1, 2. Jesu wabacinisa njani bafundzi bakhe ngelilanga lavuswa ngalo?

BEKUSOLO kulilanga lekuvuswa kwaJesu. Bafundzi bakhe lababili bebaya kulelinye lidolobhana lelingemakhilomitha langu-11.2 kusuka eJerusalema. Njengobe bebangati kutsi Jesu uvusiwe, bebeva buhlungu kakhulu ngenca yetintfo lebetisandza kwenteka. Kwatsi kusenjalo, Jesu weta kubo wahambisana nabo. Wakhona kubadvudvuta labafundzi. Wabadvudvuta njani? “Wabachazela tintfo letatimayelana naye letisemiBhalweni, wacala kuMosi wayawufika kubo bonkhe baPhrofethi.” (Luk. 24:13-15, 27) Ngemuva kwaloko, tinhlitiyo tabo tatsintseka ngobe Jesu ‘wabachazela’ imiBhalo.—Luk. 24:32.

² Ngalelo langa ntsambama, labafundzi lababili babuyela eJerusalema. Batsi nabahlangana nebaphostoli, babachazela konkhe lobekwentekile. Ngesikhatsi basakhuluma, Jesu wabonakala kubo bonkhe. Nobe kunjalo, labaphostoli betfuka kakhulu. Bacala nekungabata. Jesu wabacinisa njani? LiBhayibheli litsi: “Wase uvula tingcondvo tabo kute bacondzisise imiBhalo.”—Luk. 24:45.

3. Ngutiphi tinsayeya lesingahlangabetana nato, futsi yini lengasisita kutsi sibe nembono lofanele ngemsebenti wekushumayela?

³ Njengalabafundzi, ngaletinye tikhatsi natsi singase sidvumateke kakhulu. Kungenteka kutsi simatasatasa emsebentini weNkhosi, kodvwa siphelelwa ngemandla ngenca yekutsi kute imiphumela lesiyibonako. (1 Khor. 15:58) Mhlawumbe kubonakala  shengatsi labo lesibafundzelako abatfutfuki kangako. Labanye lesibasitako bangase bamshiye Jehova. Yini lesingayenta kute sibe nembono lofanele ngemsebenti wekushumayela? Lokunye lokungasisita kutsi siyicondzisise kahle imifanekiso yaJesu lesemiBhalweni Lengcwele. Asesihlole imifanekiso yakhe lemitsatfu sibone kutsi ngutiphi tifundvo lesingatitfola.

4. Usho kutsini umfanekiso waJesu wemhlanyeli lolalako?

⁴ Fundza Makho 4:26-29. Usho kutsini umfanekiso waJesu wemhlanyeli lolalako? Lendvodza lokukhulunywa ngayo kulomfanekiso imelela bamemeteli beMbuso. Lenhlanyelo ngumlayeto weMbuso loshunyayelwa kubantfu labanetinhlitiyo leticotfo. Njengobe kunjalo ekuphileni kwamalanga onkhe, lomhlanyeli “uyalala ebusuku aphindze avuke ekuseni.” Kukhula kutsatsa sikhatsi lesidze, kusukela ekuhlanyelweni kuze kube ngulapho sekuvunwa. Kuleso sikhatsi “lenhlanyelo iyamila futsi ikhule.” Lokukhula kutentakalela ‘kona,’ kancane kancane futsi kwenteka ngetigaba. Ngendlela lefanako, intfutfuko ebuhlotjeni naNkulunkulu yenteka kancane kancane nangetigaba. Nangabe umuntfu atfutfuka kuze kube ngulapho ancuma kukhonta Nkulunkulu, utsela titselo ngemcondvo wekutsi unikela kuphila kwakhe kuJehova futsi abhajatiswe.

5. Yini leyenta Jesu washo lomfanekiso wemhlanyeli lolalako?

⁵ Yini leyenta Jesu washo lomfanekiso? Abefuna kusisita sicondze kutsi nguJehova lowenta liciniso likhule etinhlitiyweni talabo ‘labatimisele kutfola kuphila.’ (Imis. 13:48; 1 Khor. 3:7) Tsine siyahlanyela futsi sinisele, kodvwa ngeke sikhone kulawula indlela lenhlanyelo lekhula ngayo. Ngeke sikhone kuyenta ikhule masinyane. Njengalendvodza lokukhulunywa ngayo kulomfanekiso, asati kutsi lokukhula kwenteka njani. Sivame kungakunaki njengobe sichubeka nemisebenti yetfu yamalanga onkhe. Kodvwa ngekuhamba kwesikhatsi, inhlanyelo yeMbuso ingase itsele titselo. Lomfundzi lomusha angahlanganyela natsi emsebentini wekuvuna futsi sisitakale kuloko lakwentako.—Joh. 4:36-38.

