LICEMBU lemaKhristu lasemasha lancuma kuhamba liyewubukela lifilimu. Lalivile kutsi linyenti labontsanga yalo esikolweni bebalijabulele. Nabefika ehholweni lemafilimu, babuka emabhodi ekukhangisa futsi babona tikhali letiyingoti nabosisi labagcoke ngendlela levusa inkhanuko. Yini lebebatayenta? Bebatawungena yini kulelihholwa kute babukele lelifilimu?

Lesimo sikhombisa kutsi sidzinga kwenta tincumo letinyenti, letinye tingase tibutfutfukise buhlobo betfu naJehova nobe tibulimate. Ngaletinye tikhatsi, ungase ube nesifiso sekwenta lokutsite kodvwa ucabangisise kahle ngako bese ushintja ingcondvo yakho. Loko kuyintfo lekahle yini nobe kungakhombisa kutsi uyehluleka kwenta tincumo letihlakaniphile?

Lutsandvo lwetfu ngaJehova lwasenta sanikela kuphila kwetfu kuye futsi sabhajatiswa. Kusifiso setfu lesisuka enhlitiyweni kuhlala setsembekile kuye. Nanobe kunjalo, sitsa setfu lesinguSathane Develi sitimisele kwephula bucotfo betfu. (Semb. 12:17) Sente sincumo sekukhonta Jehova futsi sigcine imiyalo yakhe. Mayelana nekutinikela kwetfu kuJehova, kungaba yintfo lebuhlungu kushintja ingcondvo yetfu! Kungasenta silahlekelwe kuphila kwetfu.

Eminyakeni lengetulu kwemakhulu langu-26 leyendlulile, iNkhosi Nebukhadnezari yaseBhabhulona yabeka sitfombe lesikhulu seligolide futsi yakhipha umyalo wekutsi bonkhe bantfu baguce basikhonte. Bonkhe labebangeke basikhonte bebatawuphonswa emlilweni lowesabekako. Tikhonti letintsatfu letesaba Jehova, boShadraki, Meshaki, na-Abednego, atizange tisikhonte. Ngenca yaloko, taphonswa emlilweni lowesabekako. Jehova watisindzisa ngalokusimangaliso, kodvwa tatikulungele kudzela kuphila kwato esikhundleni sekutsi tishintje sincumo sato sekukhonta Nkulunkulu.—Dan. 3:1-27.

 Kulesinye simo, umphrofethi Danyela wachubeka athantaza ngisho nobe abesongelwe ngekutsi utawujikijelwa emgodzini wemabhubesi. Wachubeka athantaza kuJehova katsatfu ngelilanga. Danyela akazange ashintje esincumeni sakhe sekukhonta Nkulunkulu weliciniso. Ngaleso sizatfu, lomphrofethi wasindziswa “emandleni emabhubesi.”—Dan. 6:1-27.

Tinceku taNkulunkulu lamuhla nato tiphila ngekuvumelana nekutinikela kwato kuye. Kulesinye sikolwa e-Afrika, licembu lebafundzi labaBoFakazi BaJehova lala kuhlanganyela emkhosini wekukhonta luphawu lwesive. Lesatjiswa ngekutsi litawucoshwa esikolweni nangabe lingahlanganyeli nalalabanye bantfwana. Ngekushesha ngemuva kwaloko, indvuna yelitiko letemfundvo yavakashela lelidolobha futsi yakhuluma nalabanye bantfwana labaBoFakazi. Ngemusa kodvwa ngekungesabi, laBoFakazi labasebasha bachaza tinkholelo tabo. Kusukela ngaleso sikhatsi, lendzaba akukaphindzi kwakhulunywa ngayo. Bazalwane nabodzadze labasebasha bayakhona kuya esikolweni futsi abacindzetelwa kutsi balahle buhlobo babo naJehova.

