Engomeni ledvumisa uMdali, iNkhosi Davide yaka-Israyeli wasendvulo yahlabela yatsi: “Yebo, Nkulunkulu wami, kujabula kwami kusekwenteni intsandvo yakho, imiyalo yakho isenhlitiyweni yami.” (Hla. 40:8) Nangetulu kwebumatima nekucindzetelwa tinkinga tekuphila, Davide wakujabulela kakhulu kwenta intsandvo yaNkulunkulu. Kuliciniso kutsi Davide bekungasuye yena yedvwa inceku yaJehova leyakujabulela kukhonta Nkulunkulu weliciniso.

Asebentisa lamavi eTihlabelelo 40:8 nakakhuluma ngaMesiya nobe Khristu, umphostoli Pawula wabhala: “[Jesu] naketa emhlabeni utsi: ‘“Awuzange uyifune imihlatjelo neminikelo, kodvwa wangilungiselela umtimba. Awuzange uyemukele iminikelo yekushiswa neminikelo yetono.” Ngako mine ngatsi: “Naku ngitile (encwadzini lengumculu kubhalwe ngami) kuze ngente intsandvo yakho Nkulunkulu.”’”—Heb. 10:5-7.

Ngalesikhatsi alapha emhlabeni, Jesu abekujabulela kubuka indalo, kucitsa sikhatsi nebangani bakhe nekudla nabo. (Mat. 6:26-29; Joh. 2:1, 2; 12:1, 2) Nobe kunjalo, intfo lebeyimcoka kuye nalebekayijabulela kakhulu bekukwenta intsandvo yeYise losezulwini. Ecinisweni Jesu watsi: “Kudla kwami kwenta intsandvo yaloyo longitfumile nekutsi ngicedze umsebenti wakhe.” (Joh. 4:34; 6:38) Bafundzi baJesu bafundza eNkhosini yabo kutsi iyini imfihlo yekutfola injabulo sibili. Ngenjabulo lenkhulu, bawushumayela ngekutitsandzela nangemfutfo lomkhulu umlayeto weMbuso.—Luk. 10:1, 8, 9, 17.

Jesu watjela balandzeli bakhe watsi: “Hambani nente bantfu bato tonkhe tive babe bafundzi bami, nibabhabhatise egameni leYise, neleNdvodzana, nelemoya longcwele, nibafundzise kugcina konkhe lenginitjele kona. Nibokwati kutsi mine nginani onkhe emalanga kute kube sekupheleni kwalelive.” (Mat. 28:19, 20) Kwenta lowo msebenti kufaka ekhatsi kuya kubantfu nome ngukuphi lapho batfolakala khona, kubuyela kulabo labanesifiso sekutfola lwati lolubanti,  kanye nekuchuba tifundvo teliBhayibheli nabo. Loko kungasiletsela injabulo lenkhulu.

Ngisho nome bantfu bawutsandza umlayeto wetfu nome bangawutsandzi, simo setfu sengcondvo sidlala indzima lenkhulu ekutfoleni injabulo ensimini. Kungani sichubeka sisakata tindzaba letimnandzi ngisho nome singanakwa? Loko sikwenta ngobe siyati kutsi kushumayela ngeMbuso nekwenta bantfu babe bafundzi kuyindlela lesikhombisa ngayo kutsi siyamtsandza Nkulunkulu nabomakhelwane betfu. Kuphila kwetfu nekwabomakhelwane betfu kusengotini. (Hez. 3:17-21; 1 Thim. 4:16) Ake sicoce ngalamanye emaphuzu lasite bantfu labanyenti lesikholwa nabo kutsi bahlale banenshisekelo yekuhlanganyela emsebentini wekushumayela emasimini lalukhuni.

Kusebentisa imibuto lekahle emsebentini wetfu wekushumayela kuletsa imiphumela lemihle. Ngalelinye lilanga ekuseni Amalia wabona indvodza ifundza liphephandzaba epaki. Wasondzela kulendvodza wayibuta kutsi timnandzi yini letindzaba lefundza ngato. Ngalesikhatsi itsi atisimnandzi, Amalia watsi: “Mine ngikuletsele tindzaba letimnandzi letimayelana neMbuso waNkulunkulu.” Loko kwenta lendvodza yaba nesifiso sekwati ngato, futsi yavuma kufundzelwa liBhayibheli. Ecinisweni Amalia wakhona kucala tifundvo teliBhayibheli letintsatfu kuleyo paki.

