GUY HOLLIS PIERCE, lobekalilunga leSigungu Lesibusako SaBoFakazi BaJehova, wacedza kuphila kwakhe kwasemhlabeni ngaLesibili March 18, 2014. Abeneminyaka lengu-79 budzala ngesikhatsi aba ngulomunye webanakabo Khristu labavusiwe.—Heb. 2:10-12; 1 Phet. 3:18.

Guy Pierce watalwa e-Auburn, leseCalifornia eMelika ngaNovember 6, 1934, futsi wabhajatiswa nga-1955. Nga-1977 washada naPenny, umfati wakhe lotsandzekako futsi baba nebantfwana. Lokuhlangenwe nako kwakhe kwekuba nemndeni kwenta kutsi labanye bakhone kumtsatsa njengababe. Nga-1982 yena naPenny baba ngemahlahlandlela, futsi nga-1986 waba ngumbonisi wesigodzi eMelika iminyaka lengu-11.

Nga-1997, Guy naPenny Pierce baba ngemalunga emndeni waseBethel eMelika. UMzalwane Pierce wasebenta eHhovisini Lemsebenti, futsi nga-1998 wabekwa kutsi abe ngumsiti weKomidi Yetisebenti YeSigungu Lesibusako. Kubekwa kweMzalwane Pierce kutsi abe lilunga leSigungu Lesibusako kwamenyetelwa emhlanganweni wemnyaka we-Watch Tower Bible and Tract Society of Pennsylvania nga-October 2, 1999. Eminyakeni lembalwa leyendlulile, usebente neKomidi Yetisebenti, Yekubhala, Yekushicilela neYebachumanisi.

Bantfu labakhule ngetindlela letingafani nalabavela emaveni lehlukehlukene, bebadvonseleka kuMzalwane Pierce ngobe abehlale amomotseka futsi ajabulile. Kodvwa tintfo lebetimenta atsandzeke kakhulu kulabanye bekulutsandvo labenalo, kutfobeka, kuhlonipha kwakhe timiso nemitsetfo lelungile kanye nekukholwa kwakhe lokucinile kuJehova. Guy Pierce abekholelwa kutsi lilanga lingamane lingaphumi kunekutsi tetsembiso taJehova tingafezeki, futsi abefuna kucocela bonkhe bantfu emhlabeni ngalelo ciniso.

UMzalwane Pierce abekukhutsalele kusebentela Jehova, avuka lokwa ekuseni futsi avame kusebenta kuze kube sebusuku. Wahamba wonkhe umhlaba kute akhutsate bazalwane nabodzadze, futsi bekungenteki abebete sikhatsi sekuba nelilunga ngalinye lemndeni waseBethel nalabanye lebebatsandza kuba naye, lebebafuna teluleko takhe nelusito lwakhe. Ngisho nangemuva kweminyaka leminyenti, bazalwane basawukhumbula umusa wakhe, bungani kanye netikhutsato takhe letisekelwe emiBhalweni.

UMzalwane Pierce longumngani wetfu lesimtsandzako ushiye umfati wakhe nebantfwana labasitfupha, batukulu kanye nebantfwana bebatukulu bakhe. Kunebantfu labanyenti labasite kutsi bemukele liciniso. Inkhulumo yemngcwabo yeMzalwane Pierce lebeyiseBethel eBrooklyn ngeMgcibelo, March 22, 2014, yetfulwa nguMark Sanderson lolilunga leSigungu Lesibusako. Lokunye lakhuluma ngako bekulitsemba leMzalwane Pierce lekuphila ezulwini futsi wafundza emavi aJesu latsi: “Ekhaya laBabe kunetindzawo tekuhlala letinyenti. . . . Nasengihambile ngiyonilungisela indzawo, ngitawuphindze ngite futsi nginemukele, kuze lapho ngikhona khona nani nibe khona. Nine niyayati indlela leya lapho ngiya khona.”—Joh. 14:2-4.

Sitamkhumbula kakhulu uMzalwane Pierce. Kodvwa siyajabula ngekutsi ‘abeyati indlela’ letamyisa ‘endzaweni yakhe yekuhlala’ yaphakadze.