6. Yini lokufanele siyati mayelana nekutfutfuka ebuhlotjeni naNkulunkulu?

⁶ Singafundzani kulomfanekiso? Kwekucala, kufanele sivume kutsi ngeke sikhone kuyilawula indlela umuntfu lesimfundzela liBhayibheli latfutfuka ngayo. Kutfobeka kutasisita kutsi sikubalekele kumcindzetela nobe kumphocelela kutsi abhajatiswe. Sitawenta konkhe lokusemandleni kute simsite futsi simsekele, kodvwa ngekutfobeka sitawuvuma kutsi ekugcineni nguye lokufanele atentele sincumo sekutinikela. Kutinikela kufanele kuvele enhlitiyweni lechutjwa lutsandvo ngaNkulunkulu. Nangabe kungasinjalo, kutinikela kwetfu ngeke kwemukeleke kuJehova.—Hla. 51:12; 54:6; 110:3.

7, 8. (a) Ngutiphi letinye tifundvo lesitifundza emfanekisweni waJesu wemhlanyeli lolalako? Niketa sibonelo. (b) Loku kusifundzisani ngaJehova nangaJesu?

⁷ Kwesibili, kusicondza sifundvo lesisitfola kulomfanekiso kutasisita kutsi singadvumateki nangabe ekucaleni singayiboni imiphumela yekushumayela kwetfu. Kufanele sibeketele. (Jak. 5:7, 8) Ngisho nobe lenhlanyelo ingatseli titselo, nangabe sente konkhe lokusemandleni kute sisite lomfundzi, sitawukhumbula kutsi loku akusho kutsi asikawenti kahle umsebenti wetfu. Jehova uvumela inhlanyelo yeliciniso kutsi ikhule enhlitiyweni letfobekile lekulungele kwenta lushintjo. (Mat. 13:23) Ngako imphumelelo yetfu emsebentini wekushumayela akukafaneli  siyikale ngemiphumela lesiyitfolako. KuJehova, imphumelelo yetfu emsebentini wekushumayela ayiyi ngekutsi basilalele yini labo lebesibafundzisa. Esikhundleni saloko, uyayijabulela imetamo yetfu lemihle ngisho nobe singatfola imiphumela lenjani.—Fundza Lukha 10:17-20; 1 Khorinte 3:8.

⁸ Kwesitsatfu, asiluboni ngaso sonkhe sikhatsi lushintjo lolwenteka kumuntfu. Nasi sibonelo: Lenye indvodza nemfati wayo lebebafundzelwa sitfunywa selivangeli baya kuso basichazela kutsi sebafuna kuba bamemeteli labangakabhajatiswa. Lesitfunywa selivangeli sabakhumbuta kutsi kuze babe bamemeteli bekutawudzingeka bayekele kubhema. Samangala nabasho kutsi sekuphele tinyanga letimbalwa bayekele kubhema. Kungani bakuyekela? Bese bati kutsi Jehova uyababona nababhema nekutsi uyakutondza kutentisa. Ngako loku kwabakhutsata kutsi batsatse sincumo sekutsi babheme embikwalesitfunywa selivangeli nobe bakuyekele nje sanhlobo. Lutsandvo lebebanalo ngaJehova lwabasita kutsi bente sincumo lesikahle. Buhlobo babo naNkulunkulu besebutfutfukile, nanobe lesitfunywa selivangeli besingalwati lushintjo lebelwentekile.

9. Usho kutsini umfanekiso welinethi?

⁹ Fundza Matewu 13:47-50. Usho kutsini umfanekiso waJesu welinethi? Jesu wafanisa umsebenti wekushumayela umlayeto weMbuso kubo bonkhe bantfu nekujikwa kwelinethi lelikhulu elwandle. Njengobe lelinethi libutsa “tinhlanti [letinyenti] tato tonkhe tinhlobo” ngekungakhetsi, nemsebenti wetfu wekushumayela udvonsa tigidzi tebantfu bato tonkhe tinhlobo. (Isa. 60:5) Linani lelikhulu lebantfu lababakhona emihlanganweni yetfu lemikhulu naseSikhumbutweni umnyaka ngamunye libufakazi baloku. Letinye taletinhlanti letingumfanekiso kutsiwa ‘tinhle’ futsi tibutselwa ebandleni lebuKhristu. Nobe kunjalo, letinye kutsiwa ‘timbi’ ngobe akusibo bonkhe lababutselwe ebandleni labemukelekako kuJehova.

