Sicongosekulindza saSeptember 15, 1950, sachaza kutsi ngaletinye tikhatsi umuntfu lotsite, intfo leyentekile nobe intfo lokukhulunywa ngayo eBhayibhelini, imelela lokutsite lokubalulekile lokutawenteka esikhatsini lesitako.

Esikhatsini lesendlulile, tincwadzi tetfu tatsi emadvodza nebafati labetsembekile labafaka ekhatsi boDebora, Elihu, Jeftha, Jobe, Rahabi, Rebheka, nalabanye labanyenti bebamelela labagcotjiwe nobe “sicumbi lesikhulu.” (Sembulo 7:9) Sibonelo saloko kutsi besitsi boJeftha, Jobe, naRebheka bamelela labagcotjiwe, futsi satsi Debora naRahabi bamelela sicumbi lesikhulu. Kodvwa eminyakeni yakamuva, asisakusho loko. Kungani kunjalo?

ImiBhalo iyasho kutsi labanye bantfu lokukhulunywa ngabo eBhayibhelini bamelela umuntfu lotsite nobe intfo letsite lebalulekile letawenteka esikhatsini lesitako. Nasi sibonelo: KuGalathiya 4:21-31, umphostoli Pawula wakhuluma ‘ngendzaba lengumfanekiso’ lemayelana nebafati lababili. Umfati wekucala nguHagari, lobekasigcilakati sa-Abrahama. Pawula wachaza kutsi Hagari umelela sive sema-Israyeli, lebesitinikele kuJehova ngaphansi kweMtsetfo waMosi. Umfati wesibili nguSara umka-Abrahama, ‘lobekangumfati lokhululekile.’ Bekamelela umfati waNkulunkulu, lokuluhlangotsi lwasezulwini lwenhlangano yaNkulunkulu. Pawula waphindze wakhuluma ngekufana lokukhona emkhatsini waJesu kanye naMelkhisedeki lobekayinkhosi aphindze abe ngumphristi. (Hebheru 6:20; 7:1-3) Ngetulu kwaloko, Pawula wafanisa Jesu nemphrofethi Isaya, emadvodzana a-Isaya wawafanisa nemaKhristu lagcotjiwe. (Hebheru 2:13, 14) NguJehova lowaphefumulela Pawula kutsi abhale loku, ngako singaciniseka kutsi letindzaba letingumfanekiso kanye naloko letikumelelako kuliciniso.

Nanobe kunjalo, ngisho nalapho liBhayibheli litsi umuntfu umelela intfo letsite, akukafaneli  sicabange kutsi yonkhe intfo leyenteka ekuphileni kwakhe imelela lokutsite lokubalulekile lokutawenteka esikhatsini lesitako. Nasi sibonelo: Pawula watsi Melkhisedeki umelela Jesu. Kodvwa akazange akhulume ngalesikhatsi Melkhisedeki aniketa Abrahama sinkhwa neliwayini ngemuva kwekuncoba emakhosi lamane. Ngako-ke, kute sizatfu lesisemBhalweni sekufuna inchazelo lefihlekile kuloko lokwenteka.—Genesisi 14:1, 18.

Labanye babhali lebebabhala emakhulwini eminyaka ngemuva kwekufa kwaKhristu benta liphutsa lelikhulu. Bebatsi cishe tonkhe tindzaba letiseBhayibhelini timelela lokutsite. I-“The International Standard Bible Encyclopaedia” yakhuluma ngetimfundziso ta-Origen, Ambrose, naJerome, yatsi: “Bebafuna tindzaba letingumfanekiso ngisho nome titincane kangakanani, futsi bagcine batitfolile kuko konkhe lokusemiBhalweni. Bekucatjangwa kutsi ngisho nendzaba lemelula futsi leyetayelekile inemaciniso lajulile [lafihlekile] . . . , kangangekutsi kunyenti bantfu labetame kukusho ngelinani letinhlanti letabanjwa bafundzi ngebusuku uMsindzisi wabo labonakala ngabo kubo, lokutinhlanti letingu-153!”

