidolobha, iJerusalema Lensha futsi ‘ulungiswe njengamakoti  ahlotjiselwe umkhwenyane.’ Lelidolobha lelisezulwini ‘linenkhatimulo yaNkulunkulu’ futsi kukhanya kwalo ‘kufana nelitje leliligugu kakhulu, njengelitje lejasiphi lelicwebetelisa kwekristalu.’ (Semb. 21:10, 11) Lobuhle beJerusalema Lensha buchazwe kahle kakhulu encwadzini yeSembulo. (Semb. 21:18-21) Akumangalisi-ke kutsi umhlabeli utsi lomakoti ‘uyacwebetela’! Ngetulu kwako konkhe, lomshado wasebukhosini utawube usezulwini.

9. Ngubani ‘lenkhosi’ lokuletfwa kuyo makoti, futsi lomakoti ugcoke njani?

⁹ Lomakoti uletfwa kuMkhwenyane—iNkhosi LenguMesiya. Bekasolo amlungiselela, ‘amhlambulula ngekumgeza ngemanti asebentisa livi.’ Lomakoti ‘ungcwele futsi akasoleki.’ (Ef. 5:26, 27) Asingabati kutsi nalomakoti uwugcokele kahle lomkhosi. Vele kunjalo! Ecinisweni ‘wembetse tingubo letelukwe ngegolide’ futsi ‘umikiswa enkhosini, embetse bukhatikhati.’ Njengobe kungumshado weliWundlu, lomakoti “uvunyelwe kutsi embatse ilineni lekhanyako, lehlantekile, nalecolisakele—ngobe ilineni lecolisakele imelela imisebenti lelungile yalabangcwele.”—Semb. 19:8.

10. Utawuba nini umshado weliWundlu?

¹⁰ Fundza Sembulo 19:7. Utawuba nini umshado weliWundlu? Nanobe ‘makoti walo atilungiselele’ lomshado, loko lesibese sitjelwa kona akusichazeli kutsi kwentekani kulomshado. Kunaloko kusichazela kahle ngesigaba sekugcina sekuhlupheka lokukhulu. (Semb. 19:11-21) Loku kusho kutsi lomshado utawuba khona ngaphambi kwekutsi leNkhosi lenguMkhwenyane icedze kuncoba kwayo yini? Cha. Imibono lesencwadzini yeSembulo ayikabhalwa ngekulandzelana kwekugcwaliseka kwayo. KuTihlabelelo 45, lomshado uba khona ngemuva kwekutsi iNkhosi Jesu Khristu itsatse inkemba ‘iphume imphi, iyewuncoba’ titsa tayo.—Hla. 45:3, 4.

11. Khristu utakucedzela njani kuncoba kwakhe?

¹¹ Singaphetsa ngekutsi tintfo letitawenteka titawulandzelana ngalendlela: Kwekucala, kutawehlulelwa ‘ingwadla lenkhulu,’ iBhabhulona Lenkhulu, umbuso welive wenkholo yemanga. (Semb. 17:1, 5, 16, 17; 19:1, 2) Ngemuva kwaloko, Khristu utawukhipha sehlulelo saNkulunkulu kulo lonkhe lelive lelibi laSathane ngekutsi alibhubhise e-Amagedoni, “emphini yelilanga lelikhulu laNkulunkulu Somandla.” (Semb. 16:14-16; 19:19-21) Ekugcineni, iNkhosi Lelichawe itawucedzela kuncoba kwayo ngekutsi ijikijele Sathane nemadimoni akhe emgodzini longenamkhawulo, babe sesimeni sekungatsi bafile.—Semb. 20:1-3.

12, 13. (a) Utawuba nini umshado weliWundlu? (b) Bobani labatawujabula ngemshado weliWundlu ezulwini?