10. Yini leyenta Jesu washo lomfanekiso welinethi?

¹⁰ Yini leyenta Jesu washo lomfanekiso? Kwehlukaniswa kwaletinhlanti lokungumfanekiso akumeleli kwehlulelwa kwekugcina lokutawenteka ekuhluphekeni lokukhulu. Kodvwa kugcizelela loko lokwenteka emalangeni ekugcina alelive lelibi. Jesu wachaza kutsi akusibo bonkhe labadvonswe liciniso labatawukhona kumelela Jehova. Bantfu labanyenti babakhona emihlanganweni yetfu yelibandla. Labanye bavumile kutsi sibafundzele liBhayibheli kodvwa abakatimiseli kutsatsa sincumo. (1 Khos. 18:21) Labanye sebayekelile kutihlanganisa nelibandla lebuKhristu. Labanye labasha bakhuliswe batali labangemaKhristu kodvwa basengakabi nalo lutsandvo ngetimiso taJehova. Kunome ngukuphi, Jesu wagcizelela kutsi wonkhe umuntfu kufanele atitsatsele sincumo. Labo labenta njalo utawubatsatsa njengebantfu ‘labalangatelelwako’ nobe labaligugu ‘betive tonkhe.’—Hag. 2:7.

11, 12. (a) Singazuza njani kulomfanekiso welinethi? (b) Loku kusifundzisani ngaJehova nangaJesu?

¹¹ Singazuza njani kulomfanekiso welinethi? Kucondza sifundvo lesisitfola kulomfanekiso kutasisita kutsi singakhatsateki kakhulu nome sidvumateke nangabe umuntfu lesimfundzela liBhayibheli nobe umntfwana wetfu angalenti liciniso libe lakhe. Loku kungenteka ngisho nobe sente konkhe lebesingakwenta. Kuvuma kufundzelwa liBhayibheli nobe kukhuliswa ngemaKhristu akusho kutsi umuntfu utawuvele atakhele buhlobo lobucinile naJehova. Ekugcineni, labo labangafuni  kutitfoba ekubuseni kwaJehova batawehlukaniswa kubantfu bakhe.

¹² Loku kusho kutsi labo labashiye liciniso ngeke yini basavunyelwa kutsi babuye ebandleni? Nangabe umuntfu ehluleka kunikela kuphila kwakhe kuJehova, utawutsatfwa njengemuntfu ‘lomubi’ yini kuze kube phakadze? Cha. Lisekhona litfuba lekutsi bantfu labanjalo babuye kungakefiki kuhlupheka lokukhulu. Kuba shengatsi Jehova utsi kubo: “Buyelani kimi, nami ngiyawubuyela kini.” (Mal. 3:7) Loku kugcizelelwa ngulomunye umfanekiso lowashiwo nguJesu, lokungumfanekiso wendvodzana yelulahleko.—Fundza Lukha 15:11-32.

13. Usho kutsini umfanekiso wendvodzana yelulahleko?

¹³ Usho kutsini umfanekiso waJesu wendvodzana yelulahleko? Lobabe lonemusa kulomfanekiso umelela Jehova, longuBabe wetfu wasezulwini lonelutsandvo. Lendvodzana lecela lifa layo bese iyalidlabhatisa imelela labo labashiya libandla. Nabahamba, kuba shengatsi baya “eveni lelikhashane,” lokulive laSathane lelehlukanisiwe naJehova. (Ef. 4:18; Khol. 1:21) Nanobe kunjalo, ngemuva kwesikhatsi lesitsite labanye bayaphendvuka futsi bente imetamo yekubuyela enhlanganweni yaJehova. Babe wetfu lotsetselelako uphindze abemukele laba labatfobekile futsi labaphendvukile.—Isa. 44:22; 1 Phet. 2:25.