Lomunye umbhali lokutsiwa ngu-Augustine waseHippo, watsi indzaba leseBhayibhelini lemayelana naJesu ngesikhatsi ondla emadvodza langu-5 000 ngetinkhwa letisihlanu tebhali netinhlanti letimbili imelela lokutsite. Watsi letinkhwa letisihlanu tebhali timelela tincwadzi tekucala letisihlanu eBhayibhelini. Watsi njengobe ibhali beyibukeleka phansi kunakolo, loko bekusho kutsi “Lithestamente Lelidzala” belibukeleka phansi “kuneLithestamente Lelisha.” Waphindze watsi letinhlanti letimbili timelela inkhosi nemphristi. Lesinye sati satsi sento saJakobe sekutsenga butibulo ku-Esawu ngesitjulo lesibovu, besimelela kutsi Jesu watsengela bantfu litsemba lekuphila ezulwini ngengati yakhe lebovu!

Nangabe ukutfola kumatima kucondza letinchazelo, kungenteka uyabona kutsi inkinga ikuphi. Bantfu ngeke bakhone kwati kutsi ngutiphi tindzaba letiseBhayibhelini letimelela lokutsite lokubalulekile. Ngako-ke, yini lokukuhlakanipha kuyenta? Nangabe imiBhalo ifundzisa kutsi umuntfu lotsite, intfo leyentekile nobe intfo letsite imelela lokubalulekile lokutawenteka esikhatsini lesitako, siyayemukela leyo nchazelo. Kodvwa akukafaneli sitsi indzaba leseBhayibhelini imelela lokutsite nangabe kute sizatfu lesisekelwa yimiBhalo sekusho njalo.

Singazuza njani-ke etindzabeni letiseBhayibhelini kanye nemininingwane lesiyifundza kulo? Umphostoli Pawula wabhala watsi: “Tonkhe tintfo letabhalwa kadzeni tabhalelwa kufundzisa tsine, kuze kutsi ngekucinisela kwetfu nangendvudvuto lesiyitfola emiBhalweni sitewuba nelitsemba.” (Roma 15:4) Pawula abebhalela emaKhristu lagcotjiwe angelikhulu lekucala, awatjela indlela langazuza ngayo etindzabeni letiseBhayibhelini. Kodvwa kusukela ngaleso sikhatsi, onkhe emaKhristu, lokufaka ekhatsi ‘letinye timvu’ asitakele kuletifundvo letitfolakala emiBhalweni.—Johane 10:16; 2 Thimothi 3:1.

Ngako-ke, tindzaba letinyenti letiseBhayibhelini atisebenti kulabagcotjiwe kuphela, ‘kuletinye timvu’ nobe kumaKhristu labephila ngesikhatsi lesitsite. Esikhundleni saloko, letindzaba tisite tonkhe tinceku taNkulunkulu takadzeni netalamuhla. Sibonelo saloku kutsi kuhlupheka kwaJobe akumeleli nje kuphela kuhlupheka labagcotjiwe lababhekana nako ngeMphi Yelive Yekucala. Bantfu baNkulunkulu labanyenti, kungaba ngemadvodza nebafati, labagcotjiwe ‘naletinye timvu,’ bahlangabetene nekuhlupheka njengaJobe futsi basitakele ngekufundza indzaba yakhe. ‘Bawubonile umphumela Jehova lawuletsile, ngaloku babona kutsi Jehova unelutsandvo lolukhulu kanye nemusa.’—Jakobe 5:11.

Emabandleni etfu lamuhla, sinabodzadze labakhulile futsi labetsembekile njengaDebora, nalabadzala belibandla labasebasha futsi labahlakaniphile njenga-Elihu. Siphindze sibe nemahlahlandlela lakhutsele nalanesibindzi njengaJeftha, kanye nemadvodza nebafati labetsembekile futsi lababeketelako njengaJobe. Simbonga kakhulu Jehova ngekutsi aciniseke kutsi “tonkhe tintfo letabhalwa kadzeni” siyakhona kutitfola lamuhla, kuze ‘ngendvudvuto lesiyitfola emiBhalweni sitewuba nelitsemba.’

Ngako-ke, ngenca yaletizatfu lesesikhulume ngato, asetami kufuna tinchazelo letingumfanekiso kuto tonkhe tindzaba letiseBhayibhelini nobe kufuna kwati kutsi titawugcwaliseka njani esikhatsini lesitako. Kunaloko, nyalo tincwadzi tetfu tisifundzisa kakhulu ngetifundvo letibalulekile letitfolakala emiBhalweni.