1. Yini leyente kutsi kube lukhuni kushumayela?

NGESIKHATSI bacala kushumayela tindzaba letimnandzi eminyakeni lengetulu kwalengu-130 leyengcile, bantfu baJehova bahlangabetana nebumatima lobunyenti. * (Fundza umbhalo longentansi.) NjengemaKhristu angelikhulu lekucala, nabo bebalicembu lelincane futsi bebashumayela umlayeto lobewungatsandvwa bantfu labanyenti. Labanye bebacabanga kutsi abakafundzi lokuyaphi. Ngesikhatsi Sathane aphonswa emhlabeni, baphatfwa kabi. (Sembulo 12:12) Kusukela ngaleso sikhatsi, bebasolo bashumayela ‘kulamalanga ekugcina’ ‘lokumatima kubhekana nawo.’—2 Thimothi 3:1.

2. Yini Jehova layentile kuze asisite kutsi sishumayele?

² Kodvwa Jehova abesolo abasita bantfu bakhe. Ufuna kutsi  bashumayele tindzaba letimnandzi emhlabeni wonkhe futsi ngeke avumele lutfo kutsi luvimbe lomsebenti. Usite bantfu bakhe kutsi bamkhonte ngendlela layemukelako ngekubehlukanisa nenkholo yemanga. Kadzeni, wenta lokufanako ngesikhatsi akhulula ema-Israyeli eBhabhulona. (Sembulo 18:1-4) Loko Jehova lasifundzisa kona kusita tsine. Usisita kutsi sihlale ngekuthula nalabanye bantfu, futsi uyasicecesha kute sifundzise labanye ngaye. (Fundza Isaya 48:16-18.) Ngisho nobe Jehova acondzisa umsebenti wetfu, akusho kutsi uhlale ashintja timo letikhona emhlabeni kuze asisite sishumayele. Kuliciniso kutsi letinye tintfo letenteka emhlabeni tibangele kutsi umsebenti wetfu wekushumayela ube melula. Kodvwa solo siphatfwa kabi futsi sibhekana naletinye tinkinga letibangelwa ngulelive laSathane. Sisitwa nguJehova kuphela kuze sishumayele.—Isaya 41:13; 1 Johane 5:19.

3. Siphrofetho lesikuDanyela sigcwaliseke njani?

³ Danyela waphrofetha kutsi esikhatsini sekugcina, bantfu labanyenti batawucondza liciniso leliseBhayibhelini. (Fundza Danyela 12:4.) Ngaphambi nje kwekutsi “sikhatsi sekugcina” sicale, Jehova wasita bantfu bakhe kutsi bacondze timfundziso letibalulekile letiseBhayibhelini futsi babalekele timfundziso temanga teTinkholo Letitsi TebuKhristu. Lamuhla, bantfu bakhe bafundzisa ngeliciniso leliseBhayibhelini emhlabeni wonkhe. Kuyacaca kutsi lesiphrofetho lesikuDanyela sesigcwalisekile. Bantfu labacishe babe tigidzi letisiphohlongo balifundzile leliciniso futsi balifundzisa labanye. Ngutiphi letinye tintfo letisite bantfu baJehova kutsi bashumayele emhlabeni wonkhe?

4. Nga-1900, liBhayibheli beselihunyushelwe etilwimini letingakhi?

⁴ Lamuhla, bantfu labanyenti banalo liBhayibheli, futsi loko kusisita kutsi sibafundzise tindzaba letimnandzi. Kodvwa bekusolo kungasinjalo. Kwaphela emakhulu eminyaka bafundisi beTinkholo Letitsi TebuKhristu bangafuni kutsi bantfu bafundze liBhayibheli. Bebabaphatsa kabi labo lebebalifundza futsi babulala nalabo lebebalihumusha. Kodvwa ngabo-1800, letinye tinhlangano tahumusha liBhayibheli nobe tincenye talo futsi talishicilela ngetilwimi letingaba ngu-400. Nga-1900, bantfu labanyenti besebanalo liBhayibheli. Kodvwa bebangakucondzi loko lelikufundzisako.

