1. Kungani kufanele sigcine buhlobo betfu naJehova bucinile?

NANGABE unguFakazi WaJehova lobhajatisiwe, unalokutsite lokuligugu kakhulu. Unebuhlobo naJehova. Kodvwa lobo buhlobo buhlaselwa live laSathane futsi bungaphatanyiswa butsakatsaka betfu. Kungako-ke sonkhe kufanele sigcine buhlobo betfu naJehova bucinile.

2. (a) Buyini buhlobo? (Fundza umbhalo longentansi.) (b) Yini lesingayenta kuze buhlobo betfu naJehova bucine kakhulu?

² Jehova umtsatsa njengemuntfu mbamba yini? Umtsatsa njengeMngani wakho yini? Ungatsandza yini kutsi buhlobo bakho naye bucine kakhulu? Jakobe 4:8 ukutjela loko lokufanele ukwente nawutsi: “Sondzelani kuNkulunkulu, naye utawusondzela kini.” Buhlobo bakho naJehova butsintsa wena kanye naye. * (Fundza umbhalo longentansi.) Nawutsatsa tinyatselo tekusondzela kuJehova, naye utawusondzela  kuwe. Nawuchubeka wenta njalo, Jehova utawuba ngumuntfu mbamba kuwe futsi buhlobo benu butawucina kakhulu kangangekutsi utawutiva ngendlela Jesu labetiva ngayo ngesikhatsi atsi: “Loyo lowangitfuma ukhona mbamba” nanakatsi: “Mine ngiyamati.” (Johane 7:28, 29) Kodvwa ngutiphi letinye tintfo longatenta kute usondzelane naJehova?

3. Singakhulumisana njani naJehova?

³ Nawufuna kusondzelana naJehova, kubaluleke kakhulu kutsi nihlale nikhulumisana. Kodvwa loko kungenteka njani? Cabanga ngendlela longakhulumisana ngayo nemngani wakho lohlala khashane. Ningahlale nibhalelana tincwadzi futsi nikhulume ngelucingo. Ungakhuluma naJehova ngekuthantaza kuye njalo. (Fundza Tihlabelelo 142:2.) Kodvwa ungamvumela njani Jehova kutsi akhulume nawe? Loko ungakwenta ngekuhlale ufundza liVi lakhe liBhayibheli, futsi uzindla ngalo. (Fundza Isaya 30:20, 21.) Asesibone kutsi kukhulumisana lokuba khona emkhatsini wakho naJehova kungabucinisa njani buhlobo benu futsi bumente abe nguMngani wakho sibili.

4, 5. Jehova ukhuluma njani nawe nawutadisha liBhayibheli? Niketa sibonelo.

⁴ Siyati kutsi liBhayibheli linemlayeto waNkulunkulu lobhalelwe bonkhe bantfu. Kodvwa lingakusita yini wena kutsi usondzelane naJehova? Yebo lingakusita. Njengobe ufundza liBhayibheli futsi ulitadisha njalo, naka indlela lotiva ngayo ngaloko lokufundzako. Cabanga nangekutsi ungakusebentisa njani loko lokufundzako. Nawenta njalo, usuke uvumela Jehova kutsi akhulume nawe. Ngaleyo ndlela, Jehova uba nguMngani wakho lomkhulu nalokusitako, futsi loku kukwenta usondzelane naye.—Hebheru 4:12; Jakobe 1:23-25.

⁵ Nasi sibonelo: Utiva njani nawufundza emavi aJesu latsi: “Ningatibekeli umcebo emhlabeni”? Nangabe wenta konkhe lokusemandleni akho kute Jehova ete kucala ekuphileni kwakho, utawubona kutsi uyajabula ngawe. Kodvwa kungenteka nawufundza lamavi ubone kutsi kudzingeka wente kuphila kwakho kube melula futsi unake  kakhulu umsebenti lowentela Nkulunkulu. Nangabe kunjalo, Jehova usuke akusita kutsi ucondze loko longakwenta kuze usondzelane naye.—Matewu 6:19, 20.

6, 7. (a) Kutadisha liBhayibheli kulutsintsa njani lutsandvo lwetfu ngaJehova nelutsandvo lanalo ngatsi? (b) Kufanele ube yini umgomo wetfu loyinhloko nasitadisha liBhayibheli?

⁶ Kuliciniso kutsi nasitadisha liBhayibheli, sifundza ngelushintjo lesingalwenta kute sikhonte Jehova ngendlela lencono kakhulu. Kodvwa siphindze sifundze ngetintfo latentako letiveta lutsandvo kanye nangebunguye bakhe lobuhle, lokusenta simtsandze kakhulu. Njengobe lutsandvo lwetfu ngaye lukhula, nelutsandvo lanalo ngatsi luyakhula futsi buhlobo betfu naye bucina kakhulu.—Fundza 1 Khorinte 8:3.

