1. Pawula wativa njani ngalabo labakhonta Jehova ngekutimisela?

UMPHOSTOLI PAWULA wabakhumbula labo labebatikhandla ngenca yetindzaba letimnandzi. Wabhala watsi: “Asiwukhohlwa umsebenti wenu wekwetsembeka, kutikhandla kwenu ngelutsandvo, kanye nekucinisela kwenu ngenca yelitsemba leninalo eNkhosini yetfu Jesu Khristu embikwaNkulunkulu wetfu longuBabe.” (1 Thes. 1:3) Ecinisweni, naJehova uyakukhumbula kutikhandla ngelutsandvo kwabo bonkhe labamkhonta ngekwetsembeka, ngisho nobe kungakanani timo tabo ekuphileni letibavumela kutsi bakwente.—Heb. 6:10.

2. Yini lesitawucoca ngayo kulesihloko?

² EmaKhristu lamanyenti asendvulo newalamuhla, atidzele kakhulu kute akhonte Jehova sikhatsi sonkhe. Asesihlole indlela lamanye lebekamkhonta ngayo Nkulunkulu ekhulwini lekucala. Sitawuphindze sihlole naletinye tinhlobo temsebenti wasikhatsi sonkhe lowentiwa lamuhla futsi sibone kutsi singabakhumbula njani bazalwane betfu labatsandzekako labatinikele kute bakhonte ngaletindlela letibalulekile.

3, 4. (a) Labanye bebamkhonta njani Nkulunkulu ngelikhulu lekucala? (b) Tidzingo tabo tenyama betinakekelwa njani?

³ Ngekushesha ngemuva kwekubhajatiswa, Jesu wacalisa umsebenti lobewutawentiwa emhlabeni wonkhe. (Luk. 3:21-23; 4:14, 15,  43) Ngemuva kwekufa kwakhe, baphostoli bakhe bahola ekwandziseni lomsebenti wekushumayela. (Imis. 5:42; 6:7) Lamanye emaKhristu, njengaFiliphu, akhonta njengebavangeli nanjengetitfunywa telivangeli ePhalestina. (Imis. 8:5, 40; 21:8) Pawula kanye nalabanye bahamba baya etindzaweni letikhashane. (Imis. 13:2-4; 14:26; 2 Khor. 1:19) Labanye njengaSilvanosi (Silasi), Makho naLukha, baphindze baba babhali. (1 Phet. 5:12) Bodzadze labangemaKhristu bebasebenta kanye nalabazalwane labetsembekile. (Imis. 18:26; Rom. 16:1, 2) Lokuhlangenwe nako kwabo lokumnandzi, kwenta kutsi kujabulise kakhulu kufundza imiBhalo YemaKhristu YesiGriki, kuphindze kuvete kutsi Jehova uyatikhumbula tinceku takhe.

⁴ Tisebenti tasikhatsi sonkhe tangelikhulu lekucala betisekelwa njani ngetimali? Ngaletinye tikhatsi, betemukelwa ngulamanye emaKhristu tiphindze titfole lolunye lusito kuwo, kodvwa betingalufuni ngenkhani lusito lolunjalo. (1 Khor. 9:11-15) Labanye bantfu kanye nemabandla bebabasita ngekutitsandzela. (Fundza Imisebenti 16:14, 15; Filiphi 4:15-18.) Pawula nalabo labehamba nabo bebaphindze basebente sikhatsi lesitsite kute bakhone kunakekela tindleko tabo.

5. Labanye labashadene batsi bativa njani ngekuba semsebentini wasikhatsi sonkhe?

⁵ Nalamuhla, labanyenti bayatikhandla etincenyeni letehlukahlukene temsebenti wasikhatsi sonkhe. (Fundza libhokisi lelitsi “ Tincenye Temsebenti Wasikhatsi Sonkhe.”) Bativa njani ngendlela yekuphila labayikhetsile? Lona ngumbuto longababuta wona, futsi utawuzuza lokunyenti nawungenta njalo. Cabanga nganasi sibonelo: Lomunye umzalwane lokhonte njengelihlahlandlela lelivamile, lihlahlandlela lelikhetsekile, sitfunywa selivangeli, nanjengelilunga lemndeni waseBethel kulelinye live watsi: “Kungenela umsebenti wasikhatsi sonkhe kusincumo lesincono kakhulu lengake ngasenta. Ngesikhatsi ngineminyaka lengu-18 budzala, bekumatima kukhetsa emkhatsini wekuyofundza enyuvesi, kwenta umsebenti wekutiphilisa wesikhatsi sonkhe nobe kuba lihlahlandlela. Lokuhlangenwe nako kwami kungente ngabona kutsi Jehova akakukhohlwa kutidzela lokwentako kuze umkhonte sikhatsi sonkhe. Ngikhonile kusebentisa emakhono lengiwanikwe nguJehova ngetindlela lebengingeke ngikhone kuwasebentisa ngato kube ngakhetsa kwenta umsebenti kulelive.” Umfati wakhe utsi: “Tonkhe tabelo lengitentile tingisitile kutsi ngitfutfuke. Sisibonile sivikelo saJehova nesicondziso sakhe emahlandla lamanyenti nangetindlela lebesingeke sisibone ngaso kube sachubeka siphila imphilo lentofontofo. Ngimbonga malanga onkhe Jehova ngemphilo lesiyijabulelako emsebentini wasikhatsi sonkhe.” Nawe ungatsandza yini kutiva ngalendlela ngekuphila kwakho?

