1, 2. (a) Ngumiphi imifanekiso Jesu layitjela bangani bakhe? (Buka sitfombe lesisekucaleni kwalesihloko.) (b) Yini lokufanele siyati ngemfanekiso wetimvu netimbuti?

JESU bekakhuluma nebangani bakhe boPhetro, Andreya, Jakobe naJohane ngalokutsite lokujabulisako. Ngemuva kwekubatjela ngemfanekiso wesisebenti lesetsembekile nalesihlakaniphile, wetintfombi letilishumi newemathalenta, wabese ubatjela lomunye umfanekiso. Kulomfanekiso wabachazela ngesikhatsi lapho “iNdvodzana yemuntfu” itawehlulela “tonkhe tive.” Watsi “iNdvodzana yemuntfu” itawehlukanisa bantfu babe ngemacembu lamabili, lelinye watsi timvu lelinye watsi timbuti. Wabese uchaza nalelinye licembu lelibalulekile lesitsatfu, ‘bomnakabo’ Nkhosi.—Fundza Matewu 25:31-46.

² Njengalabaphostoli, tinceku taJehova esikhatsini salamuhla tinesifiso sekuwucondza lomfanekiso ngobe utsintsa kuphila kwebantfu. Jesu watsi labanye batawutfola kuphila  lokuphakadze kodvwa labanye batawubhujiswa. Kungaleso sizatfu kubalulekile kwati kutsi usho kutsini lomfanekiso futsi yini lokufanele siyente kute sitfole kuphila lokuphakadze. Ngako kulesihloko, sitawuphendvula lemibuto lelandzelako: Jehova usisite njani kutsi siwucondze lomfanekiso? Sati njani kutsi lomfanekiso ugcizelela umsebenti wekushumayela? Bobani lokufanele bashumayele? Kungani kubalulekile kutsi bantfu betsembeke nyalo ‘eNkhosini’ ‘nakubomnakabo’ Nkhosi?

3, 4. (a) Yini lokufanele siyati kuze siwucondze lomfanekiso? (b) Sicongosekulindza sa-1881 sawuchaza njani lomfanekiso?

³ Kuze sicondze kutsi umfanekiso wetimvu netimbuti usho kutsini, kufanele sati loku lokulandzelako: (1) Ngubani “iNdvodzana yemuntfu,” nome “iNkhosi,” tibobani timvu netimbuti futsi bobani ‘bomnakabo’ Nkhosi? (2) “INdvodzana yemuntfu” itehlukanisa nini timvu netimbuti? futsi (3) kungani labanye babitwa ngekutsi timvu labanye babitwa ngekutsi timbuti?

⁴ Nga-1881, Sicongosekulindza satsi “iNdvodzana yemuntfu” nobe “iNkhosi,” nguJesu. Sachaza kutsi ‘bomnakabo’ Nkhosi akusibo labo labatawubusa naJesu ezulwini kuphela kodvwa nabo bonkhe bantfu labatawuphila emhlabeni nasebete sono. Le-Sicongosekulindza satsi bantfu batawehlukaniswa ngesikhatsi seKubusa KwaKhristu Kweminyaka Leyinkhulungwane, futsi labo labalingise lutsandvo lwaNkulunkulu kuko konkhe lebebakwenta batawubitwa ngekutsi timvu.

5. Nga-1923, bantfu baNkulunkulu bebawucondza njani lomfanekiso?

⁵ Ngemuva kwesikhatsi, Jehova wasita bantfu bakhe kutsi bawucondze kancono lomfanekiso. Nga-1923, Sicongosekulindza sa-October 15 satsi “iNdvodzana yemuntfu” nguJesu. Sasebentisa emavesi eliBhayibheli kute sichaze kutsi ‘bomnakabo’ Khristu kulomfanekiso bamelela labo labatawubusa naJesu kuphela, futsi bonkhe batawube sebasezulwini ngesikhatsi seKubusa Kweminyaka Leyinkhulungwane. Saphindze satsi timvu timelela labo labatawuphila emhlabeni ngephansi kwekubusa kwaJesu akanye nabomnakabo. Njengobe lomfanekiso utsi labo labatimvu basita bomnakabo Nkhosi, ngako kwehlukanisa kufanele kwenteke ngesikhatsi bomnakabo Jesu labagcotjiwe basaphila emhlabeni, kungakacali Kubusa Kweminyaka Leyinkhulungwane. Lesihloko saphindze satsi timvu timelela labo labatawuba nekukholwa kuJesu futsi labacinisekako kutsi uMbuso utawuletsa imphilo lencono emhlabeni.