14. Yini leyenta Jesu washo lomfanekiso wendvodzana yelulahleko?

¹⁴ Yini leyenta Jesu washo lomfanekiso? Ngendlela lenelutsandvo, Jesu washo lomfanekiso loveta kutsi Jehova ufuna kutsi labo labamshiyile baphindze babuye kuYe. Lobabe kulomfanekiso akazange aphelelwe litsemba lekutsi indvodzana yakhe itawubuya. Nakabona indvodzana yakhe ibuya, lobabe wagijima wayihlangabeta nanobe ‘beyisesekhashane.’ Lesi sikhutsato lesinemandla sekutsi labo labashiye liciniso babuyele kuJehova ngaphandle kwekucitsa sikhatsi. Kungenteka kutsi buhlobo babo naNkulunkulu bubutsakatsaka, nekubuyela kuye kungase kubonakale kulukhuni futsi kubahlaze. Kodvwa ngeke batisole ngaloko, ngisho nasezulwini kutawujatjulwa ngekubuya kwabo.—Luk. 15:7.

15, 16. (a) Ngutiphi tifundvo lesitifundza emfanekisweni waJesu wendvodzana yelulahleko? Niketa tibonelo. (b) Loku kusifundzisani ngaJehova nangaJesu?

¹⁵ Singazuza njani kulomfanekiso wendvodzana yelulahleko? Kufanele silingise  sibonelo saJehova. Asifuni kuba ‘ngulabalunge kakhulu’ size singasatemukeli ngisho netoni letiphendvukile. Loku ‘kungabulala’ buhlobo betfu naNkulunkulu. (Shu. 7:16) Singafundza lesinye sifundvo kuloku. Loyo loshiya libandla kufanele simtsatse “njengemvu lelahlekile,” hhayi njengemuntfu longayuze abuye. (Hla. 119:176) Nasibona umuntfu loshiye libandla, sitamsita yini ngelutsandvo kuze akhone kubuya? Sitawusheshe sibatjele yini labadzala belibandla ngaye kuze bamnikete lusito loludzingekako? Sitawukwenta loko nangabe sisisebentisa ngekuhlakanipha sifundvo lesisitfola emfanekisweni waJesu wendvodzana yelulahleko.

¹⁶ Naka indlela labo lebebashiye Jehova lababonga ngayo ngemusa wakhe nelutsandvo kanye nekusekelwa labakutfola ebandleni. Lomunye umzalwane lobekayekeliswe kuba nguFakazi iminyaka lengu-25 utsi: “Kusukela ngibuyiselwe ebandleni, injabulo yami iyachubeka ikhula njengobe ngitfola ‘sikhatsi sekuvuseleleka’ lesivela kuJehova. (Imis. 3:19) Bonkhe ebandleni bayangisekela futsi bangikhombise lutsandvo! Nyalo nginemndeni lojabulisa sibili ebandleni.” Mayelana nekubuya kwakhe, lomunye dzadze losemusha lowashiya Jehova iminyaka lesihlanu utsi: “Ngeke ngikhone kukuchazela indlela lengativa ngayo nangibona lutsandvo Jesu labekhuluma ngalo luvetwa ngalokucacile kimi. Kuba yincenye yenhlangano yaJehova kuligugu kakhulu!”

17, 18. (a) Ngutiphi tifundvo letilusito lesitifundzile kulemifanekiso lemitsatfu lesiyihlolile? (b) Yini lokufanele sitimisele kuyenta?

¹⁷ Ngutiphi tifundvo letilusito lesitifundzile kulemifanekiso lemitsatfu? Kwekucala, kufanele semukele kutsi ngeke sikhone kulawula intfutfuko yebantfu ebuhlotjeni babo naNkulunkulu. Loko ngumsebenti waJehova. Kwesibili, ngeke silindzele kutsi bonkhe bantfu labatihlanganisa natsi nalabafundza natsi batawuvele nje bamkhonte Jehova. Kwekugcina, ngisho nobe labanye bangalishiya liciniso futsi bafulatsele Jehova, kufanele singaphelelwa litsemba lekutsi batawubuya. Nababuya, kufanele sibemukele ngendlela lekhombisa kutsi sinembono waJehova.

¹⁸ Shengatsi ngamunye wetfu angachubeka afuna lwati, kucondza nekuhlakanipha. Njengobe sifundza ngemifanekiso yaJesu, tibute kutsi isho kutsini, kungani yabhalwa eBhayibhelini, singatisebentisa njani tifundvo letikuyo, nekutsi yini lesingayifundza ngaJehova nangaJesu. Ngekwenta njalo, sitawukhombisa kutsi siyayicondzisisa inchazelo yemavi aJesu.