¹² Njengobe emaKhristu lagcotjiwe acedza kuphila kwawo kwasemhlabeni ngesikhatsi sekuba khona kwaKhristu, avuselwa ekuphileni kwasezulwini. Ngemuva kwesikhatsi lesitsite iBhabhulona Lenkhulu ibhujisiwe, Jesu utawabutsela kuye onkhe emalunga lasele amakoti. (1 Thes. 4:16, 17) Ngaphambi kwekucala kwemphi ye-Amagedoni onkhe emalunga ‘amakoti’ atawube sekasezulwini. Ngemuva kwalemphi, lomshado weliWundlu ungabese sewuyacala. Lomshado utawuba ngulojabulisa sibili! Sembulo 19:9 sitsi: “Bayajabula labo labamenywe esidlweni sakusihlwa semshado weliWundlu.” Atawujabula mbamba emalunga amakoti langu-144 000. INkhosi lenguMkhwenyane itawujabula kakhulu kuba nebangani bayo basebukhosini labatawube ‘badla futsi banatsa etafuleni leliseMbusweni wayo’ ngekwemfanekiso. (Luk. 22:18, 28-30) Nanobe kunjalo,  kujabula ngemshado weliWundlu angeke nje kube kweMkhwenyane namakoti kuphela.

¹³ Njengobe sibonile ekucaleni, ticumbi letisezulwini titawuhlanganyela ekuhlabeleni titsi: “Asitfokote, sigcwale injabulo, futsi simkhatimulise [Jehova], ngobe umshado weliWundlu sewufikile, namakoti walo sewutilungiselele.” (Semb. 19:6, 7) Kutsiwani-ke ngetinceku taJehova letisemhlabeni? Nato titawuhlanganyela yini kulenjabulo?

14. Njengobe kuvetwe kuTihlabelelo 45, tibobani ‘letintfombi letitimphekeleteli’ tamakoti?

¹⁴ Fundza Tihlabelelo 45:12, 14b, 15. Umphrofethi Zakhariya wabiketela kutsi esikhatsini sekuphela, bantfu betive bebatawukujabulela kutihlanganisa nensali ya-Israyeli waNkulunkulu. Wabhala watsi: “Ngalawo malanga emadvodza lalishumi lasuka kuto tonkhe tilwimi netive ayawunkonkoshela umJuda munye ngemphetfo wesembatfo sakhe, atsi: ‘Asihambisane nani, ngobe sivile kutsi Nkulunkulu unani.’” (Zak. 8:23) KuTihlabelelo 45:12, NW, ‘lamadvodza lalishumi’ langekwemfanekiso amelelwa ‘yindvodzakati yaseThire’ ‘nangulabo labanjingile.’ Lamadvodza eta kulensali yalabagcotjiwe aphetse tipho, ‘afuna kwemukeleka’ kuyo nekutfola lusito ekukhonteni Jehova. Kusukela nga-1935, tigidzi tebantfu tivumele insali kutsi ‘itiholele ekulungeni.’ (Dan. 12:3) Labangani labetsembekile bemaKhristu lagcotjiwe bahlante kuphila kwabo kuko konkhe kukhonta kwemanga. ‘Letintfombi letitimphekeleteli’ talomakoti titinikele kuJehova futsi takhombisa kutsi tetsembekile kuleNkhosi lenguMkhwenyane.

15. ‘Tintfombi letitimphekeleteli’ tisebente njani ngekubambisana nemalunga amakoti lasesemhlabeni?

 ¹⁵ Insali yamakoti ijabula kakhulu ‘ngaletintfombi letitimphekeleteli’ ngenca yekukhutsala kwato ekuyisiteni ekushumayeleni “letindzaba letimnandzi teMbuso” emhlabeni wonkhe. (Mat. 24:14) Akusiye nje kuphela ‘umoya namakoti labachubeka batsi, “Kota!”’ kodvwa nalabevako batsi, “Kota!” (Semb. 22:17) ‘Letinye timvu’ taweva emalunga lagcotjiwe amakoti atsi “Kota!” nato tase tihlanganyela namakoti ekutjeleni labo labasemhlabeni kutsi: “Kota!”—Joh. 10:16.