6. Nga-1995, yashintja njani indlela lebesiwucondza ngayo lomfanekiso?

⁶ Kwaphela iminyaka leminyenti sicabanga kutsi bantfu behlulelwa ngemsebenti wekushumayela kulesikhatsi sekuphela. Nangabe bawemukela umlayeto wetfu besitsi batimvu, kodvwa nangabe bangawemukeli besitsi batimbuti. Kodvwa nga-1995 indlela lebesiwucondza ngayo lomfanekiso yashintja. Sicongosekulindza sacatsanisa Matewu 24:29-31 (fundza) naMatewu 25:31, 32 (fundza), futsi sachaza kutsi Jesu utawehlulela bantfu ngesikhatsi sekuhlupheka lokukhulu lapho iNdvodzana yemuntfu “ifika inemandla  lamakhulu.” *—Fundza umbhalo longentasi.

7. Usho kutsini lomfanekiso?

⁷ Lamuhla siwucondza kancono lomfanekiso wetimvu netimbuti. Siyati kutsi “iNdvodzana yemuntfu,” nobe “iNkhosi” nguJesu. ‘Bomnakabo’ Nkhosi ngulabagcotjwe ngemoya longcwele futsi ngulabatawubusa naJesu ezulwini. (Roma 8:16, 17) “Timvu” ‘netimbuti’ bantfu bato tonkhe tive. Batawehlulelwa ngasekupheleni kwekuhlupheka lokukhulu lokutawucala ngekushesha. Siyati nekutsi Jesu utawehlulela bantfu ngendlela labatawube babaphetse ngayo labagcotjiwe labasaphila emhlabeni. Sijabula kakhulu ngekutsi kuyo yonkhe leminyaka Jehova usisitile kutsi siwucondze lomfanekiso kanye naleminye imifanekiso lekuMatewu sehluko 24 na-25.

8, 9. Kungani Jesu abita timvu ngekutsi ‘tilungile’?

⁸ Jesu akazange asebentise emagama latsi “kushumayela” nobe “umsebenti wekushumayela” kulomfanekiso wetimvu netimbuti. Ngako sati njani kutsi lomfanekiso usifundzisa kutsi umsebenti wekushumayela ubaluleke kakhulu?

⁹ Kuze sitfole imphendvulo, kufanele sikhumbule kutsi Jesu bekafundzisa sifundvo lesitsite ngalomfanekiso. Bekangakhulumi ngetimbuti kanye netimvu mbamba. Ngako ngendlela lefanako, bekangasho kutsi wonkhe umuntfu lotawehlulelwa njengemvu kufanele aphe labagcotjiwe kudla netimphahla aphindze abanakekele nabagula nobe abavakashele emajele. Kunaloko, Jesu wachaza timvu ngekutsi ‘tilungile’ ngobe titsatsa labagcotjiwe njengabomnakabo Khristu futsi tetsembekile kubo kulamalanga ekugcina lamatima.—Matewu 10:40-42; 25:40, 46; 2 Thimothi 3:1-5.

