PHETRO wadzindza sililo ngemuva kwekuphika Jesu. Nanobe bekutawudzingeka kutsi lomphostoli asebente kamatima kute avuselele buhlobo bakhe naNkulunkulu, Jesu abefuna kumsebentisa ekusiteni labanye. Ngako Jesu watsi kuye: “Nasewubuyile kimi, ubocinisa banakenu.” (Luk. 22:32, 54-62) Phetro wagcine angulomunye webantfu labebatsatfwa njengetinsika telibandla lebuKhristu langelikhulu lekucala. (Gal. 2:9) Ngendlela lefanako, umuntfu loke wakhonta njengalomdzala welibandla angakhona kuphindze atfwale lomtfwalo futsi atfole injabulo ekuciniseni kukholwa kwebazalwane bakhe.

Labanye labake bakhonta njengebabonisi bayekelisiwe kuwenta lomsebenti, futsi kungenteka loku kwabenta bativa behlulekile. Julio, * lowakhonta njengalomdzala welibandla laseNingizimu Melika iminyaka lengetulu kwalengu-20, watsi: “Kulungiselela tinkhulumo, kuvakashela bazalwane nekwelusa emalunga elibandla bekuyincenye lebalulekile yekuphila kwami! Kodvwa avele aphela lamalungelo, futsi ngasala ngitiva nginesikhala lesikhulu. Ecinisweni leso bekusikhatsi lesimatima kakhulu.” Lamuhla Julio sewuphindze ukhonta njengalomdzala welibandla.

Umfundzi Jakobe wabhala watsi: “Nibojabula bazalwane bami nanehlelwa tilingo letehlukahlukene.” (Jak. 1:2) Jakobe abekhuluma ngetilingo letibangelwa kuphatfwa kabi kanye nekuba nesono. Wakhuluma ngetifiso tenyama, kukhetsa kanye nalokunye lokunyenti. (Jak. 1:14; 2:1; 4:1, 2, 11) Siyalo saJehova singase sibe buhlungu. (Heb. 12:11) Kodvwa tilingo letinjalo akukafaneli tisicedzele injabulo.

Ngisho nobe siyekelisiwe kuba nemalungelo latsite ebandleni, sisengakhona kuhlolisisa kutsi kukholwa kwetfu kucine kangakanani futsi sikhombise lutsandvo lesinalo ngaJehova. Singaphindze sicabangisise ngesizatfu lesasenta safuna kukhonta labanye. Besifuna kutizuzisa tsine yini nobe besichutjwa  lutsandvo lwetfu ngaNkulunkulu kanye nekuciniseka kutsi libandla lakhe, futsi kufanele linakekelwe kahle? (Imis. 20:28-30) Bazalwane labake baba ngulabadzala belibandla labachubeka benta imisebenti lengcwele ngenjabulo baveta kubo bonkhe bantfu, ngisho nakuSathane imbala, kutsi bamtsandza sibili Jehova.

Ngesikhatsi iNkhosi Davide iniketwa siyalo ngenca yekwenta tono letinkhulu, yasemukela lesiyalo futsi yatsetselelwa. Davide wahlabela watsi: “Ubusisiwe umuntfu lotsetselelwe tiphambuko takhe, nalotono takhe tisitjekelwe. Ubusisiwe umuntfu Nkulunkulu langambaleli tiphambuko takhe, lonenhlitiyo lete inkhohliso.” (Hla. 32:1, 2) Siyalo samsita Davide futsi asingabati kutsi samenta waba ngumelusi loncono webantfu baNkulunkulu.

Etikhatsini letinyenti, bazalwane lababuyela baphindze bakhonte njengalabadzala belibandla baba belusi labancono kunakucala. Lomunye lomdzala watsi: “Nyalo sengiyati kancono indlela yekusita labo labenta emaphutsa.” Lomunye lomdzala welibandla naye watsi: “Nyalo sengilitsatsa njengalelibaluleke kakhulu lilungelo lenginalo lekukhonta bazalwane bami.”