Janice watsatsa indzawo lasebentela kuyo njengensimi yakhe. Ngalesikhatsi gadzi kanye nalomunye lasebenta naye bakhangwa sihloko lesitsite lesiku-Sicongosekulindza, Janice wabona kuncono kutsi abahambisele bomagazini njalo. Wenta lokufanako nangalomunye lasebenta naye lowajatjuliswa tihloko letehlukahlukene letitfolakala ku-Sicongosekulindza naku-“Phaphama!” Loku kwenta kutsi nalomunye lasebenta naye acele kuhanjiselwa bomagazini. Janice utsi: “Loku kwaba sibusiso lesikhulu lesivela kuJehova!” Ekugcineni besekanebantfu labangu-11 labahambisela bomagazini njalo emsebentini.

Lomunye umbonisi lojikeletako wakhutsata bamemeteli kutsi nabashumayela emtini ngemuti, akukafaneli baphetse indzaba ngekumane nje batsi batawuphindze babuye ngalelinye lilanga. Watsi esikhundleni saloko bangabuta umnikati welikhaya batsi: “Ungatsandza yini kutsi ngikukhombise indlela sifundvo seliBhayibheli lesichutjwa ngayo?” nobe batsi: “Nguliphi lilanga nesikhatsi longatsandza kutsi ngibuye ngaso sitewuchubeka nalendzaba yetfu?” Lombonisi lojikeletako watsi ngekusebentisa lendlela, bazalwane nabodzadze bakulelinye libandla labelivakashele bacalisa tifundvo teliBhayibheli letingu-44 ngeliviki linye.

Kubuyela kubantfu ngekushesha, ngisho nangemuva nje kwemalanga lambalwa, kungaba lusito kakhulu. Kungani sisho njalo? Kwenta njalo kukhombisa kutsi sinesifiso lesisuka enhlitiyweni sekusita bantfu labacotfo kutsi balicondze liBhayibheli. Ngalesikhatsi abutwa kutsi kungani avume kutsi BoFakazi BaJehova bamchubele sifundvo seliBhayibheli, lomunye make watsi: “Ngivumile kutsi bangifundzele ngobe bakhombise kutsi banendzaba nami futsi banelutsandvo sibili.”

 Ngemuva nje kwemalangana abuye eSikolweni Semsebenti Semahlahlandlela, Madaí abechuba tifundvo teliBhayibheli letingu-15 futsi letinye letisihlanu watiniketa labanye bamemeteli. Linyenti laletifundvo takhe teliBhayibheli tacala kuya emihlanganweni yelibandla njalo. Yini leyasita Madaí kutsi acale tifundvo teliBhayibheli letinyenti kangaka? Lesikolwa samsita wabona sidzingo sekubuyela kanyenti kulabo labakhombisa kuba nesifiso sekufundza ekucaleni. Lomunye ummemeteli losasite bantfu labanyenti kutsi bafundze liciniso leliBhayibheli utsi: “Ngifundze kutsi kubuyela kubantfu ungayekeli kuyindlela lebalulekile yekusita labo labafuna kwati ngaJehova.”

Kubuyela kubantfu lebesicoce nabo kanye nekuchuba tifundvo teliBhayibheli kudzinga kutikhandla. Nobe kunjalo, imiphumela lesitayitfola itawuba minyenti kakhulu kunemetamo lesisuke siyentile. Ngekutikhandla emsebentini wekushumayela ngeMbuso, singakhona kusita labanye kutsi ‘batfole lwati lolungulonalona lweliciniso’ futsi loko kungabaholela ekusindzisweni. (1 Thim. 2:3, 4) Loko kungasenta sitfole kwenetiseka nenjabulo lenkhulu lengacatsaniswa nalutfo.