Hlale Uwukhutsalele Umsebenti Wekushumayela
KUSHUMAYELA tindzaba letimnandzi kungumsebenti lobaluleke kakhulu lowentiwa emhlabeni lamuhla. Kulilungelo kumelela Jehova kulomsebenti wekufundzisa. Nobe kunjalo, ngaletinye tikhatsi kungaba yinsayeya ngemahlahlandlela nebamemeteli kuhlale bawukhutsalele umsebenti wekushumayela. Kungani?
Yini lengakusita kute uhlale uwukhutsalele umsebenti wekushumayela?
Labanye bamemeteli bacoca nebantfu labambalwa nabashumayela emtini ngemuti ngobe bantfu labanyenti abatfolakali emakhaya. Nangabe bantfu sibatfola emakhaya, bangase babe bete sifiso sekulalela umlayeto weMbuso futsi bangase basitfukutselele. Labanye bamemeteli banensimi lenkhulu naletselako kodvwa besaba kutsi ngeke bakhone kubashumayela bonkhe bantfu labakuyo. Labanye sekuphele iminyaka leminyenti bashumayela futsi sebadvumatekile ngobe kuphela solo akufiki.
Titawuba khona tinsayeya letingatsikameta inkhutsalo yetfu emsebentini wekushumayela. Siphila eveni lelilawulwa ‘ngulomubi,’ Sathane Develi, futsi sikulindzele kutsi kube lukhuni kushumayela tindzaba letimnandzi.
Ungaciniseka kutsi Jehova utakusita ukwati kuncoba nome ngabe ngubuphi bumatima longahlangabetana nabo emsebentini wekushumayela. Kodvwa yini longayenta kute ukhulise inkhutsalo yakho kulomsebenti? Ase sicoce ngalokutsite lesingakwenta.
SITA LABO LABASANDZA KUBA BAMEMETELI
Umnyaka ngemnyaka, tinkhulungwane tebantfu tiyabhajatiswa tibe BoFakazi BaJehova. Nangabe usandza kubhajatiswa, ungafundza lokunyenti kulabo lasebaneminyaka bashumayela. Nangabe sewube ngummemeteli iminyaka leminyenti, ungabasita yini labo labasandza kuba bamemeteli? Kwenta njalo kungakwenetisa kakhulu.
Jesu bekati kutsi bafundzi bakhe badzinga kucondziswa kute babe bafundzisi labaphumelelako, futsi wabakhombisa indlela yekushumayela. (Lukha 8:1) Nalamuhla, labo labasandza kuba bamemeteli badzinga kuceceshwa lokufanako kute baphumelele emsebentini wekushumayela.
Akukafaneli sicabange kutsi umuntfu losandza kuba ngummemeteli utawutfola emakhono ekufundzisa ngekuya nje ensimini. Udzinga kucondziswa ngumfundzisi lonemusa nalonelutsandvo. Ummemeteli lonalokuhlangenwe nako kudzingeka amfundzise indlela (1) yekulungiselela nekuphrakthiza loko latakusho kumnikati welikhaya, (2) yekucocisana nebantfu, (3) yekuhambisa tincwadzi, (4) yekubuyela kulabo lababe nesifiso sekufundza, (5) neyekucalisa sifundvo seliBhayibheli. Umuntfu losandza kuba ngummemeteli angaphumelela ensimini nangabe anaka indlela bamemeteli labanalokuhlangenwe nako labafundzisa ngayo futsi ayilingise. (Lukha 6:40) Angaba nesibindzi kakhulu nangabe ati kutsi kukhona lolungele kumsita nakunesidzingo. Kumncoma nekumtjela lapho angatfutfukisa khona nako kungamsita.
COCA NEMUNTFU LOHAMBA NAYE ENSIMINI
Ngisho nobe ungetama kangakanani kukhuluma nebanikati bemakhaya, ngaletinye tikhatsi incociswano lemnandzi kakhulu nguleyo loba nayo nalohamba naye. Khumbula kutsi Jesu watfuma bafundzi bakhe “ngababili” kutsi bayewushumayela. (Lukha 10:1) Njengobe bebasebenta ndzawonye, bebangakhutsatana futsi bacinisane. Sinelitfuba lelihle ‘lekukhutsatana’ nasisebenta nebazalwane nabodzadze ensimini.
Ngutiphi letinye tintfo leningacoca ngato? Ukhona yini emkhatsini wenu lobe nalokuhlangenwe nako lokukhutsatako? Kukhona yini liphuzu lelijabulisako lolifundze esifundvweni lotichubela sona nobe esifundvweni semndeni? Kukhona yini lokukukhutsatile lokuve emhlanganweni? Ngaletinye tikhatsi ungase ushumayele nemmemeteli longakametayeli. Mhlawumbe ungambuta kutsi walitfola njani liciniso. Yini leyamenta waciniseka kutsi lena yinhlangano yaJehova? Ngumaphi emalungelo nobe lokuhlangenwe nako lakutfolile? Mhlawumbe nawe ungamcocela lokuhlangenwe nako kwakho. Ngisho nome bantfu ensimini balalela nobe cha, nangabe ushumayela nalotsite, ninematfuba lamahle ekutsi nichubeke ‘nakhane.’