Cabanga nangaJoseph, umfati wakhe lobekaphetfwe ngumdlavuza futsi washona ngekutumeka lokukhulu. Umndeni waJoseph bewuyicondza futsi uyihlonipha indlela labefuna emalungiselelo emngcwabo entiwe ngayo. Nanobe kunjalo, basekhakhakhe abasibo BoFakazi, futsi bebafuna kwenta imisimeto yangaphambi kwemngcwabo, lokufaka ekhatsi nemasiko langamjabulisi Nkulunkulu. Joseph utsi: “Ngesizatfu sekutsi angiyishintjanga ingcondvo, betama kukhuluma nebantfwana bami, kodvwa bonkhe bachubeka bacinile esincumeni sabo. Tihlobo tami taphindze tetama kuhlela kutsi kube nemlindzelo ekhaya lami njengelisiko lato, kepha ngatitjela kutsi natifuna kuba nemlindzelo, ngeke tize tiwente ekhaya lami. Betati kutsi umlindzelo awuhambisani netinkholelo tami netemfati wami, ngako ngemuva kwekucocisana nato tancuma kuwenta kulenye indzawo.

“Ngalesikhatsi lesimatima selusizi, ngacela lusito kuJehova kute umndeni wami ungayephuli imitsetfo yakhe. Wayiva imithantazo yami futsi wasisita sachubeka sicinile nanobe sasicindzetelwa.” Joseph nebantfwana bakhe bebangakucabangi ngisho nekukucabanga kushintja ingcondvo yabo mayelana nekukhonta kwabo Nkulunkulu.

Ngemuva nje kweliPhasika la-32 C.E., umfati lovela eFenikhe leseSiriya weta kuJesu Khristu ngesikhatsi aseSidoni. Wamcela kanyenti kutsi akhiphe lidimoni lebelisendvodzakatini yakhe. Ekucaleni Jesu akashongo lutfo. Watjela bafundzi bakhe watsi: “Angikatfunyelwa kulabanye bantfu, kodvwa ngitfunyelwe etimvini letilahlekile taka-Israyeli.” Nakachubeka amcela, Jesu watsi: “Akukalungi kutsatsa sinkhwa sebantfwana usijikele tinjana.” Akhombisa kukholwa lokukhulu, lomfati waphendvula watsi: “Kona kunjalo Nkhosi, kodvwa netinjana tidla timvutfu letiwa etafuleni lebanikati bato.” Jesu wakwenta loko lebekucelwa ngulomfati futsi wayelapha indvodzakati yakhe.—Mat. 15:21-28.

Ngekwenta njalo, Jesu abelingisa Jehova ngekukhombisa kutsi uyafuna kushintja nangabe simo sidzinga kutsi ente njalo. Sibonelo saloko kutsi Nkulunkulu bekafuna kuwabulala onkhe ema-Israyeli ngesikhatsi ente litfole leligolide, kodvwa wavuma ngesikhatsi Mosi amncenga kutsi ashintje sincumo saKhe.—Eks. 32:7-14.

Umphostoli Pawula walingisa Jehova naJesu. Ngalesinye sikhatsi, Pawula waba nemuva wekutsi kwakungasikahle kuhamba naJohane Makho eluhambeni lwabo lwetitfunywa telivangeli ngesizatfu sekutsi abeshiye Pawula naBhanabasi eluhambeni lwabo lwekucala lwetitfunywa telivangeli. Nobe kunjalo, ngemuva kwesikhatsi Pawula wabona kutsi Makho abekhutsele kulomsebenti nekutsi abetawuba lusito lolukhulu kuye. Ngaleso sizatfu Pawula watsi kuThimothi: “Ubota naMakho ngobe uyangisita emsebentini wami.”—2 Thim. 4:11.

 Kutsiwani ngatsi? Nasifuna kulingisa Babe wetfu wasezulwini lonelutsandvo, lonemusa nalobeketelako, singase sikubone kulungile kushintja ingcondvo yetfu. Sibonelo saloko kutsi singawushintja umbono lesinawo ngalabanye. Tsine asifani naJehova naJesu ngobe sinesono. Nangabe bona banaso sifiso sekushintja ingcondvo, ngeke yini natsi siticabangele timo talabanye futsi sishintje ingcondvo yetfu?