6. Yini lokufanele sonkhe siciniseke ngayo ngendlela Jehova lativa ngayo?

⁶ Kuliciniso kutsi kwanyalo, labanye timo tabo atibavumeli kutsi bangenele umsebenti wasikhatsi sonkhe. Singaciniseka kutsi Jehova uyitsatsa njengalebalulekile imetamo yabo labayenta ngemphefumulo wonkhe. Cabanga ngalabo Pawula labasho ngemabito kuFilemoni 1-3, kanye nabo bonkhe lebebayincenye yelibandla laseKholose. (Fundza.) Pawula abebatsatsa njengalababalulekile futsi naJehova abebatsatsa ngaleyo ndlela. Ngendlela lefanako, Babe wetfu wasezulwini uyawujabulela umsebenti lowentako. Kodvwa ungabasekela njani labo labasemsebentini wasikhatsi sonkhe?

7, 8. Kuba lihlahlandlela kufaka ekhatsi ini, futsi labanye ebandleni bangawasita njani?

⁷ Njengebavangeli bangelikhulu lekucala, emahlahlandlela lakhutsele asikhutsato lesikhulu emabandleni. Lamanyenti alwela kucitsa ema-awa langu-70 inyanga ngayinye emsebentini wekushumayela. Ungawasita njani?

 ⁸ Lomunye dzadze lolihlahlandlela libito lakhe lokunguShari watsi: “Emahlahlandlela abonakala anemandla njengobe acitsa lilanga lonkhe asensimini. Nanobe kunjalo ayasidzinga sikhutsato.” (Rom. 1:11, 12) Lomunye dzadze lowakhona kuba lihlahlandlela iminyaka letsite wakhuluma ngemahlahlandlela lasebandleni lakubo watsi: “Asebenta kamatima futsi awapheli emandla. Nangabe labanye bawamema kutsi ahambe nabo ngemoto ensimini, bawamemela kudla, bawanika imali letsite yaphethiloli nobe bawasekele ngaletinye tindlela, ajabula kakhulu. Kuwenta abone kutsi akhatsalelwa mbamba.”

9, 10. Yini labanye labayentile kute basite emahlahlandlela emabandleni abo?

⁹ Ungatsandza yini kuwasita emahlahlandlela ensimini? Lihlahlandlela lokutsiwa nguBobbi latsi: “Sidzinga lusito lolukhulu emkhatsini weliviki.” Lelinye lihlahlandlela lelisebandleni lelifanako lengeta latsi: “Kumatima kakhulu kutfola bantfu lotawuhamba nabo entsambama.” Lomunye dzadze lokhonta eBethel yaseBrooklyn ulandzisa ngenjabulo mayelana nekuba kwakhe lihlahlandlela, utsi: “Lomunye dzadze lobekanemoto watsi: ‘Nakwenteka weswele umuntfu lotawuhamba naye, ungangitsintsa kute ngihambe nawe ensimini.’ Wangisita kutsi ngikhone kuchubeka ngilihlahlandlela.” Shari washo nali liphuzu lelihle watsi: “Nawabuya ensimini, emahlahlandlela langakashadi avame kuba odvwa. Ngaletinye tikhatsi, ungase umeme bazalwane nabodzadze labangakashadi ekukhonteni kwenu kwemndeni. Kubamema nanenta letinye tintfo nako kungabasita kutsi bahlale bacinile.”

¹⁰ Nakakhumbula sikhatsi lebekalihlahlandlela ngaso nalabanye bodzadze lebebangakashadi, lomunye dzadze losabe semsebentini wasikhatsi sonkhe iminyaka lecishe ibe ngu-50 utsi: “Labadzala bebavakashela emahlahlandlela njalo ngemuva kwetinyanga letimbalwa. Bebasibuta ngemphilo yetfu, nemsebenti wekutiphilisa nangekutsi kukhona yini lokusikhatsatako. Loko bebakusho ngalokusuka enhlitiyweni. Bebasivakashela lapho sihlala khona kuze babone kutsi lukhona yini lusito lesiludzingako.” Loku kungase kukukhumbute indlela Pawula lalujabulela ngayo lusito labelutfola kulenye indvodza yase-Efesu.—2 Thim. 1:18.

