SIPHILA esikhatsini lesimatima kakhulu emlandvweni wekuphila kwebantfu. (2 Thim. 3:1-5) Lutsandvo lwetfu ngaJehova nekutimisela kwetfu kuphila ngetimiso takhe letilungile kuyavivinywa lilanga ngalinye. Jesu wabona kusenesikhatsi kutsi kuyawufika tikhatsi letimatima, futsi wacinisekisa balandzeli bakhe kutsi batawutfola sikhutsato labasidzingako kute bakhutsatele kudzimate kube sekugcineni. (Mat. 24:3, 13; 28:20) Kuze abacinise, wabeka sisebenti lesetsembekile kute sibanikete “kudla ngesikhatsi lesifanele.”​—Mat. 24:45, 46.

Kusukela lesisebenti lesetsembekile sabekwa nga-1919, tigidzi ‘taletinye tisebenti’ letivela kuto tonkhe tilwimi tibutselwe enhlanganweni yaNkulunkulu futsi tondliwa nguye. (Mat. 24:14; Semb. 22:17) Nobe kunjalo, lokwatiswa akutfolakali ngato tonkhe tilwimi futsi akusibo bonkhe bantfu labakhona kufundza tincwadzi tetfu letitfolakala etintfweni tebuchwephesha. Sibonelo saloku kutsi bantfu labanyenti bete ema-video netihloko letikhishwa kuphela ekhelini letfu le-Internet lelitsi jw.org. Loko kusho kutsi labanye abakutfoli yini kudla labakudzingako kute bahlale banebudlelwane lobuhle naNkulunkulu? Kute siwuphendvule kahle lombuto, asesicabangele timphendvulo tanayi imibuto lemine lebalulekile.

Ngesikhatsi Sathane alinga Jesu kutsi agucule ematje awente sinkhwa, Jesu waphendvula watsi: “Umuntfu ngeke aphile ngesinkhwa sodvwa, kodvwa ngawo onkhe emavi laphuma emlonyeni waJehova.” (Mat. 4:3, 4) Emavi aJehova abhalwe eBhayibhelini. (2 Phet. 1:20, 21) Ngako-ke, liBhayibheli liyindlela leyinhloko Nkulunkulu lasondla ngayo.​—2 Thim. 3:16, 17.

Inhlangano yaJehova yente kutsi i-“New World Translation of the Holy Scriptures,” iphelele nobe iyincenye, itfolakale ngetilwimi letingetulu kwa-120, futsi kwengeteka tilwimi letinyenti umnyaka ngamunye. Ngetulu kwalelo humusho, kunetigidzigidzi temakhophi alamanye emahumusho eliBhayibheli letitfolakala tiphelele nobe tiyincenye ngetilwimi letinyenti. Lemphumelelo lemangalisako ihambisana nentsandvo yaJehova yekutsi “tonkhe tinhlobo tebantfu tisindziswe, titfole nelwati lolungulonalona lweliciniso.” (1 Thim. 2:3, 4) Ngesizatfu sekutsi “kute nendalo lefihlekile emehlweni [aJehova],” singaciniseka kutsi utawubadvonsela enhlanganweni yakhe labo ‘labanakisisa tintfo letiphatselene naye’ futsi abondle.​—Heb. 4:13; Mat. 5:3, 6; Joh. 6:44; 10:14.

Kuze umuntfu abe nekukholwa lokucinile, kudzingeka ente lokungetulu kwekufundza liBhayibheli. Kufanele akucondze loko lakufundzako aphindze akusebentise. (Jak. 1:22-25) Indvuna yesigodlo saseTopiya yangelikhulu lekucala leminyaka beyilicondza lelo ciniso. Yayifundza liVi laNkulunkulu ngesikhatsi Filiphu umvangeli ayibuta atsi: “Uyakucondza yini loku lokufundzako?” Lendvuna yaphendvula yatsi: “Ngingakucondza njani nangabe kute umuntfu longichazelako?” (Imis. 8:26-31) Filiphu wayisita lendvuna kutsi itfole lwati lolucondzile ngeliVi laNkulunkulu. Yatsintseka ngaloko lebeyikufundza kangangekutsi yaze yabhajatiswa. (Imis. 8:32-38) Ngendlela lefanako, tincwadzi tetfu letisekelwe eBhayibhelini tisisitile sakwati kutfola lwati lolucondzile lweliciniso. Tisitsintse enhlitiyweni futsi tasikhutsata kutsi sikusebentise loko lesikufundzako.​—Khol. 1:9, 10.

Ngaletincwadzi, tinceku taJehova tinikwa inala yekudla. (Isa. 65:13) Sibonelo saloku kutsi Sicongosekulindza lesitfolakala ngetilwimi letingetulu kwa-210, sichaza tiphrofetho teliBhayibheli, sikhulisa kucondza kwetfu emaciniso lajulile futsi sisikhutsata kutsi siphile ngetimiso teliBhayibheli. Magazini we-“Phaphama!,” loshicilelwa ngetilwimi letingaba ngu-100, ukhulisa lwati lwetfu ngemisebenti yaJehova yekudala uphindze usikhombise indlela yekusebentisa seluleko seliBhayibheli. (Taga 3:21-23; Rom. 1:20) Sisebenti lesetsembekile sisiniketa tincwadzi letisekelwe eBhayibhelini ngetilwimi letingetulu kwa-680. Uyatinika yini sikhatsi sekufundza liBhayibheli onkhe malanga? Uyabafundza yini bomagazini labasha nato tonkhe tincwadzi letinsha letiba khona ngelulwimi lwakho umnyaka ngamunye?