Kushintja ingcondvo yetfu kungase kube kuhle nasicabanga ngemigomo yekukhonta Nkulunkulu. Labanye labafundza liBhayibheli futsi lesekuphele sikhatsi lesidze beta emihlanganweni yelibandla, bangase babe matsintsanyawo kubhajatiswa. Lamanye emaKhristu angase angabate kuba ngemahlahlandlela ngisho nobe asetfubeni lelihle lekwandzisa umsebenti wawo wekushumayela. Labanye bazalwane babonakala bete sifiso sekuniketwa imisebenti leminyenti ebandleni. (1 Thim. 3:1) Uke waba sesimeni lesifana nalesi yini? Ngelutsandvo, Jehova ukumema kutsi uwajabulele emalungelo lanjalo. Kungani ungashintji indlela locabanga ngayo futsi uhlanganyele enjabulweni letfolakala ngekutinikela kuNkulunkulu nekusita labanye?

Naku lokushiwo ngu-Ella ngemsebenti lawenta ehhovisi leligatja laBoFakazi BaJehova e-Afrika: “Nangifika eBethel, bengingati kutsi ngitawuhlala sikhatsi lesidze. Benginesifiso sekukhonta Jehova ngemphefumulo wonkhe, kodvwa ngangiphindze ngiwutsandza kakhulu umndeni wakitsi. Ekucaleni, ngangiwukhumbula kakhulu! Kodvwa loyo lebengihlala naye eBethel wangikhutsata, ngako ngancuma kuhlala. Njengobe sengicitse iminyaka lelishumi ngiseBethel, ngifuna kuchubeka sikhatsi lesidze ngikhonta bazalwane nabodzadzewami ngekutsi ngichubeke nemsebenti wami eBethel.”

Uyakhumbula yini kutsi kwentekani kuKhayini ngesikhatsi aba nemona ngemnakabo futsi amtfukutselela kakhulu? Nkulunkulu watjela lendvodza lebeyitfukutsele kutsi abetayikhombisa umusa nangabe itawushintja yente lokuhle. Nkulunkulu wakhutsata Khayini kutsi ancobe sono ‘lebesimcatsamela ngasemnyango.’ Khayini abengakhona kushintja simo sakhe sengcondvo kanye nendlela lacabanga ngayo, kodvwa wakhetsa kungasilaleli seluleko saNkulunkulu. Lokubuhlungu kutsi Khayini wabulala umnakabo futsi waba ngumbulali wekucala emhlabeni!—Gen. 4:2-8.

Cabanga nangesibonelo seNkhosi Uziya. Ekucaleni, bekenta lokuhle embikwaJehova futsi wachubeka afunisisa Nkulunkulu. Kodvwa lokubuhlungu kutsi Uziya walonakalisa lidvumela lakhe lelihle ngekutsi atigabatise. Nanobe bekangasuye umphristi, wangena ethempelini washisa imphepho. Ngesikhatsi baphristi bamecwayisa kutsi ayekele kugabadzela, wayishintja yini ingcondvo yakhe? Akazange. Uziya “watfukutsela” futsi wangasinaki lesecwayiso. Ngesizatfu saloko, Jehova wamshaya ngebulephelo.—2 Khr. 26:3-5, 16-20.

Kuliciniso kutsi kunetikhatsi lapho kufanele siyishintje khona ingcondvo yetfu. Nasi sibonelo salamuhla. Joachim wabhajatiswa nga-1955, kodvwa nga-1978 wayekeliswa kuba nguFakazi. Ngemuva kweminyaka lengetulu kwalengu-20, waphendvuka futsi wabuyiselwa waba ngulomunye waBoFakazi BaJehova. Muva nje, lomunye lomdzala welibandla umbutile kutsi kungani atsetse sikhatsi lesidze ngaphambi kwekutsi acele kubuyiselwa. Joachim waphendvula watsi: “Ngangitfukutsele futsi ngitigabatisa. Ngiyatisola kutsi ngitsetse sikhatsi lesidze. Ngalesikhatsi ngiyekelisiwe kuba nguFakazi, ngangati kutsi BoFakazi BaJehova bafundzisa liciniso.” Joachim abedzinga kushintja simo sakhe sengcondvo futsi aphendvuke.

Singase sititfole sisesimeni lesidzinga kutsi sishintje ingcondvo kanye netento tetfu. Shengatsi singatimisela kwenta njalo kute sijabulise Jehova.—Hla. 34:8.