⁷ Nangabe sifuna kusondzelana naJehova kubalulekile kutsi sitadishe liBhayibheli ngenjongo lefanele. Jesu watsi: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.” (Johane 17:3) Nasifundza liBhayibheli singatfola tintfo letinyenti letinsha naletijabulisako, kodvwa umgomo wetfu loyinhloko kufanele ube kumati kahle Jehova nekumtsatsa njengeMuntfu mbamba.—Fundza Eksodusi 33:13; Tihlabelelo 25:4.

8. (a) Labanye bangase bacabangeni mayelana naloko Jehova lakwenta eNkhosini Azariya? (b) Nangabe umati Jehova, utawutiva njani ngaloko lakwentako?

⁸ Nasitsatsa Jehova njengeMngani wetfu lomkhulu, ngeke sikhatsateke nangabe liBhayibheli lihle lingachazi kutsi kungani ente tintfo ngendlela letsite. Nasi sibonelo: Ngesikhatsi Azariya ayinkhosi yakaJuda, bantfu bebakhonta bonkulunkulu bemanga. Kodvwa Azariya akazange ente njalo. “Wenta lokuhle emehlweni aSimakadze.” (2 Emakhosi 15:1-5) Nanobe kunjalo, Jehova wamshaya ngesifo sebulephelo. Ngasiphi sizatfu? Lokulandzisa akusitjeli lutfo. Utiva njani-ke ngaloko Jehova lakwenta? Kukwenta ukhatsateke yini futsi ubone shengatsi Jehova akakalungi nekutsi wajezisa Azariya ngaphandle kwesizatfu? Cha. Nangabe umati kahle Jehova, uyati kutsi siyalo sakhe sihlale silungile. Uhlale asiyala ‘ngelizinga lelifanele.’ (Jeremiya 30:11, NW.) Ngako-ke, ngisho nome ungati kutsi kungani Jehova ajezisa Azariya, ungaciniseka kutsi loko lakwenta kulungile.

9. Ngumiphi imininingwane lesisita sicondze kutsi kungani Jehova ashaya Azariya ngebulephelo?

⁹ LiBhayibheli lisiniketa leminye imininingwane mayelana nekuphila kweNkhosi Azariya, lebeyatiwa nangekutsi yiNkhosi Uziya. (2 Emakhosi 15:7, 32) Kulandzisa lokuku-2 Tikhronike 26:3-5, 16-21 kutsi lenkhosi yenta “lokuhle emehlweni aSimakadze.” Kodvwa kuphindze kusitjele kutsi ngekuhamba kwesikhatsi ‘kutiphakamisa kwayo kwayidvonsela ekuweni.’ Lenkhosi yetama kwenta lokutsite lebekubaphristi kuphela lebebavumeleke kukwenta. Baphristi labangemashumi lasiphohlongo nakunye bayitjela kutsi yenta intfo lengakalungi futsi betama kuyivimba. Yenta njani lenkhosi? Beseyitiphakamisa kakhulu kangangekutsi yabatfukutselela! Lemininingwane isisita sicondze kutsi kungani Jehova ashaya lenkhosi ngebulephelo.

10. Kungani singadzingi kwati tizatfu tako konkhe Jehova lakwentako? Yini lesingayenta kuze setsembe kutsi Jehova uhlale enta lokulungile?

 ¹⁰ Ngusiphi sifundvo lesibalulekile lesisifundzako? Endzabeni yeNkhosi Azariya, siniketwe imininingwane leyenele kute sicondze kutsi kungani Jehova ayijezisa lenkhosi. Kodvwa utawenta njani nangabe liBhayibheli lingasitjeli yonkhe imininingwane ngendzaba letsite? Kungakwenta yini loko utibute kutsi Jehova wente lokulungile? Nobe utawubona yini kutsi liBhayibheli likunikete kwatiswa lokwenele kuze wetsembe kutsi Nkulunkulu uhlale enta lokulungile? (Dutheronomi 32:4) Nawuchubeka wati Jehova futsi umtsatsa njengeMuntfu mbamba, utamtsandza kakhulu futsi umetsembe. Ngaleyo ndlela ngeke udzinge kwati tizatfu tako konkhe lakwentako. Njengobe utadisha liBhayibheli, Jehova utawuba nguMuntfu mbamba kuwe futsi utawusondzelana naye.—Tihlabelelo 77:12, 13.

11-13. Wati njani kutsi Jehova uyayilalela imithantazo? (Buka sitfombe lesisekucaleni kwalesihloko.)