Ngetulu kwekushicilela tincwadzi, inhlangano yaJehova ilungiselela tinhlaka tetinkhulumo letisekelwe eBhayibhelini letetfulwa emihlanganweni yetfu yelibandla, yesigodzi neyesifundza. Uyatijabulela yini letinkhulumo, ema-drama, imiboniso kanye netincociswano letiba khona kuleyo mihlangano? Ecinisweni Jehova usiniketa kudla lokunyenti kakhulu!​—Isa. 25:6.

Cha akusinjalo. Kufanele kungasimangalisi kutsi ngaletinye tikhatsi, letinye tinceku taJehova tikhona kutfola kudla lokunyenti kunaloko letinye letikutfolako. Kungani kunjalo? Cabanga ngendzaba yebaphostoli. Bebatfola ticondziso letinyenti kunaleto lebetitfolwa ngulabanye bafundzi bangelikhulu lekucala. (Mak. 4:10; 9:35-37) Nanobe kunjalo, lalabanye bafundzi bebangalambi ngobe bebakutfola kudla lebebakudzinga.​—Ef. 4:20-24; 1 Phet. 1:8.

Kubalulekile nekunaka kutsi lokunyenti kwaloko Jesu lakusho nalakwenta ngesikhatsi asesemhlabeni akukabhalwa emaVangelini. Umphostoli Johane wabhala watsi: “Ecinisweni, tinyenti letinye tintfo letentiwa nguJesu, futsi ngicabanga kutsi kube tabhalwa tonkhe, umhlaba bewungeke ukhone kuyigcina lemiculu lebeyingabhalwa.” (Joh. 21:25) Nanobe balandzeli baJesu bangelikhulu lekucala bebanekwatiswa lokunyenti ngaye kunaloko tsine lesinako, natsi sinelwati lolwenele. Jehova wente kutsi sati lokwenele ngaJesu kute sikhone kulandzela tinyatselo takhe.​—1 Phet. 2:21.

Asewucabange futsi nangetincwadzi baphostoli lebebatibhalela emabandla angelikhulu lekucala. Incwadzi yinye yaPawula ayizange ibhalwe eBhayibhelini. (Khol. 4:16) Kudla kwetfu akukeneli yini ngesizatfu sekutsi asikhoni kuyifundza leyo ncwadzi? Cha. Jehova uyakwati loko lesikudzingako futsi usinikete kudla lokwenele kute sichubeke sicinile.​—Mat. 6:8.

Lamuhla, lamanye emacembu etinceku taJehova atfola kudla lokunyenti kunaloko lokutfolwa ngulabanye. Tincane yini tincwadzi letitfolakalako ngelulwimi lwakho? Nangabe kunjalo, ciniseka kutsi Jehova uyakukhatsalela. Fundza tincwadzi lonato, futsi nangabe ungakhona uye emihlanganweni yelulwimi lolucondzako. Ciniseka nekutsi Jehova utawugcina buhlobo bakho naye bucinile.​—Hla. 1:2; Heb. 10:24, 25.

Ekhelini letfu le-Internet, sishicilela emakhophi abomagazini betfu kanye naletinye tincwadzi tekufundza liBhayibheli. Lelikheli le-Internet liphindze linikete kwatiswa lokusita bantfu labashadene, bantfu labaseminyakeni yekutfomba nalabo labanebantfwana labancane. Imindeni iyazuza ngekuhlola lokwatiswa ekuKhonteni kwayo Kwemndeni. Ngetulu kwaloko, lelikheli letfu le-Internet liphindze libike ngemibutsano lekhetsekile lefaka ekhatsi kuphotfula esikolweni saseGileyadi nemhlangano wemnyaka, liphindze linikete bazalwane labasemhlabeni wonkhe umbiko lomayelana netehlakalo temvelo naloko lokwentekako emacaleni letfweswe bantfu baJehova. (1 Phet. 5:8, 9) Lelikheli liphindze libe lithulusi lelinemandla lekushumayela, lente kutsi tindzaba letimnandzi titfolakale ngisho nasetindzaweni lapho umsebenti wetfu uvinjelwe khona.

Nanobe kunjalo, buhlobo bakho naNkulunkulu bungachubeka bucinile ngisho nobe ukhona kuvakashela lelikheli nobe ungakhoni. Lesisebenti lesihlakaniphile sisebenta kamatima kute silungiselele kwatiswa lokwenele lokushicilelwe lokutawugcina letinye tisebenti tondleke kahle. Ngako-ke, akukafaneli utive ucindzetelekile kutsi utsenge intfo letsite yetebuchwephesha kute ungene ku-jw.org. Labanye bangase bahlele kuphrinta lokunye kwatiswa lokutfolakala kulelikheli bese bakunika labo labangakhoni kungena ku-Internet, kodvwa asikho sidzingo sekutsi emabandla akwente loku.

Siyajabula ngekutsi Jesu usigcinile setsembiso sakhe sekunakekela tidzingo tetfu tekufundza ngaNkulunkulu. Njengobe lamalanga ekugcina lamatima asondzela ngekushesha ekupheleni, singaciniseka kutsi Jehova utawuchubeka asiniketa “kudla ngesikhatsi lesifanele.”