NGESIKHATSI bantfu baNkulunkulu bahamba eBhabhulona nga-537 B.C.E., Jehova bekanendzaba nendlela lebebatawuhamba kuyo nababuyela eJerusalema. Watsi: “Lungiselelani bantfu umgwaco! Yakhani, yakhani umgwaco lomkhulu! Susani ematje.” (Isa. 62:10) Cabanga ngendlela lamanye emaJuda lakwenta ngayo loku. Kungenteka kutsi emacembu labekasembili alungisa umgwaco, avala imisele lebeseyakhekile netigojana lebetisemgwacweni. Kufanele kutsi loko kwawasita ema-Israyeli labekalandzela ngemuva njengobe bekabuyela eveni lakuwo.

Ngendlela lefanako, nasenta imigomo letsintsa buhlobo betfu naNkulunkulu kufana nekutsi sihamba endleleni letsite. Jehova ufuna tonkhe tinceku takhe kutsi tihambe ngalendlela ngaphandle kwekuphatamiseka. LiVi lakhe lisikhutsata litsi: ‘Lungisa indlela yetinyawo takho, tonkhe-ke tindlela takho tiyawuba nekuciniseka.’ (Taga 4:26) Ngisho nobe umncane nobe sewukhulakhulile, ungakubona kuba kuhlakanipha kwaleseluleko lesivela kuNkulunkulu.

Mhlawumbe uke weva bantfu bakhuluma ngemuntfu loseminyakeni yekutfomba, batsi: ‘Unematfuba lamanyenti lamvulekele,’ nobe ‘Utawuphumelela ekuphileni.’ Ngalokuvamile bantfu labasha banemphilo lenhle, ingcondvo lehlakaniphile kanye nesifiso lesikhulu sekuphumelela ekuphileni. LiBhayibheli lisho ngalokucacile litsi: “Ludvumo lwalabasha ngemandla abo.” (Taga 20:29) Umuntfu lomusha losebentisa emakhono akhe nemandla akhe kute akhonte Jehova angafeza imigomo leminyenti letfutfukisa buhlobo bakhe naNkulunkulu futsi atfole injabulo sibili.

Njengobe wati, emakhono ebantfu labasha atsatfwa njengalabaluleke kakhulu kulelive. Nangabe Fakazi losemusha aphumelela esikolweni, umeluleki wesikolwa, thishela wakhe nome lotsite lafundza naye angamcindzetela kutsi aphishanekele imfundvo lephakeme, kute aphumelele kulelive laSathane. Bantfu labasha labanemakhono kutemidlalo bangahle  bakhutsatwe ngulabanye kutsi bawente abe ngumsebenti wabo. Uke watitfola yini usesimeni lesifanako, nobe ukhona yini lomatiko lobhekene nekucindzetelwa lokufana naloku? Yini lengasita umKhristu kutsi akhetse ngekuhlakanipha?

Timfundziso teliBhayibheli tingamsita umuntfu kute atilungiselele kuhamba ngendlela lencono kakhulu ekuphileni. Umshumayeli 12:1 utsi: “Khumbula uMdali wakho etinsukwini tebusha bakho.” Wena nobe umuntfu lomusha lomatiko, ‘ningamkhumbula njani uMdali wenu’ Lomkhulu?

Cabanga ngaloko lokwenteka ku-Eric * waseNshonalanga Afrika. Bekakutsandza kudlala ibhola. Ngesikhatsi Eric aneminyaka lengu-15 budzala, wakhetfwa kutsi ayewudlalela licembu lesive. Loko bekusho kutsi ngekushesha nje abengaba nelitfuba lekutfola kuceceshwa lokuncono kakhulu eYurophu, mhlawumbe kuze kumholele ekubeni ngumdlali lodlalela emacembu lamakhulu. Kodvwa abetasisebentisa njani leseluleko lesimayelana ‘nekukhumbula uMdali’ Lomkhulu? Futsi ngusiphi sifundvo wena nobe umngani wakho losemusha leningasitfola kuloku?

Ngesikhatsi asafundza sikolwa, Eric wacala kufundza liBhayibheli naBoFakazi BaJehova. Wafundza kutsi nguMdali lotawucatulula tinkinga tebantfu ngalokuphelele. Wakubona kubaluleka kwekusebentisa sikhatsi sakhe nemandla akhe kute ente intsandvo yaNkulunkulu. Ngekuvumelana naloko, Eric wakhetsa kungaphishanekeli kufuna kudlalela emacembu lamakhulu. Kunaloko, wabhajatiswa futsi watfutfukisa buhlobo bakhe naNkulunkulu. Ngekuhamba kwesikhatsi, waba yinceku lesebentako futsi ngemuva kwaloko wamenywa eSikolweni Lesisekelwe EBhayibhelini Sebazalwane Labangakashadi.

