LELIGAMA lelitsi “Eureka!” lisho kutsi “Ngilitfolile!” Ngelikhulu lesi-19 leminyaka ngesikhatsi bantfu labanyenti bahamba bayewufuna ligolide eCalifornia, U.S.A., lamavi bekashiwo ngumuntfu losebenta emayini nakatfola ligolide. Nobe kunjalo, Charles Taze Russell kanye neBafundzi BeliBhayibheli batfola lokuncono kakhulu kuneligolide—liciniso leliseBhayibhelini, futsi bebatimisele kulihlanganyela nalabanye.

Ngelihlobo langa-1914, tigidzi tebantfu letisemadolobheni lamakhulu tahamba tayewubukela i-“Photo-Drama of Creation,” lokulifilimu lebelitsatsa ema-awa lasiphohlongo lebelentiwe yi-International Bible Students Association (I.B.S.A.). Njengobe belinetitfombe letinhle letinyakatako, naletinemibala lemihle, letichazwa ngendlela letsintsa inhlitiyo futsi kunemculo lomnandzi wetinsimbi, lelifilimu lelisekelwe eBhayibhelini belikhombisa tibukeli kusukela ekudalweni kwetintfo, ekudalweni kwebantfu kuze kube ngusekugcineni kwekuBusa kwaJesu Khristu Kweminyaka leyiNkhulungwane.​—Semb. 20:4. *

Kodvwa kutsiwani ngalabo labebahlala emadolobheni lamancane nasetindzaweni letisemakhaya? Kuze kube bete labalambele liciniso labashiyelwa ngephandle, nga-August 1914, i-I.B.S.A. yakhulula i-“Eureka Drama”​—luhlelo lwe-“Photo-Drama” loluphatfwako futsi lobelute titfombe letinyakatako. Kwakunetincenye letintsatfu lobewungakhetsa kuto, ngayinye itfolakala ngetilwimi letinyenti: I-“Eureka X” beyinemavi nemculo lotsetjuliwe. I-“Eureka Y” beyinako konkhe lokutsetjuliwe kanye netitfombe letinemibala lemihle. I-“Eureka Family Drama,” lebeyihlelelwe kutsi isetjentiswe emakhaya, beyinemavi latsite kanye nemculo. Emagilamafoni lashiphile kanye nemishini yekuveta titfombe kwakutfolakala.

Ngisho nobe bebangaba bete umshini wekuveta titfombe nobe indvwangu yekubukelisa bhayisikobho, Bafundzi BeliBhayibheli bebangakhona kusebentisa lelifilimu lelimahhala etindzaweni tasemakhaya, bafinyelele emasimu lamasha ngemlayeto weMbuso. I-“Eureka X” lelalelwako bebangayilalela nome ngunini. Umshini wekudlala ema-slides e-“Eureka Y” bewungase usetjentiswe ngaphandle kwagesi, kusetjentiswa sibane lesitsite kuze kukhanyiswe lomshini. Umbiko lobewuku-Watch Tower yesiFinnish watsi: “Singakhombisa bantfu letitfombe ngisho nome ngukuphi.” Lawo mavi abeliciniso.

Esikhundleni sekucasha emahholwa lamakhulu ekubukelisa emabhayisikobho, Bafundzi BeliBhayibheli ngalokuvamile bebatfola tindzawo letimahhala  lokufaka ekhatsi emakilasi, tinkantolo, titeshi tetitimela ngisho netindzawo letisemakhaya lamakhulu tekwemukela tivakashi. Lelifilimu belivame kubukeliswa ngephandle, kusetjentiswa lishidi lelikhulu lelimhlophe lebeligacwa enyangweni. Anthony Hambuch wabhala watsi: “Balimi bebenta indzawo levulekile ngasetihlahleni, lebeyinetihlalo letakhiwe ngetingodvo kuze bantfu bahlale futsi bajabulele loluhlelo.” Lelicembu le-“Eureka” belisebentisa inkalishi lokutsiwa yi-“Drama wagon” kute lilayishe tintfo talo, tikhwama kanye netintfo tekukhempa netekupheka.

Labo labebalalela i-“Eureka” bebasukela ecenjini lelincane lebantfu kuya emakhulwini. EMelika, bantfu labangu-400 babutsanela esakhiweni sesikolwa lesisedolobheni lelinebantfu labangu-150. Kuletinye tindzawo, labanye bantfu bebahamba emakhilomitha lasiphohlongo kuze bayobona i-“Eureka Drama.” Bomakhelwane baCharlotte Ahlberg waseSweden, labebabutsanele endlini yakhe lencane kute balalele loko lobekutsetjuliwe “batsintseka enhlitiyweni.” Bantfu labangaba ngu-1 500 babutsana kute babukele lelifilimu edolobheni lelikhashane lase-Australia lelinetimayini. I-Watch Tower yabika kutsi etikolweni letiphakeme nasemakolishi, “bophrofesa kanye nebantfwana besikolwa bebakhangwa nguletitfombe kanye nemarekhodi etfu lamnandzi.” I-“Eureka Drama” yayidvume ngisho nasetindzaweni letinetindlu tekubukelisa emabhayisikobho.

I-“Eureka Drama” yaba lithulusi lelihle “Emsebentini Wekwandzisa Emakilasi,” lapho khona Bafundzi BeliBhayibheli bebatfumela tikhulumi letitawucalisa emakilasi lamasha ekufundza. Ngeke sati kutsi bangakhi labayibukela i-“Eureka Drama.” Tincenye letinyenti tale-“Drama” betibukelwa kanyenti. Nobe kunjalo, nga-1915 ngemacembu langu-14 kuphela kulangu-86 labebukelisa le-“Drama” labebika njalo. Nayibika ngalamanani langakapheleli, ingcikitsi yekuphela kwemnyaka yakhombisa kutsi bantfu labangetulu kwesigidzi sebayibukele le-“Drama.” Bantfu labangaba ngu-30 000 bacela tincwadzi letisekelwe eBhayibhelini.

Kungenteka kutsi i-“Eureka Drama” ayizange ibe yincophamlandvo, kodvwa kusukela e-Australia kuya e-Argentina, kusukela eNingizimu Afrika kuya eBritish Isles, eNdiya naseCaribbean, kungenteka kutsi tigidzi talibona lelifilimu lelingafanani nalamanye. Labanyenti babo batfola liciniso leliBhayibheli leliligugu kwendlula ligolide futsi bebangababata batsi “Eureka!”