Umhlabeli wabhala watsi: “[Jehova] ulungile futsi ulungele kutsetselela.” (Hla. 86:5) Ngako akukafaneli sicabange kutsi Nkulunkulu ngeke aphindze ametsembe umuntfu lowente liphutsa lelikhulu. Ricardo lowayekeliswa kuba ngulomdzala welibandla ngemuva kwekutsi sekakhonte njengalomdzala iminyaka leminyenti watsi: “Yangijabhisa kakhulu indlela lebengehluleke ngayo. Kwaphela sikhatsi lesidze ngitiva ngehlulekile futsi loko kwangivimbela kutsi ngiphindze ngikhonte bazalwane bami njengembonisi. Bengingasatetsembi. Kodvwa njengobe ngikutsandza kusita labanye, ngakhona kuchuba tifundvo teliBhayibheli, kukhutsata bazalwane eHholweni LeMbuso nekusebenta nabo ensimini. Loko kwangisita kutsi ngiphindze ngitetsembe futsi nyalo sengibuyele ngikhonta njengalomdzala welibandla.”

Nangabe umzalwane ahlale atfukutsele, loko kungamvimbela kutsi akhonte njengalomdzala. Kuncono kakhulu kulingisa Davide, inceku yaJehova lebeyibalekela iNkhosi Sawula lebeyinemona.  Davide akazange afune kutiphindziselela kuSawula ngisho nalapho kuvela ematfuba ekwenta njalo. (1 Sam. 24:4-7; 26:8-12) Ngesikhatsi Sawula afa emphini, Davide wamlilela futsi watsi Sawula nendvodzana yakhe Jonathani ‘bebatsandvwa, baligugu.’ (2 Sam. 1:21-23) Davide akazange amtfukutselele Sawula.

Nangabe uva shengatsi awukacondvwa kahle nobe kwentiwe lokungakalungi kuwe, ungayivumeli intfukutselo kutsi ilawule imicabango yakho. Nasi sibonelo: Ngesikhatsi William ayekeliswa kuba ngulomdzala ngemuva kwekukhonta njengalomdzala welibandla iminyaka lengaba ngu-30 eBrithani, wabatfukutselela labadzala belibandla. Yini leyamsita kutsi avuselele buhlobo bakhe naNkulunkulu? Utsi: “Kufundza incwadzi yaJobe kwangikhutsata. Nangabe Jehova amsita Jobe kutsi akhe kuthula nebangani bakhe labatsatfu, abetangisita kakhulu kangakanani-ke mine kutsi ngakhe kuthula nalabadzala belibandla!”​—Jobe 42:7-9.

Nangabe wakhetsa kuyekela kuba ngumelusi wemhlambi waNkulunkulu, kungaba kuhle kucabanga ngekutsi kungani wakhetsa kanjalo. Bewucindzetelwa tinkinga lonato yini? Letinye tintfo besetibaluleke kakhulu yini ekuphileni kwakho? Wajabhiswa ngemaphutsa alabanye yini? Kunome ngukuphi, khumbula kutsi ngesikhatsi ungulomdzala welibandla bewusetfubeni lekusita labanye ngetindlela letinyenti. Tinkhulumo takho betibacinisa, sibonelo sakho besibakhutsata futsi kubavakashela kwakho kwekwelusa bekubasita kutsi babeketelele tilingo. Umsebenti lobewuwenta ngesikhatsi ungulomdzala lowetsembekile, bewuyijabulisa inhlitiyo yaJehova futsi nawe bewukujabulisa.​—Taga 27:11.

Jehova ubasitile bazalwane kutsi bakhone kuphindze bavuselele injabulo yabo kanye nesifiso sekuhola ebandleni. Nangabe watiyekelela kuba ngulomdzala welibandla nobe wayekeliswa, ungakhona kuphindze ‘ufise umsebenti wekuba ngumbonisi.’ (1 Thim. 3:1) Pawula ‘akayekelanga kuthantazela’ emaKhristu aseKholose kutsi abe nelwati lolungulonalona ngentsandvo yaNkulunkulu ‘kuze ahambe ngendlela lefanele embikwaJehova, khona atewumjabulisa ngalokuphelele.’ (Khol. 1:9, 10) Nangabe uphindze walitfola lilungelo lekukhonta njengalomdzala welibandla, yetsembela kuJehova kute ube nemandla, kubeketela nenjabulo. Kulamalanga ekugcina, bantfu baNkulunkulu badzinga kusekelwa belusi labanelutsandvo. Ungakhona yini kucinisa bazalwane bakho, futsi unaso yini sifiso sekwenta njalo?