5. Yini BoFakazi BaJehova labayentile kute bahumushe liBhayibheli?

⁵ Bantfu baJehova bebati kutsi kufanele batjele labanye ngaloko liBhayibheli lelikufundzisako, futsi nguloko kanye labakwenta. Ekucaleni bebasebentisa emahumusho eliBhayibheli lebekakhona futsi bapha bantfu emakhophi alo. Kusukela nga-1950, sebashicilele i-“New World Translation of the Holy Scriptures,” nobe tincenye tayo ngetilwimi letingetulu kwa-120. Nga-2013, bashicilele i-“New World Translation” yesiNgisi lebuketiwe. Lelihumusho kumelula kulicondza futsi kumelula nekulihumusha. Nasisebentisa liBhayibheli bantfu labalicondzako, kuba melula kubafundzisa liciniso.

6, 7. (a) Ngutiphi timphi letibe khona kuleminyaka lengu-100 leyendlulile? (b) Tikhatsi tekuthula kulamanye emave tisisite njani kutsi sishumayele?

⁶ Eminyakeni lelikhulu leyendlulile, kube netimphi letinyenti, lokufaka ekhatsi  imphi yelive yekucala neyesibili. Kwafa tigidzi tebantfu. Ngako kuthula kube khona ngayiphi indlela, futsi kubasite njani bantfu baJehova kutsi bashumayele? Ngemphi yelive yesibili, Nathan Knorr bekahola BoFakazi BaJehova. Emhlanganweni wesifundza wanga-1942, wabeka inkhulumo lemnandzi lenesihloko lesitsi “Kuthula—Kungahlala Njalo Yini?” UMzalwane Knorr wachaza siphrofetho lesikuSembulo sehluko 17 futsi wasebentisa sona kute achaze kutsi i-Amagedoni beyingeke ite ngaleso sikhatsi. Ngemuva kwalemphi, bekutawuba nesikhatsi sekuthula.—Sembulo 17:3, 11.

⁷ Ecinisweni, loku akusho kutsi ngemuva kwalemphi kwaba nekuthula yonkhe indzawo. Kusukela ngemphi yelive yesibili, kufe tigidzi tebantfu kuletinye timphi. Kodvwa emaveni lamanyenti, kube netikhatsi tekuthula letente kwaba melula ngebantfu baJehova kutsi bashumayele. Ube yini umphumela? Ngemphi yelive yesibili, BoFakazi BaJehova bebangephansi kwa-110 000. Kodvwa lamuhla bacishe babe tigidzi letisiphohlongo! (Fundza Isaya 60:22.) Kuyacaca kutsi tikhatsi tekuthula tisenta sikhone kushumayela tindzaba letimnandzi kubantfu labanyenti.

8, 9. Yini leyente kutsi kube melula kuya kuletinye tindzawo, futsi kungani loku kusisita emsebentini wetfu wekushumayela?

⁸ Ngesikhatsi bantfu baJehova bacala kushumayela eMelika, bekulukhuni kutsi baye kuletinye tindzawo. Nga-1900, ngemuva kweminyaka lecishe ibe ngu-21 bacale kushicilela Sicongosekulindza, bekunetimoto letingaba ngu-8 000 kuphela kanye nemigwaco lembalwa lemihle kulelive. Kodvwa lamuhla kunetimoto letingetulu kwesigidzigidzi nehhafu emhlabeni wonkhe, kanye nemigwaco lemihle etindzaweni letinyenti. Ngako singasebentisa timoto kanye nemigwaco kuze sishumayele kubantfu etindzaweni letikhashane nemadolobha nalokumatima kufika kuto. Ngisho nobe sihlala endzaweni lokumatima kuhamba kuyo futsi sihamba emabanga lamadze, senta konkhe lokusemandleni etfu kutsi sishumayele bantfu nome ngukuphi lapho batfolakala khona.—Matewu 28:19, 20.