TFUTFUKISA SIFUNDVO LOTICHUBELA SONA
Kute sichubeke sikhutsele emsebentini wetfu wekushumayela, kufanele sitfutfukise sifundvo lesitichubela sona. ‘Sisebenti lesetsembekile nalesihlakaniphile’ sikhipha kwatiswa lokumayelana netihloko letinyenti lesingatifundza. (Matewu 24:45) Asesicoce ngesibonelo sinye sesihloko lokungaba kuhle sisihlole esifundvweni lesitichubela sona: Kungani umsebenti wekushumayela ubaluleke kangaka? Libhokisi lelitsi “ Kungani Kufanele Sihlale ” lisiniketa letinye tizatfu. Siwukhutsalele Umsebenti Wekushumayela?
Kucabanga ngemaphuzu lakulelibhokisi kungakwenta kutsi uchubeke ushumayela ngenkhutsalo. Nawutichubela sifundvo, yetama kubhala letinye tizatfu letiseBhayibhelini tekushumayela ngenkhutsalo, bese uyazindla ngato. Nawenta njalo, inkhutsalo lonayo ngemsebenti wekushumayela itawukhula.
KULUNGELE KWETAMA TINDLELA LETINSHA
Inhlangano yaJehova ihlale isiniketa tindlela letingasisita kute sitfutfukise umsebenti wetfu wekushumayela. Nasi sibonelo: Ngetulu nje kwekushumayela emtini ngemuti, singetama kushumayela ngekubhala tincwadzi, ngelucingo, esitaladini nobe etindzaweni letiphitsitelako, sishumayele singakahleli nobe sishumayele bantfu etindzaweni temsebenti. Mhlawumbe singetama kushumayela etindzaweni lapho babancane khona BoFakazi nobe bangekho sanhlobo.
Uyafisa yini kwetama letindlela letinsha? Labanyenti labatetamile baphumelele. Asesicabange ngetibonelo letintsatfu.
Lomunye dzadze libito lakhe lokungu-April wancuma kusebentisa loko lokushiwo ngulesinye sihloko lesiku-Msebenti WeMbuso mayelana nekucalisa tifundvo teliBhayibheli. Wacela kufundzela bantfu labatsatfu lasebenta nabo. April wamangala futsi wajabula ngesikhatsi bobatsatfu bavuma kuchutjelwa sifundvo futsi bacala kuta emihlanganweni yelibandla.
Siphindze sakhutsatwa kutsi sifune bantfu lokungenteka banesifiso sekufundza sihloko lesitsite kubomagazini betfu. Lomunye umbonisi wesigodzi eMelika wancuma kutsi i-“Phaphama!” lenesihloko lesikhuluma ngemathayi ayihambisele bomenenja bato tonkhe titolo temathayi
endzaweni letsite. Yena nemkakhe, baphindze bahambisa i-“Phaphama!” lenesihloko lesitsi “Understanding Your Doctor” emahhovisini abodokotela langetulu kwa-100. Utsi loko kusita labantfu kutsi betayelane nemsebenti wetfu wekushumayela netincwadzi tetfu. Nasebabati kahle bantfu ensimini labayishumayelako, babese bayakhona kubuyela kulabanyenti labacoce nabo.Lomunye dzadze libito lakhe lokunguJudy wabhalela indlunkhulu yaBoFakazi ngobe abejabule kakhulu ngesikhutsato sekushumayela ngelucingo. Watsi make wakhe loneminyaka lengu-86 budzala futsi lonemphilo lebutsakatsaka, abevamise kushumayela ngelucingo. Umphumela waloko waba kutsi wacalisa sifundvo seliBhayibheli nalomunye gogo loneminyaka lengu-92 budzala.
Loko tincwadzi tetfu letitsi asikwente kusebenta mbamba. Kwetame! Kungakusita kutsi uchubeke ujabulile futsi ukhutsele emsebentini wekushumayela.
TIBEKELE IMIGOMO LOTAWUKHONA KUYIFINYELELA
Yini lesenta kutsi siphumelele emsebentini wetfu wekushumayela? Akusilo linani letincwadzi lesitihambisako, tifundvo lesitichubako, nobe bantfu lesibasita kutsi babe BoFakazi BaJehova. Cabanga ngaNowa. Ngaphandle kwemndeni wakhe, bangakhi bantfu labasita kutsi babe tikhonti taJehova? Kodvwa abengumshumayeli lophumelelako. Lokubalulekile kutsi sikhonta Jehova ngekwetsembeka.
Bamemeteli labanyenti bayabona kutsi kute bawujabulele umsebenti wekushumayela, kufanele batibekele imigomo labangayifinyelela. Ngumiphi leminye yalemigomo? Leminye yayo itfolakala ebhokisini lelinesihloko lesitsi “ Tibekele Imigomo Lotawukhona Kuyifinyelela.”
Cela Jehova akusite wente umsebenti wakho wekushumayela ukwenetise futsi utsele titselo. Nawufinyelela imigomo yakho, utawenetiseka ngobe utawube wati kutsi wenta konkhe lokusemandleni kute ushumayele tindzaba letimnandzi.
Kuliciniso kutsi kushumayela tindzaba letimnandzi kungaba yinsayeya. Kodvwa kunetintfo longatenta kute ukhutsale emsebentini wakho wekushumayela. Bani netincociswano letikhutsatako naloyo lohamba naye ensimini, ube nesifundvo lotichubela sona njalo futsi lesizuzisako, yetama kusebentisa loko lokushiwo sisebenti lesetsembekile nalesihlakaniphile futsi utibekele imigomo longayifinyelela. Ngetulu kwako konkhe, khumbula kutsi Jehova Nkulunkulu ukunikete lilungelo lekushumayela tindzaba letimnandzi njengobe ungulomunye waBoFakazi bakhe. (Isaya 43:10) Utawujabula kakhulu njengobe uchubeka ulondvolota inkhutsalo yakho emsebentini wekushumayela!