Kungenteka ukhona umuntfu lomatiko lodivosile, nobe banyenti lobatiko labanjalo. Sizatfu saloko sikutsi idivosi seyivamile. Nasi sibonelo: Luhlolo lolwentiwe ePoland luveta kutsi manyenti ematfuba ekutsi bantfu labaneminyaka lengu-30 budzala lasebaneminyaka lesukela kulemitsatfu kuye kulesitfupha bashadile, badivose; futsi idivosi ayigcini nje kubantfu labakuleyo minyaka kuphela.

Ecinisweni, umbiko we-Institute for Family Policy yaseSpain utsi ‘[eYurophu] ihhafu yebantfu labashadako itawugcine idivosile.’ Kwenteka intfo lefanako nakulamanye emave latfutfukile.

Ngumiphi imiphumela lebangelwa ngulesimo lesesivamile? Lomunye losanesikhatsi lesidze angumeluleki walabashadile eMphumalanga Yurophu utsi: “Idivosi imane isho kukwenta kube semtsetfweni loko lebesekuvele kwentekile—kubhidlika kwebuhlobo emshadweni lokuphumela ekwehlukaneni, lokuyintfo lebangela buhlungu lobukhulu.” Wachubeka watsi: “Kubese kulandzela imiva lebuhlungu kakhulu lefaka ekhatsi intfukutselo, kutisola, kudvumateka, kuphelelwa litsemba nekutiva unemahloni.” Ngaletinye tikhatsi loko kwenta umuntfu afise kutibulala. “Ngemuva kwekutsi inkantolo seyiyente yaba semtsetfweni idivosi, umuntfu lodivosile bese uhlushwa nguleminye imiva. Njengobe asuke ativa angasilutfo futsi alahliwe, angatibuta: ‘Njengobe sengidivosile, sengiyini vele? Ngisaphilelani?’”

Akhumbula indlela labetiva ngayo eminyakeni leyendlulile, Eva utsi: “Ngemuva kwekutsi sesidivose ngalokusemtsetfweni, bengitiva nginemahloni kakhulu ngesikhatsi bomakhelwane bami nebantfu lebengisebenta nabo bangibita ngekutsi ‘ngingumfati lodivosile.’ Bengitiva ngitfukutsela kakhulu. Njengobe bengishiywe nebantfwana lababili labancane kwadzingeka kutsi ngidlale indzima yamake nababe.” * Adam lowakhonta iminyaka lengu-12 njengalomdzala welibandla lohlonishwako utsi: “Sengiphelelwe sitfunti kangangekutsi ngaletinye tikhatsi ngitiva ngitfukutsela kakhulu, ngize ngifune kutehlukanisa nalabanye.”

Ngesizatfu sekutsi basuke bakhatsateke ngelikusasa, labanye bakutfola kumatima kuphindze babuyele esimeni sabo ngisho nangemuva kweminyaka leminyenti badivosile. Bangaphetsa ngekutsi labanye bantfu abanendzaba nabo. Ngetulu kwaloko, lomunye umbhali lobhala ngetindzaba temadivosi utsi kusuke sekudzingeka “bashintje indlela labenta ngayo tintfo futsi bafundze kuphila netinkinga tabo.”

Stanisław uyakhumbula: “Ngesikhatsi sidivosa, loyo lobekangumfati wami abengangivumeli kutsi ngibone emadvodzakati ami lamabili. Loko kwangenta ngabona shengatsi kute longikhatsalelako futsi  ngeva shengatsi naJehova sewungilahlile. Bengingasakujabuleli kuphila. Ngekuhamba kwesikhatsi, ngabona kutsi indlela lebengicabanga ngayo beyingakafaneli.” Wanda lobekadivosile, naye abehlushwa kukhatsateka ngelikusasa. Utsi: “Bengicabanga kutsi ngekuhamba kwesikhatsi bantfu labanyenti, ngisho nalengihlanganyela nabo imbala bebangeke babe nendzaba nami nebantfwana bami. Kodvwa nyalo sengiyayibona indlela bazalwane lebebasisekela ngayo nalebebangisita ngayo njengobe bengetama kukhulisa bantfwana bami kutsi babe tikhonti taJehova.”

Lamavi langenhla angakusita ubone kutsi ngemuva kwekudivosa labanye babese bahlushwa yimiva lengakafaneli. Bangatitfola sebanembono longakafaneli, bacabange kutsi abakabaluleki futsi abakufaneli kunakwa ngulabanye. Ngetulu kwaloko, bangacala kusola labanye bantfu. Loko kungabenta bacabange kutsi libandla alinandzaba nabo futsi alibaveli. Kodvwa lokuhlangenwe nako lokufana nekwaStanisław naWanda kuveta kutsi bantfu labadivosile bangagcine babonile kutsi bazalwane nabodzadze babakhatsalela mbamba. Ecinisweni, emaKhristu abanakekela kakhulu bantfu labanjalo, ngisho nobe kungenteka bangaluboni lusito lwawo ekucaleni.

Kufanele sikhumbule kutsi ngisho nobe singetama kangakanani kuwasita emaKhristu ladivosile, ngaletinye tikhatsi angativa anesitunge. Bodzadze labadivosile bangabona shengatsi labanye bantfu abanendzaba nabo. Alicja utsi: “ Sekuphele iminyaka lesiphohlongo ngidivosile. Kodvwa ngaletinye tikhatsi ngihle ngitiva ngingakabaluleki. Etikhatsini letinjalo ngivame kutehlukanisa kulabanye bantfu, ngikhale futsi ngitive ngingakajabuli.”

Nanobe lemiva lechazwe kulesihloko ivamile kumuntfu lodivosile, liBhayibheli liyecwayiswa ngekutehlukanisa. Kungasilaleli lesecwayiso kungenta kutsi umuntfu angakwemukeli ‘kuhlakanipha lokulusito.’ (Taga 18:1, NW.) Umuntfu lotiva anesitunge kufanele acondze kutsi kukuhlakanipha kubalekela kufuna seluleko nobe indvudvuto kumuntfu webulili lobehlukile. Nakenta njalo, ngeke alingeke kutsi acale kuba nemiva lengakafaneli yekutsandzana naloyo muntfu.

EmaKhristu lesikanye nawo ladivosile angahlaselwa yimiva lebuhlungu kakhulu, lefaka ekhatsi kukhatsateka ngelikusasa, kuba nesitunge ngisho nekutiva alahliwe. Nangabe sikhumbula kutsi imiva lenjalo ivamile nekutsi kuba matima kulwisana nayo, kufanele silingise Jehova ngekusekela bazalwane nabodzadzewetfu ngekwetsembeka. (Hla. 55:22; 1 Phet. 5:6, 7) Singaciniseka kutsi batawujabula kakhulu nganobe nguluphi lusito lesibanika lona. Ecinisweni, ebandleni batawutfola lusito loluvela kubangani sibili!—Taga 17:17; 18:24.