Kube Eric waphishanekela kudlalela emacembu lamakhulu, ngabe watfola ludvumo futsi wanjinga. Kodvwa wabona kutsi siliciniso lesimiso lesiseBhayibhelini lesitsi: “Ingcebo yemuntfu lonjingile siphephelo sakhe. Uyaye acabange kutsi nguyona nqaba yakhe lengamvikela.” (Taga 18:11) Ecinisweni, kuvikeleka umuntfu langabonakala shengatsi uyakutfola emcebeni wakhe, kulite. Ngetulu kwaloko, labo labatimisele ngekunjinga “batigwaza yonkhe indzawo ngebuhlungu lobunyenti.”—1 Thim. 6:9, 10.

Kuyajabulisa kutsi bantfu labanyenti labasha batfole injabulo nekulondzeka lokuhlala njalo ngekungenela umsebenti wasikhatsi sonkhe. Eric utsi: “Nyalo ngisecenjini lelikhulu letinceku taJehova tasikhatsi sonkhe. Leli ngulona cembu lelincono kakhulu lengingaba kulo, futsi ngimbonga kakhulu Jehova ngekungikhomba indlela lenguyonayona leholela enjabulweni sibili nasemphumelelweni ekuphileni.”

Kutsiwani ngawe? Kunekuphishanekela imigomo yelive, kungani ungacinisi “tindlela takho” kuJehova ngekuba lihlahlandlela?—Fundza libhokisi lelitsi “ Kutfola Tinzuzo Longeke Utitfole Enyuvesi.”

Ngesikhatsi labanye bantfu labashadene bavakashele lihhovisi leligatja laseMelika, babona kutsi emalunga aseBethel lakhonta Jehova lapho ayajabula. Ngekuhamba kwesikhatsi, lodzadze wabhala watsi: “Sasenetisekile endleleni lebesiphila ngayo.” Laba labashadene bancuma kutsi batawunikela ngesikhatsi nemandla abo kute bajabulele emalungelo lamakhulu emsebentini waNkulunkulu.

Ngalesinye sikhatsi, tingucuko labebafuna kutenta tatibonakala titinkhulu kakhulu. Kodvwa ngalelinye lilanga, bacabanga ngemBhalo welusuku wangalelo langa. Kwakungumbhalo waJohane 8:31, lapho sifundza emavi aJesu latsi: “Nanigcina emavi ami, nisuke nibafundzi bami sibili.” Banaloko engcondvweni, bacabanga: “Nome ngabe ngukuphi kutidzela lesikwentako kute sente kuphila kwetfu kube melula, kubaluleke kakhulu.” Batsengisa indlu yabo lenkhulu, banciphisa naletinye tintfo letatingumtfwalo kubo, base batfutsela ebandleni lelalidzinga lusito. Nyalo bangemahlahlandlela, baphindze basite ekwakhiweni kwemaHholwa eMbuso futsi bayavolontiya emihlanganweni yesigodzi. Bativa njani ngaloku? Batsi: “Iyasimangalisa injabulo lesiyitfola ngekuphila kuphila lokumelula, nekwenta loko inhlangano yaJehova lesikhutsata kutsi sikwente.”

Solomoni wabhala watsi: “Emehlo akho akacondze ngco embili, ubukisise embikwakho.” (Taga 4:25) Njengemshayeli lohlale anake umgwaco lashayela kuwo, kufanele sitibalekele tintfo letingasiphatamisa naletingasenta singakhoni kutibekela imigomo yekutfutfukisa buhlobo betfu naNkulunkulu nekuyifinyelela.

Ngumiphi imigomo yekukhonta Nkulunkulu longatibekela yona futsi uyifinyelele? Kuba semsebentini wasikhatsi sonkhe ngumgomo lomuhle kakhulu.  Lomunye umgomo ungaba kuhlanganyela ebandleni lelisedvutane lelinesidzingo sebamemeteli labanalokuhlangenwe nako, kute ulisite ekuhlanganiseni insimi yalo lenkhulu. Nobe kungenteka kutsi libandla lelitsite linebamemeteli labanyenti labakahle, kodvwa lite labadzala netinceku letisebentako letenele. Ungakhona yini kusita ngaletindlela? Kungani ungakhulumi nembonisi wesifundza kute ubone kutsi ungakwati yini kusita? Nangabe unesifiso sekuya emasimini lakhashane, ungase ucele kwatiswa ngemabandla lakhashane ladzinga lusito. *

Asesiphindze sicoce ngesimo lesichazwe ku-Isaya 62:10. Kungenteka kutsi lamanye emaJuda asebenta kamatima alungisa indlela lebuyela ekhaya kute bantfu baNkulunkulu bakwati kufika lapho bebaya khona. Nangabe utinikele kute ukwati kufinyelela imigomo yakho emsebentini longcwele, ungapheli emandla. Ngelusito lwaNkulunkulu, ungakwati kuyifinyelela. Chubeka ucela kuhlakanipha kuJehova njengobe wetama kususa tintfo letingakuphatamisa. Ngesikhatsi lesifanele, utawubona kutsi utakusita njani ‘ekulungiseni indlela yetinyawo takho.’—Taga 4:26.