11. Kufaka ekhatsi ini kukhonta njengelihlahlandlela lelikhetsekile?

¹¹ Lamanye emabandla abusisekile ngekuba nemahlahlandlela lakhetsekile. Labanyenti balabazalwane nalabodzadze balwela  kucitsa ema-awa langu-130 inyanga ngayinye emsebentini wekushumayela. Ngenca yesikhatsi labasicitsa basensimini futsi basita nangaletinye tindlela, baba nesikhatsi lesincane sekwenta umsebenti wekutiphilisa nobe babe bete sanhlobo. Lihhovisi leligatja libanika imadlana letsite ngenyanga kuze bakhone kucitsa sikhatsi lesinyenti bashumayela.

12. Labadzala kanye nalabanye bangawasita njani emahlahlandlela lakhetsekile?

¹² Singawasita njani emahlahlandlela lakhetsekile? Lomunye lomdzala welibandla lokhonta ehhovisini leligatja futsi lotsintsana nalamanyenti awo, utsi: “Labadzala kufanele bakhulume nawo, beve ngetimo tawo futsi babone kutsi bangawasita njani. Labanye BoFakazi bacabanga kutsi emahlahlandlela lakhetsekile anakekelwa ngako konkhe ngenca yekutsi kunemali layiniketwako, kodvwa bazalwane labasebandleni lawo bangawasita ngetindlela letinyenti.” Njengemahlahlandlela lavamile, emahlahlandlela lakhetsekile ayakujabulela kuba nebantfu latawuhamba nabo ensimini. Ungakhona yini kusita ngalendlela?

13, 14. (a) Yini lokufanele siyikhumbule ngebabonisi besigodzi? (b) Yini locabanga kutsi ungayenta kuze usite labo labasemsebentini wekujikeleta?

¹³ Babonisi besigodzi nebafati babo bavamise kutsatfwa njengebantfu labanekukholwa lokucinile. Nanobe loko kuliciniso, kodvwa nabo bayasidzinga sikhutsato, kusekelwa ensimini, kanye nekumenyelwa ekutijabuliseni. Kutsiwani nangabe bagula nome balaliswe esibhedlela, mhlawumbe kudzingeka bahlindvwe nome belashwe? Bajabula kakhulu nangabe bazalwane nabodzadze bakuleyo ndzawo babasita ngetintfo labatidzingako futsi babakhombise kutsi bayabakhatsalela. Singacabanga ngendlela Lukha “longudokotela lotsandzekako,” nembhali wencwadzi yeMisebenti, lakhatsalela ngayo Pawula kanye nalabanye lebebajikeleta naye.—Khol. 4:14; Imis. 20:5–21:18.

¹⁴ Babonisi labajikeletako nebafati babo bayakudzinga kuba nebangani labasedvute futsi babatsandza kakhulu. Lomunye umbonisi wesigodzi wabhala watsi: “Bangani bami bayabona nangidzinga sikhutsato. Bangibuta imibuto lehluta ingcondvo futsi loko kungisita kutsi ngikhulume ngalokungikhatsatako. Kungilalelisisa kwabo kungisita kakhulu.” Babonisi besigodzi kanye nebafati babo bakujabulela kakhulu kukhatsalelwa bazalwane nabodzadze babo.

15, 16. Ngumiphi imisebenti leyentiwa ngulabo labaseBethel nalabo labanakekela emaHholwa eMhlangano, futsi singabasekela njani?

¹⁵ Emhlabeni wonkhe, labo labakhonta eBethel nalabanakekela emaHholwa eMhlangano basekela umsebenti weMbuso emaveni labukwe lihhovisi leligatja lakuleyo ndzawo. Nangabe libandla lakho nobe sigodzi lokuso sinemalunga aseBethel, ungakhombisa njani kutsi uyawakhatsalela?

¹⁶ Nabasafika eBethel, bangase bakhumbule ekhaya ngobe bashiye imindeni yabo kanye nebangani babo lababatsandzako. Bajabula kakhulu nangabe labanye eBethel nasebandleni labakulo babenta bangani babo! (Mak. 10:29, 30) Luhlelo lwabo lwekusebenta lwenta kutsi bakhone kuya emihlanganweni yelibandla futsi babe nencenye emsebentini wekushumayela maviki onkhe. Nanobe kunjalo, ngalesinye sikhatsi emalunga aseBethel aba naleminye imisebenti. Nangabe emabandla akucondza loku futsi akhombisa kutsi ayawajabulela emalunga aseBethel kanye nemsebenti lawentako, wonkhe umuntfu uyazuza.—Fundza 1 Thesalonika 2:9.