⁹ Siphindze sisebentise letinye tinhlobo tetintfo tekuhamba. Sisebentisa emaloli, imikhumbi netitimela kuze sitfumele emaBhayibheli naletinye tincwadzi. Loku kusho kutsi ngemaviki nje lambalwa, singatfumela tincwadzi kubazalwane nabodzadze etindzaweni letikhashane. Babonisi betigodzi, emalunga eKomidi Yeligatja, titfunywa telivangeli kanye nalabanye bahamba ngetindiza kute bayowetfula tinkhulumo emihlanganweni yesifundza futsi basite emabandla. Emalunga eSigungu Lesibusako kanye nalabanye bazalwane labasuka endlunkhulu yemhlaba wonkhe, basebentisa tindiza nabaya emaveni lamanyenti kuze bakhutsate bazalwane babo  futsi babaceceshe. Konkhe loku kusita bantfu baJehova kutsi babe nebunye.—Tihlabelelo 133:1-3.

10. SiNgisi sisetjentiswa ngayiphi indlela emhlabeni wonkhe?

¹⁰ Ngelikhulu lekucala, bantfu labanyenti eMbusweni waseRoma bebakhuluma siGriki. Lamuhla, bantfu labanyenti emhlabeni wonkhe bakhuluma siNgisi. Ecinisweni, incwadzi letsi “English as a Global Language” itsi emaphesenti langaba ngu-25 ebantfu emhlabeni ayakhona kukhuluma siNgisi nobe kusiva. Bantfu labanyenti bafundza siNgisi ngobe sisetjentiswa emhlabeni wonkhe emabhizinisini, kutepolitiki, kutesayensi nakutebuchwephesha.

11. Lulwimi lwesiNgisi lube nayiphi indzima emsebentini lowentiwa bantfu baJehova?

¹¹ Kusebenta kakhulu kwelulwimi lwesiNgisi kusisitile kutsi sisakate liciniso. Kadzeni, tincwadzi tetfu tacale tatfolakala ngesiNgisi. Bantfu labanyenti bebakhona kutifundza ngobe siNgisi besikhulunywa emhlabeni wonkhe. Endlunkhulu yetfu yemhlaba wonkhe kusetjentiswa siNgisi. Bazalwane nabodzadze labasuka emaveni lahlukahlukene futsi labasatiko siNgisi baceceshwa etikolweni tetfu letisePatterson, eNew York.

12. Tincwadzi tetfu tihunyushelwe etilwimini letingakhi, futsi tinhlelo tabongcondvomshini tisisite njani?

¹² Kodvwa sinemtfwalo wekushumayela tindzaba letimnandzi kubantfu emhlabeni wonkhe. Kungako sihumusha tincwadzi tetfu ngetilwimi letingetulu kwa-700. Yini lesisitile kutsi sente loko? Bongcondvomshini, netinhlelo tabongcondvomshini letifaka ekhatsi i-MEPS, tisisitile kutsi sente lomsebenti wekuhumusha. Ngaleso sizatfu, BoFakazi BaJehova emhlabeni wonkhe bayakhona kucondza lulwimi ‘loluhlambulukile’ lwemaciniso laseBhayibhelini futsi babe nebunye.—Fundza Zefaniya 3:9.

13, 14. Imitsetfo netijubo tenkantolo kusisite njani?

¹³ Imitsetfo yemaRoma yawasita ngetindlela letinyenti emaKhristu angelikhulu lekucala kutsi akhone kushumayela. Nalamuhla, imitsetfo lekhona emaveni lamanyenti iyasisita kutsi sishumayele.  Nasi sibonelo: Imitsetfo yaseMelika iniketa bantfu lilungelo lekutikhetsela inkholo, kucoca ngaloko labakukholelwako nekuhlangana ndzawonye. Loku kusho kutsi sikhululekile kuchuba imihlangano yetfu nekushumayela kulelive. Endlunkhulu yetfu leseMelika, sinenkhululeko yekuhlela umsebenti wekushumayela lowentiwa emhlabeni wonkhe. Kuliciniso kutsi ngaletinye tikhatsi bekudzingeka siye etinkantolo kute sivikele lilungelo letfu lekushumayela tindzaba letimnandzi. (Filiphi 1:7) Ngesikhatsi emajaji kuleto tinkantolo etama kusemuka lilungelo letfu lekushumayela, besiya etinkantolo letiphakeme futsi sivame kuphumelela.