¹¹ Nasithantaza, sisondzela kuJehova. Siyamdvumisa, simbonge futsi sicele lusito. (Tihlabelelo 32:8) Kodvwa nangabe ufuna kuba ngumngani lomkhulu waJehova, kufanele uciniseke kutsi uyayilalela imithantazo.

¹² Labanye bantfu batsi Nkulunkulu akayilaleli imithantazo, futsi batsi kuthantaza kumane nje kukwente utive uncono. Bakholelwa kutsi kuthantaza kumane kukusite kutsi ucabangisise ngetinkinga takho futsi utitfolele sisombululo.  Kuliciniso kutsi umthantazo ungase ukusite kuloku. Kodvwa nawuthantaza, Jehova ukulalela mbamba. Ungaciniseka njani ngaloko?

¹³ Cabanga nganaku: Ngaphambi kwekutsi Jesu ete emhlabeni, wabona kutsi Jehova uyayiphendvula imithantazo yetinceku taKhe. Ngesikhatsi asemhlabeni, Jesu wathantaza kuYise wasezulwini amtjela imicabango yakhe nendlela labetiva ngayo. Ngalesinye sikhatsi, waze wathantaza busuku bonkhe. (Lukha 6:12; 22:40-46) Abengakwenta yini loko kube bekacabanga kutsi Jehova akamlaleli? Jesu waphindze wafundzisa balandzeli bakhe indlela yekuthantaza kuJehova. Abengakwenta yini loko nangabe abecabanga kutsi Jehova akayilaleli imithantazo? Kuyacaca-ke kutsi Jesu bekati kutsi Jehova uyilalela mbamba imithantazo. Waze watsi: “Babe, ngiyabonga ngekutsi ungivile. Ngiyati kutsi uhlale ungiva.” Natsi singaciniseka kutsi Jehova uyayilalela imithantazo yetfu.—Johane 11:41, 42; Tihlabelelo 65:2.

14, 15. (a) Sizuza njani nasicela tintfo leticondzile emithantazweni yetfu? (b) Imithantazo yaKathy imsite njani kutsi asondzelane naJehova?

¹⁴ Ngaletinye tikhatsi kungenteka ungayiboni ngalokucacile imphendvulo yemithantazo yakho. Kodvwa nangabe ucela tintfo leticondzile emithantazweni yakho, utayibona ngalokucacile imphendvulo yaJehova futsi utawuba ngumuntfu mbamba kuwe. Nangabe umtjela tonkhe tintfo letikukhatsatako, Jehova utawusondzela kuwe.

¹⁵ Nasi sibonelo: Kathy abevame kuya ensimini kodvwa abengayijabuleli. * (Fundza umbhalo longentansi.) Watsi: “Bengingawutsandzi  mbamba umsebenti wekushumayela.” Ngesikhatsi atsatsa umhlalaphansi, umzalwane longulomdzala wamkhutsata kutsi abe lihlahlandlela lelivamile. Kathy utsi: “Waze wanginika nelifomu. Ngakhetsa kuba lihlahlandlela futsi ngacala kuthantaza onkhe malanga ngicela Jehova kutsi angente ngikutsandze kushumayela.” Jehova wayiphendvula yini imithantazo yakhe? Ngemuva kwekuba lihlahlandlela iminyaka lemitsatfu, Kathy watsi: “Ngesizatfu sekucitsa sikhatsi lesinyenti ngisemsebentini wekushumayela futsi ngifundza kulabanye bodzadze, likhono lami lekushumayela litfutfuke kancane kancane. Lamuhla angigcini nje ngekukujabulela kushumayela, kodvwa ngiyakutsandza. Ngetulu kwako konkhe, buhlobo bami naJehova sebucine kakhulu kunasekucaleni.” Imithantazo yaKathy yamsita kutsi asondzelane naJehova.

16, 17. (a) Yini lokufanele siyente kute sichubeke sicinisa buhlobo betfu naJehova? (b) Yini lesitawucoca ngayo esihlokweni lesilandzelako?

¹⁶ Singachubeka sisondzelana naJehova kuze kube phakadze. Ngako asichubekeni simlalela ngekutsi sitadishe liBhayibheli njalo, futsi sichubeke nekukhuluma naye ngemthantazo. Nasenta njalo, buhlobo betfu naJehova butawuchubeka bucina futsi utasisita kutsi sibeketelele kuvivinywa.

¹⁷ Kodvwa ngalesinye sikhatsi silwisana netinkinga tetfu ngisho nobe sichubeka nekuthantaza kuJehova. Etikhatsini letinjalo, singacala kungasametsembi Jehova. Singabona shengatsi Jehova akayilaleli imithantazo yetfu futsi sitibute kutsi sibangani bakhe mbamba yini. Yini longayenta nawucala kutiva ngalendlela? Sihloko lesilandzelako sitawucoca ngalendzaba.