17, 18. Ngutiphi tincenye temsebenti weMbuso letifaka ekhatsi kwabelwa kulelinye live?

¹⁷ Labo labaya kuyokhonta kulelinye live bangase batfole kutsi kudla kwakhona, lulwimi, emasiko kanye netimo takhona tehluke kakhulu kunaloko labakwetayele.  Yini lebenta bakhetse kuphila ngaphansi kwaletimo?

¹⁸ Labanye babo batitfunywa telivangeli, ngalokuyinhloko letisebenta emasimi lapho bantfu labanyenti bangazuza khona ekuceceshweni lokukhetsekile letikutfolile. Lihhovisi leligatja libanakekela ngendzawo yekuhlala lekahle kanye nemadlana kuze bahlangabetane netidzingo tabo. Labanye labakhonta kulamanye emave babelwa kutsi basebente ehhovisini leligatja nobe basite ekwakheni takhiwo teligatja, emahhovisi ekuhumusha, emaHholwa eMhlangano nobe emaHholwa eMbuso. Banakekelwa ngekudla, indzawo yekuhlala nangaletinye tintfo. Njengemalunga emndeni waseBethel, baya njalo emihlanganweni futsi babe nencenye emsebentini wekushumayela, ngako basibusiso ngetindlela letinyenti.

19. Yini lokufanele sihlale siyikhumbula ngalabo labakhonta kulamanye emave?

¹⁹ Yini longayenta kute usite letisebenti tasikhatsi sonkhe? Khumbula kutsi ekucaleni tingahle tingakwetayeli kudla kwakuleyo ndzawo. Kufanele ukukhumbule loko nangabe ubameme kutsi batewudla kakho; ungacala ngekubabuta kutsi yini labangatsandza kuyidla nobe loko labangatsandza kukuva kutsi kunjani. Bani nesineke njengobe bafundza lulwimi lwakuleyo ndzawo kanye nemasiko akhona. Kungase kutsatse sikhatsi lesidze kutsi bakucondze loko lokushoko, kodvwa ngesineke ungabafundzisa kuphumisela kahle emagama. Bayafuna kufundza!

20. Nguyiphi indlela lekahle lesingabasita ngayo labo labasemsebentini wasikhatsi sonkhe kanye nebatali babo?

²⁰ Tisebenti tasikhatsi sonkhe tiyakhula ngeminyaka, futsi nebatali bato bayakhula. Nangabe labatali baBoFakazi, kungenteka kutsi sifiso sabo lesikhulu kutsi bantfwana babo bachubeke basetabelweni tabo. (3 Joh. 4) Kuliciniso kutsi nangabe batali bato badzinga kunakekelwa, tisebenti tasikhatsi sonkhe tingenta konkhe letingakhona kukwenta kuze tibasite. Nanobe kunjalo, labo labasedvute nasekhaya bangasita tisebenti tasikhatsi sonkhe ngekuhlale bakulungele kusita batali bato lasebakhulile nangabe badzinga lusito. Kufanele ukhumbule kutsi tisebenti tasikhatsi sonkhe tinendzima lebalulekile ekwenteni lomsebenti lomcoka kakhulu lowentiwa emhlabeni wonkhe. (Mat. 28:19, 20) Wena nobe libandla lokulo ningakhona yini kusita batali betisebenti tasikhatsi sonkhe nangabe badzinga lusito?

21. Labo labasemsebentini wasikhatsi sonkhe bativa njani ngelusito nesikhutsato labasitfola kulabanye?

²¹ Labo labangenela umsebenti wasikhatsi sonkhe abakwenti loko kuze batfole imali, kodvwa bakwenta kuze baphe Jehova kanye nalabanye. Balujabulela kakhulu lusito labanikwa lona. Lomunye dzadze lokhonta kulelinye live ukhuluma ngendlela labanyenti labativa ngayo utsi: “Ngisho nemlayeto lomncane wekubonga ukhombisa kutsi labanye bayacabanga ngawe nekutsi bayakujabulela loko lokwentako.”

22. Utiva njani ngemsebenti wasikhatsi sonkhe?

²² Ecinisweni kukhonta Jehova sikhatsi sonkhe kuyindlela yekuphila leletsa tibusiso letinyenti. Ngumsebenti lodzinga kutikhandla, lozuzisako naloletsa kwenetiseka. Uphindze usiceceshele umsebenti wesikhatsi lesitako loletsa injabulo lengapheli lomele tonkhe tinceku taJehova letetsembekile ngephansi kweMbuso waNkulunkulu. Shengatsi sonkhe singachubeka singawukhohlwa ‘umsebenti wekwetsembeka nekutikhandla ngelutsandvo’ lowentiwa tisebenti tasikhatsi sonkhe.—1 Thes. 1:3.