10. Timvu tingabasita njani bomnakabo Khristu?

¹⁰ Ngesikhatsi Jesu asho umfanekiso wetimvu netimbuti, abekhuluma ngaloko lobekutawenteka esikhatsini sekuphela. (Matewu 24:3) Sibonelo saloko kutsi watsi: “Letindzaba letimnandzi teMbuso tiyawushunyayelwa emhlabeni wonkhe.” (Matewu 24:14) Ngaphambi kwekutsi akhulume ngetimvu netimbuti, washo umfanekiso wemathalenta. Jesu washo lomfanekiso kuze afundzise labagcotjiwe kutsi bekufanele basebente ngekutimisela emsebentini wekushumayela. Kodvwa bambalwa labagcotjiwe labasaphila emhlabeni futsi mnyenti umsebenti lokusafanele wentiwe. Labagcotjiwe bayalwa kutsi bashumayele “etiveni tonkhe” ngaphambi kwekutsi kufike kuphela. Njengobe sifundza kulomfanekiso wetimvu netimbuti,  “timvu” tisita bomnakabo Jesu. Umsebenti wekushumayela ungulenye yetindlela letibalulekile timvu letingabasita ngayo bomnakabo Jesu. Kodvwa kwenele yini kunikela ngemali kute kwentiwe lomsebenti nobe kukhutsata labagcotjiwe kutsi bashumayele?

11. Ngumuphi umbuto labanye labangatibuta wona, futsi leni?

¹¹ Lamuhla, batigidzi letisiphohlongo bafundzi baJesu, futsi linyenti labo alikagcotjwa. Jesu akazange abanike emathalenta. Kodvwa wawanika bomnakabo labagcotjiwe. (Matewu 25:14-18) Ngako labanye bangatibuta, ‘Nangabe Jesu angazange abanike emathalenta, kufanele yini vele bashumayele?’ Yebo. Asesibone kutsi kungani.

12. Sifundzani emavini aJesu lakuMatewu 28:19, 20?

¹² Jesu wayala bonkhe bafundzi bakhe kutsi bashumayele. Ngemuva kwekuvuswa kwakhe, Jesu watjela balandzeli bakhe kutsi ‘bente bantfu babe bafundzi’ futsi babafundzise “konkhe” labebatjele kona. Ngako labafundzi nabo bekufanele bawulalele lomyalo waJesu wekushumayela. (Fundza Matewu 28:19, 20.) Kuyacaca kutsi sonkhe kufanele sishumayele, ngisho nobe sinelitsemba lekuphila ezulwini nobe emhlabeni.—Imisebenti 10:42.

13. Sifundzani embonweni lowabonwa nguJohane?

¹³ Incwadzi yeSembulo isitjela kutsi umsebenti wekushumayela bowutawentiwa ngulabagcotjiwe kanye nalabanye bantfu. Jesu wabonisa umphostoli Johane umbono ‘wamakoti’ lomema bantfu kutsi bete batewunatsa emanti lanika kuphila. Lomakoti umelela bantfu labagcotjiwe labangu-144 000 labatawubusa naJesu ezulwini. (Sembulo 14:1, 3; 22:17) Lamanti amelela umhlatjelo waJesu loyinhlawulo lotawusita bantfu kutsi bakhululeke esonweni nasekufeni. (Matewu 20:28; Johane 3:16; 1 Johane 4:9, 10) Labagcotjiwe bafundzisa bantfu ngekutimisela mayelana nenhlawulo nangekutsi bangazuza njani kuyo. (1 Khorinte 1:23) Lombono ukhuluma nangalelinye licembu lebantfu labangakagcotjwa kodvwa labanelitsemba lekuphila emhlabeni. Nabo bayalwa kutsi batjele labanye, batsi: “Kota!” Bayawulalela lomyalo ngekutsi batjele labanye ngetindzaba letimnandzi. Ngako lombono ukhombisa kutsi bonkhe labemukela tindzaba letimnandzi kufanele bashumayele kulabanye.

14. Singawulalela njani “umtsetfo waKhristu”?

¹⁴ Bonkhe labalalela “umtsetfo waKhristu” kufanele bashumayele. (Galathiya 6:2) Jehova ulindzele kutsi bonkhe labamkhontako balalele imitsetfo lefananako. Kadzeni, abelindzele kutsi ema-Israyeli kanye nebantfu bekuhamba lebebahlala nawo balalele imitsetfo yakhe. (Eksodusi 12:49; Levithikhusi 24:22) Kuliciniso kutsi lamuhla kute sidzingo sekutsi silalele yonkhe imitsetfo leyaniketwa ema-Israyeli. Esikhundleni saloko, ngisho sigcotjiwe  nobe cha, kufanele silalele “umtsetfo waKhristu.” Lokunye lokubaluleke kakhulu Jesu lasifundzisa kona kutsi sitsandzane. (Johane 13:35; Jakobe 2:8) Kufanele sitsandze Jehova, sitsandze Jesu kanye nalabanye bantfu. Indlela lehamba embili yekukhombisa lolutsandvo, kutsi sitjele bantfu ngetindzaba letimnandzi teMbuso.—Johane 15:10; Imisebenti 1:8.

