Ubafundze kahle yini bomagazini bakamuva be-Sicongosekulindza? Nangabe kunjalo, asewubone kutsi ungakwati yini kuphendvula lemibuto lelandzelako:

Bekufanele ihlatjwe nini imvu yeliPhasika nga-Nisani 14?

Lamanye emahumusho eliBhayibheli atsi lemvu bekufanele ihlatjwe “emkhatsini wekuhlwa lokubili,” lokusho kutsi nakuhwalala—kusandza kushona lilanga kodvwa kusengakabi mnyama. (Eks. 12:6)—12/15, emakhasi 18-19.

Bantfu labasha bangasebentisa tiphi timiso teliBhayibheli kute bente tincumo ngekuhlakanipha?

Nati letinye tato (1) Funa uMbuso waNkulunkulu kucala kanye nekulunga kwakhe. (Mat. 6:19-34) (2) Tfola injabulo ngekusita labanye. (Imis. 20:35) (3) Jabulela kukhonta Nkulunkulu usemusha. (Shu. 12:1)—1/15, emakhasi 19-20.

Utawuba khona nini “umshado weliWundlu”? (Semb. 19:7)

“Umshado weliWundlu” utawuba khona ngemuva kwekutsi iNkhosi Jesu Khristu icedzele kuncoba kwayo, futsi loko kutawuba ngemuva kwekubhujiswa kweBhabhulona Lenkhulu kantsi nemphi ye-Amagedoni itawube seyiliwe.—2/15, likhasi 10.

Kungani emaJuda angesikhatsi saJesu ‘abelindzele’ kufika kwaMesiya? (Luk. 3:15)

Ngeke sisho ngekuciniseka kutsi emaJuda angelikhulu lekucala abesicondza siphrofetho saDanyela lesimayelana naMesiya ngendlela tsine lesisicondza ngayo. (Dan. 9:24-27) Nanobe kunjalo, kungenteka bekavile ngesimemetelo lesakhishwa yingilosi kulabanye belusi, nobe ngaloko umphrofethikati Ana lakusho nakabona luswane lolunguJesu ethempelini. Tati tetinkhanyeti nato teta titewubuka “lomntfwana lotelwe, loyinkhosi yemaJuda.” (Mat. 2:1, 2) Ngekuhamba kwesikhatsi, Johane uMbhabhatisi watsi Khristu abetawuvela masinyane.—2/15, emakhasi 26-27.

Singakubalekela njani kutsi Yebo wetfu abe nguCha? (2 Khor. 1:18)

Kuliciniso kutsi ngaletinye tikhatsi timo letingetulu kwemandla etfu tingase tente kutsi singakhoni kugcina tetsembiso tetfu. Kodvwa nasenta setsembiso nobe sifungo, kufanele sente konkhe lokusemandleni etfu kute sisigcine.—3/15, likhasi 32.

Singasibalekela njani silingo sekubuka titfombe letikhombisa kungcola?

Nati tinyatselo letintsatfu letingaba lusito (1) Nasibona titfombe letivusa inkhanuko, kufanele sikhweshise emehlo etfu kuto ngekushesha. (2) Kufanele sicaphele imicabango yetfu ngekutsi sicabange ngetintfo letakhako futsi sithantaze kuNkulunkulu. (3) Kufanele sicaphele tindlela tetfu ngekubalekela kubuka emabhayisikobho nobe emakheli e-Internet lanetitfombe letikhombisa kungcola.—5/1, emakhasi 12-14.

Ngumiphi imiphumela lengakalindzeleki lengaba khona nangabe umKhristu ashiya umndeni wakhe kute atfole imali lenyenti kulelinye live?

Nangabe batali bakhetsa kungahlali ndzawonye njengemndeni, bantfwana bangaphatamiseka emiveni kanye nasekutiphatseni kwabo. Bangabatfukutselela batali babo. Bantfu labangahlali nalabashade nabo bangase bahlangabetane netilingo tekutiphatsa kabi ngekwelicasi.—4/15, emakhasi 19-20.

Ngumiphi imibuto lemine lokufanele siyikhumbule nasishumayela kubantfu ensimini?

Bobani labantfu lengitawukhuluma nabo? Ngitawukhuluma kuphi nabo? Ngusiphi sikhatsi lengingakhuluma nabo ngaso? Nguyiphi indlela lengingakhuluma nabo ngayo?—5/15, emakhasi 12-15.