¹⁴ Nakulamanye emave, kudzingeke kutsi siye enkantolo kute sivikele lilungelo letfu lekukhonta Jehova nelekushumayela. Nangabe singaphumeleli, besiya etinkantolo temhlaba wonkhe. Sibonelo saloko kutsi etikhatsini letinyenti siya eNkantolo Yemalungelo Ebantfu YaseYurophu. NgaJune 2014, besesiphumelele emacaleni langu-57 kuleNkantolo, futsi emaveni lamanyenti aseYurophu tincumo taleNkantolo kufanele tilalelwe. Ngisho nobe ‘sitondvwa tive tonkhe,’ imitsetfo lekhona emaveni lamanyenti yente kutsi sikhone kukhonta Jehova ngenkhululeko.—Matewu 24:9.

15. Tindlela tekushicilela titfutfuke ngayiphi indlela, futsi loku kusisite njani?

¹⁵ Tindlela letinsha tekushicilela tisisitile kutsi sishumayele tindzaba letimnandzi kubantfu labanyenti. Kwaphela emakhulu eminyaka bantfu basebentisa umshini wekushicilela lobewakhiwe nguJohannes Gutenberg nga-1450. Kodvwa kuleminyaka lengu-200 leyengcile, imishini yekushicilela itfutfuke ngetindlela letinyenti. Kwakhiwe imishini  yekushicilela yesimanjemanje leyente kutsi umsebenti wekushicilela usheshe, futsi kushicilelwe tintfo letisezingeni lelisetulu. Kwenta liphepha nekuhlanganisa emakhasi etincwadzi akukaduli njengaseminyakeni leyendlulile. Lolushintjo lube namuphi umphumela ekushicilelweni kwetincwadzi tetfu? Nga-1879, Sicongosekulindza sekucala besishicilelwa ngesiNgisi kuphela. Besite titfombe futsi kwashicilelwa emakhophi langu-6 000. Lamuhla, Sicongosekulindza sishicilelwa ngetilwimi letingetulu kwa-200. Sinetitfombe letinhle naletimibalabala, futsi kushicilelwa emakhophi langetulu kwa-50 000 000 amagazini ngamunye.

16. Ngutiphi tintfo tebuchwephesha letisisite kutsi sishumayele emhlabeni wonkhe? (Buka sitfombe lesisekucaleni kwalesihloko.)

¹⁶ Tintfo letinyenti letakhiwe kuleminyaka lengu-200 leyengcile, tisite bantfu baJehova kutsi bashumayele tindzaba letimnandzi. Sesivele sikhulumile ngetitimela, timoto netindiza. Kodvwa kwakhiwe nemabhayisikili, imishini yekubhala, imishini ye-Braille, tincingo takadzeni netanyalo, emakhamera, imishini yekutsebula emavi, imishini ye-video, umsakato, i-TV, emafilimu, bongcondvomshini ne-Internet. Ngisho nobe letintfo tingakakhiwa bantfu baJehova, kodvwa bayatisebentisa kute bashicilele liBhayibheli naletinye tincwadzi ngetilwimi letinyenti futsi bashumayele emhlabeni wonkhe. Ngaleyo ndlela, ‘banatsa lubisi lwetive,’ njengobe kwaphrofethwa eBhayibhelini.—Fundza Isaya 60:16.

17. (a) Umsebenti wekushumayela ukhombisa ini? (b) Kungani Jehova afuna sisebente naye?

¹⁷ Kuyacaca-ke kutsi nguJehova locondzisa umsebenti wetfu wekushumayela. Usinike lomsebenti ngenca yekutsi uyasitsandza futsi ufuna sisebente naye, hhayi ngobe ehluleka kutentela wona. Nasishumayela, sisuke sikhombisa kutsi siyamtsandza futsi siyabatsandza labanye bantfu. (Makho 12:28-31; 1 Khorinte 3:9) Simbonga kakhulu Jehova ngekusisita kutsi sishumayele emhlabeni wonkhe. Ngako-ke, shengatsi singasebentisa onkhe ematfuba lesiwatfolako kute sishumayele ngaJehova nangeMbuso wakhe!