16. Nguliphi litfuba Jehova lalinikete letinye timvu?

¹⁶ Insali yalabagcotjiwe iyabatsandza bangani bayo futsi iyakujabulela kwati kutsi uYise weMkhwenyane lokunguJehova, unikete letinye timvu litfuba lekujabula ngemshado wasezulwini weliWundlu. Kwashiwo kutsi ‘letintfombi letitimphekeleteli’ ‘titawumikiswa ngekujabula nangekutsakasa.’ Letinye timvu letinelitsemba lekuphila phakadze emhlabeni, titawuhlanganyela enjabulweni yendzawo yonkhe ngesikhatsi semshado weliWundlu lotawube usezulwini. Kuyafaneleka-ke kutsi incwadzi yeSembulo itsi emalunga ‘esicumbi lesikhulu’ atawube ‘eme embikwesihlalo sebukhosi nasembikweliWundlu.’ Entela Jehova umsebenti longcwele emabaleni asemhlabeni elithempeli lakhe.—Semb. 7:9, 15.

17, 18. Umshado weliWundlu uba nemiphumela ngayiphi indlela, futsi Khristu utawuba nguyise kubobani ngesikhatsi sekuBusa Kweminyaka Leyinkhulungwane?

¹⁷ Fundza Tihlabelelo 45:16. ‘Tintfombi letitimphekeleteli’ tamakoti waKhristu losezulwini titawuba nesizatfu lesikhulu sekujabula natibona lomshado uletsa imiphumela lemihle emhlabeni lomusha. INkhosi lenguMkhwenyane itawunaka umhlaba futsi ivuse ‘boyise’ basemhlabeni labatawuba ‘ngemadvodzana’ ayo. (Joh. 5:25-29; Heb. 11:35) Emkhatsini walaba itawubeka “tikhulu eveni lonkhe.” Asingabati kutsi Khristu utawubeka labanye kulabadzala labetsembekile balamuhla kutsi bahole emhlabeni lomusha.—Isa. 32:1.

¹⁸ Ngesikhatsi sekuBusa Kweminyaka Leyinkhulungwane, Khristu utawuba nanguyise walabanye bantfu. Ecinisweni, bonkhe labasemhlabeni labatawutfola kuphila lokuphakadze batakutfola ngobe babe nekukholwa emhlatjelweni waJesu loyinhlawulo. (Joh. 3:16) Ngaleyo ndlela, utawuba “nguBabe Waphakadze” kubo.—Isa. 9:6, 7.

19, 20. Tintfo letijabulisako letichazwe kuTihlabelelo 45 tiwatsintsa njani onkhe emaKhristu eliciniso lamuhla?

¹⁹ Fundza Tihlabelelo 45:1, 17. Ecinisweni letintfo letibhalwe kuTihlabelelo 45 tiwatsintsa onkhe emaKhristu. Labagcotjiwe labasele emhlabeni bayajabula ngekutsi madvutane batawuhlangana ezulwini nebanakabo kanye neMkhwenyane. Letinye timvu titimisele kakhulu kutfobela iNkhosi yato lekhatimulako futsi tiyalijabulela lilungelo lekusebentelana nemalunga amakoti lasekhona emhlabeni. Ngemuva kwalomshado, Khristu kanye nebangani bakhe latawube anabo eMbusweni batawuletsela bantfu emhlabeni tibusiso letinyenti.—Semb. 7:17; 21:1-4.

²⁰ Njengobe silangatelela kugcwaliseka ‘kwendzaba lenhle’ lemayelana neNkhosi lenguMesiya, asikatimiseli yini ‘kwenta libito layo likhunjulwe’? Shengatsi singaba semkhatsini walabo ‘labatawubonga iNkhosi phakadze naphakadze.’