15. Sisho ngani kutsi Jesu wayala bonkhe bafundzi bakhe kutsi bashumayele?

¹⁵ Ngaletinye tikhatsi, loko Jesu lakutjela bafundzi bakhe labambalwa kungasebenta nakubafundzi bakhe labanyenti. Nasi sibonelo: Jesu wenta sivumelwane nebafundzi bakhe labangu-11 futsi wabetsembisa kutsi batawubusa naye eMbusweni wakhe. Kodvwa bangu-144 000 bantfu labatawubusa naye. (Lukha 22:29, 30; Sembulo 5:10; 7:4-8) Ngemuva kwekuvuswa kwaJesu, bambalwa bafundzi labamuva nakakhipha umyalo wekushumayela. (Imisebenti 10:40-42; 1 Khorinte 15:6) Kodvwa bonkhe bafundzi bakhe bangelikhulu lekucala bawulalela lomyalo. (Imisebenti 8:4; 1 Phetro 1:8) Natsi lamuhla siyati kutsi kufanele sishumayele, ngisho nobe singazange sitivele matfupha ngesikhatsi Jesu akhuluma ngalomsebenti. Ecinisweni, batigidzi letisiphohlongo bantfu labenta lomsebenti wekushumayela. Siyati kutsi nasishumayela sisuke sikhombisa kutsi sinekukholwa sibili kuJesu.—Jakobe 2:18.

16-18. Singabasita njani ngekwetsembeka bomnakabo Khristu labagcotjiwe, futsi kungani loko kufanele sikwente nyalo?

¹⁶ Sathane uyachubeka nekulwa ngemandla nabomnakabo Khristu labagcotjiwe labasaphila emhlabeni, futsi uyati kutsi usalelwe ‘sikhatsi lesincane.’ (Sembulo 12:9, 12, 17) Kodvwa nangetulu kwekuhlasela kwaSathane, labagcotjiwe bayachubeka nekuhola umsebenti wekushumayela futsi nyalo sebanyenti kakhulu bantfu labeva tindzaba letimnandzi kunasesikhatsini lesendlulile. Kuyacaca kutsi Jesu uyabasekela labagcotjiwe futsi uyabacondzisa.—Matewu 28:20.

¹⁷ Sikutsatsa njengelilungelo lelikhulu kusita bomnakabo Khristu ngekwenta umsebenti wekushumayela. Siphindze sibasite ngekunikela ngemali, nangekusebenta ngekutimisela ekwakheni emaHholwa eMbuso, emaHholwa eMhlangano kanye nemahhovisi emagatja. Nasilalela labadzala belibandla nalabanye bazalwane lababekwe ‘sisebenti lesetsembekile nalesihlakaniphile,’ sisuke sikhombisa kutsi siyafuna kubasita bomnakabo Khristu.—Matewu 24:45-47; Hebheru 13:17.

¹⁸ Ngekushesha nje, insali yalabagcotjiwe itawubekwa luphawu lwekugcina. Ngemuva kwaloko tingilosi titawukhulula “imimoya lemine yemhlaba,” bese kucala kuhlupheka lokukhulu. (Sembulo 7:1-3) Ngaphambi kwekucala kwe-Amagedoni, Jesu utawutsatsa labagcotjiwe baye ezulwini. (Matewu 13:41-43) Ngako-ke, nangabe sifuna kutsatfwa njengetimvu nakufika Jesu, nyalo sikhatsi sekutsi setsembeke kubomnakabo Khristu labagcotjiwe.